شاعر کی معلومات لوڈ ہو رہی ہیں...
اس کی جام جم آنکھیں شیشۂ بدن میرا
اس کی بند مٹھی میں سارا بانکپن میرا
شاعر کی معلومات لوڈ ہو رہی ہیں...
Abdullah kamal
1948 – 2010
Abdullah Kamal was a prominent modern Urdu poet, critic, and translator. He was born on April 17, 1948, in Muzaffarpur, Bihar (India). After completing his education, he settled in Mumbai, where he became an influential voice in contemporary Urdu literature. Kamal was known for his modern poetic style, focusing on themes such as urban life, emotional complexity, alienation, and existential uncertainty. His poetry reflected a deep understanding of the human condition and the rapidly changing social landscape. In addition to poetry, he also contributed as a literary critic and translator, and served as an editor of the famous Urdu literary magazine "Shair" for several years. His notable poetry collections include: Main (1970) Be-Aasman (1987) Abdullah Kamal passed away on May 18, 2010, in Mumbai, due to a heart attack, at the age of 62.
ان کے کلام کے چند منتخب اشعار پڑھیے۔
اس کی جام جم آنکھیں شیشۂ بدن میرا
اس کی بند مٹھی میں سارا بانکپن میرا
میں نے اپنے چہرے پر سب ہنر سجائے تھے
فاش کر گیا مجھ کو سادہ پیرہن میرا
دل بھی کھو گیا شاید شہر کے سرابوں میں
اب مری طرح سے ہے درد بے وطن میرا
ایک دشت خاموشی اب مرا مقدر ہے
یاد بے صدا تیری زخم بے چمن میرا
آؤ آج ہم دونوں اپنا اپنا گھر چن لیں
تم نواح دل لے لو خطۂ بدن میرا
روز اپنے خوابوں کا خون کرتا رہتا ہوں
ہائے کن غنیموں سے آ پڑا ہے رن میرا
گاؤں کی ہواؤں نے پھر سندیسہ بھیجا ہے
منتظر تمہارا ہے خوشبوؤں کا بن میرا
بڑا مخلص ہوں پابند وفا ہوں
کسی کی سادگی پر رو پڑا ہوں
مری قیمت زمین و آسماں ہے
بہت انمول ہوں پھر بھی بکا ہوں
چھلکتا جام ہوں پھر بھی ہوں پیاسا
میں اپنے آپ میں اک کربلا ہوں
نہ جانے گفتگو کیا گل کھلائے
تمہاری خامشی سے جل گیا ہوں
کتاب دل کو دیمک لگ گئی ہے
تمہارا نام کیا ہے ڈھونڈھتا ہوں
ہزاروں داغ ہیں میرے بدن پر
نہ جانے کس کے دل کا راستہ ہوں
کمالؔ اس قتل گاہ روشنی میں
ہزاروں بار میں بجھ کر جلا ہوں
اپنی آنکھوں کو امیدوں سے سجائے رکھنا
جلتی راتوں میں کوئی خواب بچائے رکھنا
لوٹ کر آؤں گا پھر گاؤں تمہارے اک دن
اپنے دروازے پہ اک دیپ جلائے رکھنا
اجنبی جان کے پتھر نہ سواگت کو بڑھیں
اپنی گلیوں کو مرا نام بتائے رکھنا
سونے ساون میں ستائے گی بہت پروائی
درد کو دل میں مگر اپنے دبائے رکھنا
ہجر کی تیرہ شبی ٹھہری ہے تقدیر وصال
میری یادوں کے ستاروں کو جگائے رکھنا
خوش نقابی کا بھرم ٹوٹنے پائے نہ کمالؔ
غم کو ہونٹوں کے تبسم میں چھپائے رکھنا
ابھی گناہ کا موسم ہے آ شباب میں آ
نشہ اترنے سے پہلے مری شراب میں آ
دھنک سی خواب سی خوشبو سی پھر برس مجھ پر
نئی غزل کی طرح تو مری کتاب میں آ
اٹھا نہ دیر تک احسان موسم گل کا
میں زندگی ہوں مجھے جی مرے عذاب میں آ
وہ میرے لب کے پرندے وہ تیرا جھیل بدن
بجھا نہ پیاس مری تو مگر سراب میں آ
ترے دریچے سے ہے دور میرا دروازہ
اگر تو درد ہے میرا تو دل کے باب میں آ
میں تجھ کو جاگتی آنکھوں سے چھو سکوں نہ کبھی
مری انا کا بھرم رکھ لے میرے خواب میں آ
عجیب شخص ہے دھرتی پہ آسمان سا ہے
خدا مقام نہیں پھر بھی لا مکان سا ہے
اگے جو صبح کا سورج تو اک مشین ہے وہ
ڈھلے جو شام تو پھر جسم کی تکان سا ہے
سکوت دشت تمنا ہے اس کو جائے پناہ
نواح عارض و گیسو میں بے نشان سا ہے
برہنہ رہتا ہے شمشیر بے اماں کی طرح
ہر ایک شخص یہاں اس سے بد گمان سا ہے
اٹھا نہ پائے گا یک لمحۂ نشاط وجود
وہ اپنی تیغ نفس سے لہولہان سا ہے
نگاہ دار فلک تا فلک رہا وہ کمالؔ
اور اب زمین پہ ٹوٹی ہوئی کمان سا ہے
اک حقیقت ہوں اگر اظہار ہو جاؤں گا میں
جانے کس کس جرم کا اقرار ہو جاؤں گا میں
کاٹ لو اب کے مجھے بھی خواہشوں کی فصل پر
زندگی اک خواب ہے بیدار ہو جاؤں گا میں
رفتہ رفتہ باغ کی سب تتلیاں کھو جائیں گی
اور اک دن خود سے بھی بیزار ہو جاؤں گا میں
یا تو اک دن توڑ ڈالوں گا حصار آگہی
یا کسی قصے کا اک کردار ہو جاؤں گا میں
عکس اندر عکس آتا ہے نظر مجھ کو کمالؔ
کیا کسی دن آئنے کے پار ہو جاؤں گا میں
وہ نشانہ بھی خطا جاتا تو بہتر ہوتا
آخری تیر نہ لگتا تو میں پتھر ہوتا
تشنگی اپنی صداؤں سی بھٹکتی ہوتی
ریت کا ڈھیر سرابوں کا سمندر ہوتا
پھر وہی قصہ وہ اک بار سناتا مجھ کو
پھر نگاہوں میں وہی خواب سا منظر ہوتا
میں نے ہی کاٹ دیں سب پھیلتی شاخیں ورنہ
اس گھنے پیڑ کا سایہ مرے سر پر ہوتا
وہ شخص کیا ہے مرے واسطے سنائیں اسے
ہوا میں میرے حوالے سے گنگنائیں اسے
اداس راتوں میں آوارہ گرد بنجارے
ہٹا لیں بانسری ہونٹوں سے اور گائیں اسے
وہ میرا دل ہے کوئی ریت کا گھروندا نہیں
کہ شوخ موجیں مٹائیں اسے بنائیں اسے
ہے دل میں درد کا لشکر پڑاؤ ڈالے ہوئے
ملے وہ جان غزل تو کہاں سجائیں اسے
غزل ہے نام فلک پر قیام ہے اس کا
کبھی فلک سے زمیں پر اتار لائیں اسے
بچھڑ گیا تو پلٹ کر کبھی نہ آئے گا
ہزار دشت و بیاباں میں دو صدائیں اسے
وہ دل کا درد سہی جان بن گیا ہے کمالؔ
ہم اپنی جان سے جائیں تو بھول جائیں اسے
قدم قدم پہ نیا امتحاں ہے میرے لیے
یہ شہر آج بھی اک ہفت خواں ہے میرے لیے
نہیں ہے اب کوئی احساس روز و شب بھی مجھے
بس ایک عرصۂ پیکار جاں ہے میرے لیے
نہ رہ گزار شجر دار ہے نہ آب و سحاب
یہ تیز دھوپ یہ صحرائے جاں ہے میرے لیے
میں اک ستارہ ہوں اس کے فلک سے ٹوٹا ہوا
وہ دھند ہوتی ہوئی کہکشاں ہے میرے لیے
سمیٹ لیتی ہے مجھ کو میں ٹوٹا پھوٹا سہی
یہ رات خرقۂ آوارگاں ہے میرے لیے
مہکتے رہتے ہیں خوابوں میں ہجرتوں کے گلاب
نئی زمین نیا آسماں ہے میرے لیے
عبور کرنا ہے دریائے شور مجھ کو کمالؔ
اور ایک کشتیٔ بے بادباں ہے میرے لیے
بلندیوں کے دھندلکے میں تھا خدا سا لگا
جو میں قریب سے گزرا تو وہ شناسا لگا
نہ کوئی جسم تھا اس کا نہ کوئی چہرہ مگر
جہت جہت سے ابھرتی ہوئی صدا سا لگا
عقب میں چھوڑتا آیا شکستگی کا غبار
کہ سنگ میل بھی مجھ کو اک آئنہ سا لگا
بہت نشیب و فراز اس کے طے کیے میں نے
وہ سر سے پاؤں تلک ایک راستا سا لگا
یہی کہا تھا کہ تم سب بدلتے چہرے ہو
ہر ایک شخص مجھے پھر خفا خفا سا لگا
صدائے آمد و شد باعث سفر تھی کمالؔ
نفس نفس مجھے اپنے لہو کا پیاسا لگا
لفظوں میں اک نئے سفر کا کرتا ہے آغاز بدن
نقطہ نقطہ پھیل کے مجھ کو دیتا ہے آواز بدن
ہر پل ٹوٹ بکھرنا خدشہ ٹھیس لگے تو کانپ اٹھتا ہے
شیشہ شیشہ روپ لیے ہے پتھر کا دم ساز بدن
اڑتا بادل ڈھلتی چھایا اک اک پل میں سو سو کایا
اڑتے روز و شب سے آگے کرتا ہے پرواز بدن
انجانی ان دیکھی صدائیں اکثر دستک دے جاتی ہیں
مجھ کو برہنہ کر دیتا ہے اکثر یہ غماز بدن
کتنے حاتم بھٹکے برسوں لوح طلسم راز لیے
پھر بھی اک اسرار کا صحرا پھر بھی ہے اک راز بدن
اک اک تار نفس سے اب تک لپٹی ہے اس لمس کی خوشبو
اک دن شاید ٹکرایا تھا مجھ سے کوئی شہناز بدن
دشت و صحرا پھر سے اپنائیں بھی کیا
وحشتوں کو اپنی سمجھائیں بھی کیا
درد ہی خوابوں کا خمیازہ سہی
دور دشت درد سے جائیں بھی کیا
اور کچھ لمحے ڈبو دیں چائے میں
یار اس گرمی میں گھر جائیں بھی کیا
یہ بہت کچھ تو ہے گردانا تمہیں
اور اس سے نیچے اب آئیں بھی کیا
فیصلہ کر دے گی اک موج ہوا
ڈہتی دیواروں کو ہم ڈھائیں بھی کیا
شاعری بازی گری تو ہے نہیں
شعبدے یاروں کو دکھلائیں بھی کیا
وعدۂ وصل ہے لذت انتظار اٹھا
اور پھر عمر بھر اک غم اعتبار اٹھا
اس کا غم میرے دل میں ہے اب بانسری کی طرح
نغمۂ درد سے زخمۂ اختیار اٹھا
میں اٹھا تو فلک سے بہت چاند تارے گرے
اور صحرائے جاں میں بہت غم غبار اٹھا
کچھ رہا میرے دل میں تو اک اضطراب رہا
میں سدا اپنی ہی خاک سے بے قرار اٹھا
اے خدا رزق پرواز دے شہپروں کو مرے
میرے اطراف سے آسماں کا حصار اٹھا
تو مجھے آسماں دے نہ دے بے زمین نہ کر
دشت جاں سے مرے موسم تاب کار اٹھا
یا مری آنکھ سے چھین لے سب خزانۂ خواب
یا مری خاک سے زندگی کا فشار اٹھا
سلگ رہا ہے کوئی شخص کیوں عبث مجھ میں
بجھے گا کیسے ابھی شعلۂ نفس مجھ میں
عجیب درد سا جاگا ہے بائیں پسلی میں
عجب شرار طلب سا ہے پیش و پس مجھ میں
میں شاخ شاخ سے لپٹوں شجر شجر چوموں
پنپ رہی ہے عجب لذت ہوس مجھ میں
نہ کوئی نقش یقیں ہے نہ کوئی عکس گماں
دھواں دھواں ہے ابھی سے نیا برس مجھ میں
نہ زیست کی کوئی ہلچل نہ موت ہی کی فغاں
ہے کہر کہر سا اک شہر بے حرس مجھ میں
بس اک پرندہ سا پر پھڑپھڑا کے چیختا ہے
بہت اداس ہے اب موسم قفس مجھ میں
کبھی تو گزرے ادھر سے بھی تند موج ہوا
ہیں جمع کتنے ہی موسم کے خار و خس مجھ میں
بنائے ارض و فلک حرف ابتدا ہوں میں
بکھر گیا تو سمجھ لو کہ انتہا ہوں میں
یوں ہی سلگتے رہو آگ کی قبا ہوں میں
تمہیں بچاؤں گا کیا خود سلگ رہا ہوں میں
اٹھائے پھرتا ہوں بے شخصیت بدن اپنا
اور اپنے گمشدہ چہرے کو ڈھونڈھتا ہوں میں
یہ کہر کہر سے چہرے دھواں دھواں آواز
تمہارے شہر میں شاید ابھی نیا ہوں میں
لہو لہو سی کھنڈر کی تمام اینٹیں ہیں
کہاں سے نکلوں کہ اک آہ نارسا ہوں میں
نئی ہے مشق نہ جانے کہاں پہ گر جاؤں
نفس کی ڈور پہ کرتب دکھا رہا ہوں میں
کمالؔ جھوٹ ہے یارو فقط فریب ہے وہ
کمالؔ سچ کو ابھی تک تلاشتا ہوں میں
خوش شناسی کا صلہ کرب کا صحرا ہوں میں
کون پہچانے کہ اک دشت تمنا ہوں میں
سرد پانی کی زباں چاٹتی رہتی ہے مجھے
کہر میں ڈوبا ہوا کوئی جزیرہ ہوں میں
اپنی ویران سی آنکھوں کو سجا لو مجھ سے
پھر نہ ہاتھ آؤں گا اڑتا ہوں سپنا ہوں میں
بھول جاؤ گے مجھے تم بھی سحر ہونے تک
آخر شب کا کوئی ٹوٹتا لمحہ ہوں میں
ٹوٹا پھوٹا ہی سہی پھر بھی کشش رکھتا ہوں
مجھ سے محظوظ تو ہو لو کہ کھلونا ہوں میں
ایک دشنام ہے یہ طرز تعارف مجھ کو
یارو اس شہر کا دیرینہ شناسا ہوں میں
اتنا یقین رکھ کہ گماں باقی رہے
ایک ذرا کار جہاں باقی رہے
باقی رہے یادوں کی اک قوس قزح
یعنی مری جائے اماں باقی رہے
شورش خوں رقص جنوں ختم نہ ہو
قہقہہ ہم نفساں باقی رہے
آتا رہے یوں ہی سدا موسم گل
سلسلۂ دل زدگاں باقی رہے
قافلۂ غم گزراں کی بھی سنا
حوصلۂ ہم سفراں باقی رہے
قید قفس شور نفس کس کے لیے
کس کے لیے رشتۂ جاں باقی رہے
آنکھوں سے چھن جائیں اک اک خواب مگر
اس کی طلب دل کا دھواں باقی رہے
حسین خواب نہ دے اب یقین سادہ دے
مرے وجود کو یا رب نیا لبادہ دے
غم حیات کو پھیلا دے آسمانوں تک
دل تباہ کو وسعت بھی کچھ زیادہ دے
مجھے قرار نہ دے تو پس غبار نفس
میں شہ سوار ہوں میدان بھی کشادہ دے
نہ چھین مجھ سے مرا ذوق خود نوردی بھی
مرے قدم کو بھی منزل نہ دے ارادہ دے
مرے رفیقوں کو دے حوصلہ کہ سنگ اٹھائیں
مرے خلوص کو ہر سنگ صد افادہ دے
مرے حریفوں کے دم خم میں ہو کمی تو انہیں
مرے غرور سے توفیق استفادہ دے
چمک دے چاند کو ٹھنڈک ہوا کو دل کو امنگ
اداس قصے کو پھر ایک شاہزادہ دے
کہ میری ذات بھی جس میں دھواں دھواں ہو جائے
کبھی کبھی مجھے وہ سجدہ بے ارادہ دے
اتار دے مری رگ رگ میں پھر سے سبز لہو
سکوت دشت کو پھر شورش اعادہ دے
انا رہی نہ مری مطلق العنانی کی
مرے وجود پہ اک دل نے حکمرانی کی
کرم کیا کہ بکھرنے دیا نہ اس نے مجھے
مرے جنوں کی حفاظت کی مہربانی کی
پہاڑ کاٹنا اک مشغلہ تھا بچپن سے
کڑے دنوں میں بھی تیشے سی نوجوانی کی
بدن کہ اڑنے کو پر تولتا پرندہ سا
کسی کمان سی چڑھتی ندی جوانی کی
کمالؔ میں نے تو در سے دیے اٹھائے نہیں
اٹھائی اس نے ہی دیوار بد گمانی کی
اپنے ہونے کا اک اک پل تجربہ کرتے رہے
نوک نیزہ پر بھی ہم رقص انا کرتے رہے
اک مسلسل جنگ تھی خود سے کہ ہم زندہ ہیں آج
زندگی ہم تیرا حق یوں بھی ادا کرتے رہے
ہاتھ میں پتھر نہ تھا چہرے پہ وحشت بھی نہ تھی
پھر وہ کیا تھا جس پہ ہم یوں قہقہہ کرتے رہے
کچھ نہ کچھ تو پیش منظر میں بھی شاید تھا کہیں
کچھ پس منظر بھی ہم آب و ہوا کرتے رہے
بے طلب بڑھتا رہا ہر لمحہ قرض جاں کا بوجھ
بے سبب ہی ہر نفس خود کو ادا کرتے رہے
دور تک پھیلا دیے کہسار جنگل وادیاں
رزق آنکھوں کو دیا ہر پل نیا کرتے رہے
تم تو اے خوشبو ہواؤ اس سے مل کر آ گئیں
ایک ہم تھے زخم تنہائی ہرا کرتے رہے
زہر خود بوتے رہے اجلی ہواؤں میں کمالؔ
چند سانسوں کو بھی ہم بے ذائقہ کرتے رہے
دیکھنا ہے پیاس کے صحرا کا پس منظر تو آ
اے سمندر تو ہمارے جسم کے اندر تو آ
دیکھ پھر جامد مناظر کے لہکنے کا سماں
اے نشاط حرف تازہ تو مرے لب پر تو آ
اک سکوت بے کراں رگ رگ میں ہے اترا ہوا
تو اٹھا سکتا ہے اپنے خون سے محشر تو آ
قطرہ قطرہ دے چکا ہوں اپنے ہی خوں کا قصاص
اب بھی تشنہ ہے ترے انصاف کا خنجر تو آ
میں خدا کی طرح تنہائی کے شعلوں میں جلوں
تو بھی ہے اس کرب تنہائی کا پیغمبر تو آ
دیکھ روشن ہو گئے ہیں نقش لوح آفتاب
شاہزادے اب طلسم خواب سے باہر تو آ
مزید شاعری پڑھیے اور دوسرے شعراء کو دریافت کیجیے۔