شاعر کی معلومات لوڈ ہو رہی ہیں...
اپنی آگ کو زندہ رکھنا کتنا مشکل ہے
پتھر بیچ آئینہ رکھنا کتنا مشکل ہے
شاعر کی معلومات لوڈ ہو رہی ہیں...
Ishrat Afreen
1956 – حال
Ishrat Aafreen is one of the most prominent female poets from Pakistan. She is well-known for her feminist themes in poetry and her activism for women’s rights. She was born on December 25, 1956, into an educated family in Karachi. She earned her Master’s degree in Urdu literature from the University of Karachi. Ishrat Aafreen began writing at a young age, and her work started getting published when she was just 14 years old. Her poetic journey continued to flourish from there. So far, she has published two poetry collections: Kunj Peelay Phoolon Ka Dhoop Apne Hissay Ki
ان کے کلام کے چند منتخب اشعار پڑھیے۔
اپنی آگ کو زندہ رکھنا کتنا مشکل ہے
پتھر بیچ آئینہ رکھنا کتنا مشکل ہے
کتنا آساں ہے تصویر بنانا اوروں کی
خود کو پس آئینہ رکھنا کتنا مشکل ہے
آنگن سے دہلیز تلک جب رشتہ صدیوں کا
جوگی تجھ کو ٹھہرا رکھنا کتنا مشکل ہے
دوپہروں کے زرد کواڑوں کی زنجیر سے پوچھ
یادوں کو آوارہ رکھنا کتنا مشکل ہے
چلو میں ہو درد کا دریا دھیان میں اس کے ہونٹ
یوں بھی خود کو پیاسا رکھنا کتنا مشکل ہے
تم نے معبد دیکھے ہوں گے یہ آنگن ہے یہاں
ایک چراغ بھی جلتا رکھنا کتنا مشکل ہے
داسی جانے ٹوٹے پھوٹے گیتوں کا یہ دان
سمے کے چرنوں میں لا رکھنا کتنا مشکل ہے
اپنی آگ کو زندہ رکھنا کتنا مشکل ہے
پتھر بیچ آئینہ رکھنا کتنا مشکل ہے
کتنا آساں ہے تصویر بنانا اوروں کی
خود کو پس آئینہ رکھنا کتنا مشکل ہے
آنگن سے دہلیز تلک جب رشتہ صدیوں کا
جوگی تجھ کو ٹھہرا رکھنا کتنا مشکل ہے
دوپہروں کے زرد کواڑوں کی زنجیر سے پوچھ
یادوں کو آوارہ رکھنا کتنا مشکل ہے
چلو میں ہو درد کا دریا دھیان میں اس کے ہونٹ
یوں بھی خود کو پیاسا رکھنا کتنا مشکل ہے
تم نے معبد دیکھے ہوں گے یہ آنگن ہے یہاں
ایک چراغ بھی جلتا رکھنا کتنا مشکل ہے
داسی جانے ٹوٹے پھوٹے گیتوں کا یہ دان
سمے کے چرنوں میں لا رکھنا کتنا مشکل ہے
اپنی آگ کو زندہ رکھنا کتنا مشکل ہے
پتھر بیچ آئینہ رکھنا کتنا مشکل ہے
کتنا آساں ہے تصویر بنانا اوروں کی
خود کو پس آئینہ رکھنا کتنا مشکل ہے
آنگن سے دہلیز تلک جب رشتہ صدیوں کا
جوگی تجھ کو ٹھہرا رکھنا کتنا مشکل ہے
دوپہروں کے زرد کواڑوں کی زنجیر سے پوچھ
یادوں کو آوارہ رکھنا کتنا مشکل ہے
چلو میں ہو درد کا دریا دھیان میں اس کے ہونٹ
یوں بھی خود کو پیاسا رکھنا کتنا مشکل ہے
تم نے معبد دیکھے ہوں گے یہ آنگن ہے یہاں
ایک چراغ بھی جلتا رکھنا کتنا مشکل ہے
داسی جانے ٹوٹے پھوٹے گیتوں کا یہ دان
سمے کے چرنوں میں لا رکھنا کتنا مشکل ہے
وحشت سی وحشت ہوتی ہے
زندہ ہوں حیرت ہوتی ہے
جل بجھنے والوں سے پوچھو
غم کی کیا حدت ہوتی ہے
رہن نہ رکھ دینا بینائی
اس کی بھی مدت ہوتی ہے
سارے قرض چکا دینے کی
کبھی کبھی عجلت ہوتی ہے
دل اور جان کے سودے جو ہیں
ان میں کب حجت ہوتی ہے
خود سے جھوٹ کہاں تک بولیں
تھوڑی سی خفت ہوتی ہے
اپنے آپ سے ملنے میں بھی
اب کتنی دقت ہوتی ہے
خود سے باتیں کرنے کی بھی
اب کس کو فرصت ہوتی ہے
کچھ کہہ لو روکھی سوکھی میں
اپنے ہاں برکت ہوتی ہے
سونا سی مٹی کے گھر میں
کب ہم سے محنت ہوتی ہے
دھان ہمارے چڑیا کھائیں
چڑیوں کو عادت ہوتی ہوتی ہے
بچوں سے کیا شکوہ کرنا
مٹی میں الفت ہوتی ہے
سبز کواڑوں کی جھریوں میں
جگنو یا حیرت ہوتی ہے
ٹاٹ کے مٹ میلے پردوں میں
کیا اجلی رنگت ہوتی ہے
پھٹی پرانی سی چنری میں
کیا بھولی صورت ہوتی ہے
چاول کی پیلی روٹی میں
کیا سوندھی لذت ہوتی ہے
رلی کے ایک اک ٹانکے میں
پوروں کی چاہت ہوتی ہے
جاڑے اوڑھ کے سو جانے میں
کب کوئی زحمت ہوتی ہے
شام کو تیرا ہنس کر ملنا
دن بھر کی اجرت ہوتی ہے
ہوائیں جب گھنٹیاں بجائیں تو لوٹ آنا
کسی کی آنکھیں دئے جلائیں تو لوٹ آنا
بہت دنوں تک یہ موسم گل نہیں رہے گا
جو شاخ جاں پر گلاب آئیں تو لوٹ آنا
ہوا درختوں سے جب گلے مل کے رو رہی ہو
پرند لمبے سفر پہ جائیں تو لوٹ آنا
جو ضد پہ آ جائے دل تو اس کی بھی مان لینا
پرانی یادیں بہت ستائیں تو لوٹ آنا
فراق کی آگ چاٹ جاتی ہے جسم و جاں کو
جو سن سکو وقت کی صدائیں تو لوٹ آنا
یہ نازک سی مرے اندر کی لڑکی
عجب جذبے عجب تیور کی لڑکی
یوں ہی زخمی نہیں ہیں ہاتھ میرے
تراشی میں نے اک پتھر کی لڑکی
کھڑی ہے فکر کے آذر کدے میں
بریدہ دست پھر آذر کی لڑکی
انا کھوئی تو کڑھ کر مر گئی وہ
بڑی حساس تھی اندر کی لڑکی
سزاوار ہنر مجھ کو نہ ٹھہرا
یہ فن میرا نہ میں آذر کی لڑکی
بکھر کر شیشہ شیشہ ریزہ ریزہ
سمٹ کر پھول سے پیکر کی لڑکی
حویلی کے مکیں تو چاہتے تھے
کہ گھر ہی میں رہے یہ گھر کی لڑکی
یوں ہی کسی کے دھیان میں اپنے آپ میں گاتی دوپہریں
نرم گلابی جاڑوں والی بال سکھاتی دوپہریں
سارے گھر میں شام ڈھلے تک کھیل وہ دھوپ اور چھاؤں کا
لپے پتے کچے آنگن میں لوٹ لگاتی دوپہریں
جیون ڈور کے پیچھے حیراں بھاگتی ٹولی بچوں کی
گلیوں گلیوں ننگے پاؤں دھول اڑاتی دوپہریں
سرگوشی کرتے پردے کنڈی کھٹکاتا نٹ کھٹ دن
دبے دبے قدموں سے تپتی چھت پر جاتی دوپہریں
کمرے میں حیران کھڑے آئینہ جیسے ہنستے دن
خود سے لڑ کر گوریا سی شور مچاتی دوپہریں
وہی مضافاتوں کے بھید بھرے سناٹوں والے گھر
گڑیوں کے لب سی کر ان کا بیاہ رچاتی دوپہریں
کھڑکی کے ٹوٹے شیشوں پر ایک کہانی لکھتی ہیں
منڈھے ہوئے پیلے کاغذ سے چھن کر آتی دوپہریں
نیم تلے وہ کچے دھاگے رنگتی ہوئی پرانی یاد
گھیرا ڈالے چھوٹی چھوٹی ہاتھ بٹاتی دوپہریں
پھٹی پرانی کتھری اوڑھے دھوپ سینکتے بوڑھے دن
پیشانی تک پلو کھینچے چلم بناتی دوپہریں
پانی کی تقسیم کے پیچھے جلتے کھیت سلگتے گھر
اور کھیتوں کی زرد منڈیروں پر کمھلاتی دوپہریں
پروائی سے لڑتے کتنے ورق پرانی یادوں کے
سوغاتوں کے صندوقوں کو دھوپ دکھاتی دوپہریں
دکھتی آنکھیں زخمی پوریں الجھے دھاگوں جیسے دن
بادل جیسی اوڑھنیوں پر پھول کھلاتی دوپہریں
اوڑھنیوں کے اڑتے بادل رنگوں کے بازاروں میں
چوڑی کی دوکانوں سے وہ ہمیں بلاتی دوپہریں
سنتے ہیں اب ان گلیوں میں پھول شرارے کھلتے ہیں
خون کی ہولی کھیل رہی ہیں رنگ نہاتی دوپہریں
یہ تو میرے خواب نہیں ہیں یہ تو میرا شہر نہیں
کس جانب سے آ نکلی ہیں یہ گہناتی دوپہریں
تم سے بھی بات چیت ہو دل سے بھی گفتگو رہے
خواب و خبر کا سلسلہ یونہی کبھو کبھو رہے
درد بھی ہاتھ تھام لے زخم بھی بولنے لگیں
یعنی نہال شاخ غم ایسے ہی با نمو رہے
عشق میں احتیاط ہی گویا ہے پاس وضع عشق
چاک ہوں صد ہزار اور دامن دل رفو رہے
تو جو نہیں تو میں نہیں میں جو نہیں تو تو کہاں
دونوں طرح تھی بات ایک میں رہوں یا کہ تو رہے
اور متاع جان و دل کچھ بھی نہ مجھ کو چاہئے
سینے میں اک چراغ سا آنکھ میں اک لہو رہے
ایک چراغ ہنس پڑا طاق میں احتیاط سے
اور ہوا سہم گئی پھول کی آبرو رہے
ایک لکیر رو پڑی دونوں ہتھیلیوں کے بیچ
رنگ حنا چھپا گیا ہاتھ لہو لہو رہے
پرانے محلے کا سنسان آنگن
مجھے پا کے تھا کتنا حیران آنگن
یہ تہذیب کو پاؤں چلنا سکھائیں
سمیٹے ہیں صدیوں کے امکان آنگن
وہ دیوار سے جھانکتی شوخ آنکھیں
وہ پہرے پہ بوڑھا نگہبان آنگن
کوئی جست میں پار کرتا ہے چوکھٹ
کسی کے لئے اک بیابان آنگن
کسی کے لئے پایۂ تخت ہے یہ
کسی کے لئے ایک زندان آنگن
سنا رفتہ رفتہ کھنڈر ہو رہے ہیں
وہ آباد گلیاں وہ گنجان آنگن
کدھر جائیں تہذیب کی ہجرتوں میں
یہ بوڑھے درخت اور یہ ویران آنگن
میں پھول پھول سفر کر رہی تھی خوابوں کا
پھوار لائی تھی تحفہ نئے گلابوں کا
ملے تو قرب کا وہ اعتماد ہی نہ رہا
بھلا تھا اس سے تو موسم وہی حجابوں کا
وہ زخم چن کے مرے خار مجھ میں چھوڑ گیا
کہ اس کو شوق تھا بے انتہا گلابوں کا
وہ جنگلوں سے نکالے ہوئے غریب پرند
جہاں گئے انہیں مسکن ملا عقابوں کا
ہر ایک پوچھتا پھرتا ہے پھر نہ کچھ تعبیر
کہ جیسے شہر میں میلا تھا رات خوابوں کا
میں جو بھی کچھ ہوں یہ سچائی میری اپنی ہے
تمام جھوٹ تھا لکھا ہوا کتابوں کا
میں اپنے عذاب لکھ رہی تھی
زخموں کا حساب لکھ رہی تھی
پھولوں کی زباں کی شاعرہ تھی
کانٹوں سے گلاب لکھ رہی تھی
اس پیڑ کے کھوکھلے تنے پر
اک عمر کے خواب لکھ رہی تھی
آنکھوں سے سوال پڑھ رہی تھی
پلکوں سے جواب لکھ رہی تھی
ہر بوند شکستہ بام و در پر
بارش کا عتاب لکھ رہی تھی
اک نسل کے خواب کے لہو سے
اک نسل کے خواب لکھ رہی تھی
پھولوں میں ڈھلی ہوئی یہ لڑکی
پتھر پہ کتاب لکھ رہی تھی
لڑکیاں ماؤں جیسے مقدر کیوں رکھتی ہیں
تن صحرا اور آنکھ سمندر کیوں رکھتی ہیں
عورتیں اپنے دکھ کی وراثت کس کو دیں گی
صندوقوں میں بند یہ زیور کیوں رکھتی ہیں
وہ جو آپ ہی پوجی جانے کے لائق تھیں
چمپا سی پوروں میں پتھر کیوں رکھتی ہیں
وہ جو رہی ہیں خالی پیٹ اور ننگے پاؤں
بچا بچا کر سر کی چادر کیوں رکھتی ہیں
بند حویلی میں جو سانحے ہو جاتے ہیں
ان کی خبر دیواریں اکثر کیوں رکھتی ہیں
صبح وصال کی کرنیں ہم سے پوچھ رہی ہیں
راتیں اپنے ہاتھ میں خنجر کیوں رکھتی ہیں
دل ہے یا میلے میں کھویا ہوا بچہ کوئی
جس کو بہلا نہیں سکتا ہے کھلونا کوئی
میں تو جلتے ہوئے زخموں کے تلے رہتی ہوں
تو نے دیکھا ہے کبھی دھوپ کا صحرا کوئی
میں لہو ہوں تو کوئی اور بھی زخمی ہوگا
اپنی دہلیز پہ پھینکو تو نہ شیشہ کوئی
خواہشیں دل میں مچل کر یونہی سو جاتی ہیں
جیسے انگنائی میں روتا ہوا بچہ کوئی
زائچے تو نے امیدوں کے بنائے تھے مگر
مٹ گئے حرف گرا آنکھوں سے قطرہ کوئی
چاندنی جب بھی اترتی ہے مرے آنگن میں
کھولتا ہے تری یادوں کا دریچہ کوئی
میرا گھر جس کے در و بام بھی مہمان سے تھے
کاش اس اجڑے ہوئے گھر میں نہ آتا کوئی
دل کوئی پھول نہیں ہے کہ اگر توڑ دیا
شاخ پر اس سے بھی کھل جائے گا اچھا کوئی
تم بھرے شہر میں افکار لیے پھرتے ہو
سب تو مفلس ہیں خریدے گا یہاں کیا کوئی
رات تنہائی کے میلے میں مرے ساتھ تھا وہ
ورنہ یوں گھر سے نکلتا ہے اکیلا کوئی
آفریںؔ درد کا احساس مٹا ہے ایسے
جیسے بچپن میں بنایا تھا گھروندا کوئی
سائیں میرے کھیتوں پر بھی رت ہریالی بھیجو ناں
سکھی پرندوں کی چہکاریں گیتوں والی بھیجو ناں
ایک اک کر کے پنچھی اڑتے جائیں ٹھور ٹھکانوں سے
بھوک اڑے کھلیانوں میں رت باجرے والی بھیجو ناں
چکنے مکنے آنگن مانگیں روز دعائیں پرندوں کی
کبھی تو ان کی دعا سنو اور بھری کنڈالی بھیجو ناں
الگنیوں الگنیوں پھیلی رنگ برنگی انگیوں کو
لہریں لیتے جسم اور ہنستے مکھ کی لالی بھیجو ناں
سکھی رہیں وہ ہاتھ جو ڈلیا بنتے کبھی نہیں تھکتے
سندیسہ اس ماں کو جس کی آتما خالی بھیجو ناں
بجرے دریا پار خزانے اپنے ڈھو لے جاتے ہیں
سر اور تن کی جدا جدا اب کے رکھوالی بھیجو ناں
سائیں رات کی رات یہ بستی مقتل کیوں بن جاتی ہے
اب جس رات بھی خنجر نکلیں آندھی کالی بھیجو ناں
طاق میں کون رکھ گیا ایک دیا اور ایک پھول
دھیان میں پھر سے جل اٹھا ایک دیا اور ایک پھول
میرے تمہارے درمیاں قطرۂ اشک رائیگاں
پچھلی رتوں کا سانحہ ایک دیا اور ایک پھول
خواب ہی خواب میں کٹی عمر تمام جل بجھی
تیرا کہا مرا سنا ایک دیا اور ایک پھول
شام فراق کی قسم اور تو کچھ نہ پاس تھا
تیرے لئے بچا لیا ایک دیا اور ایک پھول
بام مراد تک مرے ہاتھ نہ جا سکے مگر
دیر تلک جلا کیا ایک دیا اور ایک پھول
تیری اداس آنکھ سے میرے خموش ہونٹ تک
حرف وصال کیا ہوا ایک دیا اور ایک پھول
جشن کی رات جب ترے نام پہ لوگ چپ سے تھے
میں نے یوں ہی اٹھا لیا ایک دیا اور ایک پھول
وہ جو یادوں کی روشنی سی تھی
وہ جو آباد اک گلی سی تھی
وہ جو اک شہر تھا سمندر سا
اور سمندر پہ چاندنی سی تھی
وہ جو جنگل تھا اک کواڑوں کا
اور جنگل میں زندگی سی تھی
وہ جو دیوار پیچھے مکھڑے تھے
اور مکھڑوں پہ تازگی سی تھی
وہ جو اک باڑھ تھی گلابوں کی
وہ جو خوشبو دھلی دھلی سی تھی
وہ جو رستے میں ایک کٹیا تھی
وہ جو بڑھیا جھکی جھکی سی تھی
وہ جو صورت پہ تھا نمک اس کی
وہ جو باتوں میں چاشنی سی تھی
وہ جو لڑکی تھی اک پہیلی سی
وہ پہیلی جو ان کہی سی تھی
وہ جو کونے پہ ایک جامن تھا
وہ جو ڈالی ہری بھری سی تھی
وہ جو لڑکوں کی ایک گارد تھی
وہ جو اک فاختہ ڈری سی تھی
وہ جو لڑکا تھا اک چھریرا سا
اور رنگت بھی سانولی سی تھی
نام بھی یاد ہے بتائیں کیا
شکل بھی یاد ہے بھلی سی تھی
وہ جو اک پیڑ تھا پرانا سا
پیڑ اوپر جو اک پری سی تھی
وہ جو ویراں سی ایک مسجد تھی
وہ جو دیوار اک گری سی تھی
شاہ جنات جس میں رہتا تھا
ٹیڑھی میڑھی جو اک گلی سی تھی
وہ جو بوڑھا تھا سرخ آنکھوں کا
وہ جو لڑکی بجھی بجھی سی تھی
وہ جو بادل سا ایک پردہ تھا
ایک کھڑکی جو ادھ کھلی سی تھی
وہ جو کاغذ ملا دلا سا تھا
وہ جو چٹھی مڑی تڑی سی تھی
وہ جو تھے آنسوؤں سے بگڑے حرف
روشنائی اڑی اڑی سی تھی
وہ جو آنکھیں تھیں اک ستارہ سی
وہ جو اک لو چراغ کی سی تھی
رات وہ حال پوچھنے آئے
رات میں بھی تھکی تھکی سی تھی
میری مٹھی میں ایک کاغذ تھا
اور مٹھی بھنچی ہوئی سی تھی
پاس خبروں کا ایک ملبہ تھا
تھی جو تصویر ادھ جلی سی تھی
اک خبر تھی بہت ادھوری سی
ایک سرخی کٹی پٹی سی تھی
اختلافات نے اجاڑ دیا
وہ جو بستی بھری پری سی تھی
گھر جلے ہیں ہواؤں کی شہہ پر
آتش غم تو بس یوں ہی سی تھی
خوشبو صندل اور نہ گہنا دکھ دے گا
اک جیسا دکھ سہتے رہنا دکھ دے گا
ڈرتی کیوں ہے آنکھیں تیری اچھی ہیں
لیکن ان کا چپ چپ بہنا دکھ دے گا
جو ہم دونوں نے مل جل کر جھیلے تھے
وہ دکھ تیرا تنہا سہنا دکھ دے گا
جس نے ہم کو آنگن آنگن بانٹ دیا
اب تو اس دیوار کا ڈھہنا دکھ دے گا
بظاہر ٹوٹ کر بکھرے نہیں ہیں
مگر ہم اب وہ پہلے سے نہیں ہیں
وہی بے چین رکھتے ہیں زیادہ
ابھی تک حرف جو لکھے نہیں ہیں
ہے مٹی سے جڑے رہنا ضروری
خلا میں پھول تو کھلتے نہیں ہیں
لڑائی لڑ رہے ہیں زندگی سے
تھکے تو ہیں مگر ہارے نہیں ہیں
یہ دریا خشک ہے ایسا نہیں بس
کسی کے سامنے روتے نہیں ہیں
سمجھ میں آ گئی جس روز دنیا
اسی دن سے تو دنیا کے نہیں ہیں
کہ بے ترتیب بھی رہنے دیا کر
یہ گھر ہیں آئنہ خانے نہیں ہیں
جنہیں کہ عمر بھر سہاگ کی دعائیں دی گئیں
سنا ہے اپنی چوڑیاں ہی پیس کر وہ پی گئیں
بہت ہے یہ روایتوں کا زہر ساری عمر کو
جو تلخیاں ہمارے آنچلوں میں باندھ دی گئیں
کبھی نہ ایسی فصل میرے گاؤں میں ہوئی کہ جب
کسم کے بدلے چنریاں گلاب سے رنگی گئیں
وہ جن کے پیرہن کی خوشبوئیں ہوا پہ قرض تھیں
رتوں کی وہ اداس شاہزادیاں چلی گئیں
ان انگلیوں کو چومنا بھی بدعتیں شمار ہوں
وہ جن سے خاک پر نمو کی آیتیں لکھی گئیں
سروں کا یہ لگان اب کے فصل کون لے گیا
یہ کس کی کھیتیاں تھیں اور کس کو سونپ دی گئیں
بھوک کی کڑواہٹ سے سرد کسیلے ہونٹ
خون اگلتے سوکھے چٹخے پیلے ہونٹ
ٹوٹی چوڑی ٹھنڈی لڑکی باغی عمر
سبز بدن پتھرائی آنکھیں نیلے ہونٹ
سونا آنگن تنہا عورت لمبی عمر
خالی آنکھیں بھیگا آنچل گیلے ہونٹ
کچے کچے لفظوں کا یہ نیلا زہر
چھو جائے تو مورکھ تو بھی چھیلے ہونٹ
زہر ہی مانگیں امرت رس کو منہ نہ لگائیں
باغی ضدی وحشی اور ہٹیلے ہونٹ
ایسی بنجر باتیں ایسے کڑوے بول
ایسے سندر کومل سرخ رسیلے ہونٹ
اتنا بولو گی تو کیا سوچیں گے لوگ
رسم یہاں کی یہ ہے لڑکی سی لے ہونٹ
دھوپ اٹھا لی میں نے اپنے حصے کی
بھر لی تھالی میں نے اپنے حصے کی
اس کی آنکھوں میں خوابوں کا جنگل تھا
نیند چرا لی میں نے اپنے حصے کی
جب بھی اندھیرا ہوتے دیکھا بستی میں
آگ جلا لی میں نے اپنے حصے کی
اس کے حصے کا جیون تو دان کیا
عمر بچا لی میں نے اپنے حصے کی
مسند پر جھگڑا تھا لو یہ مسند بھی
کر دی خالی میں نے اپنے حصے کی
بھیڑ بہت تھی بنے بنائے رستوں میں
راہ نکالی میں نے اپنے حصے کی
کر رکھی ہے آنے والے دنوں کے نام
رت ہریالی میں نے اپنے حصے کی
شہر پر رات کا شباب اترے
مجھ پہ تنہائی کا عذاب اترے
آنکھیں برسیں تو ٹوٹ کر برسیں
دھوپ اترے تو بے حساب اترے
ہم نئی فکر کے پیمبر ہیں
ہم پہ بھی اک نئی کتاب اترے
پسلیوں کے نحیف نیزوں پر
بھوک کے زرد آفتاب اترے
خوب تھا اہتمام دار و رسن
ہم وہاں سے بھی کامیاب اترے
شہر بہرا ہے لوگ پتھر ہیں
اب کے کس طور انقلاب اترے
آفریںؔ شعر وہ تو جھوٹے تھے
اب صداقت کا کوئی باب اترے
عداوتیں نصیب ہو کے رہ گئیں
محبتیں رقیب ہو کے رہ گئیں
پرند ہیں نہ آنگنوں میں پیڑ ہیں
یہ بستیاں عجیب ہو کے رہ گئیں
ترس رہی ہیں یوں بہار کو رتیں
غریب کا نصیب ہو کے رہ گئیں
بس ایک پل دھنک کی ساری شوخیاں
مرے بہت قریب ہو کے رہ گئیں
مرے دکھوں کا ذکر شہر شہر ہے
اداسیاں نقیب ہو کے رہ گئیں
میں خود سے جب بچھڑ گئی تو بس تری
دعائیں ہی حبیب ہو کے رہ گئیں
روایتوں کی قتل گاہ عشق میں
یہ لڑکیاں صلیب ہو کے رہ گئیں
اگلی غزل
یہ وصل نہیں تو اور کیا ہے
عشرت آفریں
پچھلی غزل
شہر پر رات کا شباب اترے
عشرت آفریں
COMMENT
SHARE YOUR VIEWS
1 Comment
CANCELCOMMENT
R
Rao Saghir 1 year ago
کمال است۔۔۔
REPLY
آپ یہ بھی پڑھ سکتے ہیں
ہماری پسند
کیوں خوف سا آتا مجھے دیوار سے در سے
کرشن پرویز
خاک ہوں اعتبار کی سوگند
سراج اورنگ آبادی
جو میں نے کہہ دیا اس سے مکرنے والا نہیں
عین الدین عازم
تو کیا جانے تیری بابت کیا کیا سوچا کرتے ہیں
شمیم عباس
ساون میں گھبرا جاتا ہے
پروین کمار اشک
ابر کے ساتھ ہوا رقص میں ہے
سارے جنگل کی فضا رقص میں ہے
پاؤں ٹکتے ہی نہیں اشکوں کے
جیسے آنکھوں کی دعا رقص میں ہے
درمیاں چیختے انسانوں کے
میرا خاموش خدا رقص میں ہے
کھوکھلا پیڑ کھڑا ہے لیکن
اس کا احساس انا رقص میں ہے
اب تو ان پیروں کو غیرت آئے
وہ مرا شعلہ نوا رقص میں ہے
عشق پیچاں جو ستونوں پہ چڑھی
گھر کی ویران فضا رقص میں ہے
خوشبوئیں گونج رہی ہیں مجھ میں
آج پھولوں کی صدا رقص میں ہے
سب لکیروں سے لہو رستا ہے
یوں ہتھیلی پہ حنا رقص میں ہے
نذر سیلاب ہوئے اہل مکاں
طاق پر اب بھی دیا رقص میں ہے
جو معبد میں دیا جلانے آتی تھی
وہ لڑکی کیوں اندھیاروں کی نذر ہوئی
وہ جس نے اشکوں سے ہار نہیں مانی
کس خاموشی سے دریا میں ڈوب گئی
ریت پہ میرے اور تمہارے قدموں کی
اک تحریر تھی سو وہ دریا برد ہوئی
لفظوں کے شہزادے کا رستہ دیکھے
جنگل میں رہنے والی بھولی لڑکی
تیری مخبر تیری ہی ہم راز کنیز
میری دشمن میری ایک سہیلی تھی
بھوک ہی پالے اپنی کوکھ میں میری ماں
بانجھ دعائیں محنت والے ہاتھوں کی
وہ گھر جس کے طاق میں دیا نہ تھا لیکن
صحن میں ایک کنڈاری رکھی رہتی تھی
آبادی آبادی گہرا سناٹا
ہر سُو میرے دل کے جیسا سناٹا
پنکھ پکھیرو ڈالی ڈالی چہک رہے ہیں
آدمی کے حصے میں ایسا سناٹا
گلیوں گلیوں دھول اڑاتی تنہائی
آنگن آنگن شور مچاتا سناٹا
انجانی دیوار کھڑی ہے ہر گھر میں
اندر بیٹھا ہے ان دیکھا سناٹا
خاموشی كا قفل پڑا دروازوں میں
اور کھڑکی میں سہما سہما سناٹا
دروازے پر جانے کس نے دستک دی
دستک سن کر باہر نکلا سناٹا
اک دوجے کو چھوتے بھی ڈر لگتا ہے
ساتھ کھڑا ہے خوف میں لپٹا سناٹا
دھرتی نے اک چادر اوڑھی صاف سفید
اور سرہانے بیٹھ کے رویا سناٹا
یہ جنگ وہ ہے کہ اب خود بھی ہارنا چاہوں
مگر میں اس کے لیے بھی تری رضا چاہوں
مرے غلام مرے آئنے اٹھا لانا
کہ میں اس آگ کو پانی میں دیکھنا چاہوں
میں شاخ شاخ تری نکہتیں فزوں دیکھوں
میں طاق طاق تری روشنی سوا چاہوں
اٹا ہوا تری خوشبو سے پیرہن رکھوں
بھرے ہوئے ترے رنگوں میں دست و پا چاہوں
تمام شہر خموشی کی نیند سویا ہے
میں ایسے وقت میں اک خنجر نوا چاہوں
جو خیمہ گاہ سے نکلوں تو قتل گاہ تلک
پٹا ہوا ترے اعضا سے راستہ چاہوں
میں عہد نامۂ تنہائی لینے آئی ہوں
فصیل ہجر کا اک ایک باب وا چاہوں
مری ردائیں کنیزوں میں بانٹ دیں جس نے
خراج سایۂ دیوار اس سے کیا چاہوں
وہ مرے خواب پیرہن چھو کر
اٹھ گیا آنکھ کی چبھن چھو کر
پھر وہ مانوس خوشبوئیں لوٹیں
پھر ہوائیں چلیں بدن چھو کر
خواب آنکھوں میں رنگ تیر گئے
بدلیاں آ گئیں کرن چھو کر
دور کیوں پتھروں پہ جا بیٹھا
وہ مری روح کی تھکن چھو کر
تتلیاں جنگلوں کو لوٹ گئیں
رنگ فطرت چمن چمن چھو کر
کھائی ہوگی وہی قسم تو نے
پھر کسی زلف کی شکن چھو کر
اس شہر کج کلاہ کے آثار دیکھنا
اور خود کو بے ردا سر بازار دیکھنا
وہ میرے بادبان کا کھلنا ہوا کے ساتھ
اور مڑ کے تیرا جانب رہوار دیکھنا
آشوب خشت و خاک سے جی کو اماں کہاں
پھر اس پہ رنگ شیشۂ پندار دیکھنا
اب کے لگان کون اٹھانے کو آئے گا
اب کے سروں کی فصل ہے تیار دیکھنا
مسند نشین شہر خرابات کون ہو
کس سے سنبھل سکے گی یہ دستار دیکھنا
گہہ اس فصیل یاد کی قندیل پر نگاہ
گہہ اسپ حرف و خواب کی رفتار دیکھنا
جس میں غریب شہر کی بیٹی چنی گئی
اے میرے شہر یار وہ دیوار دیکھنا
کب تک پھرنا غاروں اور گپھاؤں میں
آؤ واپس لوٹ چلیں اب گاؤں میں
صحرا میں اک ریت محل تعمیر کریں
سکھ سے بیٹھیں انگوروں کی چھاؤں میں
روح بھٹکتی ہے باغی شہزادی کی
سنتے ہیں ان خالی محل سراؤں میں
مجھ میں چھٹی حس جاگی تازہ مٹی کی
طغیانی ہے پھر پانچوں دریاؤں میں
گیا تو سردار کے باغ میں قتل ہوئی
چرواہا سوتا ہے نیم کی چھاؤں میں
ایک نے بیٹی ایک نے بیٹا جنم دیا
کتنا فرق ہے ہم دونوں کی ماؤں میں
قطرہ قطرہ نم مٹی میں
بوئیں اپنے غم مٹی میں
یہ مٹی ہے اور طرح کی
جمتے نہیں قدم مٹی میں
یہ بچے ہیں اور ہی ڈھب کے
کھیلتے ہیں کم کم مٹی میں
ایک امکان اور ایک اندیشہ
دونوں ہیں باہم مٹی میں
سچل سائیں کیا تکتے ہو
مل گیا اک عالم مٹی میں
شاہ بھٹائی کچھ تو بولو
کچھ تو ہو دم خم مٹی میں
تم بھی رلتے دیکھ رہے ہو
بچے اور پرچم مٹی میں
کیسی انوکھی فصل اٹھی ہے
اپنے لہو سے نم مٹی میں
ننگے سورج سے لڑتا ہے
ہریالی کا غم مٹی میں
جب بھی کونپل ہاتھ ہلائے
دیکھوں نیا جنم مٹی میں
سب کو اک دن مل جانا ہے
کیا تم اور کیا ہم مٹی میں
میں اپنے عذاب لکھ رہی تھی
زخموں کا حساب لکھ رہی تھی
پھولوں کی زباں کی شاعرہ تھی
کانٹوں سے گلاب لکھ رہی تھی
اس پیڑ کے کھوکھلے تنے پر
اک عمر کے خواب لکھ رہی تھی
آنکھوں سے سوال پڑھ رہی تھی
پلکوں سے جواب لکھ رہی تھی
ہر بوند شکستہ بام و در پر
بارش کا عتاب لکھ رہی تھی
اک نسل کے خواب کے لہو سے
اک نسل کے خواب لکھ رہی تھی
پھولوں میں ڈھلی ہوئی یہ لڑکی
پتھر پہ کتاب لکھ رہی تھی
دیواروں پر سائے سے لہراتے تھے
لوگ اس کی تصویریں دیکھنے آتے تھے
اس بستی میں مجھ کو بھی لے جانا تھا
جس بستی میں چاند بدن گہناتے تھے
اس کیاری میں میری تیری آنکھیں تھیں
جس کیاری میں تارے بوئے جاتے تھے
پھول کٹورا پانی آنکھیں اور دیے
لوگ کہیں ویرانے میں رکھ آتے تھے
جانے کیا آسیب تھا پتھر آتے تھے
رات گئے کچھ سائے چھت پر آتے تھے
صبح وہ کیاری پھولوں سے بھر جاتی تھی
تم جس کی بیلوں میں چھپ کر آتے تھے
میں جس رستے پر نکلی اس رستے میں
صحراؤں کے بیچ سمندر آتے تھے
چاند کی دھیمی دھیمی چاپ ابھرتے ہی
سارے سپنے پھول پہن کر آتے تھے
اس سے میری روح میں اترا ہی نہ گیا
رستے میں دو گہرے ساگر آتے تھے
خوابوں کے یاقوت سے پوریں زخمی ہیں
راس مجھے کب ایسے زیور آتے تھے
کیسا خزانہ یہ تو زاد سفر نہیں رکھتی
خانہ بدوش محبت کوئی گھر نہیں رکھتی
یادوں کے بستر پر تیری خوشبو کاڑھوں
اس کے سوا تو اور میں کوئی ہنر نہیں رکھتی
کوئی بھی آواز اس کی آہٹ نہیں ہوتی
کوئی بھی خوشبو اس کا پیکر نہیں رکھتی
میں جنگل ہوں اور اپنی تنہائی پر خوش
میری جڑیں زمین میں ہیں کوئی ڈر نہیں رکھتی
وہ جو لوٹ بھی آیا تو کیا دان کروں گی
میں تو اس کے نام کا اک زیور نہیں رکھتی
میراؔ ماں مری آگ کو کوئی گن نہیں آیا
اس مورت کو رام کروں یہ ہنر نہیں رکھتی
خون ناحق کی طرح گلیوں میں جب بہتی ہے رات
ذرہ ذرہ چیختا ہے اور چپ رہتی ہے رات
پارساؤں کے حرم آباد رکھنے کے لئے
داشتاؤں کی طرح ہنس ہنس کے دکھ سہتی ہے رات
جب کواڑوں سے ہوا سرگوشیاں کرنے لگے
تب دیے کی لو سے دھیرے دھیرے کچھ کہتی ہے رات
چاند تاروں کے اسی ملبے سے تازہ آفتاب
سر اٹھاتا ہے کھنڈر کی طرح جب ڈہتی ہے رات
کون دروازے دبے قدموں نکل جاتا ہے دن
کون سی دہلیز پر سر رکھ کے سو رہتی ہے رات
بارش شور مچاتی تھی
ناچتی گاتی آتی تھی
ٹین کی چھت پر ایک اک بوند
کیا کیا راگ سناتی تھی
نیلے سبز کواڑوں بیچ
چابک سی لہراتی تھی
موسم تالیں دیتے تھے
برکھا بھاؤ بتاتی تھی
بادل ڈھول بجاتے تھے
بجلی ناچ دکھاتی تھی
شاخیں پینگیں لیتی تھیں
کوئل کجری گاتی تھی
پتے رم جھم ہنستے تھے
شاخ شاخ بل کھاتی تھی
دھرتی اور امبر کے بیچ
اندردھنش لہراتی تھی
پیڑ تکبر کرتے تھے
آندھی سبق سکھاتی تھی
آگ پانی میں فروزاں دیکھو
تم بھی اس گھر کا چراغاں دیکھو
وحشت خواب گریزاں دیکھو
لذت دید کا عنواں دیکھو
دیکھ کر ہی تمہیں خوش ہو جاؤں
میری آسودگیٔ جاں دیکھو
اپنے ہی لمس پہ ہے اس کا گماں
میرا عرفاں مرا وجداں دیکھو
میں بلندی نہیں پاتال میں ہوں
دیکھو پاؤ تو تہہ جاں دیکھو
یہ نہیں غم کہ میں پابند غم دوراں تھی
رنج یہ ہے کہ مری ذات مرا زنداں تھی
صبح سے آئنہ چھوتے ہوئے ڈر لگتا ہے
رات ہی خواب میں دیکھا تھا کہ مانگ افشاں تھی
سوکھتی جاتی ہے اب ڈھلتی ہوئی عمر کے ساتھ
باڑھ مہندی کی جو دروازے پہ اپنے ہاں تھی
شمعیں اور سائے سے دیکھے گئے طوفان کی رات
اس حویلی میں جو مدت سے بہت ویراں تھی
خاک میں کھیل کے سب نشوونما پائی ہے
بنت افلاس ہوں میں بھوک تو میری ماں تھی
پڑھ رہا تھا وہ کسی اور کے آنچل پہ نماز
میں بس آئینہ و قرآن لیے حیراں تھی
گرم سنسان دوپہر اور میں
سونا آنگن گھنا شجر اور میں
سر خمیدہ گرفتہ دل دالان
خستہ محراب گرتے در اور میں
لیے بیٹھے ہیں دل میں سو شکوے
اس گلی کے شجر حجر اور میں
ہائے وہ سرخ خشمگیں آنکھیں
ہائے وہ سرزنش کا ڈر اور میں
ہائے وہ پوپلی ہنسی کے پھول
ہائے وہ مہرباں نظر اور میں
کوئی حقہ سا گڑگڑاتا ہے
بات کرتے ہیں بام و در اور میں
مجھ پہ ہنستا یہ پوپلا بوڑھا
میری تہذیب کا کھنڈر اور میں
نمو کے عرفاں سے بے خبر ہوں
کہ لالۂ دشت بے شجر ہوں
یہ زرد پھولوں کے کنج دیکھو
یہاں بھی آؤ کہ میں ادھر ہوں
وہ پھول ہے شاخ پر رہے گا
میں اس کی خوشبو ہوں در بدر ہوں
وہ زندگی کی سزا کا لمحہ
اس ایک لمحے کا میں ثمر ہوں
مجھے اٹھانے کا حق ہے کس کو
کہ اپنی تربت پہ نوحہ گر ہوں
وہ کج کلاہوں کی بستیاں ہیں
وہاں نہ لے چل میں ننگے سر ہوں
اپنی چادر کو پرچم کر سکتی ہے
عورت اک تاریخ رقم کر سکتی ہے
ایوانوں سے نکل سکے تو یہ آواز
اک عالم درہم برہم کر سکتی ہے
چار دواری میں پابند اکیلی سوچ
ڈرو کہ قاتل کو محرم کر سکتی ہے
زندہ دفنائی گئی عورت کی اک چیخ
خاموشی کے ہاتھ قلم کر سکتی ہے
وہ جو بیاہی گئی کلام پاک کے ساتھ
لکھنے کو پوریں تو قلم کر سکتی ہے
گہری کالی رات میں ایک دیے کی لو
تاریکی كا دکھ تو کم کر سکتی ہے
بچوں کی ننھی منی میٹھی مسکان
جینے كا سامان بہم کر سکتی ہے
دل کی شیرینی باتوں میں ہوتی تھی
پھر تاثیر مناجاتوں میں ہوتی تھی
کیا دن تھے جب کنجی خوشی خزانے کی
اپنے دھول بھرے ہاتھوں میں ہوتی تھی
بچپن میں میٹھی روٹی جیسی خوشبو
ماں کی بھید بھری باتوں میں ہوتی تھی
کچے رنگوں کا آنچل اور بھیگے خواب
کتنی مشکل برساتوں میں ہوتی تھی
یاں تو اپنی ذات کے غم میں رہتے ہیں
دکھ سے جنگ مضافاتوں میں ہوتی تھی
بستر دھول اور خوشبو وہی پرانی ہے
اس کمرے کی اپنی ایک کہانی ہے
مدّت بعد کہیں سناٹا بولا ہے
یہ آہٹ کتنی جانی پہچانی ہے
دو جلتی بجھتی آنکھیں اور میں اور تم
بچپن ہے اور رات ہے اور کہانی ہے
سیر کرائے روز اک اڑن کھٹولے میں
یاد بھی جیسے میری بوڑھی نانی ہے
خود کو میں نے قید کیا ہے کمرے میں
میں نے ہی کھڑکی پر چادر تانی ہے
آنکھ پہ پٹی باندھ کے بھی چل سکتی ہے
بیٹی میری مجھ سے بہت سیانی ہے
چڑیوں کو تو شور مچانا آتا ہے
پیڑ کو لیکن اپنی ریت نبھانی ہے
بچوں سے تو ہم کو شکوہ رہتا ہے
آگے کس نے بات بڑوں کی مانی ہے
دریا ہے تو اک دن رستہ بدلے گا
کب دریا نے بات کسی کی مانی ہے
ان رستوں كا اپنا ایک اندازہ ہے
ان گلیوں کی اپنی ایک نشانی ہے
اب یہ دل بھی کتنا بوجھ سہارے گا
مان بھی جاؤ کشتی بہت پرانی ہے
موسم شاید آخری ہچکی لیتا ہے
یے جو لہو کے دریا میں طغیانی ہے
سر ٹکراتا رہتا ہے دیواروں سے
میرے اندر بھی کوئی زندگانی ہے
عشق میں ہم نے کیا کھویا اور کیا پایا
مت پوچھو پیارے قصہ طولانی ہے
شام کے ساتھ نہ جانا تنہا میلے میں
کھو جاؤ گے شام بہت سیلانی ہے
آگ بچہ کر رکھنا اپنے حصے کی
آنے والی رات بڑی برفانی ہے
تیری خاطر کتنا خود کو بدل دیا
اپنے اوپر مجھ کو بھی حیرانی ہے
دور بستی سے کسی شام کے ہنگام کہیں
چل کہ پھر جشن منائیں دل ناکام کہیں
اب بھی کچھ زرد دوپٹے سے جھمک اٹھتے ہیں
کنج میں دور درختوں کے سر شام کہیں
دل نگر ہے کسی اجڑی ہوئی شہزادی کا
سبزہ زار ایک لہکتا ہے سر بام کہیں
کس کو معلوم ہوئی کون سی آیت منسوخ
یاد اتری تھی تری صورت الہام کہیں
پھر سے وہ گرمیٔ انفاس کہاں سے لائیں
لوٹ بھی آئیں اگر وہ سحر و شام کہیں
اداس شام گھنے پیڑ اور ہوا اور میں
وہ ٹمٹماتا ہوا دور اک دیا اور میں
شکستہ حال منڈیروں پہ جگنوؤں كا نزول
خیال و خواب كا ہلکا سا جھُٹپٹا اور میں
وہ رات اور وہ سرگوشیاں بہاروں کی
وہ چھت وہ چاند وہ بادل وہ رتجگا اور میں
ملی دلی سی رضائی مڑا تڑا تکیہ
اور آنسوؤں کی امنڈتی ہوئی گھٹا اور میں
پرانے گھر میں نئی زندگی کے ہنگامے
نیا نیا مرے کمرے كا آئنہ اور میں
دبی دبی سی ہنسی جامنی دوپٹے بیچ
وہی شریر وہی باؤلی ہوا اور میں
وہ شب وہ شور وہ اندوہ آگہی كا ہجوم
یہ دل یہ حسن تمنا كا معجزہ اور میں
اک انتظار مگر کس کا انتظار ہے اب
یہ دستکوں سے الجھتی ہوئی ہوا اور میں
بہت محیط بہت بے کراں خموشی میں
کلام کرتا ہوا بس مرا خدا اور میں
یہ برف کس لیے پگھل نہیں رہی
زمیں لباس کیوں بدل نہیں رہی
ہماری شاخ کے ثمر کدھر گئے
ہوا تو اتنی تیز چل نہیں رہی
وہ صبح راستے میں مر گئی کہاں
یہ رات ہے کہ سر سے ٹل نہیں رہی
بھبھک اٹھی ہے پھر یہ کیسی روشنی
ابھی تو کوئی شمع جل نہیں رہی
زمین ہم پہ تنگ کر رہے ہیں جو
زمین کیوں انہیں نگل نہیں رہی
ہمارا حال پوچھنے سے فائدہ
طبیعت ان دنوں سنبھل نہیں رہی
مرا دکھ میری ماں کے دکھ سے تھوڑا مختلف ہے
مسائل ایک ہیں لیکن زمانہ مختلف ہے
سنا ہے تیسری دُنیا میں اوسط عمر کم ہے
تو ان كا کاتب تقدیر گویا مختلف ہے
پرانے پیڑ منظر سے ہٹاتا جا رہا ہے
یہ موسم کس قدر سفاک کتنا مختلف ہے
تمہارے ساتھ رشتوں سے بھی فرصت پا گئے ہم
تمہارے بعد اپنوں کا رویہ مختلف ہے
کبھی تھیں کھڑکیاں رومان پرور جان عالم
یہ گلیاں وہ نہیں ہیں یہ دریچہ مختلف ہے
نقابوں کے ادھر کیا ہے یہ عقدہ کون کھولے
نقابیں ایک سی اندر سے چہرہ مختلف ہے
ہماری سوچ کا انداز ہے اوروں سے ہٹ کر
ہماری شاعری کا استعارہ مختلف ہے
کنکر ٹھہرے پانی میں
آئینہ حیرانی میں
جادو لڑکی محل سرا
سب تھا ایک کہانی میں
جانے کیا کیا بول گئے
ہم بھی رات روانی میں
بھول ہی جانا بہتر ہے
جو بھی ہوا نادانی میں
نیند ہمیں آ جاتی تھی
اکثر بیچ کہانی میں
ناگ اور ناگن رہتے تھے
اپنی رات کی رانی میں
زہر یہ کس نے گھول دیا
ٹھنڈے میٹھے پانی میں
آگ یہ کس نے بھڑکائی
موسم کی جولانی میں
ایک آسیب مکانوں میں
اک دل کی ویرانی میں
ایک اندیشہ گھر میں ہے
اور اک نقل مکانی میں
ایک کرشمہ آگ میں ہے
ایک کرامت پانی میں
ایک تماشہ حرف میں ہے
اک تمثیل معانی میں
فرق تو آخر ہونا تھا
غالبؔ اور خاقانیؔ میں
پانی میں چھپ چھیا کرتی شور مچاتی شام
جیسے مجھ میں ٹھہر گئی ہے جل برساتی شام
گیلی لکڑی جیسا جیون دھواں دھواں سے خواب
ساون جیسے دھوپ چھانو دن آگ جلاتی شام
تنہائی کی شال میں لپٹے اونچے اونچے گھر
اور گلی میں ننگے پاؤں اودھم مچاتی شام
ننگے پیروں کاجل ٹیکہ تن پر پھٹی قمیص
تیز ہوا سے لڑتے بھڑتے جشن مناتی شام
امیدیں ٹوٹے پھوٹے طاقوں میں ہنستے پھول
خواہش سونی درگاہوں میں دیے جلاتی شام
ریل کی پٹری جیسی یادیں الجھے سلجھے رستے
آدھی کھلی ہوئی کھڑکی سے ہاتھ ہلاتی شام
کشادہ صحن کھلی کھڑکیاں سنہری دھوپ
قدیم پیڑ جھکی ٹہنیاں سنہری دھوپ
وہ جستجو کا نشہ بچپنے کے وہ موسم
لدی پھندی ہوئی جھر بیریاں سنہری دھوپ
لپے پتے ہوئے آنگن میں دھوپ چھاؤں کا کھیل
وہ میرے گاؤں کا کچا مکاں سنہری دھوپ
نگلتا جاتا ہے بارود رنگ پھْولوں کے
یہ مجھ سے کرتی ہے سرگوشیاں سنہری دھوپ
کہاں سے لائیں گے بچوں کے واسطے اپنے
گئی صدی کا کھلا آسماں سنہری دھوپ
کہانیوں میں سنایا کریں گے آگے لوگ
ستارہ پھول دھنک تتلیاں سنہری دھوپ
خدا نہ کردہ کہ مٹی سے ہو کبھی ناراض
یہ مسکراتی ہوئی مہرباں سنہری دھوپ
خواب آنکھوں سے ہاتھوں سے پھول اور چراغ اور دعا لے گئے
اب کے یہ سنگ زن چھین کر ہی مرا آئنہ لے گئے
موج خوں ناب جب سر سے اونچی ہوئی اس طرح بھی ہوا
شہریاروں کی دستار خاشاک مل کر بہا لے گئے
یاں کتاب محبت تو بس طاق میں جوں کی توں رہ گئی
اصل اوراق جو تھے وہ دشمن ہمارے اڑا لے گئے
جس خزانے پہ ساحل سمندر سے اس درجہ ناراض تھا
شب کے قزاق آئے اور آ کر وہ دولت اُٹھا لے گئے
شعر پیغمبروں کی طرح سے اترتے ہیں اب بھی مگر
میرے کذب و ریا دست تخلیق سے معجزہ لے گئے
اک تواتر سے بارش زمیں کو مسلسل بھگوتی تو ہے
میرے اعمال آب و نمک سے مگر ذائقہ لے گئے
اول اہل قبیلہ نے پرچم بنایا اسے اور پھر
پیش دشمن بھی تاوان میں صرف میری ردا لے گئے
اینٹوں پر تاریخ کھدی تھی برتن پر کچھ نام
بوڑھی آنکھیں چھاجوں برسیں جس دن تھا نیلام
پیٹ کا دوزخ پاٹ رہے ہیں پوروں کے یہ زخم
اوڑھنیوں پر پھول کھلائیں بٹیا صبح و شام
دروازے سے لوٹی جب سے آئی ہوئی برات
قبروں میں اماں باوا کو ملا نہیں آرام
گھر کی بوڑھی دیواروں کو لونی کھاتی جائے
سیدزادے ڈھونڈ رہے ہیں ایک صدی سے کام
اب تک لڑکی کہلاتی ہیں چاندی ہو گئے بال
ان سے ملیے ان پر بھی ہے جینے کا الزام
پرانے محلے كا ویران آنگن
مجھے پا کے تھا کتنا حیران آنگن
یہ تہذیب کو پاؤں چلنا سکھائے
سمیٹے ہے صدیوں کے امکان آنگن
وہ دیوار سے جھانکتی شوخ آنکھیں
وہ پہرے پہ بوڑھا نگہبان آنگن
کوئی جست میں پار کرتا ہے چوکھٹ
کسی کے لئے اک بیابان آنگن
کسی کے لئے پایۂ تخت ہے یہ
کسی کے لئے ایک زندان آنگن
سنا رفتہ رفتہ کھنڈر ہو رہے ہیں
وہ آباد گلیاں وہ گنجان آنگن
کدھر جائیں تہذیب کی ہجرتوں میں
یہ بوڑھے درخت اور یہ سنسان آنگن
کھڑکی میں لہراتے تنہا زرد گلابوں جیسے دن
وہ تکیوں پر کاڑھے جانے والے خوابوں جیسے دن
باہر دستک دیتے موسم چغلی کھاتی تیز ہوا
میز پہ رکھی نیند سے بوجھل کھلی کتابوں جیسے دن
جانے کس کے دل کی دھڑکن کھدی ہوئی تھی پیڑوں پر
جاتے جاتے ٹھٹک گئے ہیں یوںہی نصابوں جیسے دن
ہم کو یاد ہیں اڑتے پھرتے تتلی جیسے صبح و شام
ہاتھ میں جلتا سورجؔ تھامے وہ تالابوں جیسے دن
کنگوروں سے لپٹی بیلیں اور بیلوں پہ ہنستے پھول
بیچ کھنڈر خاموش کھڑی روشن محرابوں جیسے دن
گھور دھوئیں کے پھیلے بادل رکتا سانس گلابوں کا
دلدل جیسی اندھی راتیں اور سرابوں جیسے دن
اک مدت سے ٹھہر گئے ہیں جیسے ہم دونوں کے بیچ
وہی سوالوں جیسی راتیں وہی جوابوں جیسے دن
یں بہت ٹوٹ چکی ہوں وہ سمیٹے آ کر
ان چمکتے ہوئے ریزوں کو اٹھا لے آ کر
میں نے تنہائی کے جتنے بھی گھروندے کھینچے
تیرے احساس کی اک موج مٹا دے آ کر
کس طرف ہے مری معصوم انا کا دشمن
وہ بھی رو دے مجھے اس وقت جو دیکھے آ کر
ہائے وہ کرب کہ جو تشنۂ تحریر رہا
ہائے وہ حرف جو قرطاس پہ ٹوٹے آ کر
ہائے وہ خواب کہ جو قرض رہے آنکھوں پر
ہائے وہ رنگ جو تو نے نہیں دیکھے آ کر
عمر گزری ہے کھلونے ہی سجاتے مجھ کو
کوئی تو ہو کہ انہیں توڑ بھی ڈالے آ کر
جھاڑی جھرنا جھیل کنول
پورا چاند چمکتا جل
چین محبت ٹھنڈک چھانو
بھیگی شام ہرا جنگل
دھوپ کے آگے بکھرا جائے
بوڑھا جذباتی پیپل
گاؤں کنول جھولے باغات
ساون گیت دھنک آنچل
ٹکڑے ٹکڑے قیس کا سر
بستی کی بستی پاگل
میں جاگی تو پھیل گیا
رات کی آنکھوں میں کاجل
لمحوں کی طرح ملنا اس کا صدیوں کی طرح گم ہو جانا
یا اپنے کسی ٹھکانے سے چیزوں کی طرح گم ہو جانا
یا انگلی تھام کے چل پڑنا یادوں کے سنہرے رستے پر
یا ہاتھ چھڑا کر میلے میں بچوں کی طرح گم ہو جانا
یا دھیان کے کونے کھدرے میں یادوں کی طرح سے پڑ رہنا
یا آنکھ جھپکتے منظر سے خوابوں کی طرح گم ہو جانا
یا کسی پرانی کشتی کی صورت ساحل کا ہو رہنا
یا آن کی آن خفا ہو کر لہروں کی طرح گم ہو جانا
یا آندھی سا لڑنا اس کا یا بادل سا رونا اس کا
یا سرد ہواؤں کے ڈر سے چڑیوں کی طرح گم ہو جانا
یا قوس قزح سا رستے میں بانہیں پھیلائے مل جانا
یا مٹھی میں آ جاتے ہی رنگوں کی طرح گم ہو جانا
یا پھٹی پرانی چنری سا کانٹوں کی باڑھ پہ لہرانا
یا نئی نویلی دلہن کے گہنوں کی طرح گم ہو جانا
یا کسی پیمبر لمحے میں وجدان کے زینے طے کرنا
یا نوک قلم تک آتے ہی لفظوں کی طرح گم ہو جانا
یا اس کا کتاب دل پہ کہیں سب نام پتہ لکھا ہونا
یا چھوٹے چھوٹے کاغذ کے پرزوں کی طرح گم ہو جانا
اک شام اچانک آ جانا بے آہٹ بے دستک اس کا
اک رات سرہانے لکھ رکھی نظموں کی طرح گم ہو جانا
آنسوؤں کے ریلے میں
جگنوؤں کے میلے میں
موم کے کھلونے تھے
روشنی کے ٹھیلے میں
ہجر کی بھی خوشبو تھی
چاہتوں کے بیلے میں
ہچکیاں بھی بہ نکلیں
قہقہوں کے ریلے میں
پھول سے کہے تتلی
اپنا دکھ اکیلے میں
چیخ چیخ کر روئی
رات میں اکیلے میں
ایک چراغ جلا رکھنا
دھیان مسافر کا رکھنا
دھیان کے اجلے طاقوں میں
آنکھیں روز جلا رکھنا
نیک شگن کی چوکھٹ پر
آگ اور خوشبو لا رکھنا
چٹکی بھر صندل سا خواب
تھالی بھر آشا رکھنا
سینہ میں آنسو سا دل
آنکھوں میں دریا رکھنا
سنگ زنوں کی بستی میں
آئینہ چمکا رکھنا
پھول سا تن اور دھوپ سا روپ
کس کے لیے بچا رکھنا
ایک ہتھیلی پر قندیل
ایک پہ حرف دعا رکھنا
دیر تلک خوشبو دینا
دور تلک چھایا رکھنا
اندر سے ٹوٹی پھوٹی ہوں
اوپر سے ہنس بول رہی ہوں
اک آسیبوں والے گھر میں
سپنے رکھ کر بھول گئی ہوں
اس خالی ہوتی بستی میں
کس کا رستہ دیکھ رہی ہوں
جلتی بجھتی آنکھیں لے کر
کس کی آرتی کو نکلی ہوں
میرا ماں میں وہ بیراگن
دان میں آنسو ہی پاتی ہوں
ابر کے ساتھ ہوا رقص میں ہے
سارے جنگل کی فضا رقص میں ہے
پاؤں ٹکتے ہی نہیں اشکوں کے
جیسے آنکھوں کی دعا رقص میں ہے
درمیاں چیختے انسانوں کے
میرا خاموش خدا رقص میں ہے
کھوکھلا پیڑ کھڑا ہے لیکن
اس کا احساس انا رقص میں ہے
اب تو ان پیروں کو غیرت آئے
وہ مرا شعلہ نوا رقص میں ہے
خوشبوئیں گونج رہی ہیں مجھ میں
آج پھولوں کی صدا رقص میں ہے
سب لکیروں سے لہو رستا ہے
یوں ہتھیلی پہ حنا رقص میں ہے
نذر سیلاب ہوئے اہل مکاں
طاق پر اب بھی دیا رقص میں ہے
کپاس چنتے ہوئے ہاتھ کتنے پیارے لگے
مجھے زمیں سے محبت کے استعارے لگے
تمام رات ۔۔۔جو لڑتے رہے تھے طوفاں سے
عجیب لوگ تھے تھک ہار کر کنارے لگے
مجھے تو باغ بھی مہکا ہوا الاؤ لگا
مجھے تو پھول بھی ٹھہرے ہوئے شرارے لگے
وہ ہم نہ تھے جسے آنکھیں نچوڑ کر دی تھیں
وہ تم نہ تھے جسے ہم اپنی جاں سے پیارے لگے
اس ایک رات قیامت کی بارشیں ٹوٹیں
مری شکستہ حویلی پہ جب پچارے لگے
بس ایک فصل درمیان رہ گئی
زمین زیر آسمان رہ گئی
وہ خواب ساعتیں کہ میرے گھر میں جب
شب وصال میہمان رہ گئیں
مرے وجود پر تری پلک پلک
جھکی مثال سائبان رہ گئی
ہوا کے ہاتھ میں دعا کا تیر تھا
لرز کے ایک پل کمان رہ گئی
مرا وجود تھا کہ شہر خامشی
سجی سجائی ہر دکان رہ گئی
مزید شاعری پڑھیے اور دوسرے شعراء کو دریافت کیجیے۔