مکمل شاعری
کسی بھی بات کا جب اعتبار مشکل ہے
پھر ایسے میں یہاں رہنا تو یار مشکل ہے
کچھ اور وسعتیں درکار ہیں محبت کو
وصال و ہجر پہ دار و مدار مشکل ہے
کہ مسکرانا بھی پڑتا ہے فاتحانہ ہمیں
ترے شکستہ دلوں کی ہزار مشکل ہے
سر ریاست الفت نظام ہے ایسا
کوئی ملے یہاں بے روزگار مشکل ہے
ادھار خواب خریدیں اور آنکھیں بیچیں نقد
یہ کاروبار ہے اور کاروبار مشکل ہے
تو کن فضاؤں میں ہے اے رقیب عیش پسند
تری خزاں سے ہماری بہار مشکل ہے
نہ اس کو چومیں تو رستہ بھٹکتی ہیں سانسیں
اور اس کو چومنا بھی بار بار مشکل ہے
اب اس کو ملنے لگے عاشقان جز وقتی
لہٰذا اپنا شمار و قطار مشکل ہے
— جمال احسانی