شاعر کی معلومات لوڈ ہو رہی ہیں...
میں نے پلکوں سے در یار پہ دستک دی ہے
میں وہ سائل ہوں جسے کوئی صدا یاد نہیں
شاعر کی معلومات لوڈ ہو رہی ہیں...
Saghar Siddiqui
1928 – 1974
Saghir Siddiqui (1928–1974) was a prominent Pakistani poet, known for his soulful and poignant poetry. Born in Uttar Pradesh, India, his real name was Muhammad Akhtar, but he is famously known by his pen name, Saghir Siddiqui. His poetry often delves into themes of love, pain, loss, and the harsh realities of life. Siddiqui’s works reflect deep emotional intensity, and his unique style earned him a prominent place in Urdu literature. His life, however, was marked by personal struggles, including a battle with alcoholism, which influenced his poetry. Despite facing many hardships, including the loss of his loved ones and financial instability, Saghir Siddiqui's poetry continues to resonate with readers. He died tragically in 1974 at the age of 46, but his legacy endures through his powerful words and timeless verses. His work remains a significant part of Urdu literary history.
ان کے کلام کے چند منتخب اشعار پڑھیے۔
میں نے پلکوں سے در یار پہ دستک دی ہے
میں وہ سائل ہوں جسے کوئی صدا یاد نہیں
کیسے بھر آئیں سر شام کسی کی آنکھیں
کیسے تھرائی چراغوں کی ضیا یاد نہیں
زندگی جبر مسلسل کی طرح کاٹی ہے
جانے کس جرم کی پائی ہے سزا یاد نہیں
صرف دھندلائے ستاروں کی چمک دیکھی ہے
کب ہوا کون ہوا کس سے خفا یاد نہیں
یہ جو دیوانے سے دو چار نظر آتے ہیں
ان میں کچھ صاحب اسرار نظر آتے ہیں
آؤ اک سجدہ کریں عالم مدہوشی میں
لوگ کہتے ہیں کہ ساغرؔ کو خدا یاد نہیں
میں نے جن کے لیے راہوں میں بچھایا تھا لہو
ہم سے کہتے ہیں وہی عہد وفا یاد نہیں
تیری محفل کا بھرم رکھتے ہیں سو جاتے ہیں
ورنہ یہ لوگ تو بیدار نظر آتے ہیں
ہے دعا یاد مگر حرف دعا یاد نہیں
میرے نغمات کو انداز نوا یاد نہیں
دور تک کوئی ستارہ ہے نہ کوئی جگنو
مرگ امید کے آثار نظر آتے ہیں
مرے دامن میں شراروں کے سوا کچھ بھی نہیں
آپ پھولوں کے خریدار نظر آتے ہیں
یہ کناروں سے کھیلنے والے
ڈوب جائیں تو کیا تماشا ہو
وقت کی چند ساعتیں ساغرؔ
لوٹ آئیں تو کیا تماشا ہو
میں تلخیٔ حیات سے گھبرا کے پی گیا
غم کی سیاہ رات سے گھبرا کے پی گیا
اتنی دقیق شے کوئی کیسے سمجھ سکے
یزداں کے واقعات سے گھبرا کے پی گیا
حشر میں کون گواہی مری دے گا ساغرؔ
سب تمہارے ہی طرفدار نظر آتے ہیں
وہ بلائیں تو کیا تماشا ہو
ہم نہ جائیں تو کیا تماشا ہو
بندہ پرور جو ہم پہ گزری ہے
ہم بتائیں تو کیا تماشا ہو
تیری صورت جو اتفاق سے ہم
بھول جائیں تو کیا تماشا ہو
کل جنہیں چھو نہیں سکتی تھی فرشتوں کی نظر
آج وہ رونق بازار نظر آتے ہیں
آج ہم بھی تری وفاؤں پر
مسکرائیں تو کیا تماشا ہو
چھلکے ہوئے تھے جام پریشاں تھی زلف یار
کچھ ایسے حادثات سے گھبرا کے پی گیا
میں آدمی ہوں کوئی فرشتہ نہیں حضور
میں آج اپنی ذات سے گھبرا کے پی گیا
دنیائے حادثات ہے اک دردناک گیت
دنیائے حادثات سے گھبرا کے پی گیا
بھیگی پلکیں سوچ کی الجھن دامن تھامے پوچھ رہی ہیں
کب تک تار گریباں یارو سلجھائے گا ٹھنڈا ہاتھ
پتھر پتھر جوت جلے گی ساحل ساحل شعلے ہوں گے
بھیگی بھیگی سرد ہوا میں شرمائے گا ٹھنڈا ہاتھ
فریب خوردہ تبسم خریدنے کے لیے
وقار دیدۂ پر نم فروخت ہوتا ہے
ساغرؔ وہ کہہ رہے تھے کہ پی لیجیے حضور
ان کی گزارشات سے گھبرا کے پی گیا
وقت کے رنگیں گلدستے کو یاد آئے گا ٹھنڈا ہاتھ
جب بکھریں گے وہ گیسو تو مر جائے گا ٹھنڈا ہاتھ
مآل نغمہ و ماتم فروخت ہوتا ہے
خوشی کے ساتھ یہاں غم فروخت ہوتا ہے
وہ جس کو آج بھی کچھ لوگ حسن کہتے ہیں
بصد نگارش پیہم فروخت ہوتا ہے
گرم لہو کی بوندیں بوئیں تنہائی کی مٹی ڈالیں
پت جھڑ آئے ان شاخوں پر اگ آئے گا ٹھنڈا ہاتھ
باغ کے مالی میرے غنچے غیروں نے پامال کئے
پھر بھی تیری پھلواری کو مہکائے گا ٹھنڈا ہاتھ
بہار وادیٔ گنگ و جمن کے ساتھ یہاں
وقار کوثر و زمزم فروخت ہوتا ہے
ساز تغزل چھیڑنے والو اے افسانے لکھنے والو
آج لکیروں کی تفسیریں دہرائے گا ٹھنڈا ہاتھ
کانٹے تو خیر کانٹے ہیں اس کا گلہ ہی کیا
پھولوں کی واردات سے گھبرا کے پی گیا
بڑے حسین گھنیرے سیاہ پردوں میں
جمال عصمت مریم فروخت ہوتا ہے
طلسم خانۂ صد رنگ و بو میں اے ساغرؔ
فریب شعلہ و شبنم فروخت ہوتا ہے
وہ جسم مرمریں نظریں بھی جس کو چھو نہ سکیں
برائے رونق عالم فروخت ہوتا ہے
چشم ساقی پر تبسم میکدہ بہکا ہوا
آؤ قسمت کو حریف کہکشاں کرتے چلو
جذبۂ سوز طلب کو بے کراں کرتے چلو
کو بہ کو روشن چراغ کارواں کرتے چلو
چھین لاؤ آسماں سے مہر و مہ کی عظمتیں
اور ٹوٹے جھونپڑوں کو ضو فشاں کرتے چلو
جن سے زندہ ہو یقین و آگہی کی آبرو
عشق کی راہوں میں کچھ ایسے گماں کرتے چلو
چھیڑ کر ساغرؔ کسی کے گیسوؤں کی داستاں
ان شگوفوں کو ذرا شعلہ زباں کرتے چلو
زندگی کو لوگ کہتے ہیں برائے بندگی
زندگی کٹ جائے گی ذکر بتاں کرتے چلو
وقت کی عمر کیا بڑی ہوگی
اک ترے وصل کی گھڑی ہوگی
ہر نفس اے جینے والو شغل پیمانہ رہے
بے خودی کو زندگی کا پاسباں کرتے چلو
زلف بل کھا رہی ہے ماتھے پر
چاندنی سے صبا لڑی ہوگی
مشعلیں لے کے تمہارے غم کی
ہم اندھیروں میں چلا کرتے تھے
ترک احساس محبت مشکل
ہاں مگر اہل وفا کرتے تھے
بکھری بکھری ہوئی زلفوں والے
قافلے روک لیا کرتے تھے
پڑ گئیں پیراہن صبح چمن پر سلوٹیں
یاد آ کر رہ گئی ہے بے خودی کی ایک شام
ایک نغمہ ایک تارا ایک غنچہ ایک جام
اے غم دوراں غم دوراں تجھے میرا سلام
موت کہتے ہیں جس کو اے ساغرؔ
زندگی کی کوئی کڑی ہوگی
تیری عصمت ہو کہ ہو میرے ہنر کی چاندنی
وقت کے بازار میں ہر چیز کے لگتے ہیں دام
آج گلشن میں شگوفے ساغرؔ
شکوۂ باد صبا کرتے تھے
اے حسن لالہ فام! ذرا آنکھ تو ملا
خالی پڑے ہیں جام! ذرا آنکھ تو ملا
کہہ رہے ہیں چند بچھڑے رہروؤں کے نقش پا
ہم کریں گے انقلاب جستجو کا اہتمام
یہ جام یہ سبو یہ تصور کی چاندنی
ساقی کہاں مدام! ذرا آنکھ تو ملا
پامال ہو نہ جائے ستاروں کی آبرو
اے میرے خوش خرام! ذرا آنکھ تو ملا
ہم بنائیں گے یہاں ساغرؔ نئی تصویر شوق
ہم تخیل کے مجدد ہم تصور کے امام
جھوم کر گاؤ میں شرابی ہوں
رقص فرماؤ میں شرابی ہوں
کہتے ہیں آنکھ آنکھ سے ملنا ہے بندگی
دنیا کے چھوڑ کام! ذرا آنکھ تو ملا
کیا وہ نہ آج آئیں گے تاروں کے ساتھ ساتھ
تنہائیوں کی شام! ذرا آنکھ تو ملا
ایک سجدہ بنام مے خانہ
دوستو آؤ میں شرابی ہوں
ہیں راہ کہکشاں میں ازل سے کھڑے ہوئے
ساغرؔ ترے غلام! ذرا آنکھ تو ملا
زلف آوارہ گریباں چاک گھبرائی نظر
ان دنوں یہ ہے جہاں میں زندگانی کا نظام
ساقی مجھے بھی چاہئے اک جام آرزو
کتنے لگیں گے دام! ذرا آنکھ تو ملا
آج ان ریشمی گھٹاؤں کو
یوں نہ بکھراؤ میں شرابی ہوں
مجھ پہ ظاہر ہے آپ کا باطن
منہ نہ کھلواؤ میں شرابی ہوں
کیوں گرہ گیسوؤں میں ڈالی ہے
جاں کسی پھول کی اڑی ہوگی
لوگ کہتے ہیں رات بیت چکی
مجھ کو سمجھاؤ میں شرابی ہوں
حادثے روز ہوتے رہتے ہیں
بھول بھی جاؤ میں شرابی ہوں
اے عدم کے مسافرو ہشیار
راہ میں زندگی کھڑی ہوگی
بات پھولوں کی سنا کرتے تھے
ہم کبھی شعر کہا کرتے تھے
کیا خبر تھی کہ نوک خنجر بھی
پھول کی ایک پنکھڑی ہوگی
اب کہاں ایسی طبیعت والے
چوٹ کھا کر جو دعا کرتے تھے
دستکیں دے رہی ہے پلکوں پر
کوئی برسات کی جھڑی ہوگی
التجا کا ملال کیا کیجے
ان کے در پر کہیں پڑی ہوگی
چند تارے ٹوٹ کر دامن میں میرے آ گرے
میں نے پوچھا تھا ستاروں سے ترے غم کا مقام
تاروں سے میرا جام بھرو میں نشے میں ہوں
اے ساکنان خلد سنو میں نشے میں ہوں
ٹھہرو ابھی تو صبح کا مارا ہے ضو فشاں
دیکھو مجھے فریب نہ دو میں نشے میں ہوں
کچھ پھول کھل رہے ہیں سر شاخ مے کدہ
تم ہی ذرا یہ پھول چنو میں نشے میں ہوں
میلہ یوں ہی رہے یہ سر رہ گزار زیست
اب جام سامنے ہی رکھو میں نشے میں ہوں
چاک دامن کو جو دیکھا تو ملا عید کا چاند
اپنی تقدیر کہاں بھول گیا عید کا چاند
نشہ تو موت ہے غم ہستی کی دھوپ میں
بکھرا کے زلف ساتھ چلو میں نشے میں ہوں
دور ویران بسیرے میں دیا ہو جیسے
غم کی دیوار سے دیکھا تو لگا عید کا چاند
چشم تو وسعت افلاک میں کھوئی ساغرؔ
دل نے اک اور جگہ ڈھونڈ لیا عید کا چاند
میں ڈگمگا رہا ہوں بیابان ہوش میں
میرے ابھی قریب رہو میں نشے میں ہوں
تلخیاں بڑھ گئیں جب زیست کے پیمانے میں
گھول کر درد کے ماروں نے پیا عید کا چاند
لے کے حالات کے صحراؤں میں آ جاتا ہے
آج بھی خلد کی رنگین فضا عید کا چاند
ان کے ابروئے خمیدہ کی طرح تیکھا ہے
اپنی آنکھوں میں بڑی دیر چھپا عید کا چاند
ہے صرف اک تبسم رنگیں بہت مجھے
ساغرؔ بہ دوش لالہ رخو میں نشے میں ہوں
پائل چھنک رہی ہے نگار خیال کی
کچھ اہتمام رقص کرو میں نشے میں ہوں
جانے کیوں آپ کے رخسار مہک اٹھتے ہیں
جب کبھی کان میں چپکے سے کہا عید کا چاند
اک فریب اور زندگی کے لیے
ہاتھ پھیلاؤ وقت نازک ہے
جام ٹکراؤ وقت نازک ہے
رنگ چھلکاؤ وقت نازک ہے
حسرتوں کی حسین قبروں پر
پھول برساؤ وقت نازک ہے
بزم ساغرؔ ہے گوش بر آواز
کچھ تو فرماؤ وقت نازک ہے
تشنگی تشنگی ارے توبہ
زلف لہراؤ وقت نازک ہے
مسکراؤ بہار کے دن ہیں
گل کھلاؤ بہار کے دن ہیں
تم گئے رونق بہار گئی
تم نہ جاؤ بہار کے دن ہیں
دختران چمن کے قدموں پر
سر جھکاؤ بہار کے دن ہیں
ساقی کی اک نگاہ کے افسانے بن گئے
کچھ پھول ٹوٹ کر مرے پیمانے بن گئے
ہاں کوئی واردات ساغر و مے
کچھ سناؤ بہار کے دن ہیں
جو پی سکے نہ سرخ لبوں کی تجلیاں
دنیا کے تجربات سے انجانے بن گئے
جن پر نہ سائے زلف غزالاں کے پڑ سکے
احساس کی نگاہ میں ویرانے بن گئے
ساغرؔ وہی مقام ہے اک منزل فراز
اپنے بھی جس مقام پہ بیگانے بن گئے
مے نہیں ہے تو اشک غم ہی سہی
پی بھی جاؤ بہار کے دن ہیں
کاٹی جہاں تصور جاناں میں ایک شب
کہتے ہیں لوگ اس جگہ بت خانے بن گئے
اے جاں! کوئی تبسم رنگیں کی واردات
پھیکا ہے ماہتاب کہ موسم خراب ہے
چراغ طور جلاؤ بڑا اندھیرا ہے
ذرا نقاب اٹھاؤ بڑا اندھیرا ہے
جام و سبو کے ہوش ٹھکانے نہیں رہے
مطرب اٹھا رباب کہ موسم خراب ہے
زلفوں کو بے خودی کی ردا میں لپیٹ دے
ساقی پئے شباب کہ موسم خراب ہے
غنچوں کو اعتبار طلوع چمن نہیں
رخ سے الٹ نقاب کہ موسم خراب ہے
لا اک خم شراب کہ موسم خراب ہے
کر کوئی انقلاب کہ موسم خراب ہے
وہ جن کے ہوتے ہیں خورشید آستینوں میں
انہیں کہیں سے بلاؤ بڑا اندھیرا ہے
ابھی تو صبح کے ماتھے کا رنگ کالا ہے
ابھی فریب نہ کھاؤ بڑا اندھیرا ہے
مجھے تمہاری نگاہوں پہ اعتماد نہیں
مرے قریب نہ آؤ بڑا اندھیرا ہے
فراز عرش سے ٹوٹا ہوا کوئی تارہ
کہیں سے ڈھونڈ کے لاؤ بڑا اندھیرا ہے
بنام زہرہ جبینان خطۂ فردوس
کسی کرن کو جگاؤ بڑا اندھیرا ہے
جسے زبان خرد میں شراب کہتے ہیں
وہ روشنی سی پلاؤ بڑا اندھیرا ہے
بصیرتوں پہ اجالوں کا خوف طاری ہے
مجھے یقین دلاؤ بڑا اندھیرا ہے
رنگ اڑنے لگا ہے پھولوں کا
اب تو آ جاؤ وقت نازک ہے
مزید شاعری پڑھیے اور دوسرے شعراء کو دریافت کیجیے۔