مکمل شاعری

گرم سنسان دوپہر اور میں

سونا آنگن گھنا شجر اور میں

سر خمیدہ گرفتہ دل دالان

خستہ محراب گرتے در اور میں

لیے بیٹھے ہیں دل میں سو شکوے

اس گلی کے شجر حجر اور میں

ہائے وہ سرخ خشمگیں آنکھیں

ہائے وہ سرزنش کا ڈر اور میں

ہائے وہ پوپلی ہنسی کے پھول

ہائے وہ مہرباں نظر اور میں

کوئی حقہ سا گڑگڑاتا ہے

بات کرتے ہیں بام و در اور میں

مجھ پہ ہنستا یہ پوپلا بوڑھا

میری تہذیب کا کھنڈر اور میں

— عشرت آفریں