شاعر کی معلومات لوڈ ہو رہی ہیں...
تجھ سے مقابلے کی کسے تاب ہے ولے
میرا لہو بھی خوب ہے تیری حنا کے بعد
شاعر کی معلومات لوڈ ہو رہی ہیں...
Maulana Muhammad Ali Jauhar
1878 – 1931
Mohammad Ali, with the pen name 'Johar' and the title 'Rais-ul-Ahrar,' was born in 1878 in Rampur. He received his education at Aligarh and Lincoln College, Oxford. He worked in the princely states of Baroda and Rampur. After resigning from his job, he started the weekly newspaper Comrade from Calcutta. He also launched a newspaper in Urdu called Hamdard in Delhi. In 1914, he was placed under house arrest for writing against British policies. After being released in 1919, he participated in the Khilafat Movement. Alongside Gandhi, he became involved in the struggle for the country's independence and the organization and promotion of the Khilafat Movement, which led to him being imprisoned twice. He was released in 1943 and was appointed the president of the Congress the same year. Due to the mindset of some Hindus, Maulana Ali parted ways with the Congress. He went to London to attend the Round Table Conference and passed away there on January 4, 1931. He was buried in Jerusalem. In poetry, he was a student of Daagh. His poetry collection, Johar, has been published. Mohammad Ali Johar was an elegant English-language writer. He was a great advocate of India's freedom and a beloved leader of the Muslims.
ان کے کلام کے چند منتخب اشعار پڑھیے۔
تجھ سے مقابلے کی کسے تاب ہے ولے
میرا لہو بھی خوب ہے تیری حنا کے بعد
جینا وہ کیا کہ دل میں نہ ہو تیری آرزو
باقی ہے موت ہی دل بے مدعا کے بعد
ممکن ہے نالہ جبر سے رک بھی سکے اگر
ہم پر تو ہے وفا کا تقاضا جفا کے بعد
ہے کس کے بل پہ حضرت جوہرؔ یہ روکشی
ڈھونڈیں گے آپ کس کا سہارا خدا کے بعد
دور حیات آئے گا قاتل قضا کے بعد
ہے ابتدا ہماری تری انتہا کے بعد
یہ حور بہشتی کی طرف سے ہے بلاوا
لبیک کہ مقتل کا صلا میرے لیے ہے
پیغام ملا تھا جو حسین ابن علی کو
خوش ہوں وہی پیغام قضا میرے لیے ہے
لذت ہنوز مائدۂ عشق میں نہیں
آتا ہے لطف جرم تمنا سزا کے بعد
تم یوں ہی سمجھنا کہ فنا میرے لیے ہے
پر غیب سے سامان بقا میرے لیے ہے
کیوں جان نہ دوں غم میں ترے جب کہ ابھی سے
ماتم یہ زمانہ میں بپا میرے لیے ہے
اک شہر آرزو پہ بھی ہونا پڑا خجل
ھل من مزید کہتی ہے رحمت دعا کے بعد
قتل حسین اصل میں مرگ یزید ہے
اسلام زندہ ہوتا ہے ہر کربلا کے بعد
سرخی میں نہیں دست حنا بستہ بھی کچھ کم
پر شوخیٔ خون شہدا میرے لیے ہے
میں کھو کے تری راہ میں سب دولت دنیا
سمجھا کہ کچھ اس سے بھی سوا میرے لیے ہے
توحید تو یہ ہے کہ خدا حشر میں کہہ دے
یہ بندہ دوعالم سے خفا میرے لیے ہے
راحل ہوں مسلمان بصد نعرۂ تکبیر
یہ قافلہ یہ بانگ درا میرے لیے ہے
انعام کا عقبیٰ کے تو کیا پوچھنا لیکن
دنیا میں بھی ایماں کا صلا میرے لیے ہے
کیوں ایسے نبی پر نہ فدا ہوں کہ جو فرمائے
اچھے تو سبھی کے ہیں برا میرے لیے ہے
اللہ کے رستہ ہی میں موت آئے مسیحا
اکسیر یہی ایک دوا میرے لیے ہے
اے شافع محشر جو کرے تو نہ شفاعت
پھر کون وہاں تیرے سوا میرے لیے ہے
کیا ڈر ہے جو ہو ساری خدائی بھی مخالف
کافی ہے اگر ایک خدا میرے لیے ہے
جو صحبت اغیار میں اس درجہ ہو بے باک
اس شوخ کی سب شرم و حیا میرے لیے ہے
اے چارہ گرو چارہ گری کی نہیں حاجت
یہ درد ہی داروئے شفا میرے لیے ہے
ہے ظلم ترا عام بہت پھر بھی ستم گر
مخصوص یہ انداز جفا میرے لیے ہے
قلزم عشق میں ہیں نفع و سلامت دونوں
اس میں ڈوبے بھی تو کیا پار اترنا ہے یہی
حد ہے پستی کی کہ پستی کو بلندی جانا
اب بھی احساس ہو اس کا تو ابھرنا ہے یہی
ہیں یوں تو فدا ابر سیہ پر سبھی مے کش
پر آج کی گھنگھور گھٹا میرے لیے ہے
خاک جینا ہے اگر موت سے ڈرنا ہے یہی
ہوس زیست ہو اس درجہ تو مرنا ہے یہی
قید گیسو سے بھلا کون رہے گا آزاد
تیری زلفوں کا جو شانوں پہ بکھرنا ہے یہی
تجھ سے کیا صبح تلک ساتھ نبھے گا اے عمر
شب فرقت کی جو گھڑیوں کا گزرنا ہے یہی
اے اجل تجھ سے بھی کیا خاک رہے گی امید
وعدہ کر کے جو ترا روز مکرنا ہے یہی
اور کس وضع کے جویا ہیں عروسان بہشت
ہیں کفن سرخ شہیدوں کا سنورنا ہے یہی
ہو نہ مایوس کہ ہے فتح کی تقریب شکست
قلب مومن کا مری جان نکھرنا ہے یہی
نقد جاں نذر کرو سوچتے کیا ہو جوہرؔ
کام کرنے کا یہی ہے تمہیں کرنا ہے یہی
عشق بن کر جئے تو خاک جیے
زندہ وہ ہے جو ان پہ مرتا ہے
گلہ اے دل ابھی سے کرتا ہے
عشق کا دم اسی پہ بھرتا ہے
جان دیتا ہے عیش فانی پر
بس اسی زندگی پہ مرتا ہے
راحت جاوداں کو بھول گیا
کوئی دنیا میں یہ بھی کرتا ہے
نام پر اس کے سب جو دے بیٹھا
وہی اک ہے جو نام کرتا ہے
غیروں پہ لطف ہم سے الگ حیف ہے اگر
یہ بے حجابیاں بھی ہوں عذر حیا کے بعد
جس کو دنیا نے نامراد کیا
وہی ناکام کام کرتا ہے
وقف مومن ہے آزمائش عشق
اس میں پورا وہی اترتا ہے
قول مومن ہے اس کے فعل کی شرح
وہ جو کہتا ہے کر گزرتا ہے
ہے مسلماں کی بس یہی پہچان
کہ فقط اک خدا سے ڈرتا ہے
اس قدر احتیاط اے صیاد
کہ قفس میں بھی پر کترتا ہے
ڈر نہیں مجھ کو گناہوں کی گراں باری کا
تیری رحمت ہے سبب میری سبک ساری کا
آج کر لو جو کر سکو کل تک
کون جیتا ہے کون مرتا ہے
مطمئن رہ دلا وہ جان جہاں
وعدہ کر کے کہیں مکرتا ہے
دار نے اک سگ دنیا کو یہ بخشا ہے عروج
ہے فرشتوں میں بھی چرچا مری دیں داری کا
میں فدا آج بھی ہو جائے وہی ایک نگاہ
خاتمہ ہو کہیں اس دور کی خودداری کا
تنہائی کے سب دن ہیں تنہائی کی سب راتیں
اب ہونے لگیں ان سے خلوت میں ملاقاتیں
ہر آن تسلی ہے ہر لحظہ تشفی ہے
ہر وقت ہے دل جوئی ہر دم ہیں مداراتیں
میرے رنگ کفن کی شوخی دیکھ
یوں ہی عاشق ترا سنورتا ہے
معراج کی سی حاصل سجدوں میں ہے کیفیت
اک فاسق و فاجر میں اور ایسی کراماتیں
بیٹھا ہوا توبہ کی تو خیر منایا کر
ٹلتی نہیں یوں جوہرؔ اس دیس کی برساتیں
ساقیا سب کو تری ایک نظر کافی تھی
تھا کسے ہوش ترے عہد میں ہشیاری کا
عرش تک جو بے خطا جاتا ہے یہ وہ تیر ہے
غیر سمجھا ہے کہ میری آہ بے تاثیر ہے
چھوڑ میری فکر غافل رو خود اپنی قید پر
جس کو تو زیور سمجھتا ہے وہی زنجیر ہے
قلزم عشق میں گرا سو گرا
اس کا ڈوبا کہیں ابھرتا ہے
خوگر قید وفا پر کھل چکا زنداں کا راز
جرم تھی وہ قید یہ اس جرم کی تعزیر ہے
ہو نہ الجھن جب جنون جامہ ور کامل نہ ہو
جب تلک دامن ہے خار دشت دامن گیر ہے
خون ناحق کا کسی کے شبہ اور تم پر مگر
سینۂ جوہرؔ میں دیکھو تو یہ کس کا تیر ہے
بے گناہی سے بھی بڑھ کر ہے اگر کوئی گناہ
تو سزائے عشق پا کر خجلت تقصیر ہے
اک تو جو مہرباں ہو تو ہر اک ہو مہرباں
اور یوں نہ ہو بلا سے کوئی مہرباں نہ ہو
پائیداری میں ہے قصروں سے سوا کچی سی قبر
جو قیامت تک رہے قائم یہ وہ تعمیر ہے
دار ہی بنتی ہے اے دل زینۂ معراج عشق
خواب آغاز محبت کی یہی تعبیر ہے
سجن و جنت دونوں اے کافر ہیں اس دنیا کے نام
وہ ازل سے بخت مومن یہ تری تقدیر ہے
جان بھی چیز ہے کوئی کہ رکھیں تم سے دریغ
پاس اتنا بھی نہ ہو رسم وفاداری کا
بے خوف غیر دل کی اگر ترجماں نہ ہو
بہتر ہے اس سے یہ کہ سرے سے زباں نہ ہو
عاشقوں کے لیے ہے دار ہی داروئے شفا
عشق کی طب میں دوا نام ہے بیماری کا
ہاتھ تو ہوں گے قلم پر نامہ بر یہ بھی کہا
دل چرا لیتی ہے پہلو سے یہ وہ تحریر ہے
جوہرؔ اور حاجب و درباں کی خوشامد کیا خوب
عرش و کرسی پہ گزر ہے ترے درباری کا
دل و جاں سونپ چکے ہم تجھے اے جان جہاں
اب ہمیں خوف ہی کیا اپنی گرفتاری کا
ہوں بے ہراس یہ مجھے رکھیں کسی جگہ
ڈر ہو وہاں کہ تیری حکومت جہاں نہ ہو
مئے اسلام کا بھلا جوہرؔ
نشہ چڑھ کر کہیں اترتا ہے
وہی دن ہے ہماری عید کا دن
جو تری یاد میں گزرتا ہے
اجل استادہ ہے بالیں پہ مریض غم عشق
آنکھ تو کھول ذرا وقت ہے بیداری کا
ہم کو تو ایک تجھ سے دو عالم میں ہے غرض
سب بدگماں ہوا کریں تو بدگماں نہ ہو
دیر و حرم میں ڈھونڈ کے سب تھک گئے اسے
اب کون کہہ سکے کہ کہاں ہو کہاں نہ ہو
کرنا ہی تھا حرام تو پھر وعدہ کس لیے
یہ کیا کہ مے حلال وہاں ہو یہاں نہ ہو
ہمت نہ ہار دے کوئی منزل کے سامنے
پروردگار یوں بھی کوئی ناتواں نہ ہو
جوہرؔ اس ایک دل کے لیے اتنے مشغلے
کی ہے خدا کی چاہ تو عشق بتاں نہ ہو
ملنے تو پھر چلے ہو مشیخت پناہ سے
قشقہ کا دیکھو آج جبیں پر نشاں نہ ہو
قید اور قید بھی تنہائی کی
شرم رہ جائے شکیبائی کی
در بت خانہ سے بڑھنے ہی نہ پائے
گرچہ اک عمر جبیں سائی کی
ہم نے ہر ذرہ کو محمل پایا
ہے یہ قسمت ترے صحرائی کی
وقف ہے اس کے لیے جان عزیز
کعبہ کے خادم و شیدائی کی
قیس کو ناقۂ لیلیٰ نہ ملا
گو بہت بادیہ پیمائی کی
سوجھتا کیا ہمیں ان آنکھوں سے
شرط تھی قلب کی بینائی کی
نظر آیا ہمیں ہر چیز میں تو
اس پہ یہ دھوم ہے یکتائی کی
کعبہ و قدس میں گھر کیا یہ بھی
اک ادا ہے مرے ہرجائی کی
نہ سہی تیغ تجلی ہی سہی
آنکھ جھپکے نہ تماشائی کی
عشق کو ہم نے کیا نذر جنوں
عمر بھر میں یہی دانائی کی
رب عزت کے لیے بھی کوئی رہنے دو خطاب
تم خداوند ہی کہلاؤ خدا اور سہی
عشق اور جور ستم گر کا گلہ
حد ہے اے دل یہی رسوائی کی
کل کو ہے پھر وہی زنداں جوہرؔ
ٹھیک کیا آپ سے سودائی کی
خوگر جور پہ تھوڑی سی جفا اور سہی
اس قدر ظلم پہ موقوف ہے کیا اور سہی
بندگی میں تری سہتے ہی ہیں لو کی لپٹیں
چند دن کے لیے دوزخ کی ہوا اور سہی
کر گئی زندۂ جاوید ہمیں
تیغ قاتل نے مسیحائی کی
خوف غماز عدالت کا خطر دار کا ڈر
ہیں جہاں اتنے وہاں خوف خدا اور سہی
ہو نہ تقلید دلا مقتل میں
کہیں موسیٰ سے تمنائی کی
کشور کفر میں کعبہ کو بھی شامل کر لو
سیر ظلمات کو تھوڑی سی فضا اور سہی
جس نے ہنگامہ عدالت کا تری دیکھا ہے
اس گنہ گار کو اک روز جزا اور سہی
ہم معنی ہوس نہیں اے دل ہوائے دوست
راضی ہو بس اسی میں ہو جس میں رضائے دوست
عہد اول کو بھی اچھا ہے جو پورا کر دو
تم وفادار ہو تھوڑی سی وفا اور سہی
ہم وفا کیشوں کا ایماں بھی ہے پروانہ صفت
شمع محفل جو وہ کافر نہ رہا اور سہی
دین و دل جا ہی چکا جان بھی جاتی ہے تو جائے
ترکش کفر میں اک تیر قضا اور سہی
ملتی نہیں کسی کو سند امتحاں بغیر
دار و رسن کے حکم کو سمجھو صلائے دوست
طغرائے امتیاز ہے خود ابتلائے دوست
اس کے بڑے نصیب جسے آزمائے دوست
یاں جنبش مژہ بھی گناہ عظیم ہے
چپ چاپ دیکھتے رہو جو کچھ دکھائے دوست
ہے روح بھی نثار بدن بھی نثار یار
دل بھی فدائے دوست جگر بھی فدائے دوست
جوہرؔ وہ صبر آپ ہی دے گا اگر ہمیں
ہے امتیاز وعدۂ صبر آزمائے دوست
یعقوب پر فضول ہوئے لوگ خندہ زن
یاں لا مکاں سے آتی ہے بوئے قبائے دوست
کیا کم تھا ہجر یار ہی پھر اس پہ رشک غیر
دشمن کو بھی خدا نہ کرے مبتلائے دوست
تشنہ لب ہوں مدتوں سے دیکھیے
کب در مے خانۂ کوثر کھلے
طاقت پرواز ہی جب کھو چکی
پھر ہوا کیا گر ہوا میں پر کھلے
رونمائی کے لیے لایا ہوں جاں
اب تو شاید چہرۂ انور کھلے
رات تلچھٹ تک نہ چھوڑی تب کہیں
راز ہائے بادہ و ساغر کھلے
چاک کر سینہ کو پہلو چیر ڈال
یوں ہی کچھ حال دل مضطر کھلے
اب کہیں ٹوٹا ہے باطل کا طلسم
حق کے عقدے اب کہیں ہم پر کھلے
ہوں جو کثرت ہی کے قائل ان پہ کیا
راز فتح سبط پیغمبر کھلے
اب تو کشتی کے موافق ہے ہوا
ناخدا کیا دیر ہے لنگر کھلے
یہ نظر بندی تو نکلی رد سحر
دیدہ ہائے ہوش اب جا کر کھلے
لو وہ آ پہنچا جنوں کا قافلہ
پاؤں زخمی خاک منہ پر سر کھلے
جیتے جی تو کچھ نہ دکھلایا مگر
مر کے جوہرؔ آپ کے جوہر کھلے
خواہشیں نفس کی کرتے تو ہو پوری لیکن
اس سے بہتر نہیں آلا کوئی شیطان کے پاس
آدمیت ہی تو بنیاد ہے ہر خوبی کی
ہو نہ یہ بھی تو دھرا کیا ہے پھر انسان کے پاس
مت سمجھنا انہیں کم مایہ غنی ہیں یہ لوگ
کنز مخفی ہے ہر اک صاحب ایمان کے پاس
ملک سمجھو اسے پامال بجا ہے اک دین
اب تو بس اک یہی دولت ہے مسلمان کے پاس
مشکور جنوں آپ ہیں وحشی ترے ان کو
محمل کا گلا ہے نہ بیاباں کی شکایت
لگتے ہی تیر تمہارا گئی یوں جان نکل
بیٹھ کر جاتی گھڑی دو گھڑی مہمان کے پاس
ہرگز نہ ہو اے دل غم جاناں کی شکایت
کرتا ہے بھلا کوئی بھی مہماں کی شکایت
جبہ سائی کی بھی کچھ ہوگی تمہیں کو امید
گالیاں کھاتے ہو جا جا کے دربان کے پاس
گو صبر قیامت کا ہے درکار پر اے دل
یاں کفر ہے اس دشمن ایماں کی شکایت
آزاد تھے کب قید غم عشق سے ہم کو
زنجیر کا شکوہ ہے نہ زنداں کی شکایت
صحبت یار ہے اے دل تجھے گھر بیٹھے نصیب
پھر ترا کام ہے کیا حاجب دربان کے پاس
تھا ان کے تصور میں بھی اک وصل کا عالم
ہو سکتی ہے پھر کیا شب ہجراں کی شکایت
کیوں فکر ہو کیا اپنے کبھی دن نہ پھریں گے
بیکار ہے پھر گردش دوراں کی شکایت
فیض سے تیرے ہی اے قید فرنگ
بال و پر نکلے قفس کے در کھلے
بن جائے گا یہ رشتۂ تسبیح ایک دن
دھوکا نہ کھائیو کہیں زنار دیکھ کر
شرمندہ کفن نے کیا اس درجہ کہ تا حشر
اب جیب کا شکوہ ہے نہ داماں کی شکایت
لاکھ حربے سہی ہر وضع کے شیطان کے پاس
ڈھال ایمان کی موجود ہو انسان کے پاس
حکم حاکم نہ سہی مرگ مفاجات سے کم
مالک الملک پہ ایماں کی سزا اور سہی
خود کردۂ ازل سے تجلی طور کے
جھپکے کی آنکھ کیا تری تلوار دیکھ کر
ان سے نہ ستم کا نہ تغافل کا گلا ہے
ہو جاتی ہے ہاں پاکیٔ داماں کی شکایت
آساں پسندیوں سے ہیں بیزار اہل عشق
چھانٹا یہ مرحلہ بھی ہے دشوار دیکھ کر
ہم نے دل بھر کے کچھ اس طرح نکالے ارماں
کہ پھٹکتا نہیں دل جا کے اب ارمان کے پاس
جنس گراں تو تھی نہیں کوئی مگر یہ جان
لائے ہیں ہم بھی رونق بازار دیکھ کر
اس شان امتیاز کو کہ اہل تحائف
مومن سمجھ رہے ہیں ہمیں خوار دیکھ کر
منظور نہیں جب انہیں خود جلوہ دکھانا
کیوں کیجئے پھر حاجب و درباں کی شکایت
ہے رشک کیوں یہ ہم کو سر دار دیکھ کر
دینے ہیں بادہ ظرف قدح خوار دیکھ کر
لڑتا ہے ہوا سے بھی کوئی لاکھ خفا ہو
بے جا ہے تری زلف پریشاں کی شکایت
ہیں عشق کے بیمار بھی دنیا سے نرالے
ہے درد کے بدلے انہیں درماں کی شکایت
اب ہوا ہے ماسوا کا پردہ فاش
معرفت کے اب کہیں دفتر کھلے
وہ یہ نہ کہیں گے کہ تمہیں موت نہ آئی
کس منہ سے کریں ہم شب ہجراں کی شکایت
تھا نذر ازل ہی سے دل اس جان جہاں کی
کرتے رہو یوں ابرو و مژگاں کی شکایت
کچھ بھی تو ضبط گریہ نہ شبنم سے ہو سکا
بلبل کو فصل گل میں گرفتار دیکھ کر
یہ کیا کہ سجدہ گاہ ہے ہر سنگ آستاں
گھسنا جبین کو کو خانۂ خمار دیکھ کر
ہر سینہ آج ہے ترے پیکاں کا منتظر
ہو انتخاب اے نگۂ یار دیکھ کر
ہم خاصگان اہل نظر اور یہ قتل عام
جور و ستم بھی کر تو ستم گار دیکھ کر
پھر ہو رہا ہے شور صلائے نبرد عشق
ہاں اے دہان زخم جواب الاماں نہ ہو
سوز دروں سے جل بجھو لیکن دھواں نہ ہو
ہے درد دل کی شرط کہ لب پر فغاں نہ ہو
اس درد لا جواب کی کیونکر کروں دوا
وہ حال دل نشیں بھی تو مجھ سے بیاں نہ ہو
بازار جاں فروش میں سودا نہ ہو یہ کیا
گاہک ملے تو جنس تو یہ بھی گراں نہ ہو
کیا کیجے چن کے مائدۂ دل کو لخت لخت
تیرا ہی تیر سینے میں جب مہماں نہ ہو
کیا فائدہ گر اس نے چھپایا بھی درد دل
یہ کام جب بنے کہ مژہ خونچکاں نہ ہو
ہے وصل یار کی بھی تمنا کا حوصلہ
ڈر یہ بھی ہے کہ طبع عدو پر گراں نہ ہو
خوف رقیب کا تو یہ عالم اور اس پہ عشق
سب چاہتے ہیں چاہ کا ان پر گماں نہ ہو
پہلو سے دل کو لے کے وہ کہتے ہیں ناز سے
کیا آئیں گھر میں آپ ہی جب میزباں نہ ہو
کس سے آزردہ مرے قاتل کا خنجر ہو گیا
کیا ہوا جو آج یوں جامے سے باہر ہو گیا
سنتے ہی جس کے خلق سے کہرام مچ گیا
جوہرؔ وہ تیری ہی تو کہیں داستاں نہ ہو
کیوں نہیں ملتا ابھی تک تشنہ لب ہیں بادہ خوار
کیا ترا ساغر بھی ساقی جام کوثر ہو گیا
میرا شہرہ آج اک عالم میں گھر گھر ہو گیا
تیرے ہاتھوں مجھ کو قاتل یہ میسر ہو گیا
جوش وحشت کا ارادہ تھا کہ عریاں ہی رہے
بارے مر کر اک کفن مجھ کو میسر ہو گیا
تیر نگہ نے کر دیا دونوں کا فیصلہ
باہم دل و جگر میں یہ تکرار دیکھ کر
اس قدر وحشت بھی اے دست جنوں کس کام کی
تیرے ہاتھوں میرا جینا بھی تو دوبھر ہو گیا
دل کو ہلاک جلوۂ جاناں بنائیے
اس بت کدے کو کعبۂ ایماں بنائیے
اس کی رسوائی کا بھی آیا نہ تجھ کو کچھ خیال
کس قدر بے باک تو اے دیدۂ تر ہو گیا
پھر دیجئے نگاہ کو پیغام جستجو
منزل سے کیوں نظر کو گریزاں بنائیے
دوڑائیے وہ روح کہ ہر ذرہ جاگ اٹھے
اجڑے ہوئے وطن کو گلستاں بنائیے
آخر تو ختم ہوں گی کہیں قید کی حدیں
یوسف کو آپ رونق زنداں بنائیے
مژدہ اے گنج شہیداں تیرے بھی دن پھر گئے
آج دل برداشتہ دنیا سے جوہرؔ ہو گیا
جنوں ہی سے مگر بالکل دل دیوانہ خالی ہے
نہ مانوں گا اثر سے نعرۂ مستانہ خالی ہے
طوفان بن کے اٹھیے جہان خراب میں
ہستی کو اک شرارۂ رقصاں بنائیے
پھر اپنے دل میں کیجئے پیدا کوئی تڑپ
پھر مشکل حیات کو آساں بنائیے
جوہرؔ اسیریوں کی کوئی انتہا بھی ہے
آزاد اک نظام پریشاں بنائیے
ہمیں ذوق اسیری چھوڑتا ہے کب گلستاں میں
قفس میں جب تک اے صیاد کوئی خانہ خالی ہے
مروت سے تری ہم بیکسوں کی شرم رہ جاتی
بھری محفل میں ساقی اک یہی پیمانہ خالی ہے
دلا ڈر ہے کہیں کعبہ پہنچ کر تو نہ کہہ بیٹھے
کہ واپس چل یہاں سے اب تو یہ بت خانہ خالی ہے
یہ مانا ہم نے جوہرؔ شہر چھوڑا پر کہاں جائیں
وہ تیرے دم سے تھا آباد اب ویرانہ خالی ہے
مہماں دل جوہرؔ کا بلا اذن سدھارا
پیکاں تو گیا رہ گئی پیکاں کی شکایت
مزید شاعری پڑھیے اور دوسرے شعراء کو دریافت کیجیے۔