مکمل شاعری
عرش تک جو بے خطا جاتا ہے یہ وہ تیر ہے
غیر سمجھا ہے کہ میری آہ بے تاثیر ہے
چھوڑ میری فکر غافل رو خود اپنی قید پر
جس کو تو زیور سمجھتا ہے وہی زنجیر ہے
خوگر قید وفا پر کھل چکا زنداں کا راز
جرم تھی وہ قید یہ اس جرم کی تعزیر ہے
ہو نہ الجھن جب جنون جامہ ور کامل نہ ہو
جب تلک دامن ہے خار دشت دامن گیر ہے
خون ناحق کا کسی کے شبہ اور تم پر مگر
سینۂ جوہرؔ میں دیکھو تو یہ کس کا تیر ہے
بے گناہی سے بھی بڑھ کر ہے اگر کوئی گناہ
تو سزائے عشق پا کر خجلت تقصیر ہے
پائیداری میں ہے قصروں سے سوا کچی سی قبر
جو قیامت تک رہے قائم یہ وہ تعمیر ہے
دار ہی بنتی ہے اے دل زینۂ معراج عشق
خواب آغاز محبت کی یہی تعبیر ہے
سجن و جنت دونوں اے کافر ہیں اس دنیا کے نام
وہ ازل سے بخت مومن یہ تری تقدیر ہے
ہاتھ تو ہوں گے قلم پر نامہ بر یہ بھی کہا
دل چرا لیتی ہے پہلو سے یہ وہ تحریر ہے
— مولانا محمد علی جوہر