مکمل شاعری

ایک چراغ جلا رکھنا

دھیان مسافر کا رکھنا

دھیان کے اجلے طاقوں میں

آنکھیں روز جلا رکھنا

نیک شگن کی چوکھٹ پر

آگ اور خوشبو لا رکھنا

چٹکی بھر صندل سا خواب

تھالی بھر آشا رکھنا

سینہ میں آنسو سا دل

آنکھوں میں دریا رکھنا

سنگ زنوں کی بستی میں

آئینہ چمکا رکھنا

پھول سا تن اور دھوپ سا روپ

کس کے لیے بچا رکھنا

ایک ہتھیلی پر قندیل

ایک پہ حرف دعا رکھنا

دیر تلک خوشبو دینا

دور تلک چھایا رکھنا

— عشرت آفریں