شاعر کی معلومات لوڈ ہو رہی ہیں...
وہ لوگ میرے بہت پیار کرنے والے تھے
گزر گئے ہیں جو موسم گزرنے والے تھے
شاعر کی معلومات لوڈ ہو رہی ہیں...
Jamal Ehsani
1951 – 1998
Name: Muhammad Jamal Usmani, and his pen name was Jamal. He was born on 21st April 1951 in Sargodha. His ancestral hometown was Panipat. Jamal Ehsani received education up to the B.A. (Bachelor of Arts) level. After completing his education, he moved to Karachi in search of livelihood and became associated with the Department of Information and Broadcasting, Sindh. In addition, Jamal Ehsani was also affiliated with the newspapers Daily Hurriyat, Daily Sawera, and Izhar, Karachi, where he served as an assistant editor. He also used to publish his own magazine titled "Raazdaar". He faced financial difficulties throughout his life. On 10th February 1998, he departed from this world. His literary works include: Sitara-e-Safar Raat ke Jaage Huay His third collection, Taaray ko Mehtaab Kiya, was in progress when he passed away. In 1981, he was awarded the Sohni Dharti Writers Guild Award. Reference: Paimana-e-Ghazal (Volume II), by Muhammad Shams-ul-Haq, Page: [unspecified].
ان کے کلام کے چند منتخب اشعار پڑھیے۔
وہ لوگ میرے بہت پیار کرنے والے تھے
گزر گئے ہیں جو موسم گزرنے والے تھے
نئی رتوں میں دکھوں کے بھی سلسلے ہیں نئے
وہ زخم تازہ ہوئے ہیں جو بھرنے والے تھے
یہ کس مقام پہ سوجھی تجھے بچھڑنے کی
کہ اب تو جا کے کہیں دن سنورنے والے تھے
ہزار مجھ سے وہ پیمان وصل کرتا رہا
پر اس کے طور طریقے مکرنے والے تھے
تمہیں تو فخر تھا شیرازہ بندیٔ جاں پر
ہمارا کیا ہے کہ ہم تو بکھرنے والے تھے
تمام رات نہایا تھا شہر بارش میں
وہ رنگ اتر ہی گئے جو اترنے والے تھے
اس ایک چھوٹے سے قصبے پہ ریل ٹھہری نہیں
وہاں بھی چند مسافر اترنے والے تھے
قرار دل کو سدا جس کے نام سے آیا
وہ آیا بھی تو کسی اور کام سے آیا
کسی نے پوچھا نہیں لوٹتے ہوئے مجھ سے
میں آج کیسے بھلا گھر میں شام سے آیا
ہم ایسے بے ہنروں میں ہے جو سلیقۂ زیست
ترے دیار میں پل بھر قیام سے آیا
جو آسماں کی بلندی کو چھونے والا تھا
وہی منارہ زمیں پر دھڑام سے آیا
میں خالی ہاتھ ہی جا پہنچا اس کی محفل میں
مرا رقیب بڑے انتظام سے آیا
عشق میں خود سے محبت نہیں کی جا سکتی
پر کسی کو یہ نصیحت نہیں کی جا سکتی
کنجیاں خانۂ ہمسایہ کی رکھتے کیوں ہو
اپنے جب گھر کی حفاظت نہیں کی جا سکتی
کچھ تو مشکل ہے بہت کار محبت اور کچھ
یار لوگوں سے مشقت نہیں کی جا سکتی
طائر یاد کو کم تھا شجر دل ورنہ
بے سبب ترک سکونت نہیں کی جا سکتی
اک سفر میں کوئی دو بار نہیں لٹ سکتا
اب دوبارہ تری چاہت نہیں کی جا سکتی
کوئی ہو بھی تو ذرا چاہنے والا تیرا
راہ چلتوں سے رقابت نہیں کی جا سکتی
آسماں پر بھی جہاں لوگ جھگڑتے ہوں جمالؔ
اس زمیں کے لیے ہجرت نہیں کی جا سکتی
بیچ جنگل میں پہنچ کے کتنی حیرانی ہوئی
اک صدا آئی اچانک جانی پہچانی ہوئی
پھر وہی چھت پر اکیلے ہم وہی ٹھنڈی ہوا
کتنے اندیشے بڑھے جب رات طوفانی ہوئی
ہو گئی دور ان گنت ویراں گزر گاہوں کی کوفت
ایک بستی سے گزرنے میں وہ آسانی ہوئی
اس نے بارش میں بھی کھڑکی کھول کے دیکھا نہیں
بھیگنے والوں کو کل کیا کیا پریشانی ہوئی
گرد رہ کے بیٹھتے ہی دیکھتا کیا ہوں جمالؔ
جانی پہچانی ہوئی ہر شکل انجانی ہوئی
چراغ سامنے والے مکان میں بھی نہ تھا
یہ سانحہ مرے وہم و گمان میں بھی نہ تھا
جو پہلے روز سے دو آنگنوں میں تھا حائل
وہ فاصلہ تو زمین آسمان میں بھی نہ تھا
یہ غم نہیں ہے کہ ہم دونوں ایک ہو نہ سکے
یہ رنج ہے کہ کوئی درمیان میں بھی نہ تھا
ہوا نہ جانے کہاں لے گئی وہ تیر کہ جو
نشانے پر بھی نہ تھا اور کمان میں بھی نہ تھا
جمالؔ پہلی شناسائی کا وہ اک لمحہ
اسے بھی یاد نہ تھا میرے دھیان میں بھی نہ تھا
جب کبھی خواب کی امید بندھا کرتی ہے
نیند آنکھوں میں پریشان پھرا کرتی ہے
یاد رکھنا ہی محبت میں نہیں ہے سب کچھ
بھول جانا بھی بڑی بات ہوا کرتی ہے
دیکھ بے چارگیٔ کوئے محبت کوئی دم
سائے کے واسطے دیوار دعا کرتی ہے
صورت دل بڑے شہروں میں رہ یک طرفہ
جانے والوں کو بہت یاد کیا کرتی ہے
دو اجالوں کو ملاتی ہوئی اک راہ گزار
بے چراغی کے بڑے رنج سہا کرتی ہے
بکھر گیا ہے جو موتی پرونے والا تھا
وہ ہو رہا ہے یہاں جو نہ ہونے والا تھا
اور اب یہ چاہتا ہوں کوئی غم بٹائے مرا
میں اپنی مٹی کبھی آپ ڈھونے والا تھا
ترے نہ آنے سے دل بھی نہیں دکھا شاید
وگرنہ کیا میں سر شام سونے والا تھا
ملا نہ تھا پہ بچھڑنے کا غم نہ تھا مجھ کو
جلا نہیں تھا مگر راکھ ہونے والا تھا
ہزار طرح کے تھے رنج پچھلے موسم میں
پر اتنا تھا کہ کوئی ساتھ رونے والا تھا
ملنا نہیں تو یاد اسے کرنا بھی چھوڑ دے
دیوار چھوڑ دی ہے تو سایہ بھی چھوڑ دے
اک آدمی سے ترک مراسم کے بعد اب
کیا اس گلی سے کوئی گزرنا بھی چھوڑ دے
آنا اب اس نے چھوڑ دیا ہے اگر تو کیا
دل بے سبب چراغ جلانا بھی چھوڑ دے
مضبوط کشتیوں کو بچانے کے واسطے
دریا میں ایک ناؤ شکستہ بھی چھوڑ دے
اللہ کی زمین بڑی ہے بہت جمالؔ
عزت نہیں جہاں وہاں رہنا بھی چھوڑ دے
ذرا سی بات پہ دل سے بگاڑ آیا ہوں
بنا بنایا ہوا گھر اجاڑ آیا ہوں
وہ انتقام کی آتش تھی میرے سینے میں
ملا نہ کوئی تو خود کو پچھاڑ آیا ہوں
میں اس جہان کی قسمت بدلنے نکلا تھا
اور اپنے ہاتھ کا لکھا ہی پھاڑ آیا ہوں
اب اپنے دوسرے پھیرے کے انتظار میں ہوں
جہاں جہاں مرے دشمن ہیں تاڑ آیا ہوں
میں اس گلی میں گیا اور دل و نگاہ سمیت
جمالؔ جیب میں جو کچھ تھا جھاڑ آیا ہوں
سویرا ہو بھی چکا اور رات باقی ہے
ضرور دل میں ابھی کوئی بات باقی ہے
یہ لوگ کس قدر آرام سے ہیں بیٹھے ہوئے
اگرچہ ہونے کو اک واردات باقی ہے
کچھ اور زخم محبت میں بڑھ گئی ہے کسک
یہ سوچ کر کہ ابھی تو حیات باقی ہے
یہ غم جدا ہے بہت جلدباز تھے ہم تم
یہ دکھ الگ ہے ابھی کائنات باقی ہے
جو میری تیری ملاقات کا سبب تھا کبھی
وہ لمحہ تیرے بچھڑنے کے ساتھ باقی ہے
تمام بیڑیاں تو کاٹ ڈالی ہیں لیکن
جمالؔ قید نفس سے نجات باقی ہے
عمر گزری جس کا رستہ دیکھتے
آ بھی جاتا وہ تو ہم کیا دیکھتے
کیسے کیسے موڑ آئے راہ میں
ساتھ چلتے تو تماشا دیکھتے
قریہ قریہ جتنا آوارہ پھرے
گھر میں رہ لیتے تو دنیا دیکھتے
گر بہا آتے نہ دریاؤں میں ہم
آج ان آنکھوں سے صحرا دیکھتے
خود ہی رکھ آتے دیا دیوار پر
اور پھر اس کا بھڑکنا دیکھتے
جب ہوئی تعمیر جسم و جاں تو لوگ
ہاتھ کا مٹی میں کھونا دیکھتے
دو قدم چل آتے اس کے ساتھ ساتھ
جس مسافر کو اکیلا دیکھتے
اعتبار اٹھ جاتا آپس کا جمالؔ
لوگ اگر اس کا بچھڑنا دیکھتے
جمالؔ اب تو یہی رہ گیا پتہ اس کا
بھلی سی شکل تھی اچھا سا نام تھا اس کا
پھر ایک سایہ در و بام پر اتر آیا
دل و نگاہ میں پھر ذکر چھڑ گیا اس کا
کسے خبر تھی کہ یہ دن بھی دیکھنا ہوگا
اب اعتبار بھی دل کو نہیں رہا اس کا
جو میرے ذکر پر اب قہقہے لگاتا ہے
بچھڑتے وقت کوئی حال دیکھتا اس کا
مجھے تباہ کیا اور سب کی نظروں میں
وہ بے قصور رہا یہ کمال تھا اس کا
سو کس سے کیجیئے ذکر نزاکت خد و خال
کوئی ملا ہی نہیں صورت آشنا اس کا
جو سایہ سایہ شب و روز میرے ساتھ رہا
گلی گلی میں پتہ پوچھتا پھرا اس کا
جمالؔ اس نے تو ٹھانی تھی عمر بھر کے لیے
یہ چار روز میں کیا حال ہو گیا اس کا
نہ کوئی فال نکالی نہ استخارہ کیا
بس ایک صبح یوں ہی خلق سے کنارہ کیا
نکل پڑیں گے گھروں سے تمام سیارے
اگر زمین نے ہلکا سا اک اشارہ کیا
جو دل کے طاق میں تو نے چراغ رکھا تھا
نہ پوچھ میں نے اسے کس طرح ستارہ کیا
پرائی آگ کو گھر میں اٹھا کے لے آیا
یہ کام دل نے بغیر اجرت و خسارہ کیا
عجب ہے تو کہ تجھے ہجر بھی گراں گزرا
اور ایک ہم کہ ترا وصل بھی گوارہ کیا
ہمیشہ ہاتھ رہا ہے جمالؔ آنکھوں پر
کبھی خیال کبھی خواب پر گزارہ کیا
دل کی طرف دماغ سے وہ آنے والا ہے
یہ بھی مکان ہاتھ سے اب جانے والا ہے
اک لہر اس کی آنکھ میں ہے حوصلہ شکن
اک رنگ اس کے چہرے پہ بہکانے والا ہے
یہ کون آنے جانے لگا اس گلی میں اب
یہ کون میری داستاں دہرانے والا ہے
دنیا پسند آنے لگی دل کو اب بہت
سمجھو کہ اب یہ باغ بھی مرجھانے والا ہے
جو ساعت حسیں تھی وہ روکے نہیں رکی
یہ لمحہ بھی جمالؔ گزر جانے والا ہے
دھرتی پر سب درد کے مارے کس کے ہیں
آسمان پر چاند ستارے کس کے ہیں
سنتے ہیں وہ شخص تو گھر ہی بدل گیا
پھر یہ دل آویز اشارے کس کے ہیں
کس صحرا کی دھول ہے سب کی آنکھوں میں
بے موج و بے رود کنارے کس کے ہیں
اب کیا سوچنا ایسی ویسی باتوں پہ
ان ہاتھوں نے بال سنوارے کس کے ہیں
کون ہے اس رم جھم کے پیچھے چھپا ہوا
یہ آنسو سارے کے سارے کس کے ہیں
کسی پہاڑ کی چوٹی پر چڑھ کر دیکھو
آنکھوں سے اوجھل نظارے کس کے ہیں
وہ اس جہان سے حیران جایا کرتے ہیں
جو اپنے آپ کو پہچان جایا کرتے ہیں
جو صرف ایک ٹھکانے سے تیرے واقف ہیں
تری گلی میں وہ نادان جایا کرتے ہیں
کسی کے ہونے نہ ہونے کے بارے میں اکثر
اکیلے پن میں بڑے دھیان جایا کرتے ہیں
میں اب کبھی نہ دکھوں گا کسی کے مرنے سے
کہ شب گزار کے مہمان جایا کرتے ہیں
جو اصل بات ہے اس کو چھپانے کی خاطر
کبھی کبھی غلطی مان جایا کرتے ہیں
یہ بات آتے ہوئے سوچتا نہیں کوئی
کہ سب یہاں سے پریشان جایا کرتے ہیں
جمالؔ ہم تو تجھے یہ بھی اب نہیں کہتے
کبھی کسی کا کہا مان جایا کرتے ہیں
ایک فقیر چلا جاتا ہے پکی سڑک پر گاؤں کی
آگے راہ کا سناٹا ہے پیچھے گونج کھڑاؤں کی
آنکھوں آنکھوں ہریالی کے خواب دکھائی دینے لگے
ہم ایسے کئی جاگنے والے نیند ہوئے صحراؤں کی
اپنے عکس کو چھونے کی خواہش میں پرندہ ڈوب گیا
پھر کبھی لوٹ کر آئی نہیں دریا پر گھڑی دعاؤں کی
ڈار سے بچھڑا ہوا کبوتر شاخ سے ٹوٹا ہوا گلاب
آدھا دھوپ کا سرمایہ ہے آدھی دولت چھاؤں کی
اس رستے پر پیچھے سے اتنی آوازیں آئیں جمالؔ
ایک جگہ تو گھوم کے رہ گئی ایڑی سیدھے پاؤں ک
اپنے ہمراہ جلا رکھا ہے
طاق دل پر جو دیا رکھا ہے
جنبش لب نہ سہی تیرے خلاف
ہاتھ کو ہم نے اٹھا رکھا ہے
تو مجھے چھوڑ کے جا سکتا نہیں
چھوڑ اس بات میں کیا رکھا ہے
وہ ملا دے گا ہمیں بھی جس نے
آب اور گل کو ملا رکھا ہے
مجھ کو معلوم ہے میری خاطر
کہیں اک جال بنا رکھا ہے
جانتا ہوں مرے قصہ گو نے
اصل قصے کو چھپا رکھا ہے
آسمانوں نے گواہی کے لیے
اک ستارے کو بچا رکھا ہے
کام کچھ اتنے ہیں کرنے کو جمالؔ
نام کو کل پہ اٹھا رکھا ہے
اس سمے کوئی نہیں میری نگہبانی پر
یہ گھڑی سخت کڑی ہے ترے زندانی پر
با خبر کر کے رہ عشق کی مشکل سے تجھے
فیصلہ چھوڑ دیا ہے تری آسانی پر
نہ ہوا اور نہ مٹی پہ کبھی ہو پایا
جو بھروسا ہے مجھے بہتے ہوئے پانی پر
میں ابھی پہلے خسارے سے نہیں نکلا ہوں
پھر بھی تیار ہے دل دوسری نادانی پر
کسی بھی وقت بدل سکتا ہے لمحہ کوئی
اس قدر خوش بھی نہ ہو میری پریشانی پر
ختم ہونے کو ہیں اشکوں کے ذخیرے بھی جمالؔ
روئے کب تک کوئی اس شہر کی ویرانی پر
اس سمے کوئی نہیں میری نگہبانی پر
یہ گھڑی سخت کڑی ہے ترے زندانی پر
با خبر کر کے رہ عشق کی مشکل سے تجھے
فیصلہ چھوڑ دیا ہے تری آسانی پر
نہ ہوا اور نہ مٹی پہ کبھی ہو پایا
جو بھروسا ہے مجھے بہتے ہوئے پانی پر
میں ابھی پہلے خسارے سے نہیں نکلا ہوں
پھر بھی تیار ہے دل دوسری نادانی پر
کسی بھی وقت بدل سکتا ہے لمحہ کوئی
اس قدر خوش بھی نہ ہو میری پریشانی پر
ختم ہونے کو ہیں اشکوں کے ذخیرے بھی جمالؔ
روئے کب تک کوئی اس شہر کی ویرانی پر
بسر یوں شب عمر کر جاؤں گا
کوئی خواب دیکھوں گا ڈر جاؤں گا
یہی سوچتا گھر سے دور آ گیا
کوئی روک لے گا ٹھہر جاؤں گا
اگر بن نہ پائے گی کوئی جگہ
تو خالی جگہ کوئی بھر جاؤں گا
وہ جب چاہے نظریں بدل سکتا ہے
میں جب چاہوں اس سے مکر جاؤں گا
میں پھر اس سے وعدہ خلافی کے بعد
نیا کوئی پیمان کر جاؤں گا
کسی اور دل میں بنا لوں گا گھر
جب اس کی نظر سے اتر جاؤں گا
بھنک تک پڑے گی نہ اس کو ذرا
دبے پاؤں یاں سے گزر جاؤں گا
رہے ضد پہ قائم اگر اس کے اشک
یہی ہوگا اک دن سنور جاؤں گا
کہ ہو راستہ واپسی کے لئے
میں دانستہ کچھ بھول کر جاؤں گا
یوںہی مرنے والوں کو روتے ہوئے
جمالؔ ایک دن میں بھی مر جاؤں گا
تیری یاد اور تیرے دھیان میں گزری ہے
ساری زندگی ایک مکان میں گزری ہے
اس تاریک فضا میں میری ساری عمر
دیا جلانے کے امکان میں گزری ہے
اپنے لیے جو شام بچا کر رکھی تھی
وہ تجھ سے عہد و پیمان میں گزری ہے
تجھ سے اکتا جانے کی اک ساعت بھی
تیرے عشق ہی کے دوران میں گزری ہے
دیواروں کا شوق جہاں تھا سب کو جمالؔ
عمر مری اس خاندان میں گزری ہے
ستارے کا راز رکھ لیا میہمان میں نے
اک اجلے خواب اور آنکھ کے درمیان میں نے
چڑھا ہے جب چاند آسماں پر تو بوجھ اترا
سنا دی ہر سونے والے کو داستان میں نے
تمام تیشہ بدست حیرت میں گم ہوئے ہیں
چراغ سے کاٹ دی ہوا کی چٹان میں نے
میں دھوپ میں کیوں کسی کا احسان مند ہوتا
خود اپنے سائے کو کر لیا سائبان میں نے
جمالؔ ہر شہر سے ہے پیارا وہ شہر مجھ کو
جہاں سے دیکھا تھا پہلی بار آسمان میں نے
اپنا جب بوجھ مری جان اٹھانا پڑ جائے
دوسروں کا نہ کچھ احسان اٹھانا پڑ جائے
اس قدر عیش محبت پہ نہ ہو خوش کہ تجھے
دوسرے عشق میں نقصان اٹھانا پڑ جائے
اس سرائے میں نہ پھیلائیے اجزائے حیات
جانے کس وقت یہ سامان اٹھانا پڑ جائے
یوں نہ ہو بول پڑوں میں تری خاموشی پر
اور تجھے بزم سے مہمان اٹھانا پڑ جائے
پھر بدل جائے نہ اس وعدۂ امروز سے تو
اور ہمیں دوسرا طوفان اٹھانا پڑ جائے
کیا تماشا ہو سر کوچۂ دل دار اگر
میرے جیسا کوئی نادان اٹھانا پڑ جائے
میں تو مر جاؤں اسی وقت اگر مجھ کو جمالؔ
عشق سے ہاتھ کسی آن اٹھانا پڑ جائے
ہونے کی گواہی کے لیے خاک بہت ہے
یا کچھ بھی نہیں ہونے کا ادراک بہت ہے
اک بھولی ہوئی بات ہے اک ٹوٹا ہوا خواب
ہم اہل محبت کو یہ املاک بہت ہے
کچھ در بدری راس بہت آئی ہے مجھ کو
کچھ خانہ خرابوں میں مری دھاک بہت ہے
پرواز کو پر کھول نہیں پاتا ہوں اپنے
اور دیکھنے میں وسعت افلاک بہت ہے
کیا اس سے ملاقات کا امکاں بھی نہیں اب
کیوں ان دنوں میلی تری پوشاک بہت ہے
آنکھوں میں ہیں محفوظ ترے عشق کے لمحات
دریا کو خیال خس و خاشاک بہت ہے
نادم ہے بہت تو بھی جمالؔ اپنے کئے پر
اور دیکھ لے وہ آنکھ بھی نمناک بہت ہے
نہ سننے میں نہ کہیں دیکھنے میں آیا ہے
جو ہجر و وصل مرے تجربے میں آیا ہے
نئے سرے سے جل اٹھی ہے پھر پرانی آگ
عجیب لطف تجھے بھولنے میں آیا ہے
نہ ہاتھ میرے نہ آنکھیں مری نہ چہرہ مرا
یہ کس کا عکس مرے آئنے میں آیا ہے
جواز رکھتا ہے ہر ایک اپنے ہونے کا
یہاں پہ جو ہے کسی سلسلے میں آیا ہے
ہے واقعہ ہدف سیل آب تھا کوئی اور
مرا مکان تو بس راستے میں آیا ہے
وہ راز وصل تھا جو نیند میں کھلا مجھ پر
یہ خواب ہجر ہے جو جاگتے میں آیا ہے
جمالؔ دیکھ کے جیتا تھا جو کبھی تجھ کو
کہیں وہ شخص بھی کیا دیکھنے میں آیا ہے
واقعی کوئی اگر موجود ہے
پھر تو یہ دکھ عمر بھر موجود ہے
بیچ کا رستہ نہیں باقی کوئی
یا خدا ہے یا بشر موجود ہے
اس کو پانے کی توقع ہے بہت
جب تلک یہ چشم تر موجود ہے
اس کے ملنے ہی سے پہلے جانے کیوں
اس کو کھو دینے کا ڈر موجود ہے
کوئی منزل کیسے تنہا سر کریں
ہم سفر میں ہم سفر موجود ہے
عادت خانہ خرابی ہے جمالؔ
ورنہ اچھا خاصا گھر موجود ہے
سنگ کو تکیہ بنا خواب کو چادر کر کے
جس جگہ تھکتا ہوں پڑ رہتا ہوں بستر کر کے
اب کسی آنکھ کا جادو نہیں چلتا مجھ پر
وہ نظر بھول گئی ہے مجھے پتھر کر کے
یار لوگوں نے بہت رنج دیے تھے مجھ کو
جا چکا ہے جو حساب اپنا برابر کر کے
اس کو بھی پڑ گیا اک اور ضروری کوئی کام
میں بھی گھر پر نہ رہا وقت مقرر کر کے
پوچھنا چاہتا ہوں اس نگہ و دل سے جمالؔ
کس کو آباد کیا ہے مجھے بے گھر کر کے
کسی بھی دشت کسی بھی نگر چلا جاتا
میں اپنے ساتھ ہی رہتا جدھر چلا جاتا
وہ جس منڈیر پہ چھوڑ آیا اپنی آنکھیں میں
چراغ ہوتا تو لو بھول کر چلا جاتا
اسے بچا لیا آوارگان شام نے آج
وگرنہ صبح کا بھولا تو گھر چلا جاتا
مرا مکاں مری غفلت سے بچ گیا ورنہ
کوئی چرا کے مرے بام و در چلا جاتا
اگر میں کھڑکیاں دروازے بند کر لیتا
تو گھر کا بھید سر رہ گزر چلا جاتا
تھکن بہت تھی مگر سایۂ شجر میں جمالؔ
میں بیٹھتا تو مرا ہم سفر چلا جاتا
گھر سے جاتا ہوں روز شام سے میں
رات بھر کے پروگرام سے میں
اے میری جان انتشار پسند
تنگ ہوں تیرے انتظام سے میں
یہ جو لڑتا جھگڑتا ہوں سب سے
بچ رہا ہوں قبول عام سے میں
میں اتارا گیا تھا عرش سے اور
فرش پر گر پڑا دھڑام سے میں
شکل کا لاحقہ نہیں ہمراہ
جانا جاتا ہوں صرف نام سے میں
کیا کہوں اوبنے لگا ہوں جمالؔ
ایک ہی جیسے صبح و شام سے میں
سبھی کھڑے تھے شریک زمانہ ہوتے ہوئے
کسی نے روکا نہ گھر سے روانہ ہوتے ہوئے
چراغ بجھتے چلے جا رہے ہیں سلسلہ وار
میں خود کو دیکھ رہا ہوں فسانہ ہوتے ہوئے
اچانک ایک ستارہ فلک سے ٹوٹ گیا
مرے بھی شامل بزم شبانہ ہوتے ہوئے
مرا ہمیشہ ان الفاظ پر یقین رہا
جو منکشف ہوئے لب سے ادا نہ ہوتے ہوئے
اسی طرح کے ہیں جتنے بھی دکھ ہمارے ہیں
سروں پہ چھاؤں نہیں شامیانہ ہوتے ہوئے
مرا بھی نام ہے فہرست مجرماں میں لکھا
میں دیکھتا رہا خالی خزانہ ہوتے ہوئے
پرند لوٹ کے آنے ہی پر نہیں راضی
کوئی تو بات ہے جو آشیانہ ہوتے ہوئے
عجب وہ لوگ تھے آزار بھی عجب ان کے
زمین چھوڑ گئے آب و دانہ ہوتے ہوئے
یہاں تو خستگیٔ بام و در پہ چپ ہیں سبھی
کوئی تڑپتا ہے بیرون خانہ ہوتے ہوئے
مرا کمال کہ میں اس فضا میں زندہ ہوں
دعا نہ ملتے ہوئے اور ہوا نہ ہوتے ہوئے
حریف تھا مرے دشمن کا وہ مگر میں نے
جمالؔ کی نہیں بیعت بہانہ ہوتے ہوئے
سب بدلتے جا رہے ہیں سر بسر اپنی جگہ
دشت اب اپنی جگہ باقی نہ گھر اپنی جگہ
میں بھی نادم ہوں کہ سب کے ساتھ چل سکتا نہیں
اور شرمندہ ہیں میرے ہم سفر اپنی جگہ
کیوں سمٹتی جا رہی ہیں خود بہ خود آبادیاں
چھوڑتے کیوں جا رہے ہیں بام و در اپنی جگہ
جو کچھ ان آنکھوں نے دیکھا ہے میں اس کا کیا کروں
شہر میں پھیلی ہوئی جھوٹی خبر اپنی جگہ
میں جمالؔ اپنی جگہ سے اس لیے ہٹتا نہیں
وہ گھڑی آ جائے شاید لوٹ کر اپنی جگہ
سمندروں کے درمیان سو گئے
تھکے ہوئے جہاز ران سو گئے
دریچہ ایک ہولے ہولے کھل گیا
جب اس گلی کے سب مکان سو گئے
سلگتی دوپہر میں سب دکان دار
کھلی ہی چھوڑ کر دکان سو گئے
پھر آج اک ستارہ جاگتا رہا
پھر آج سات آسمان سو گئے
ہوا چلی کھلے سمندروں کے بیچ
تھکن سے چور بادبان سو گئے
سحر ہوئی تو ریگزار جاگ اٹھا
مگر تمام ساربان سو گئے
اس آنکھ کی پناہ اب نہیں نصیب
پلک پلک وہ سائبان سو گئے
جمالؔ آخر ایسی عادتیں بھی کیا
کہ گھر میں شام ہی سے آن سو گئے
جو تو گیا تھا تو تیرا خیال رہ جاتا
ہمارا کوئی تو پرسان حال رہ جاتا
برا تھا یا وہ بھلا لمحۂ محبت تھا
وہیں پہ سلسلۂ ماہ و سال رہ جاتا
بچھڑتے وقت ڈھلکتا نہ گر ان آنکھوں سے
اس ایک اشک کا کیا کیا ملال رہ جاتا
تمام آئینہ خانے کی لاج رہ جاتی
کوئی بھی عکس اگر بے مثال رہ جاتا
گر امتحان جنوں میں نہ کرتے قیس کی نقل
جمالؔ سب سے ضروری سوال رہ جاتا
خرابۂ بام و در بہت یاد آ رہا ہے
نہ جانے کیوں آج گھر بہت یاد آ رہا ہے
بھلا چکا ہوں جو راستہ طے کیا تھا میں نے
کیا نہیں جو سفر بہت یاد آ رہا ہے
وہ ساتھ رہتا تھا گھر میں تو دھیان تک نہ آیا
مگر سر رہ گزر بہت یاد آ رہا ہے
اداس بیٹھے ہیں گھر کی دیوار پر پرندے
جو صحن میں تھا شجر بہت یاد آ رہا ہے
لڑائی میں سارے وار خالی گئے تھے جس کے
جمالؔ وہ بے ہنر بہت یاد آ رہا ہے
کب پاؤں فگار نہیں ہوتے کب سر میں دھول نہیں ہوتی
تری راہ پہ چلنے والوں سے لیکن کبھی بھول نہیں ہوتی
سر کوچۂ عشق آ پہنچے ہو لیکن ذرا دھیان رہے کہ یہاں
کوئی نیکی کام نہیں آتی کوئی دعا قبول نہیں ہوتی
ہر چند اندیشۂ جاں ہے بہت لیکن اس کار محبت میں
کوئی پل بے کار نہیں جاتا کوئی بات فضول نہیں ہوتی
ترے وصل کی آس بدلتے ہوئے ترے ہجر کی آگ میں جلتے ہوئے
کب دل مصروف نہیں رہتا کب جاں مشغول نہیں ہوتی
ہر رنگ جنوں بھرنے والو شب بے داری کرنے والو
ہے عشق وہ مزدوری جس میں محنت بھی وصول نہیں ہوتی
جو بیل میرے قد سے ہے اوپر لگی ہوئی
افسوس ہر بساط سے باہر لگی ہوئی
اس کی تپش نے اور بھی سلگا رکھا ہے کچھ
جو آگ ہے مکان سے باہر لگی ہوئی
سنتے ہیں اس نے ڈھونڈ لیا اور کوئی گھر
اب تک جو آنکھ تھی ترے در پر لگی ہوئی
پہچان کی نہیں ہے یہ عرفان کی ہے بات
تختی کوئی نہیں مرے گھر پر لگی ہوئی
اب کے بہار آنے کے امکان ہیں کہ ہے
ہر پیرہن پہ چشم رفو گر لگی ہوئی
اس بار طول کھینچ گئی جنگ اگر تو کیا
اس بار شرط بھی تو ہے بڑھ کر لگی ہوئی
منحوس ایک شکل ہے جس سے نہیں فرار
پرچھائیں کی طرح سے برابر لگی ہوئی
تیرے ہی چار سمت نہیں ہے حصار جبر
پابندیٔ جمال ہے سب پر لگی ہوئی
میں بوندا باندی کے درمیان اپنے گھر کی چھت پر کھڑا رہا ہوں
چراغ تھا کوئی جس کے ہمراہ رات بھر بھیگتا رہا ہوں
یہ اب کھلا ہے کہ ان میں میرے نصیب کی دوریاں چھپی تھیں
میں اس کے ہاتھوں کی جن لکیروں کو مدتوں چومتا رہا ہوں
میں سن چکا ہوں ہواؤں اور بادلوں میں جو مشورے ہوئے ہیں
جو بارشیں اب کے ہونے والی ہیں ان کے قصے سنا رہا ہوں
اس ایک ویران پیڑ پر اب کئی پرندوں کے گھونسلے ہیں
جو پچھلے موسم میں لکھ گیا تھا وہ نام میں ڈھونڈتا رہا ہوں
سفر کی لذت سے بڑھ کے منزل کا قرب تو معتبر نہیں ہے
وہ مل گیا اور میں ابھی تک گلی گلی خاک اڑا رہا ہوں
کب دل کے آئنے میں وہ منظر نہیں رہا
آنکھوں کے سامنے جو کہ پل بھر نہیں رہا
پیروں تلے زمین نہیں تھی تو جی لئے
لیکن اب آسمان بھی سر پر نہیں رہا
تیرے خیال میں کبھی اس طرح کھو گئے
تیرا خیال بھی ہمیں اکثر نہیں رہا
وہ قحط سنگ ہے سر ساحل کہ الاماں
پانی میں پھینکنے کو بھی پتھر نہیں رہا
آگاہ کیا ہوئے ہیں سرابوں سے ہم جمالؔ
سطح زمیں پہ کوئی سمندر نہیں رہا
وہ بھی ملنے نئی پوشاک بدل کر آیا
میں جو کل پیرہن خاک بدل کر آیا
اے زمیں زاد تری رفعتیں چھونے کے لیے
تجھ تلک میں کئی افلاک بدل کر آیا
اس کو راس آئی ہے یہ بزم جہاں جو بھی یہاں
اپنا پیمانۂ ادراک بدل کر آیا
عشق میں کوئی تکلف کی ضرورت تو نہیں
پھر وہ کیوں دیدۂ نمناک بدل کر آیا
ہم سے کر بے سر و سامانئ ہجرت پہ سوال
اس سے مت پوچھ جو املاک بدل کر آیا
آنسوؤں سے نہ بدل پایا رخ باد جمالؔ
پر مزاج خس و خاشاک بدل کر آیا
ستارے ہی صرف راستوں میں نہ کھو رہے تھے
چراغ اور چاند بھی گلے مل کے رو رہے تھے
نگاہ ایسے میں خاک پہچانتی کسی کو
غبار ایسا تھا آئنے عکس کھو رہے تھے
کسی بیاباں میں دھوپ رستہ بھٹک گئی تھی
کسی بھلاوے میں آ کے سب پیڑ سو رہے تھے
نہ رنج ہجرت تھا اور نہ شوق سفر تھا دل میں
سب اپنے اپنے گناہ کا بوجھ ڈھو رہے تھے
جمالؔ اس وقت کوئی مجھ سے بچھڑ رہا تھا
زمین اور آسمان جب ایک ہو رہے تھے
وہ مثل آئینہ دیوار پر رکھا ہوا تھا
جو اک انعام میری ہار پر رکھا ہوا تھا
میں بائیں ہاتھ سے دشمن کے حملے روکتا تھا
کہ دایاں ہاتھ تو دستار پر رکھا ہوا تھا
وہی تو ایک صحرا آشنا تھا قافلے میں
وہ جس نے آبلے کو خار پر رکھا ہوا تھا
وصال و ہجر کے پھل دوسروں کو اس نے بخشے
مجھے تو رونے کی بیگار پر رکھا ہوا تھا
مسلم تھی سخاوت جس کی دنیا بھر میں اس نے
مجھے تنخواہ بے دینار پر رکھا ہوا تھا
خط تقدیر کے سفاک و افسردہ سرے پر
مرا آنسو بھی دست یار پر رکھا ہوا تھا
فلک نے اس کو پالا تھا بڑے ناز و نعم سے
ستارہ جو ترے رخسار پر رکھا ہوا تھا
وہی تو زندہ بچ کے آئے ہیں تیری گلی سے
جنہوں نے سر تری تلوار پر رکھا ہوا تھا
وہ صبح و شام مٹی کے قصیدے بھی سناتا
اور اس نے ہاتھ بھی غدار پر رکھا ہوا تھا
ترے رستے میں میری دونوں آنکھیں تھیں فروزاں
دیا تو بس ترے اصرار پر رکھا ہوا تھا
دل میں یاد رفتگاں آباد ہے
ورنہ یہ دل بھی کہاں آباد ہے
ایک میں آباد ہوں اس شہر میں
اور اک میرا مکاں آباد ہے
کس کے یہ نقش قدم ہیں خاک پر
کون ایسے میں یہاں آباد ہے
باب عمر رائیگاں کی لوح پر
حرف احساس زیاں آباد ہے
میرے ہونے سے نہ ہونا ہے مرا
آگ جلنے سے دھواں آباد ہے
رونق دل کا ہے عالم دیدنی
خانۂ آوارگاں آباد ہے
اک دریچہ اس گلی میں آج تک
بے چراغ و بے نشاں آباد ہے
چشم حیراں کو تماشائے دگر پر رکھا
اور اس دل کو تری خیر خبر پر رکھا
عین ممکن ہے چراغوں کو وہ خاطر میں نہ لائے
گھر کا گھر ہم نے اٹھا راہ گزر پر رکھا
بوجھ سے جھکنے لگی شاخ تو جا کر ہم نے
آشیانے کو کسی اور شجر پر رکھا
چمن دہر میں اس طرح بسر کی ہم نے
سایۂ گل کا بھی احسان نہ سر پر رکھا
اس کی آواز پہ باہر نکل آیا ہوں جمالؔ
سارا اسباب سفر رہ گیا گھر پر رکھا
اس کی محبتوں کا طریقہ کچھ اور ہے
کہتا وہ مجھ سے اور ہے کرتا کچھ اور ہے
جو اس پہ بیتتی ہے وہ معلوم ہے مجھے
جب اس سے پوچھتا ہوں بتاتا کچھ اور ہے
وہ بھی سمجھتا ہے کہ جدا کیوں ہوئے ہیں ہم
یہ میں بھی جانتا ہوں کہ قصہ کچھ اور ہے
پنچوں کی بات مان لیں کس طرح ہم کہ جب
میرے اور اس کے درمیاں جھگڑا کچھ اور ہے
اس کے بغیر چین بھی پڑتا نہیں جسے
سمجھاتا اور کچھ ہوں سمجھتا کچھ اور ہے
کر اے غزال عشق مرے شہر دل کی سیر
صحراؤں میں غبار اڑانا کچھ اور ہے
یاروں سے ملتے جلتے رہا کیجیئے جمالؔ
یاروں کے بیچ ان دنوں چرچا کچھ اور ہے
ایک قدم خشکی پر ہے اور دوسرا پانی میں
ساری عمر بسر کر دی ہے نقل مکانی میں
آنسو بہتے ہیں اور دل یہ سوچ کے ڈرتا ہے
آنکھ کہیں کوئی بات نہ کہہ دے اس سے روانی میں
راہ میں سارے چراغ اسی کے دم سے روشن ہیں
جو پیماں ہوا سے باندھا تھا نادانی میں
سارے ساحل سارے ساگر اس کی ہیں میراث
جس کے پاؤں زمیں پر ٹھہریں بہتے پانی میں
دو جیون تاراج ہوئے تب پوری ہوئی بات
کیسا پھول کھلا ہے اور کیسی ویرانی میں
جب اسے دیکھو آنکھ اور دل کو ساتھ ملا لینا
اک آئینہ کم پڑ جائے گا حیرانی میں
کوزۂ دنیا ہے اپنے چاک سے بچھڑا ہوا
اور اس کے بیچ میں افلاک سے بچھڑا ہوا
اس جگہ میں بھی بھٹکتا پھر رہا ہوں آج تک
جس جگہ تھا راستہ پیچاک سے بچھڑا ہوا
دن گزرتے جا رہے ہیں اور ہجوم خوش گماں
منتظر بیٹھا ہے آب و خاک سے بچھڑا ہوا
صبح دم دیکھا تو خشکی پر تڑپتا تھا بہت
ایک منظر دیدۂ نمناک سے بچھڑا ہوا
اس جہان خستہ سے کوئی توقع ہے عبث
یہ بدن ہے روح کی پوشاک سے بچھڑا ہوا
جب بھی تولا بے نیازی کی ترازو میں اسے
وہ بھی نکلا ضبط کے ادراک سے بچھڑا ہوا
اک ستارہ مجھ سے مل کر رو پڑا تھا کل جمالؔ
وہ فلک سے اور میں تھا خاک سے بچھڑا ہوا
سلوک ناروا کا اس لئے شکوہ نہیں کرتا
کہ میں بھی تو کسی کی بات کی پروا نہیں کرتا
ترا اصرار سر آنکھوں پہ تجھ کو بھول جانے کی
میں کوشش کر کے دیکھوں گا مگر وعدہ نہیں کرتا
بہت ہشیار ہوں اپنی لڑائی آپ لڑتا ہوں
میں دل کی بات کو دیوار پر لکھا نہیں کرتا
اگر پڑ جائے عادت آپ اپنے ساتھ رہنے کی
یہ ساتھ ایسا ہے کہ انسان کو تنہا نہیں کرتا
زمیں پیروں سے کتنی بار اک دن میں نکلتی ہے
میں ایسے حادثوں پر دل مگر چھوٹا نہیں کرتا
رہنا نہیں اگرچہ گوارا زمین پر
لیکن اک آدمی ہے ہمارا زمین پر
طرفہ کہ رسم گریہ و زاری بھی اٹھ گئی
مشکل تو پہلے ہی تھا گزارا زمین پر
پہلے تو دی گئی مجھے بینائی اور پھر
منظر عجیب اس نے اتارا زمین پر
بھٹکے ہوؤں کو راہ دکھانے کو کم نہیں
ٹوٹے ہوئے دیے کا کنارا زمین پر
اس کی نظر بدلنے سے پہلے کی بات ہے
میں آسمان پر تھا ستارا زمین پر
باقی تو جو بھی کچھ ہے اضافی ہے سب یہاں
اک آنکھ ہے اور ایک نظارا زمین پر
دیکھا نگاہ بھر کے مجھے اس نے پھر جمالؔ
روشن کیا چراغ دوبارا زمین پر
کسی بھی بات کا جب اعتبار مشکل ہے
پھر ایسے میں یہاں رہنا تو یار مشکل ہے
کچھ اور وسعتیں درکار ہیں محبت کو
وصال و ہجر پہ دار و مدار مشکل ہے
کہ مسکرانا بھی پڑتا ہے فاتحانہ ہمیں
ترے شکستہ دلوں کی ہزار مشکل ہے
سر ریاست الفت نظام ہے ایسا
کوئی ملے یہاں بے روزگار مشکل ہے
ادھار خواب خریدیں اور آنکھیں بیچیں نقد
یہ کاروبار ہے اور کاروبار مشکل ہے
تو کن فضاؤں میں ہے اے رقیب عیش پسند
تری خزاں سے ہماری بہار مشکل ہے
نہ اس کو چومیں تو رستہ بھٹکتی ہیں سانسیں
اور اس کو چومنا بھی بار بار مشکل ہے
اب اس کو ملنے لگے عاشقان جز وقتی
لہٰذا اپنا شمار و قطار مشکل ہے
کہنی ہے ایک بات دل شاد کام سے
تنگ آ گیا ہوں یار محبت کے نام سے
میں ہوں کہ مجھ کو دیدۂ بینا کا روگ ہے
اور لوگ ہیں کہ کام انہیں اپنے کام سے
عشاق ہیں کہ مرنے کی لذت سے ہیں نڈھال
شمشیر ہے کہ نکلی نہیں ہے نیام سے
جب اس نے جا کے پہلوئے گل میں نشست کی
باد صبا بچھڑ گئی اپنے خرام سے
وحشت اک اور ہے مجھے ہجرت سے بھی سوا
ہم خانہ مطمئن نہیں میرے قیام سے
دھرتی بھی آسماں کے برابر خراب ہے
چادر ہے جیسی ویسا ہی بستر خراب ہے
آگاہ میں چراغ جلاتے ہی ہو گیا
دنیا مرے حساب سے بڑھ کر خراب ہے
بیدار بھی ہو نیند سے چارہ گر جہاں
حالت ترے مریض کی یکسر خراب ہے
اس کے لیے ہی آئے گی آئی اگر بہار
وہ پھول جو کہ باغ سے باہر خراب ہے
نازک اگر نہیں ہے تو شیشہ ہے بے جواز
بھاری اگر نہیں ہے تو پتھر خراب ہے
دنیائے پرکشش بھی ہے ہر سو کھڑی ہوئی
نیت بھی آدمی کی سراسر خراب ہے
آنکھوں سے اب وہ خواب کو نسبت نہیں رہی
اک عمر ہو گئی یہ سمندر خراب ہے
تاریخ سے محال ہے لانا مثال کا
یہ عہد اپنی روح کے اندر خراب ہے
یہ بات بھی چھپی نہ رہے گی بہت کہ میں
اتنا نہیں ہوں جتنا مقدر خراب ہے
کچھ ہاتھ خواب میں تھے گریبان پر مرے
اک شب خیال آیا تھا یہ گھر خراب ہے
بسنے نہیں تو سیر کی خاطر چلو جمالؔ
ایک اور شہر چند قدم پر خراب ہے
ہر قرض سفر چکا دیا ہے
دشت اور نگر ملا دیا ہے
جز عشق کسے ملی یہ توفیق
جو پایا اسے گنوا دیا ہے
پہلے ہی بہت تھا ہجر کا رنج
اب فاصلوں نے بڑھا دیا ہے
آبادیوں سے گئے ہوؤں کو
صحراؤں نے حوصلہ دیا ہے
دیوار بدست راہرو تھے
کس نے کسے راستہ دیا ہے
بچھڑا تو تسلی دی ہے اس نے
کس دھند میں آئنہ دیا ہے
میں بجھ تو گیا ہوں پھر بھی مجھ میں
روشن ترے نام کا دیا ہے
یہ شہر اپنے حریفوں سے ہارا تھوڑی ہے
یہ بات سب پہ مگر آشکارا تھوڑی ہے
ترا فراق تو رزق حلال ہے مجھ کو
یہ پھل پرائے شجر سے اتارا تھوڑی ہے
جو عشق کرتا ہے چلتی ہوا سے لڑتا ہے
یہ جھگڑا صرف ہمارا تمہارا تھوڑی ہے
در نگاہ پہ اس کے جو ہم نے عمر گنوائی
یہ فائدہ ہے مری جاں خسارہ تھوڑی ہے
یہ لوگ تجھ سے ہمیں دور کر رہے ہیں مگر
ترے بغیر ہمارا گزارا تھوڑی ہے
جمالؔ آج تو جانے کی مت کرو جلدی
کہ پھر نصیب یہ صحبت دوبارہ تھوڑی ہے
صبح آتا ہوں یہاں اور شام ہو جانے کے بعد
لوٹ جاتا ہوں میں گھر ناکام ہو جانے کے بعد
ڈھانپ دیتے ہیں ہوس کو عشق کی پوشاک میں
لوگ سارے شہر میں بدنام ہو جانے کے بعد
اک ہجوم یاد ہو گا ان گلی کوچوں کے بیچ
دیکھو شہر دل کی رونق شام ہو جانے کے بعد
یاد کرنے کے سوا اب کر بھی کیا سکتے ہیں ہم
بھول جانے میں تجھے ناکام ہو جانے کے بعد
خود جسے محنت مشقت سے بناتا ہوں جمالؔ
چھوڑ دیتا ہوں وہ رستہ عام ہو جانے کے بعد
ہر ایک زخم شناسائی اک کہانی ہے
ملے نہیں ہیں جو لوگ ان کی مہربانی ہے
یہ حوصلہ تو تجھے جیت کر نصیب ہوا
وگرنہ ہار کے کس نے شکست مانی ہے
دیے کی لو سے جو تحریر میں نے لکھی تھی
ہوا کے پاس وہ اب تک مری نشانی ہے
سمندروں کا سفر آج تو مزہ دے گا
ہوا بھی تیز ہے کشتی بھی بادبانی ہے
جمالؔ کھیل نہیں ہے کوئی غزل کہنا
کہ ایک بات بتانی ہے اک چھپانی ہے
دوا کے نام سے حالت خراب ہوتی ہے
علاج سے مری صحت خراب ہوتی ہے
جب اور مجھ پہ مسیحا توجہ دیتا ہے
کچھ اور میری طبیعت خراب ہوتی ہے
چراغ راہ کے بجھنے سے کچھ نہیں ہوتا
پہ شام کوئے ملامت خراب ہوتی ہے
یہ سوچ کر نہیں کوئی جہان کا مالک
کبھی کبھی مری نیت خراب ہوتی ہے
خدا کے واسطے تفریق و جمع کر نہ یہاں
فضائے شہر محبت خراب ہوتی ہے
یہ کار عشق ہے یاں اک گھڑی کی غفلت سے
تمام عمر کی محنت خراب ہوتی ہے
دیار عشق میں ملتی ہے سرخ روئی اسے
کہ جس کی جتنی بھی عزت خراب ہوتی ہے
جسے بھی ہوں ادب آداب دیکھ سکتا ہے
کوئی بھی شخص ترے خواب دیکھ سکتا ہے
تری نگاہ سے دنیا کو دیکھنے والا
چراغ کو پس محراب دیکھ سکتا ہے
یہ کہہ کے اذن سفر دے دیا گیا مجھ کو
کہ تو ستارے کو مہتاب دیکھ سکتا ہے
دعا و اشک کی گٹھری سنبھال کے رکھنا
کسی بھی وقت وہ اسباب دیکھ سکتا ہے
وہ جس نے دیکھ لیا ہے اسے نظر بھر کے
پس غبار و تہہ آب دیکھ سکتا ہے
نہ اپنے ہجر میں پژمردہ پا کے خوش ہے ہمیں
نہ اپنے وصل میں شاداب دیکھ سکتا ہے
نہ چاہتا ہے کہ ہم حالت سکوں میں رہیں
نہ اپنے عشق میں بیتاب دیکھ سکتا ہے
جمالؔ جس کو بھی شک ہو ہماری باتوں پر
ہمارا حلقۂ احباب دیکھ سکتا ہے
جہاں بدلنے کا وہ بھی گمان رکھتے ہیں
جو گھر کے نقشے میں پہلے دکان رکھتے ہیں
ہم اپنے جسم میں رکھتے ہیں اک زمیں کی مہک
ہم اپنی روح میں اک آسمان رکھتے ہیں
مرے خدا نے وہ دشمن مجھے نصیب کیے
جو اپنے تیر سے چھوٹی کمان رکھتے ہیں
کسی کی نیم نگاہی سے جلنے لگتا ہے
وہ جس چراغ میں ہم اپنی جان رکھتے ہیں
عبث ہے ان سے توقع کوئی زمانے میں
جو لوگ نشے میں بھی اپنا دھیان رکھتے ہیں
ہر انجمن میں الگ سے دکھائی دیتے ہیں
کوئی فضا ہو ہم اپنی اڑان رکھتے ہیں
ہمیں کسی شجر راہ پر بھروسہ نہیں
کسی کی زلف کو ہم سائبان رکھتے ہ
میں جو کل پیرہن خاک بدل کر آیا
وہ بھی ملنے نئی پوشاک بدل کر آیا
اے زمیں زاد تری رفعتیں چھونے کے لئے
تجھ تلک میں کئی افلاک بدل کر آیا
ہم سے کر بے سر و سامانئ ہجرت پہ سوال
اس سے مت پوچھ جو املاک بدل کر آیا
عشق میں کوئی تکلف کی ضرورت تو نہیں
پھر وہ کیوں دیدۂ نمناک بدل کر آیا
اس کو راس آئی ہے یہ بزم جہاں جو بھی یہاں
اپنا پیمانۂ ادراک بدل کر آیا
آنسوؤں سے نہ بدل پایا رخ باد جمال
پر مزاج خس و خاشاک بدل کر آیا
اس کی خواہش ہے کہ جلدی بھول جانا چاہیے
بھول جانے کے لئے جس کو زمانہ چاہیے
اس کو آنا ہے مجھے وعدہ نبھانا چاہیے
گھر کے دروازے کو خود ہی کھٹکھٹانا چاہیے
کچی مٹی سے بنا تو لو مکاں پر سوچ لو
بارشوں کو تو برسنے کا بہانہ چاہیے
دھوپ سے بچ جاؤ گے پر چاندنی کھو جائے گی
سوچ کر آنگن میں کوئی پیڑ اگانا چاہیے
لاکھ نظروں کو نئے رنگوں کا موسم ہو پسند
دل کو تو لیکن وہی ساتھی پرانا چاہیے
اس کی خواہش ہے کہ جلدی بھول جانا چاہیے
بھول جانے کے لئے جس کو زمانہ چاہیے
اس کو آنا ہے مجھے وعدہ نبھانا چاہیے
گھر کے دروازے کو خود ہی کھٹکھٹانا چاہیے
کچی مٹی سے بنا تو لو مکاں پر سوچ لو
بارشوں کو تو برسنے کا بہانہ چاہیے
دھوپ سے بچ جاؤ گے پر چاندنی کھو جائے گی
سوچ کر آنگن میں کوئی پیڑ اگانا چاہیے
لاکھ نظروں کو نئے رنگوں کا موسم ہو پسند
دل کو تو لیکن وہی ساتھی پرانا چاہیے
کچھ نہیں تیرے میرے میں
سب ہیں ایک اندھیرے میں
کون فلک پہ ٹہلتا ہے
ہلکے ہلکے سویرے میں
ایک چراغ ہوں مٹی کا
دور دراز اندھیرے میں
فکر کر اگلے پڑاؤ کی
بیٹھ فقیر کے ڈیرے میں
بوجھ زیادہ اٹھانا پڑے
شاید دوسرے پھیرے میں
آسمان پر روشن ہیں
سات ستارے گھیرے میں
چپکے سے کھل اٹھا ہے
ایک گلاب اندھیرے میں
مچھلی کا سب جھگڑا ہے
دریا اور مچھیرے میں
رہنا نہیں اگرچہ گوارہ زمین پر
لیکن اک آدمی ہے ہمارا زمین پر
طرفہ کہ رسم گریہ و زاری بھی اٹھ گئی
مشکل تو پہلے ہی تھا گزارہ زمین پر
پہلے تو دی گئی مجھے بینائی اور پھر
منظر عجیب اس نے اتارا زمین پر
بھٹکے ہوؤں کو راہ دکھانے کو کم نہیں
ٹوٹے ہوئے دیے کا کنارہ زمین پر
اس کی نظر بدلنے سے پہلے کی بات ہے
میں آسمان پر تھا ستارہ زمین پر
رات آتی رہتی ہے دن نکلتا رہتا ہے
اور خدا کے بندوں کا کام چلتا رہتا ہے
پھر رہا ہوں بستی میں یہ پتہ لئے کب سے
اک چراغ اس گھر میں دن کو جلتا رہتا ہے
ایک گھر ہے میں جس میں رہتا ہوں خوش و خرم
ایک بات ہے جس سے دل دہلتا رہتا ہے
میں بھی آسمانوں میں روز اضافہ کرتا ہوں
وہ بھی ان زمینوں کا رخ بدلتا رہتا ہے
زیست کی تمازت میں شاخ مرگ سے آگے
راہرو ٹھہرتا ہے رستہ چلتا رہتا ہے
عشق کرنے والوں کو صرف یہ سہولت ہے
کچھ نہ کرنے سے بھی کچھ دل بہلتا رہتا ہے
میں بساط دنیا کو جب لپیٹ دیتا ہوں
کوئی دوسرا مجھ میں گھر بدلتا رہتا ہے
کبھی بھلا کے کبھی اس کو یاد کر کے مجھے
جمالؔ قرض چکانے ہیں عمر بھر کے مجھے
ابھی تو منزل جاناں سے کوسوں دور ہوں میں
ابھی تو راستے ہیں یاد اپنے گھر کے مجھے
جو لکھتا پھرتا ہے دیوار و در پہ میرا نام
بکھیر دے نہ کہیں حرف حرف کر کے مجھے
محبتوں کی بلندی پہ ہے یقیں تو کوئی
گلے لگائے مری سطح پر اتر کے مجھے
چراغ بن کے جلا جس کے واسطے اک عمر
چلا گیا وہ ہوا کے سپرد کر کے مجھے
جب اپنی روح کے احوال میں شامل نہیں سمجھا
تعلق توڑنے کے بھی اسے قابل نہیں سمجھا
عجب در تھا نہ کھلنے پر بھی اس کا فیض جاری تھا
عجب خیرات تھی جس کو کوئی سائل نہیں سمجھا
سبھی سمجھے مجھے اس سے جدا ہونے کی جلدی تھی
کوئی بھی دیکھنے والا مری مشکل نہیں سمجھا
محبت کے سوا بھی ہیں بہت سے مسئلے اس کے
دماغ اس بات کو سمجھا ہے لیکن دل نہیں سمجھا
کبھی اس آسماں کی دل کشی میں گم نہیں ہوتا
کبھی سوئے ہوئے دشمن کو میں غافل نہیں سمجھا
اپنی آنکھیں ترے چہرے پہ لگا کر دیکھوں
اور پھر اپنا بکھرتا ہوا منظر دیکھوں
نیند آئے تو کوئی گوشۂ تنہائی بہت
پاؤں پھیلانے کی حسرت ہو تو چادر دیکھوں
کتنی راتیں اسی خواہش میں بتائیں میں نے
چاند نکلے تو ذرا گھر سے نکل کر دیکھوں
پیش جب کر ہی چکا حرف عقیدت اس کو
کیوں نہ اس ہاتھ پہ ایمان بھی لا کر دیکھوں
عکس شاید ہے سلامت پس آئینۂ جاں
اپنی جانب کئی بڑھتے ہوئے لشکر دیکھوں
کون اس تشنگیٔ روح و بدن کو سمجھے
بیچ صحرا میں کھڑے ہو کے سمندر دیکھوں
موسم سنگ زنی کی ہے خبر گرم جمالؔ
دست و بازو کبھی دیکھوں تو کبھی سر دیکھوں
مدتوں بعد شب ماہ اسے دیکھا تھا
پر کسی اور کے ہم راہ اسے دیکھا تھا
کیا خبر تھی کہ کہانی کوئی بن جائے گی
میں نے کل بزم میں ناگاہ اسے دیکھا تھا
وصل کی رات ستاروں نے بڑی حسرت سے
گاہ دیکھا تھا مجھے گاہ اسے دیکھا تھا
لوگ اسے ڈھونڈھنے نکلے تو یہ معلوم ہوا
جس نے دیکھا تھا سر راہ اسے دیکھا تھا
آج اک عمر کے بعد اس سے ملا تھا لیکن
اپنے احوال سے آگاہ اسے دیکھا تھا
اس کا کیا ٹھیک کہ لوگوں نے بہ یک وقت جمالؔ
سر مے خانہ و درگاہ اسے دیکھا تھا
وہ یوں ہی نہیں عشق کی جاگیر سے نکلا
مجبوریٔ نان و نمک و شیر سے نکلا
پایا ہے کسی دائرۂ خاک میں خود کو
میں جب بھی کسی حلقۂ زنجیر سے نکلا
یہ سامنے جو ڈھیر خزانے کا پڑا ہے
نقشے سے نہیں لغزش رہ گیر سے نکلا
کیا ہوتا اگر میں نظر انداز نہ کرتا
جو دوسرا مطلب تری تحریر سے نکلا
دوہری ہوئی جاتی تھی کمر بوجھ سے میری
جب خواب لیے کوچۂ تعبیر سے نکلا
خاک لے جائیں یہاں سے کہ ہوا لے جائیں
کیا ترے شہر میں ہم چھوڑ دیں کیا لے جائیں
بحر غم ہم سے بھی پیراک نہ دیکھے ہوں گے
ڈوبتے جائیں مگر خود کو سنبھالے جائیں
خشک پتوں پہ نہ تحریر محبت لکھو
کل کہیں ان کو ہوائیں نہ اڑا لے جائیں
جان مانگے ہے بہت ان سے تعلق رکھنا
جو بچھڑنے کے لیے راہ نکالے جائیں
ہارنے والوں نے اس رخ سے بھی سوچا ہو گا
سر کٹانا ہے تو ہتھیار نہ ڈالے جائیں
تو مری کھوئی نشانی کے سوا کچھ بھی نہیں
میں تری یاد دہانی کے سوا کچھ بھی نہیں
بند کمروں میں مکیں سوتے ہیں اور آنگن میں
میرے اور رات کی رانی کے سوا کچھ بھی نہیں
یہ تجھے ایک نظر دیکھنے والوں کا ہجوم
میری ناپختہ بیانی کے سوا کچھ بھی نہیں
جو اترتا ہے وہ بہتا ہی چلا جاتا ہے
گویا دریا میں روانی کے سوا کچھ بھی نہیں
جتنے چہرے ہیں وہ مٹی کے بنائے ہوئے ہیں
جتنی آنکھیں ہیں وہ پانی کے سوا کچھ بھی نہیں
تو مری کھوئی نشانی کے سوا کچھ بھی نہیں
میں تری یاد دہانی کے سوا کچھ بھی نہیں
بند کمروں میں مکیں سوتے ہیں اور آنگن میں
میرے اور رات کی رانی کے سوا کچھ بھی نہیں
یہ تجھے ایک نظر دیکھنے والوں کا ہجوم
میری ناپختہ بیانی کے سوا کچھ بھی نہیں
جو اترتا ہے وہ بہتا ہی چلا جاتا ہے
گویا دریا میں روانی کے سوا کچھ بھی نہیں
جتنے چہرے ہیں وہ مٹی کے بنائے ہوئے ہیں
جتنی آنکھیں ہیں وہ پانی کے سوا کچھ بھی نہیں
حساب عمر جب دینا پڑے گا
تو جمع و خرچ کا جھگڑا پڑے گا
ہمیں ہو گا خسارہ عمر بھر کا
تجھے سودا بہت مہنگا پڑے گا
بنی جو صلح کا باعث کسی دن
اسی دیوار کا جھگڑا پڑے گا
قدم الٹے جہاں پڑنے لگیں گے
وہاں سے راستہ سیدھا پڑے گا
خرابہ ہی کوئی آباد کر لو
نہ جانے کب تلک رہنا پڑے گا
ہوا کا رخ بدلنے کی طلب میں
ہوا کے ساتھ بھی چلنا پڑے گا
شجر بھی کاٹنے ہیں آنگنوں سے
پرندوں کا بھی دل رکھنا پڑے گا
دوراہے پر کھڑے کب تک رہو گے
کوئی تو فیصلہ کرنا پڑے گا
خدا نے خوش مجھے اوقات سے زیادہ کیا
کہ ہاتھ تنگ رکھا اور دل کشادہ کیا
محیط چاروں طرف ایک اسم ہے جس نے
نظر میں رنگ بھرے آئنے کو سادہ کیا
کبھی فلک کبھی دھرتی نے دی پناہ مجھے
کبھی خدا سے کبھی خود سے استفادہ کیا
ازل سے اس کا گرفتار عشق ہوں جس نے
دیے کو روشنی میں چاند سے زیادہ کیا
بس ایک سطح یقیں پر رہے ہمیشہ ہم
نہ میں نے عرض کبھی کی نہ اس نے وعدہ کیا
ترا کرم کہ کوئی کام آ پڑا اس دم
میں جب کبھی ترے انکار کا ارادہ کیا
مرے خدا نے مرا رزق مجھ کو پہنچایا
جمالؔ گھر سے نکلنے کا جب ارادہ کیا
خوشبو گلاب میں خوش پتا شجر میں خوش ہے
جو بھی ہے اپنے اپنے دیوار و در میں خوش ہے
پیروں پہ جو کھڑا ہے یہ ہے زمین اس کی
ہے آسمان اس کا جو بال و پر میں خوش ہے
یہ ہجر کون جانے یہ بات کون سمجھے
میں اپنے گھر میں خوش ہوں وہ اپنے گھر میں خوش ہے
تو ہی بتا محبت یہ بھی کئی خوشی ہے
یے دل مرا اکیلا اس شہر بھر میں خوش ہے
جتنے بھی ہیں مسافر سب کے اصول الگ ہیں
کوئی قیام میں اور کوئی سفر میں خوش ہے
برس برس سے مجھے انتظار تھا جس کا
پلک جھپکنے سے پہلے وہ لمحہ بیت گیا
سحر تلک کوئی آیا نہ ساتھ کے گھر میں
بر آمدے میں کوئی رات بھر ٹہلتا رہا
میں آنکھیں بند کئے جاگتا رہا شب بھر
کہ کوئی خواب کسی بھولے بسرے لمحے کا
پھر اس کا نام ہے کیوں زینت در و دیوار
وہ ایک شخص جو اب تیرے شہر میں نہ رہا
دبے قدم اتر آئی ہے رات پیڑوں پر
وہ سو کے اٹھا کوئی جگنو آنکھ ملتا ہوا
گراں گزرتا ہے بے حد یہ سانس کا الجھاؤ
ہمارے راستے میں اور فاصلہ نہ بچھا
صدا بھی دے گا ملاقات کا تمنائی
کھلا نہ چھوڑ کے بیٹھ اپنے گھر کا دروازہ
مری بیاض سے کاٹے ہیں کس نے شعر جمالؔ
یہ میرے بعد مرے گھر میں کون آیا تھا
کوئی موضوع ہو تیرا حوالہ اچھا لگتا ہے
پھر اس کے بعد ہر چپ رہنے والا اچھا لگتا ہے
اک ایسی بے نتیجہ جنگ لڑ کر آ رہا ہوں میں
کہ اب شمشیر سے بڑھ کر پیالہ اچھا لگتا ہے
بہت آرائش خانہ کے منصوبے بناتا ہوں
مگر کمرے کی چھت پر ایک جالا اچھا لگتا ہے
مجھے اچھا نہیں لگتا زباں کو بند کر لینا
مگر بچوں کے ہاتھوں میں نوالہ اچھا لگتا ہے
کبھی دل شاد رہتا ہے کسی کے ملتے رہنے سے
کبھی کوئی بچھڑ کر جانے والا اچھا لگتا ہے
عناصر سے الگ کر کے میں تجھ کو دیکھنا چاہوں
ترے ہم راہ سب کچھ لا محالہ اچھا لگتا ہے
اسی اک بات پر ہے اتفاق و اختلاف اس سے
اسے آئینہ اور مجھ کو پیالہ اچھا لگتا ہے
وہ کوئی اور ہے ہم میں سے ہرگز ہو نہیں سکتا
جسے اس گھر سے باہر کا اجالا اچھا لگتا ہے
پہلے پہل گھر سے نکلے ہو دھیان رہے
کچھ پردیس کی لکھنا گر اوسان رہے
لکھنے والے برا ہمیں ہی لکھیں گے
اپنے شہر میں ہم تیرے مہمان رہے
دل سے تیری یاد نکل کر جائے کیوں
گھر سے باہر کیوں گھر کا سامان رہے
ایسا بدلہ اپنا رنگ سمندر نے
کشتیاں کھینے والے تک حیران رہے
گہری نیندیں لانے والی ہوا چلی
ساری رات تری آہٹ پر کان رہے
دن میں جا کر ایک نشان لگا آؤں
کوئی تو رات کو اس گھر کی پہچان رہے
دل ایسا آباد نگر ہے جس میں جمالؔ
گئے ہوؤں کی یاد سدا مہمان رہے
پہلے تو خاکدان بنانے کا دکھ ہوا
پھر آسمان کو مرے جانے کا دکھ ہوا
رویا ہوں ایک ہستیٔ نادیدہ کے حضور
مٹی میں آنسوؤں کو ملانے کا دکھ ہوا
لوگوں کو بھی ملال ہوا میرے حال پر
مجھ کو بھی داستان سنانے کا دکھ ہوا
مزید شاعری پڑھیے اور دوسرے شعراء کو دریافت کیجیے۔