مکمل شاعری

وقت کی عمر کیا بڑی ہوگی

اک ترے وصل کی گھڑی ہوگی

زلف بل کھا رہی ہے ماتھے پر

چاندنی سے صبا لڑی ہوگی

موت کہتے ہیں جس کو اے ساغرؔ

زندگی کی کوئی کڑی ہوگی

کیوں گرہ گیسوؤں میں ڈالی ہے

جاں کسی پھول کی اڑی ہوگی

اے عدم کے مسافرو ہشیار

راہ میں زندگی کھڑی ہوگی

کیا خبر تھی کہ نوک خنجر بھی

پھول کی ایک پنکھڑی ہوگی

دستکیں دے رہی ہے پلکوں پر

کوئی برسات کی جھڑی ہوگی

التجا کا ملال کیا کیجے

ان کے در پر کہیں پڑی ہوگی

— ساغر صدیقی