شاعر کی معلومات لوڈ ہو رہی ہیں...
زندگی کاوش باطل ہے مرا ساتھ نہ چھوڑ
تو ہی اک عمر کا حاصل ہے مرا ساتھ نہ چھوڑ
شاعر کی معلومات لوڈ ہو رہی ہیں...
Mazhar Imam
1928 – 2012
Mazhar Imam, known for his refined taste and literary elegance, holds a distinct place in Urdu literature, particularly as the originator of the "Azad Ghazal" (free verse ghazal). He was an advocate of literary experimentation and innovation. When he introduced this new form of ghazal, many critics objected, but he remained undeterred, often engaging with like-minded friends and offering arguments and suggestions in support of the form. He was born on March 12, 1928, in Munger, where his father worked in the postal department. Though his ancestral home was Sonipatti, near Buxar, he spent a significant part of his life in Darbhanga, where "Ameer Manzil" was known as the hub of literary activity. Later, he settled permanently in Delhi, where he passed away on January 30, 2012. Mazhar Imam held Master’s degrees in Urdu and Persian from Magadh University and Bihar University. He began his career with a newspaper in Kolkata, and in 1958, he joined All India Radio. In 1988, he was appointed as Director of Doordarshan Srinagar. Although he started his literary journey as a fiction writer, he soon turned to poetry. His first poetry collection “Zakhm-e-Tamanna” was published in 1962, followed by “Rishtah Goonge Safar Ka” in 1974, and “Pichhle Mausam Ka Phool” in 1988. For this third collection, he was awarded the Sahitya Akademi Award. His collected works of ghazals and nazms were later published as “Palki Kahkashan Ki” and “Band Hota Bazaar”, respectively. Mazhar Imam was also deeply interested in prose literature, and alongside being a poet, he was known as a prominent critic. His critical essays appeared in collections such as “Aati Jaati Lehrain”, “Ek Lehar Aati Hui”, and “Tanqeed Nama”. His biographical sketches compiled in “Aksar Yaad Aate Hain” gained considerable popularity. These sketches were free from satire, insult, or mockery, and were instead based on personal impressions and reflections.
ان کے کلام کے چند منتخب اشعار پڑھیے۔
زندگی کاوش باطل ہے مرا ساتھ نہ چھوڑ
تو ہی اک عمر کا حاصل ہے مرا ساتھ نہ چھوڑ
لوگ ملتے ہیں سر راہ گزر جاتے ہیں
تو ہی اک ہم سفر دل ہے مرا ساتھ نہ چھوڑ
تو نے سوچا ہے مجھے تو نے سنوارا ہے مجھے
تو مرا ذہن مرا دل ہے مرا ساتھ نہ چھوڑ
تو نہ ہوگا تو کہاں جا کے جلوں گا شب بھر
تجھ سے ہی گرمئ محفل ہے مرا ساتھ نہ چھوڑ
میں کہ بپھرے ہوئے طوفاں میں ہوں لہروں لہروں
تو کہ آسودۂ ساحل ہے مرا ساتھ نہ چھوڑ
اس رفاقت کو سپر اپنی بنا لیں جی لیں
شہر کا شہر ہی قاتل ہے مرا ساتھ نہ چھوڑ
ایک میں نے ہی اگائے نہیں خوابوں کے گلاب
تو بھی اس جرم میں شامل ہے مرا ساتھ نہ چھوڑ
اب کسی راہ پہ جلتے نہیں چاہت کے چراغ
تو مری آخری منزل ہے مرا ساتھ نہ چھوڑ
اپنے کھوئے ہوئے لمحات کو پایا تھا کبھی
میں نے کچھ وقت ترے ساتھ گزارا تھا کبھی
آپ کو میرے تعارف کی ضرورت کیا ہے
میں وہی ہوں کہ جسے آپ نے چاہا تھا کبھی
اب اگر اشک امنڈتے ہیں تو پی جاتا ہوں
حوصلہ آپ کے دامن نے بڑھایا تھا کبھی
اب اسی گیت کی لے سوچ رہی ہے دنیا
میں نے جو گیت تری بزم میں گایا تھا کبھی
میری الفت نے کیا غیر کو مائل ورنہ
میں تری انجمن ناز میں تنہا تھا کبھی
کر دیا آپ کی قربت نے بہت دور مجھے
آپ سے بعد کا احساس نہ اتنا تھا کبھی
دوست ناداں ہو تو دشمن سے برا ہوتا ہے
مجھ کو اپنے دل ناداں پہ بھروسا تھا کبھی
نئی بارش کی رم جھم میں لباس غم تو بدلے گا
وہی رسم چمن ہوگی مگر موسم تو بدلے گا
وہ قہر شاہ خاور ہو کہ زہر باد صرصر ہو
کسی صورت مزاج نازک شبنم تو بدلے گا
مسیحاؤں نے کچھ تازہ دوائیں لا کے رکھی ہیں
نئے زخم آئیں گے اب بھی مگر مرہم تو بدلے گا
کفن ریشم کے مقتولوں کو اب پہنائے جائیں گے
عزاداروں کا طرز گریہ و ماتم تو بدلے گا
نئی ساقی گری کا جشن فیاضی مبارک ہو
وہی ہوں گے ایاغ و جام لیکن سم تو بدلے گا
نئی ناوک زنی ہوگی مگر اتنا بھی کیا کم ہے
کہ جس عالم میں ہم رہتے ہیں وہ عالم تو بدلے گا
اک گزارش ہے بس اتنا کیجیے
جب کبھی فرصت ہو آیا کیجیے
لوگ اس کا بھی غلط مطلب نہ لیں
اجنبیت سے نہ دیکھا کیجیے
خود کو اپنی آنکھ سے دیکھا تو ہے
اب مری آنکھوں سے دیکھا کیجیے
التجا تھی ایک سادہ التجا
اپنی تنہائی میں سوچا کیجیے
یاد تو ہوگی وہ اپنی بے رخی
اب مری تصویر دیکھا کیجیے
مرہم زخم سخن بن جائیے
کچھ مرے فن کا مداوا کیجیے
عشق کو کب یاد تھی رسم وفا
حسن کا کس منہ سے شکوا کیجیے
ظلمت غم جب زیادہ ہو امامؔ
شمع فکر و فن جلایا کیجیے
سانحہ یہ بھی اک روز کر جاؤں گا
وقت کی پالکی سے اتر جاؤں گا
اپنے ٹوٹے ہوئے خواب کی کرچیاں
تیری آسودہ آنکھوں میں بھر جاؤں گا
روشنی کے سفینے بلاتے رہیں
ساحل شب سے ہو کر گزر جاؤں گا
اجنبی وادیاں کوئی منزل نہ گھر
راستے میں کہیں بھی اتر جاؤں گا
میرے دشمن کے دل میں جو برسوں سے ہے
وہ خلا بھی میں اک روز بھر جاؤں گا
دوستوں سے ملاقات کی شام ہے
یہ سزا کاٹ کر اپنے گھر جاؤں گا
کوسوں دور کنارا ہوگا
کشتی ہوگی دریا ہوگا
پاس تمہیں ہو تم ہی بتاؤ
کوئی مجھ سا تنہا ہوگا
آؤ اور قریب آ جاؤ
وقت بھی رستہ تکتا ہوگا
تم سے حسیں تو اور بھی ہوں گے
لیکن کوئی تم سا ہوگا
اب تو کچھ بھی یاد نہیں ہے
ہم نے تم کو چاہا ہوگا
ہم نے گریباں چاک کیا تھا
ہم کو ہی خود سینا ہوگا
جب ہم تیرا نام نہ لیں گے
وہ بھی ایک زمانا ہوگا
وہ بھی ایک حقیقت ہوگی
جس کا نام فسانہ ہوگا
کل کی فکر کہاں تک کیجے
اور برا اب کتنا ہوگا
ہاں وہ امامؔ اک رسوا شاعر
تم نے اس کو دیکھا ہوگا
دنیا کا یہ اعزاز یہ انعام بہت ہے
مجھ پر ترے اکرام کا الزام بہت ہے
اس عمر میں یہ موڑ اچانک یہ ملاقات
خوش گام ابھی گردش ایام بہت ہے
بجھتی ہوئی صبحیں ہوں کہ جلتی ہوئی راتیں
تجھ سے یہ ملاقات سر شام بہت ہے
میں مرحمت خاص کا خواہاں بھی نہیں ہوں
میرے لیے تیری نگہ عام بہت ہے
کم یاب کیا ہے اسے بازار طلب نے
ہم تھے تو وہ ارزاں تھا پر اب دام بہت ہے
اس گھر کی بدولت مرے شعروں کو ہے شہرت
وہ گھر کہ جو اس شہر میں بد نام بہت ہے
اپنے رستے ہوئے زخموں کی قبا لایا ہوں
زندگی میری طرف دیکھ کہ میں آیا ہوں
کسی سنسان جزیرے سے پکارو مجھ کو
میں صداؤں کے سمندر میں نکل آیا ہوں
کام آئی ہے وہی چھاؤں گھنی بھی جو نہ تھی
وقت کی دھوپ میں جس وقت میں کمھلایا ہوں
خیریت پوچھتے ہیں لوگ بڑے طنز کے ساتھ
جرم بس یہ ہے کہ اک شوخ کا ہمسایہ ہوں
صبح ہو جائے تو اس پھول کو دیکھوں کہ جسے
میں شبستان بہاراں سے اٹھا لایا ہوں
عصر نو مجھ کو نگاہوں میں چھپا کر رکھ لے
ایک مٹتی ہوئی تہذیب کا سرمایہ ہوں
یہ تجربہ بھی کروں یہ بھی غم اٹھاؤں میں
کہ خود کو یاد رکھوں اس کو بھول جاؤں میں
اسی سے پوچھ کے دیکھوں وہ میرا ہے کہ نہیں
اب اور کتنا فریب جمال کھاؤں میں
وہ بے لباس سہی جامہ زیب کتنا ہے
مہ خیال کو پوشاک کیا پہناؤں میں
وہ پل کہاں ہے جو دنیا سے جوڑتا تھا مجھے
جو تو قریب ہو سب سے قریب آؤں میں
کبھی تو ہو مرے احساس کم تری میں کمی
کبھی تو ہو کہ اسے کھل کے یاد آؤں میں
وہ شخص ہے کہ نسیم سحر کا جھونکا ہے
بکھر ہی جاؤں جو اس کو گلے لگاؤں میں
اذاں کے بعد دعا کو جو ہاتھ اٹھائے وہ
امامؔ اپنی نمازیں بھی بھول جاؤں میں
ہر ایک شخص کا چہرہ اداس لگتا ہے
یہ شہر میرا طبیعت شناس لگتا ہے
کھلا ہو باغ میں جیسے کوئی سفید گلاب
وہ سادہ رنگ نگاہوں کو خاص لگتا ہے
سپردگی کا نشہ بھی عجیب نشہ ہے
وہ سر سے پاؤں تلک التماس لگتا ہے
ہوا میں خوشبوئے موسم کہیں سوا تو نہیں
وہ پاس ہے یہ بعید از قیاس لگتا ہے
چپکے چپکے یہ کام کرتا جا
کام سب کا تمام کرتا جا
ہم کو بد نام کر زمانے میں
کچھ زمانے میں نام کرتا جا
یاد کی شاہراہ سیمیں پر
اے سمن بر خرام کرتا جا
اے کہ تیرا مزاج شبنم سا
برگ دل پر قیام کرتا جا
اشک آنکھوں میں لے کے رخصت ہو
میرا مرنا حرام کرتا جا
بستیوں کا اجڑنا بسنا کیا
بے جھجک قتل عام کرتا جا
داستاں گو تری کہانی میں
رمز کیا ہے کلام کرتا جا
چار چھ شعر کام کے کہہ لے
کچھ تو مظہر امامؔ کرتا جا
پھر آپ نے دیکھا ہے محبت کی نظر سے
گزرے نہ کہیں گردش دوراں بھی ادھر سے
پوچھیں تو ذرا پیچ و خم راہ کی باتیں
کچھ لوگ ابھی لوٹ کے آئے ہیں سفر سے
شاید کہیں سورج کی کرن شام کو پھوٹے
ہم شمع جلائے ہوئے بیٹھے ہیں سحر سے
لوگو مری آشفتہ سری پر نہ کرو طنز
الزام اتارو کوئی اس زلف کے سر سے
دیکھا نہ انہیں دیدۂ حیرت نے دوبارہ
جلووں کو شکایت ہے مری تاب نظر سے
خوشبوئے گل و لالہ چھپا لیتے ہیں پتے
اب قدر ہنر ہے تو فقط عرض ہنر سے
تارے تو چمک اپنی دکھاتے ہیں سحر تک
دل ڈوبنے لگتا ہے مگر پچھلے پہر سے
غیروں کی نگاہیں ترے جلووں سے ہیں سیراب
اے کاش یہ بادل مری آنکھوں پہ بھی برسے
ظلمت ہی کے سائے میں سکوں ڈھونڈئیے مظہرؔ
خیرات بہت مانگ چکے نور سحر سے
زمانہ اب یہ کیسا آ رہا ہے
کہ ہر بدمست سنبھلا جا رہا ہے
جلاتی ہے خرد شمعوں پہ شمعیں
اندھیرا ہے کہ بڑھتا جا رہا ہے
دعائیں کر رہے ہیں اہل ساحل
سفینہ ہے کہ ڈوبا جا رہا ہے
مگر بڑھتی نہیں ہے بات آگے
زمانہ ہے کہ گزرا جا رہا ہے
بھرا تھا رنگ جس خاکے میں برسوں
وہ خاکہ یک بہ یک دھندلا رہا ہے
محبت آپ ہی منزل ہے اپنی
نہ جانے حسن کیوں اترا رہا ہے
میں خود تصویر بنتا جا رہا ہوں
تصور میں مرے کون آ رہا ہے
کسی سے پھر محبت ہو رہی ہے
مجھے پھر پیار دل پر آ رہا ہے
نگاہ عشق کی وسعت نہ پوچھو
جہان حسن سمٹا جا رہا ہے
جدا اس کو نہ سمجھو کارواں سے
امامؔ اک بانکپن سے آ رہا ہے
درد عالم بھی کہیں درد محبت ہی نہ ہو
دل کے بہلانے کی یہ بھی کوئی صورت ہی نہ ہو
آج تزئین جمال ایک فسانہ ہی سہی
کل یہ مشاطگئی حسن حقیقت ہی نہ ہو
ان کی آنکھوں میں مچلتا ہے جو افسانۂ شوق
سوچتا ہوں کہیں وہ میری حکایت ہی نہ ہو
بے رخی پر جسے محمول کیا کرتا ہوں
وہ بھی کچھ آپ کا انداز محبت ہی نہ ہو
آج خود حسن کو دیکھا ہے سر کوچۂ عشق
دیکھیں آغاز کوئی تازہ روایت ہی نہ ہو
عقل بھی اب رسن و دار تک آ پہنچی ہے
طفلک شوق کی اک یہ بھی شرارت ہی نہ ہو
دل حزیں کو تمنا ہے مسکرانے کی
یہ رت خوشی کی ہے یا ریت ہے زمانے کی
بنا گئیں اسے پیچیدہ نت نئی شرحیں
کھلی ہوئی تھی حقیقت مرے فسانے کی
حرم کے پاس پہنچتے ہی تھک کے بیٹھ گئے
وگرنہ راہ تو لی تھی شراب خانے کی
کسی کے سایۂ گیسو کی بات چھڑتی ہے
مرے قریب رہیں گردشیں زمانے کی
میں تیرے غم کا بھی تھوڑا سا جائزہ لے لوں
کبھی ملے مجھے فرصت جو مسکرانے کی
سمیٹ لیں مہ و خورشید روشنی اپنی
صلاحیت ہے زمیں میں بھی جگمگانے کی
بھلا امامؔ تہجد گزار کیا جانیں
کہ رات کتنی حسیں ہے شراب خانے کی
دل حزیں کو تمنا ہے مسکرانے کی
یہ رت خوشی کی ہے یا ریت ہے زمانے کی
بنا گئیں اسے پیچیدہ نت نئی شرحیں
کھلی ہوئی تھی حقیقت مرے فسانے کی
حرم کے پاس پہنچتے ہی تھک کے بیٹھ گئے
وگرنہ راہ تو لی تھی شراب خانے کی
کسی کے سایۂ گیسو کی بات چھڑتی ہے
مرے قریب رہیں گردشیں زمانے کی
میں تیرے غم کا بھی تھوڑا سا جائزہ لے لوں
کبھی ملے مجھے فرصت جو مسکرانے کی
سمیٹ لیں مہ و خورشید روشنی اپنی
صلاحیت ہے زمیں میں بھی جگمگانے کی
بھلا امامؔ تہجد گزار کیا جانیں
کہ رات کتنی حسیں ہے شراب خانے کی
شکریہ تیرا کہ غم کا حوصلہ رہنے دیا
بے اثر کر دی دعا دست دعا رہنے دیا
منصفی کا شور محشر گونجتا رہنے دیا
سب دلیلوں کو سنا اور فیصلہ رہنے دیا
اے خدا ممنون ہوں تیرا کہ میرے پھول میں
تو نے خوشبوئے ہوس رنگ وفا رہنے دیا
کچھ اشارے اتنے مبہم اتنے واضح اتنے شوخ
داستاں ساری سنا دی مدعا رہنے دیا
ایک ناز بے تکلف میرے تیرے درمیاں
دوریاں ساری مٹا دیں فاصلہ رہنے دیا
ٹوٹی ہوئی دیوار کا سایہ تو نہیں ہوں
میں تیرا ہی بھولا ہوا وعدہ تو نہیں ہوں
گزرا تھا دبے پاؤں جہاں سے تو شب ماہ
میں ہی وہ ترا باغ تمنا تو نہیں ہوں
جس نقش پہ چلنے کی قسم کھاتی ہے دنیا
میں ہی وہ ترا نقش کف پا تو نہیں ہوں
اوروں سے مرا نام الجھتا ہے تو الجھے
شکوہ تجھے کیوں ہو کہ میں تیرا تو نہیں ہوں
کیوں خود کو نہ چاہوں کہ ترا دل تو نہیں میں
کیوں خود کو بھلا دوں کہ زمانہ تو نہیں ہوں
تو میری ضرورت مری عادت تو نہیں ہے
مہتاب زمیں میں ترا ہالہ تو نہیں ہوں
باغوں سے اڑائی ہوئی خوشبو ہی سہی تو
میں نکہت بے باک کا پردہ تو نہیں ہوں
میں عکس گریزاں تو نہیں اپنی انا کا
میں تیرا ہی ٹوٹا ہوا رشتہ تو نہیں ہوں
میں آخری جادو تو نہیں ساحر شب کا
سہما ہوا میں صبح کا تارا تو نہیں ہوں
مزہ لمس کا بے زبانی میں تھا
عجب ذائقہ خوش گمانی میں تھا
مری وسعتوں کو کہاں جانتا
وہ محو اپنی ہی بے کرانی میں تھا
مٹاتے رہے اولیں یاد کو
کہ جو نقش تھا نقش ثانی میں تھا
بہت دیر تک لوگ ساحل پہ تھے
سفینہ مرا جب روانی میں تھا
ہمیں سے نہ آداب برتے گئے
سلیقہ بہت میزبانی میں تھا
مئے کہنہ میں تھا نشہ در نشہ
مگر جو مزہ تازہ پانی میں تھا
ہمیں وہ ہمیں سے جدا کر گیا
بڑا ظلم اس مہربانی میں تھا
سفر میں اچانک سبھی رک گئے
عجب موڑ اپنی کہانی میں تھا
تو ہے گر مجھ سے خفا خود سے خفا ہوں میں بھی
مجھ کو پہچان کہ تیری ہی ادا ہوں میں بھی
ایک تجھ سے ہی نہیں فصل تمنا شاداب
وہی موسم ہوں وہی آب و ہوا ہوں میں بھی
ثبت ہوں دست خموشی پہ حنا کی صورت
ناشنیدہ ہی سہی تیرا کہا ہوں میں بھی
چاند بن کر ترے آنگن میں اتر ہی جاؤں
رات کے پچھلے پہر مانگ دعا ہوں میں بھی
یوں نہ مرجھا کہ مجھے خود پہ بھروسہ نہ رہے
پچھلے موسم میں ترے ساتھ کھلا ہوں میں بھی
جانے کس راہ چلوں کون سے رخ مڑ جاؤں
مجھ سے مت مل کہ زمانے کی ہوا ہوں میں بھی
رخصت شام ہے اور وعدے کا سایہ بھی نہیں
اب تکلف نہ کروں جا کے تقاضا ہو جاؤں
کب سے ہوں ماہی بے آب زمانے کی طرح
کوئی نیکی ہو ترے پاس تو دریا ہو جاؤں
کتنے پیچیدہ مسائل کی تھکن ہے مجھ میں
اک ذرا سوچ لوں تجھ کو تر و تازہ ہو جاؤں
کتنے پہلو ہیں کئی رنگ چھپے ہیں مجھ میں
ابھی ایسا ہوں جو تو چاہے تو ویسا ہو جاؤں
اپنے سینے میں ہیں ٹھہری ہوئی سانسیں کب سے
زلزلہ بن کے تو آ میں تہ و بالا ہو جاؤں
وہ رفاقت پہ رضامند نہیں ہے تو نہ ہو
کیا میں اس شخص کے ہوتے ہوئے تنہا ہو جاؤں
بے یقینی ہے کچھ امروز میں اتنی مظہرؔ
جی میں آتا ہے کہ اندیشۂ فردا ہو جاؤں
اس کو یہ ضد ہے کہ رہ جائے بدن سر نہ رہے
گھومتی جائے زمیں اور کوئی محور نہ رہے
اس نے ہمت جو بڑھائی بھی تو رکھا یہ لحاظ
کوئی بزدل نہ بنے کوئی دلاور نہ رہے
اس نے اس طرح اتاری مرے غم کی تصویر
رنگ محفوظ تو رہ جائیں پہ منظر نہ رہے
اس نے کس ناز سے بخشی ہے مجھے جائے پناہ
یوں کہ دیوار سلامت ہو مگر گھر نہ رہے
اب یہ سازش ہے کہ لکھے نہ کوئی قصۂ دل
لفظ رہ جائے مگر کوئی سخن ور نہ رہے
اب کے آندھی بھی چلی جب تو سلیقے سے چلی
یوں کہ رہ جائے شجر شاخ ثمر ور نہ رہے
اب بھی پردے ہیں وہی پردہ دری تو دیکھو
عقل کا دعویٰ بالغ نظری تو دیکھو
سر پٹکتے ہیں کہ دیوار خمستاں ڈھا دیں
حضرت شیخ کی آشفتہ سری تو دیکھو
آج ہر زخم کے منہ میں ہے زبان فریاد
میرے عیسیٰ کی ذرا چارہ گری تو دیکھو
قید نظارہ سے جلووں کو نکلنے نہ دیا
دوستوں کی یہ وسیع النظری تو دیکھو
ان سے پہلے ہی چلے آئے جناب ناصح
میرے نالوں کی ذرا زود اثری تو دیکھو
ہے تغافل کہ توجہ نہیں کھلنے پاتا
حسن معصوم کی بیداد گری تو دیکھو
مجھ سے ہی پوچھ رہا ہے مری منزل کا پتہ
میرے رہبر کی ذرا راہ بری تو دیکھو
ان کو دے آئے ہیں خود اپنی محبت کے خطوط
غم گساروں کی ذرا نامہ بری تو دیکھو
دونوں ہی راہ میں ٹکراتے چلے جاتے ہیں
عشق اور عقل کی یہ ہم سفری تو دیکھو
جاوداں قرب کے لمحات ہوئے ہیں مظہر
طائر وقت کی بے بال و پری تو دیکھو
اب بھی پردے ہیں وہی پردہ دری تو دیکھو
عقل کا دعویٰ بالغ نظری تو دیکھو
سر پٹکتے ہیں کہ دیوار خمستاں ڈھا دیں
حضرت شیخ کی آشفتہ سری تو دیکھو
آج ہر زخم کے منہ میں ہے زبان فریاد
میرے عیسیٰ کی ذرا چارہ گری تو دیکھو
قید نظارہ سے جلووں کو نکلنے نہ دیا
دوستوں کی یہ وسیع النظری تو دیکھو
ان سے پہلے ہی چلے آئے جناب ناصح
میرے نالوں کی ذرا زود اثری تو دیکھو
ہے تغافل کہ توجہ نہیں کھلنے پاتا
حسن معصوم کی بیداد گری تو دیکھو
مجھ سے ہی پوچھ رہا ہے مری منزل کا پتہ
میرے رہبر کی ذرا راہ بری تو دیکھو
ان کو دے آئے ہیں خود اپنی محبت کے خطوط
غم گساروں کی ذرا نامہ بری تو دیکھو
دونوں ہی راہ میں ٹکراتے چلے جاتے ہیں
عشق اور عقل کی یہ ہم سفری تو دیکھو
جاوداں قرب کے لمحات ہوئے ہیں مظہر
طائر وقت کی بے بال و پری تو دیکھو
تجھے بد نام کرنے پر تلی ہے
گلی ہر راہ رو کو ٹوکتی ہے
مرا قصہ مگر تجھ سے تہی سے
تری باتوں میں کیا شائستگی ہے
سکوت دشت بے خوابی میں پہروں
صدائے بربط شب گونجتی ہے
وہیں تک ہے کھنڈر کی آخری حد
جہاں تک چاندنی پھیلی ہوئی ہے
مری تخئیل کے افسردہ لب پر
وہ اپنے ہونٹ رکھ کر سو گئی ہے
کوئی سنے نہ سنے عرض حال کرتا جا
نہ رک جواب کی خاطر سوال کرتا جا
سمندروں کو ہوا میں اچھال دے اک بار
تو با ہنر ہے تو یہ بھی کمال کرتا جا
بدل دے ہجر کی ساعت کو وصل لمحوں میں
بنا کے کام کو آساں محال کرتا جا
تو بے مثال اگر ہے تو مجھ میں ظاہر ہو
مجھے بھی اپنی طرح بے مثال کرتا جا
قریب آ کہ اجالوں کے ہار پہنا دوں
مجھے اسیر شب لا زوال کرتا جا
شکست و فتح نصیبوں سے ہے ولے اے دل
ملے ہیں زخم تو خود اندمال کرتا جا
یہیں کہیں ترا ماضی بھی سانس لیتا ہے
گزرنے والے بس اتنا خیال کرتا جا
ترا ہنر تری دانائی بد دعا ہے امامؔ
زوال تیرا مقدر کمال کرتا جا
سخن نواز مرے نکتہ چیں مرے ناقد
مجھے شکار عتاب و جلال کرتا جا
بہت سے تیر ہیں تیری کماں میں قید اب بھی
مرے لہو سے قبا اپنی لال کرتا جا
مرے زوال پہ کر ثبت آخری تحریر
یہ کار نیک بھی اے لا زوال کرتا جا
میں جانتا ہوں وہ نزدیک او دور میرا تھا
بچھڑ گیا جو میں اس سے قصور میرا تھا
جو پاؤں آئے تھے گھر تک مرے وہ اس کے تھے
وہ دل بڑھا تھا جو اس کے حضور میرا تھا
بڑا غرور تھا دونوں کو ہم نوائی پر
نگاہ اس کی تھی لیکن سرور میرا تھا
وہ آنکھ میری تھی جو اس کے سامنے نم تھی
خموش وہ تھا کہ یوم نشور میرا تھا
کہا یہ سب نے کہ جو وار تھے اسی پر تھے
مگر یہ کیا کہ بدن چور چور میرا تھا
میں جانتا ہوں وہ نزدیک او دور میرا تھا
بچھڑ گیا جو میں اس سے قصور میرا تھا
جو پاؤں آئے تھے گھر تک مرے وہ اس کے تھے
وہ دل بڑھا تھا جو اس کے حضور میرا تھا
بڑا غرور تھا دونوں کو ہم نوائی پر
نگاہ اس کی تھی لیکن سرور میرا تھا
وہ آنکھ میری تھی جو اس کے سامنے نم تھی
خموش وہ تھا کہ یوم نشور میرا تھا
کہا یہ سب نے کہ جو وار تھے اسی پر تھے
مگر یہ کیا کہ بدن چور چور میرا تھا
خون اوڑھے ہوئے ہر گھر کا سراپا نکلا
آپ کے شہر کا انداز نرالا نکلا
چھو کے اک شخص کو پرکھا تو ملمع نکلا
اس کو میں کیسا سمجھتا تھا وہ کیسا نکلا
روح ویران ملی رنگ پریدہ نکلا
اس کو نزدیک سے دیکھا تو زمانہ نکلا
سچ کے صحرا میں انہیں ڈھونڈ کے تھک ہار گئے
جھوٹ کے شہر میں یاروں کا بسیرا نکلا
خوش ہو اے دھوپ کے نیزوں سے جھلسنے والو
چاند کے دوش پہ سورج کا جنازہ نکلا
جس سے کترا کے نکلتے رہے برسوں سر راہ
اس سے کل ہاتھ ملایا تو وہ اپنا نکلا
کہیں صحرا میں بھی ڈس لے نہ ہمیں سیرابی
ریت کے بطن سے پھنکارتا دریا نکلا
نرم رو تھا تو سبھی راہ سے منہ موڑ گئے
سنگ اٹھایا تو مرے ساتھ زمانہ نکلا
وادیاں لفظ و معانی کی تہہ آب ہوئیں
کن پہاڑوں سے خیالات کا جھرنا نکلا
یہ کھیل بھول بھلیاں میں ہم نے کھیلا بھی
تری تلاش بھی کی اور خود کو ڈھونڈا بھی
مرا نصیب تھی ہموار راستے کی تھکن
مرا حریف پہاڑوں پہ چڑھ کے اترا بھی
یہ آرزو تھی کہ یک رنگ ہو کے جی لیتا
مگر وہ آنکھ جو شیطاں بھی ہے فرشتہ بھی
سمندروں سے گہر کب کے ہو گئے ناپید
بھنور کے ساتھ میں گہرائیوں میں اترا بھی
برہنگی پہ بھی گزرا قبائے زر کا گماں
لباس پر ہوا جزو بدن کا دھوکا بھی
گرجنے والے برستے نہیں یہ سنتے تھے
گزشتہ رات وہ گرجا بھی اور برسا بھی
اس کی آنکھوں میں تمنائے سحر رکھ دینا
سینۂ شب میں کسی بات کا ڈر رکھ دینا
آج گزرے گا اسی سمت سے وہ مہر بدن
دل کے رستے میں ذرا چند شجر رکھ دینا
یہ نہ کہنا کہ اندھیرا ہے بہت راہوں میں
اس سے ملنا تو ہتھیلی پہ قمر رکھ دینا
اس کو اشعار سنانا تو کرامات کے ساتھ
اپنے ٹوٹے ہوئے لفظوں میں اثر رکھ دینا
وارداتیں تو کئی شہر میں گزری ہوں گی
آج اخبار میں میری بھی خبر رکھ دینا
جس ورق پر ہے حدیث لب و رخسار رقم
اس ورق پر کوئی برگ گل تر رکھ دینا
ایک مہتاب درخشاں ہے سر بام خیال
میری آنکھوں میں بھی نیرنگ نظر رکھ دینا
لالۂ نم سے تراشے وہ کوئی پیکر سنگ
دست صناع میں اک یہ بھی ہنر رکھ دینا
جو زیاں دل کا ہوا اس کا ازالہ ہو جاؤں
اب تو اظہار محبت کا سلیقہ ہو جاؤں
کھینچنا ہے ترے دامن کو حریفانہ مجھے
اک ذرا رک مرے یوسف میں زلیخا ہو جاؤں
میں ستارے کی طرح وقت پہ ہوتا ہوں غروب
شب ترا ساتھ رہا اب میں سویرا ہو جاؤں
تیرے بیمار کا ہوتا ہے مرض اور سوا
تو جو بیمار ہو میرا تو میں اچھا ہو جاؤں
میں شناور ہوں زمانے کے بھرے دریا کا
پار اترنا ہو تجھے گر تو سفینہ ہو جاؤں
اتنا بے درد ابھی دل تو نہیں ہے میرا
ساتھ کیوں چھوڑ دوں اپنا میں زمانہ ہو جاؤں
وقت رخصت تو چمک اپنی دکھانی ہے مجھے
چاند بننے سے رہا صبح کا تارا ہو جاؤں
نگاہ و دل کے پاس ہو وہ میرا آشنا رہے
ہوس ہے یا کہ عشق ہے یہ کون سوچتا رہے
وہ میرا جب نہ ہو سکا تو پھر یہی سزا رہے
کسی کو پیار جب کروں وہ چھپ کے دیکھتا رہے
اسے منا تو لوں مگر یہ سلسلہ بھی کیا رہے
الگ ہے اس کا ذائقہ کہ وہ کھنچا کھنچا رہے
مشام جاں پہ خوشبوؤں کی جب پھوار ہی نہ ہو
ہزار بات بات میں وہ پھول ٹانکتا رہے
شگفتن جمال کو حجاب لمس چاہئے
فصیل شب کی اوٹ میں چراغ یہ جلا رہے
نہ اتنی دور جائیے کہ لوگ پوچھنے لگیں
کسی کو دل کی کیا خبر یہ ہاتھ تو ملا رہے
موسم کے بدلنے کا کچھ اندازہ بھی ہوتا
جب گھر ہی بنایا تھا تو دروازہ بھی ہوتا
ہم شعر نمک ریز سناتے سر محفل
جو زخم فسردہ تھا تر و تازہ بھی ہوتا
تم ہوتے تو معراج خیالات بھی ہوتی
بکھرے ہوئے الفاظ کا شیرازہ بھی ہوتا
جذبات کی آنکھوں میں چمکتا کوئی شعلہ
احساس کے رخسار پہ کچھ غازہ بھی ہوتا
رقاصۂ دیروز بھی بے پیرہن آتی
دوشیزۂ امکان کا خمیازہ بھی ہوتا
جو اب تک ناؤ یہ ڈوبی نہیں ہے
تو ساحل پر بھی بے چینی نہیں ہے
چلو ہم بھی وفا سے باز آئے
محبت کوئی مجبوری نہیں ہے
ذرا تاریکیوں کو بھی پکارو
کہ اتنی روشنی اچھی نہیں ہے
ابھی سے کانپتا ہے شمع کا دل
ابھی اس نے نقاب الٹی نہیں ہے
رہا کرتی ہے حسرت بن کے دل میں
متاع آرزو لٹتی نہیں ہے
حیات جاوداں پانے کی خاطر
حیات مختصر چھوٹی نہیں ہے
امامؔ آئیں ذرا اس بزم تک وہ
جنہیں احساس محرومی نہیں ہے
میرا فن میری غزل تیرا اشارا تو نہیں
حسن تیرا اسی پردے میں خود آرا تو نہیں
دم ظلمت بھی جو آنکھوں میں ہے تصویر سحر
ہاتھ کچھ اس میں بھی اے دوست تمہارا تو نہیں
کاکل وقت میں سلجھاؤ نظر آتا ہے
آپ نے زلف پریشاں کو سنوارا تو نہیں
میرے احساس کی وادی میں شفق سی جھلکی
مجھ کو دوشیزۂ فطرت نے پکارا تو نہیں
دامن حسن سے کچھ اور سلگ اٹھتی ہے
عشق کی آنکھ میں شبنم بھی شرارا تو نہیں
مانتا ہوں کہ کنارے کی تمنا ہے مجھے
میں نے طوفاں سے کیا پھر بھی کنارا تو نہیں
خون گلشن ہے پس پردۂ اعلان بہار
دیکھنا غنچۂ نورس میں شرارا تو نہیں
پھر نئے سر سے پر و بال میں جنبش سی ہوئی
نرگس شاہد گل کا یہ اشارا تو نہیں
تھم گئی صوت جرس رک گئے رہبر کے قدم
کسی گم کردۂ منزل نے پکارا تو نہیں
میں نے مانا ترے کوچے میں قدم اٹھ نہ سکے
زیست کی دوڑ میں لیکن کبھی ہارا تو نہیں
زلزلے سب دل کے اندر ہو گئے
حادثے رومان پرور ہو گئے
کشتیوں کی قیمتیں بڑھنے لگیں
جتنے صحرا تھے سمندر ہو گئے
دھوپ میں پہلے پگھل جاتے تھے لوگ
اب کے کیا گزری کہ پتھر ہو گئے
وہ نگاہیں کیا پھریں ہم سے کہ ہم
اپنی ہی آنکھوں میں کم تر ہو گئے
تم کہ ہر دل میں تمہارا گھر ہوا
ہم کہ اپنے گھر میں بے گھر ہو گئے
میرے حریف ہی کو سہی چاہتا تو ہے
اب اس کی زندگی میں کوئی تیسرا تو ہے
مانا گزارتا ہے وہ مصروف زندگی
لیکن کبھی کبھی ہی مجھے سوچتا تو ہے
چھلکی ہوئی ہیں ساعت جاں کی گلابیاں
محفل میں آنسوؤں کی ابھی رت جگا تو ہے
اس کو اداس دیکھ کے کتنی خوشی ہوئی
میری تمام عمر کا غم آشنا تو ہے
نوک مژہ پہ اس کی ستارہ کبھی کبھی
میرے دھڑکتے دل کی طرح کانپتا تو ہے
سچ ہے کہ تتلیوں سے اسے ہے مناسبت
کم کم ہی برگ دل پہ مگر بیٹھتا تو ہے
انگڑائیوں سے پھول کی آتی تو ہے صدا
خوشبو کا شوخ و شنگ بدن ٹوٹتا تو ہے
ہاتھ اٹھتے ہی کٹا چلیے یہاں سے چلیے
کیا دعا کیسی دعا چلیے یہاں سے چلیے
باز ہے کوئی دریچہ نہ کوئی در ہے کھلا
کوئی جلوہ نہ ادا چلیے یہاں سے چلیں
اس کے گھر پر بھی وہی شہر خموشاں کا سماں
کوئی آہٹ نہ صدا چلیے یہاں سے چلیے
خواب خوشبوئے طلب رنگ ہوس ناز وفا
سارا سرمایہ گیا چلیے یہاں سے چلیے
کوئی سایہ نہ شجر کوئی تمنا نہ امنگ
اڑ گئی سر سے ردا چلیے یہاں سے چلیے
اس چکا چوند میں سکوں کی پرکھ کیا ہوگی
کوئی کھوٹا نہ کھرا چلیے یہاں سے چلیے
دوستوں ہی کے قبیلے میں یہ کہرام نہیں
دشمنوں نے بھی کہا چلیے یہاں سے چلیے
وہ روشنی ہے کہ آنکھوں کو کچھ سجھائی نہ دے
سکوت وہ کہ دھماکہ بھی اب سنائی نہ دے
پہنچ گیا ہوں زمان و مکان کے ملبے تک
مری انا مجھے الزام نارسائی نہ دے
اگر کہیں ہے تو دل چیر کر دکھا مجھ کو
تو اپنی ذات کا عرفان دے خدائی نہ دے
ازل کے ٹوٹتے رشتوں کی اس کشاکش میں
پکار ایسی ادا سے مجھے سنائی نہ دے
نکل چکا ہوں میں اپنی کمان سے آگے
تعلقات گزشتہ کی اب دہائی نہ دے
وہی دشت بلا ہے اور میں ہوں
زمانے کی ہوا ہے اور میں ہوں
تجھے اے ہم سفر کیسے سنبھالوں
پہاڑی راستہ ہے اور میں ہوں
سکوت کوہ ہے اور سایۂ در
صدائے ماسوا ہے اور میں ہوں
مگر شاخوں سے پتے گر رہے ہیں
وہی آب و ہوا ہے اور میں ہوں
یہ ساری برف گرنے دو مجھی پر
تپش سب سے سوا ہے اور میں ہوں
کئی دن سے نشیمن خاک دل کا
سر شاخ ہوا ہے اور میں ہوں
پہاڑوں پر کہیں بارش ہوئی ہے
زمیں محو دعا ہے اور میں ہوں
مجھے بھی کچھ نہ کچھ کرنا پڑے گا
زمانہ سرپھرا ہے اور میں ہوں
حرف دل نارسا ہے ترے شہر میں
ہر صدا بے صدا ہے ترے شہر میں
کوئی خوشبو کی جھنکار سنتا نہیں
کون سا گل کھلا ہے ترے شہر میں
کب دھنک سو گئی کب ستارے بجھے
کوئی کب سوچتا ہے ترے شہر میں
اب چناروں پہ بھی آگ کھلنے لگی
زخم لو دے رہا ہے ترے شہر میں
جتنے پتے تھے سب ہی ہوا دے گئے
کس پہ تکیہ رہا ہے ترے شہر میں
ایک درد جدائی کا غم کیا کریں
کس مرض کی دوا ہے ترے شہر میں
اب کسی شہر کی چاہ باقی نہیں
دل کچھ ایسا دکھا ہے ترے شہر میں
جیسے کسی طوفان کا خدشہ بھی نہیں تھا
کیا لوگ تھے اندیشۂ فردا بھی نہیں تھا
وہ کیسے مسافر تھے کہ بے زاد سفر تھے
سینے پہ کوئی بار تمنا بھی نہیں تھا
کیوں لوگ مزاروں پہ دعا مانگ رہے تھے
مجھ پر کسی آسیب کا سایہ بھی نہیں تھا
کس باغ طلسمات میں گم ہو گئیں آنکھیں
میں نے تری جانب ابھی دیکھا بھی نہیں تھا
کیوں تازہ ہوا کا کوئی جھونکا نہیں آیا
احساس کے در پر کوئی پردہ بھی نہیں تھا
نشہ در گندم کا ہرن ہونے سے پہلے
جنت سے نکلنا ہے یہ سوچا بھی نہیں تھا
گرتی ہوئی دیوار کو سب دیکھ رہے تھے
اس شہر میں کچھ اور تماشا بھی نہیں تھا
ناکردہ گناہی کی سزا دے مجھے یارب
جو کام کیا میں نے وہ اچھا بھی نہیں تھا
بھرا ہوا تری یادوں کا جام کتنا تھا
سحر کے وقت تقاضائے شام کتنا تھا
رخ زوال پہ رنگ دوام کتنا تھا
کہ گھٹ کے بھی مرا ماہ تمام کتنا تھا
تھا تیرے ناز کو کتنا مری انا کا خیال
مرا غرور بھی تیرا غلام کتنا تھا
جو پو پھٹی تو ہر اک داستاں تمام ہوئی
عجب کہ ان کے لیے اہتمام کتنا تھا
انہیں کو یاد کیا جب تو کچھ نہ یاد آیا
وہ لوگ جن کا زمانے میں نام کتنا تھا
ابھی شجر سے جدائی کے دن نہ آئے تھے
پکا ہوا تھا وہ پھل پھر بھی خام کتنا تھا
وہاں تو کوئی نہ تھا ایک اپنے غم کے سوا
مرے مکاں پہ مگر اژدحام کتنا تھا
دلوں کے رنگ عجب رابطہ ہے کتنی دیر
وہ آشنا ہے مگر آشنا ہے کتنی دیر
نئی ہوا ہے کریں مشعل ہوس روشن
کہ شمع درد چراغ وفا ہے کتنی دیر
اب آرزو کو تری بے صدا بھی ہونا ہے
ترے فقیر کے لب پر دعا ہے کتنی دیر
اب اس کو سوچتے ہیں اور ہنستے جاتے ہیں
کہ تیرے غم سے تعلق رہا ہے کتنی دیر
ہے خشک چشمۂ صحرا مریض وادی و کوہ
نگار خانۂ آب و ہوا ہے کتنی دیر
ٹھٹھرتے پھول پہ تصویر رنگ و بو کب تک
جھلستی شاخ پہ برگ حنا ہے کتنی دیر
ترا خیال سر شام غم سنورتا ہوا
بہت قریب سے گزرا سلام کرتا ہوا
جھجک رہا تھا وہ مجھ سے نظر ملاتے ہوئے
کہ میں بھی تھا اسی خاکے میں رنگ بھرتا ہوا
میں غرق ہونے ہی والا تھا جب تو اک تنکا
بھنور سے مجھ کو دکھائی دیا ابھرتا ہوا
ملا وہ پانچ ستاروں کی رقص گاہوں میں
زمانے بھر سے پشیمان خود سے ڈرتا ہوا
مسافتیں ہیں بہت اور سخت راہوں سے
گزر گیا ہے وہ مجھ کو تلاش کرتا ہوا
رقم ہوا نہیں اب تک نصاب ہم سفری
وہ قافلہ بھی ملا جب تو کوچ کرتا ہوا
عجب طلسم سفر ہے کہ شام مقتل تک
پہنچ گیا ہوں میں ہر موڑ پر ٹھہرتا ہوا
کنارہ تھا مرے دریا سے کٹ گیا وہ شخص
کہ میں تھا وقت کی سرحد کو پار کرتا ہوا
تجھے بھی جانچتے اپنا بھی امتحاں کرتے
کہیں چراغ جلاتے کہیں دھواں کرتے
کئی تھے جلوۂ نایاب تجھ سے پہلے بھی
کس آسرے پہ ترا نقش جاوداں کرتے
سفینہ ڈوب رہا تھا تو کیوں نہ یاد آیا
تری طلب ترے ارماں کو بادباں کرتے
محبتیں بھی تری ہیں شکایتیں بھی تری
یقین تجھ پہ نہ ہوتا تو کیوں گماں کرتے
ہوا تھی تیز جلاتے رہے دلوں میں چراغ
کٹی ہے عمر لہو اپنا رائیگاں کرتے
وہ بے جہت کا سفر تھا سواد شام نہ صبح
کہاں پہ رکتے کہاں یاد رفتگاں کرتے
دیار خواب میں ٹھہرے حصار گل میں رہے
مگر یہ غم ہی رہا خود کو شادماں کرتے
دل اکیلا ہے بہت لالۂ صحرا کی طرح
تم نے بھی چھوڑ دیا ہے مجھے دنیا کی طرح
یوں جدا مجھ سے نہ ہو عہد گزشتہ کی طرح
دل کے نزدیک رہو وعدۂ فردا کی طرح
تم ہوا ہو تو بکھیرو مجھے ساحل ساحل
موج سے ہو تو بہا دو مجھے دریا کی طرح
پاس رہتے ہو تو آتا ہے جدائی کا خیال
تم مرے دل میں ہو اندیشۂ فردا کی طرح
بیچ میں کچھ تو رہ رسم تکلف رکھو
اجنبی یوں نہیں ملتے ہیں شناسا کی طرح
ہے بھرے درختوں کے باوجود بن تنہا
روز و شب کے ہنگامے پھر بھی انجمن تنہا
رتجگوں کے وہ ساتھی کس جہاں میں بستے ہیں
کیا ہمیں تک آئے گی صبح کی کرن تنہا
زلف کی حسیں راتیں کس پہ سایہ افگن ہیں
میرے گھر تک آئی ہے بوئے یاسمن تنہا
تیری یاد نے اٹھ کر مجھ سے کل یہ پوچھا تھا
اپنے غم کے صحرا میں جا سکو گے تن تنہا
کچھ کمی نہ تھی دل کی کوچۂ محبت میں
ایک ہم ہی آئے تھے لے کے جان و تن تنہا
ہائے یہ شب وعدہ دل کا حال کیا کہئے
حجلۂ عروسی میں جس طرح دلہن تنہا
تھی خدا کی شرکت بھی ورنہ بوجھ نفرت کا
کس طرح اٹھا پائے شیخ و برہمن تنہا
ترے خیال کا شعلہ تھما تھما سا تھا
تمام شہر تمنا بجھا بجھا سا تھا
نہ جانے موسم تلوار کس طرح گزرا
مرے لہو کا شجر تو جھکا جھکا سا تھا
ہمیں بھی نیند نے تھپکی دی سو گئے تم بھی
تمام حادثۂ شب سنا سنا سا تھا
بلائے شام کے سائے تھے اور وادئ دل
اگرچہ صبح کا چہرہ دھلا دھلا سا تھا
چراغ منزل دل پر جلا کے کیا کرتے
وفا کا قافلہ کب سے رکا رکا سا تھا
وہ نام جس کے لیے زندگی گنوائی گئی
نہ جانے کیا تھا مگر کچھ بھلا بھلا سا تھا
کس سمت جا رہا ہے زمانہ کہا نہ جائے
اکتا گئے ہیں لوگ فسانہ کہا نہ جائے
اپنا مکاں اجاڑ کے صحراؤں کی طرف
وہ شخص کیوں ہوا ہے روانہ کہا نہ جائے
لمحوں کی طرح گزری ہیں صدیاں تو بارہا
اک پل بنا ہے کیسے زمانہ کہا نہ جائے
شعلے بنے ہیں لفظ تو کانٹا ہوئی زباں
اب کیا کریں جو تیرا فسانہ کہا نہ جائے
ہے آنکھ افق پہ برف کی صورت جمی ہوئی
شب ہوگی کب سحر کا نشانہ کہا نہ جائے
کہنے کو یہ غزل ہے مگر کیا غزل جسے
نوحہ کہا نہ جائے ترانہ کہا نہ جائے
ہمیں ہیں وہ کہ جنہیں بام و در سے رغبت تھی
کہ در بدر بھی اگر تھے تو گھر سے رغبت تھی
ہم اپنے حال دگر گوں کی اب خبر کیا دیں
خبر یہی ہے کہ اک بے خبر سے رغبت تھی
جبیں پہ خاک ندامت سجائے پھرتے ہیں
کہ رقص شعلہ سرو و شرر سے رغبت تھی
شکستہ پا ہی نہیں ہم شکستہ خواب بھی ہیں
کہ قافلے سے فضائے سفر سے رغبت تھی
اب ایک منزل آخر کے منتظر ہیں ہم
وہ دن بھی تھے کہ کسی رہ گزر سے رغبت تھی
دھلی دھلائی ہوئی زندگی کو کیا معلوم
کہ اک چکور کو داغ قمر سے رغبت تھی
فسون حرف لے گیا طلسم خواب لے گیا
ورق ورق اسی کا تھا وہی کتاب لے گیا
ابھی نگہ جھکی نہ تھی کہ میں نے ہونٹ رکھ دئے
سوال وہ نہ کر سکا مگر جواب لے گیا
مجھے پتہ تھا راہ میں چراغ جل نہ پائے گا
وہاں گیا تو اپنے ساتھ ماہتاب لے گیا
مری ازل کی تشنگی بجھا گیا وہ نرم دل
نشاط آب دے گیا غم سراب لے گیا
تھا دیکھنے میں سادہ رو مگر بڑا ذہین تھا
مجھے گناہ گار کر کے وہ ثواب لے گیا
نگاہ امتیاز کا شکار میں ہوا امامؔ
یہاں وہ خار دے گیا وہاں گلاب لے گیا
چاند شاخوں کی مینا سے ڈھلتا ہوا
درد بچے کی صورت مچلتا ہوا
یاد کی بیل آنکھوں پہ چڑھتی ہوئی
برگ تازہ گلابوں میں پلتا ہوا
آتش جسم پر باغ کھلتے ہوئے
ایک گھر تیز بارش میں جلتا ہوا
سخت ہوتے ہوئے آبشاروں کے لب
برف کی طرح موسم پگھلتا ہوا
ایک آندھی مکانوں میں پلتی ہوئی
ایک پرندہ فضا میں سنبھلتا ہوا
شمع کی لو تیز اتنی تھی دھواں ہونا ہی تھا
فائدے کے کام میں کچھ تو زیاں ہونا ہی تھا
کس کو خوش آتی ہماری چھت کی سایہ افگنی
گھر بنایا تھا تو پھر بے خانماں ہونا ہی تھا
ہم نتیجے کے لیے تا زندگی بیٹھے رہے
یہ کہاں سمجھے کہ پہلے امتحاں ہونا ہی تھا
وادئ گل سے نکلنا ایک مجبوری سہی
شہر نا پرساں میں ہم کو رائیگاں ہونا ہی تھا
عجیب واقعہ تھا اس کو اپنے گھر لانا
کبھی چراغ اٹھانا کبھی قمر لانا
بیان عجز میں الفاظ معتبر لانا
بڑا کمال دعاؤں میں ہے اثر لانا
بہت ہے آج تمنا اڑان بھرنے کی
قفس سے جا کے ہمارے شکستہ پر لانا
تھکے ہوئے ہیں سبھی پائمال راہوں پر
کہیں سے ڈھونڈ کے پھر تازہ رہگزر لانا
وہ شوخ رنگ کا شیدا ہے یہ خیال رہے
قریب آنا تو خود کو لہو میں تر لانا
بس ایک کام ہوا ہم سے زندگی میں امامؔ
ایاغ عمر شراب زیاں سے بھر لانا
ہم یہی سوچ رہے تھے کہ سمندر نہ رہے
موجۂ دل نے کہا اٹھ کے شناور نہ رہے
اس نے ہمت جو بڑھائی تو رکھا یہ بھی لحاظ
کوئی بزدل نہ بنے کوئی دلاور نہ رہے
اس نے اس طرح اتاری مرے غم کی تصویر
رنگ محفوظ تو رہ جائیں پہ منظر نہ رہے
اس نے کس ناز سے بخشی ہے مجھے جائے پناہ
یوں کہ دیوار سلامت ہو مگر گھر نہ رہے
اب یہ سازش ہے کہ لکھے نہ کوئی قصۂ دل
لفظ رہ جائیں مگر کوئی سخنور نہ رہے
اپنے بگڑے ہوئے چہروں کو بھلا دیں سب لوگ
جشن آئینہ منے ہاتھوں میں پتھر نہ رہے
اب کے آندھی بھی چلی جب تو سلیقے سے چلی
یوں کہ رہ جائے شجر شاخ ثمر ور نہ رہے
نئے مکاں میں عقیدے کی کوئی جا ہی نہیں
خدا تو ہے پہ کہیں بندۂ خدا ہی نہیں
بھروسہ یوں تو بہت تھا مگر دعا کے لیے
جو ہاتھ ہم نے اٹھایا تو وہ اٹھا ہی نہیں
ہر ایک شخص یہاں اپنے آپ میں گم ہے
کسی سے ہاتھ ملانے کا فائدہ ہی نہیں
لہو لہان ہے جو بھی ادھر سے آیا ہے
مگر یہ میں کہ جو اس راہ تک گیا ہی نہیں
دیار خواب ہے آؤ یہیں قیام کریں
یہاں سے یوں بھی نکلنے کا راستہ ہی نہیں
کئی سراب ملے تشنگی کے رستے میں
رکاوٹیں ہیں بہت روشنی کے رستے میں
ہمارا آپ کا سر پھوڑنا مقدر ہے
صنم کھڑے ہیں ابھی آدمی کے رستے میں
ہے اس کا ساتھ تو لب پر یہی دعا ہے کہ پھر
نہ آئے اور کوئی زندگی کے رستے میں
وہاں ملا بھی تو اپنا ہی آشنا سا یہ
کھڑے تھے دیر سے ہم روشنی کے رستے میں
نئی ہے فکر مگر لفظ تو پرانے ہیں
قدامتیں ہیں وہیں تازگی کے رستے میں
نہ ہم نوا مرے ذوق خرام کا نکلا
یہ راستہ بھی اسی نرم گام کا نکلا
نئے گلوں کی صدائے شگفت تیز ہوئی
ہوا کے لمس سے رشتہ کلام کا نکلا
مصوری نہ سہی کام آئی بے ہنری
کوئی بہانہ تو ان سے سلام کا نکلا
تلاش رزق میں نکلے تھے مہر صبح لیے
عقب سے پہلا ستارہ بھی شام کا نکلا
یہاں بھی دھوپ چلی آئی بے خیالی کی
یہ سائبان تصور نہ کام کا نکلا
مصاحبوں کی طرح ہر قدم پہ خار ملے
مرا سفر تو بڑے اہتمام کا نکلا
وہی شجر وہی پتے وہی ہوا وہی آگ
کلام نو بھی مرا رنگ عام کا نکلا
پس غبار ہوس رات ڈھلتی رہتی ہے
نشے میں چور پگھلتی مچلتی رہتی ہے
خبر یہی ہے کہ آغوش ہجر میں پہروں
تمہاری یاد بھی پہلو بدلتی رہتی ہے
یہ میں نے دیکھا ہے اکثر پھٹی پرانی حیات
سر دریچۂ شب ہاتھ ملتی رہتی ہے
قفس سے ہم بھی نکلنے کو کب سے ہیں بے تاب
مگر وہ ساعت آخر جو ٹلتی رہتی ہے
وہ رنگ رنگ بہاراں ہے کھلتا رہتا ہے
وہ شاخ شاخ ثمر ور ہے پھلتی رہتی ہے
ہے ایک کار زیاں شہر شہر در بدری
مگر یہی کہ طبیعت بہلتی رہتی ہے
سر احاطۂ غم رات بھر سنورنا تھا
تری جدائی میں کار ہنر بھی کرنا تھا
افق قریب تھا ہمت کی سرخ روئی کا
لہو میں ڈوب کے دریا کو پار اترنا تھا
ہمیں تھی کون سی سجدے کی آرزو تم سے
مگر دعا میں کبھی ہم کو یاد کرنا تھا
اگر میں برگ سحر ہوں تو تم کو تھوڑی دیر
مثال قطرۂ شبنم یہاں ٹھہرنا تھا
جواب کا تو پتہ تھا ہمیں مگر پھر بھی
لب سوال ملا تھا سوال کرنا تھا
وہ لوگ ساحل شب پر بکھر گئے کیسے
انہیں تو آئنۂ صبح میں سنورنا تھا
تاروں سے بھری راہ گزر لے کے گئی ہے
یہ صبح چراغوں کا نگر لے کے گئی ہے
تم کو تو پتہ ہوگا کہ ہم راہ تمہیں تھے
دنیا مرے خوابوں کو کدھر لے کے گئی ہے
پیاسے تھے تو پانی کو پکارا تھا ہمیں نے
ندی ادھر آئی ہے تو گھر لے کے گئی ہے
اک منزل بے مقصد و بے نام کی خواہش
کانٹوں کی سواری پہ سفر لے کے گئی ہے
بے بال و پری اب بھی سر دشت ہے محفوظ
آندھی تو فقط برگ و ثمر لے کے گئی ہے
شاید کہ اب آئے تری قربت کی نئی فصل
اس بار دعا باب اثر لے کے گئی ہے
چمکے گا ابھی زیور شہزادئ مہتاب
اس تک وہ مرے شب کی خبر لے کے گئی ہے
مزید شاعری پڑھیے اور دوسرے شعراء کو دریافت کیجیے۔