مکمل شاعری

عشق بن کر جئے تو خاک جیے

زندہ وہ ہے جو ان پہ مرتا ہے

گلہ اے دل ابھی سے کرتا ہے

عشق کا دم اسی پہ بھرتا ہے

جان دیتا ہے عیش فانی پر

بس اسی زندگی پہ مرتا ہے

راحت جاوداں کو بھول گیا

کوئی دنیا میں یہ بھی کرتا ہے

نام پر اس کے سب جو دے بیٹھا

وہی اک ہے جو نام کرتا ہے

جس کو دنیا نے نامراد کیا

وہی ناکام کام کرتا ہے

وقف مومن ہے آزمائش عشق

اس میں پورا وہی اترتا ہے

قول مومن ہے اس کے فعل کی شرح

وہ جو کہتا ہے کر گزرتا ہے

ہے مسلماں کی بس یہی پہچان

کہ فقط اک خدا سے ڈرتا ہے

اس قدر احتیاط اے صیاد

کہ قفس میں بھی پر کترتا ہے

آج کر لو جو کر سکو کل تک

کون جیتا ہے کون مرتا ہے

مطمئن رہ دلا وہ جان جہاں

وعدہ کر کے کہیں مکرتا ہے

میرے رنگ کفن کی شوخی دیکھ

یوں ہی عاشق ترا سنورتا ہے

قلزم عشق میں گرا سو گرا

اس کا ڈوبا کہیں ابھرتا ہے

مئے اسلام کا بھلا جوہرؔ

نشہ چڑھ کر کہیں اترتا ہے

وہی دن ہے ہماری عید کا دن

جو تری یاد میں گزرتا ہے

— مولانا محمد علی جوہر