مکمل شاعری

قید اور قید بھی تنہائی کی

شرم رہ جائے شکیبائی کی

در بت خانہ سے بڑھنے ہی نہ پائے

گرچہ اک عمر جبیں سائی کی

ہم نے ہر ذرہ کو محمل پایا

ہے یہ قسمت ترے صحرائی کی

وقف ہے اس کے لیے جان عزیز

کعبہ کے خادم و شیدائی کی

قیس کو ناقۂ لیلیٰ نہ ملا

گو بہت بادیہ پیمائی کی

سوجھتا کیا ہمیں ان آنکھوں سے

شرط تھی قلب کی بینائی کی

نظر آیا ہمیں ہر چیز میں تو

اس پہ یہ دھوم ہے یکتائی کی

کعبہ و قدس میں گھر کیا یہ بھی

اک ادا ہے مرے ہرجائی کی

نہ سہی تیغ تجلی ہی سہی

آنکھ جھپکے نہ تماشائی کی

عشق کو ہم نے کیا نذر جنوں

عمر بھر میں یہی دانائی کی

عشق اور جور ستم گر کا گلہ

حد ہے اے دل یہی رسوائی کی

کل کو ہے پھر وہی زنداں جوہرؔ

ٹھیک کیا آپ سے سودائی کی

کر گئی زندۂ جاوید ہمیں

تیغ قاتل نے مسیحائی کی

ہو نہ تقلید دلا مقتل میں

کہیں موسیٰ سے تمنائی کی

— مولانا محمد علی جوہر