مکمل شاعری
ہمیں ہیں وہ کہ جنہیں بام و در سے رغبت تھی
کہ در بدر بھی اگر تھے تو گھر سے رغبت تھی
ہم اپنے حال دگر گوں کی اب خبر کیا دیں
خبر یہی ہے کہ اک بے خبر سے رغبت تھی
جبیں پہ خاک ندامت سجائے پھرتے ہیں
کہ رقص شعلہ سرو و شرر سے رغبت تھی
شکستہ پا ہی نہیں ہم شکستہ خواب بھی ہیں
کہ قافلے سے فضائے سفر سے رغبت تھی
اب ایک منزل آخر کے منتظر ہیں ہم
وہ دن بھی تھے کہ کسی رہ گزر سے رغبت تھی
دھلی دھلائی ہوئی زندگی کو کیا معلوم
کہ اک چکور کو داغ قمر سے رغبت تھی
— مظہر امام