مکمل شاعری

کنکر ٹھہرے پانی میں

آئینہ حیرانی میں

جادو لڑکی محل سرا

سب تھا ایک کہانی میں

جانے کیا کیا بول گئے

ہم بھی رات روانی میں

بھول ہی جانا بہتر ہے

جو بھی ہوا نادانی میں

نیند ہمیں آ جاتی تھی

اکثر بیچ کہانی میں

ناگ اور ناگن رہتے تھے

اپنی رات کی رانی میں

زہر یہ کس نے گھول دیا

ٹھنڈے میٹھے پانی میں

آگ یہ کس نے بھڑکائی

موسم کی جولانی میں

ایک آسیب مکانوں میں

اک دل کی ویرانی میں

ایک اندیشہ گھر میں ہے

اور اک نقل مکانی میں

ایک کرشمہ آگ میں ہے

ایک کرامت پانی میں

ایک تماشہ حرف میں ہے

اک تمثیل معانی میں

فرق تو آخر ہونا تھا

غالبؔ اور خاقانیؔ میں

— عشرت آفریں