مکمل شاعری

ڈر نہیں مجھ کو گناہوں کی گراں باری کا

تیری رحمت ہے سبب میری سبک ساری کا

دار نے اک سگ دنیا کو یہ بخشا ہے عروج

ہے فرشتوں میں بھی چرچا مری دیں داری کا

میں فدا آج بھی ہو جائے وہی ایک نگاہ

خاتمہ ہو کہیں اس دور کی خودداری کا

ساقیا سب کو تری ایک نظر کافی تھی

تھا کسے ہوش ترے عہد میں ہشیاری کا

جان بھی چیز ہے کوئی کہ رکھیں تم سے دریغ

پاس اتنا بھی نہ ہو رسم وفاداری کا

عاشقوں کے لیے ہے دار ہی داروئے شفا

عشق کی طب میں دوا نام ہے بیماری کا

جوہرؔ اور حاجب و درباں کی خوشامد کیا خوب

عرش و کرسی پہ گزر ہے ترے درباری کا

دل و جاں سونپ چکے ہم تجھے اے جان جہاں

اب ہمیں خوف ہی کیا اپنی گرفتاری کا

اجل استادہ ہے بالیں پہ مریض غم عشق

آنکھ تو کھول ذرا وقت ہے بیداری کا

— مولانا محمد علی جوہر