مکمل شاعری
پڑ گئیں پیراہن صبح چمن پر سلوٹیں
یاد آ کر رہ گئی ہے بے خودی کی ایک شام
ایک نغمہ ایک تارا ایک غنچہ ایک جام
اے غم دوراں غم دوراں تجھے میرا سلام
تیری عصمت ہو کہ ہو میرے ہنر کی چاندنی
وقت کے بازار میں ہر چیز کے لگتے ہیں دام
کہہ رہے ہیں چند بچھڑے رہروؤں کے نقش پا
ہم کریں گے انقلاب جستجو کا اہتمام
ہم بنائیں گے یہاں ساغرؔ نئی تصویر شوق
ہم تخیل کے مجدد ہم تصور کے امام
زلف آوارہ گریباں چاک گھبرائی نظر
ان دنوں یہ ہے جہاں میں زندگانی کا نظام
چند تارے ٹوٹ کر دامن میں میرے آ گرے
میں نے پوچھا تھا ستاروں سے ترے غم کا مقام
— ساغر صدیقی