شاعر کی معلومات لوڈ ہو رہی ہیں...
ہر چند سہارا ہے ترے پیار کا دل کو
رہتا ہے مگر ایک عجب خوف سا دل کو
شاعر کی معلومات لوڈ ہو رہی ہیں...
shohrat bukhari
1915 – 2001
Syed Muhammad Anwar Bukhari (pen name: Shehrat) – English Biography Summary Syed Muhammad Anwar Bukhari, known by his pen name "Shehrat", was previously known as "Nargis" in his early poetic years. He was born on December 2, 1925, in Lahore. He was a student of the renowned poet Ehsan Danish. He earned Master’s degrees in both Urdu and Persian, standing out in his academic achievements. After completing his education, he worked for a while at the Majlis-e-Zaban-e-Daftari (Official Language Committee). Later, he chose teaching as his profession and became the Head of the Urdu and Persian Department at Islamia College, Lahore. He passed away on October 11, 2001, in Lahore. Notable Works: Taaq-e-Aabroo Deewar-e-Girya Khoye Huon Ki Justuju (a collection of memories and memoirs)
ان کے کلام کے چند منتخب اشعار پڑھیے۔
ہر چند سہارا ہے ترے پیار کا دل کو
رہتا ہے مگر ایک عجب خوف سا دل کو
وہ خواب کہ دیکھا نہ کبھی لے اڑا نیندیں
وہ درد کہ اٹھا نہ کبھی کھا گیا دل کو
یا سانس کا لینا بھی گزر جانا ہے جی سے
یا معرکۂ عشق بھی اک کھیل تھا دل کو
وہ آئیں تو حیران وہ جائیں تو پریشان
یارب کوئی سمجھائے یہ کیا ہو گیا دل کو
سونے نہ دیا شورش ہستی نے گھڑی بھر
میں لاکھ ترا ذکر سناتا رہا دل کو
روداد محبت نہ رہی اس کے سوا یاد
اک اجنبی آیا تھا اڑا لے گیا دل کو
جز گرد خموشی نہیں شہرتؔ یہاں کچھ بھی
کس منزل آباد میں پہنچا لیا دل کو
بت بنے راہ تکو گے کب تک
آس کی آنچ سہو گے کب تک
سر اٹھا کر کبھی دیکھو تو سہی
دل کی دنیا میں بسو گے کب تک
جس نے اپنی بھی خبر لی نہ کبھی
تم اسے یاد کرو گے کب تک
ہم سفر ہو تو کوئی اپنا سا
چاند کے ساتھ چلو گے کب تک
کوئی پتا ہے نہ بوٹا ہے نہ گل
دشت کو باغ کہوگے کب تک
ہر طرف آگ برستی ہے یہاں
کس توقع پہ رہوگے کب تک
آندھیاں تیز ہوئی جاتی ہیں
گھر بلاتا ہے چلو گے کب تک
کوئی جا کر نہیں آتا شہرتؔ
صورت شمع گھلو گے کب تک
دل اس سے لگا جس سے روٹھا بھی نہیں جاتا
کام اس سے پڑا جس کو چھوڑا بھی نہیں جاتا
دن رات تڑپتا ہوں اب جس کی جدائی میں
وہ سامنے آئے تو دیکھا بھی نہیں جاتا
منزل پہ پہنچنے کی امید بندھے کیسے
پاؤں بھی نہیں اٹھتے رستہ بھی نہیں جاتا
یہ کون سی بستی ہے یہ کون سا موسم ہے
سوچا بھی نہیں جاتا بولا بھی نہیں جاتا
انگاروں کی منزل میں زنجیر بپا ہیں ہم
ٹھہرا بھی نہیں جاتا بھاگا بھی نہیں جاتا
اس مرتبہ چھائی ہے کچھ ایسی گھٹا جس سے
کھلنا بھی نہیں ہوتا برسا بھی نہیں جاتا
ہر حال میں اتنے بھی بے بس نہ ہوئے تھے ہم
دلدل بھی نہیں لیکن نکلا بھی نہیں جاتا
مر جاتے تھے غیروں کے کانٹا بھی جو چبھتا تھا
خود قتل ہوئے لیکن رویا بھی نہیں جاتا
کافر ہوں جو حسرت ہو جینے کی مگر شہرتؔ
اس حال میں یاروں کو چھوڑا بھی نہیں جاتا
اپنوں سے مروت کا تقاضا نہیں کرتے
صحراؤں میں سائے کی تمنا نہیں کرتے
مجنوں پہ نہ کر رشک کہ جو اہل وفا ہیں
مر جاتے ہیں معشوق کو رسوا نہیں کرتے
ٹک دیکھ لیا آنکھوں ہی آنکھوں میں ہنسے بھی
پر یوں تو علاج دل شیدا نہیں کرتے
کیا ہو گیا اس شہر کے لوگوں کے دلوں کو
خنجر بھی اتر جائے تو دھڑکا نہیں کرتے
بارش کی طلب ہے تو سمندر کی طرف جا
یہ ابر تو صحراؤں پہ برسا نہیں کرتے
دو دن کی جو باقی ہے تحمل سے بسر کر
جو ہونا ہے ہو جائے گا سوچا نہیں کرتے
پچھتاوے سے بڑھ کر کوئی آزار نہیں ہے
جب دل کو لگاتے ہیں تو رویا نہیں کرتے
مایوسی کی نعمت بڑی مشکل سے ملی ہے
پھر آس بندھاتے ہو تم اچھا نہیں کرتے
جو کچھ کہے شہرتؔ کی غزل مان لو اس کو
دل کو کبھی شاعر کے دکھایا نہیں کرتے
جانے کیا بات ہے مانوس بہت لگتا ہے
یہ جو اک غیر سا اس بزم میں آ بیٹھا ہے
عمر بھر تو نے زمانے کا کہا مانا ہے
دل کی آواز بھی سن دیکھ تو کیا کہتا ہے
مل بھی جائے جو کوئی ناؤ تو اب کیا حاصل
اب تو دریا مرے دروازے پہ آ پہنچا ہے
اس نے دل جان کے چھیڑا اسے معلوم نہ تھا
میرے پہلو میں دہکتا ہوا انگارا ہے
میرا جی جانے ہے یا میرا خدا جانے ہے
کیا سنا ہے ترے اس شہر میں کیا دیکھا ہے
ہائے کیا دیدہ وری ہے کہ سحر دم یہ کھلا
جس کو ہم شمع سمجھتے رہے پروانہ ہے
کوئی روئے تو ہنسو کوئی ہنسے تو رؤو
آج کے دور میں جینے کا یہی رستہ ہے
میرے سینے میں خنک تیرگیاں چھوڑ گیا
ایک آئینہ کہ سورج کی طرح جلتا ہے
کوئی بستی نہ کوئی پیڑ نہ چشمہ کوئی
قافلہ عمر رواں کا یہ کہاں اترا ہے
جاہ و منصب کی ہوس ہو تو میں کافر شہرتؔ
میں سگ کوئے علی ہوں میرا کیا کہنا ہے
ہم شہر میں اک شمع کی خاطر ہوئے برباد
لوگوں نے کیا چاند کے صحراؤں کو آباد
ہر سمت فلک بوس پہاڑوں کی قطاریں
خسروؔ ہے نہ شیریںؔ ہے نہ تیشہ ہے نہ فرہاد
برسوں سے یہی خواب ہیں نیندوں کی سجاوٹ
گلشن ہے مگر گل ہے نہ بلبل ہے نہ صیاد
ہوں طائر بے بام چراغ سر صحرا
امید کرم ہے نہ مجھے شکوۂ بیداد
جس گھر کو بسایا تھا مری بے خبری نے
آج اس کو تری خود نگری کر گئی برباد
کچھ ایسا دھواں ہے کہ گھٹی جاتی ہیں سانسیں
اس رات کے بعد آؤ گے شاید نہ کبھی یاد
ہر ذرہ ہے مدفن مری حیرت نگہی کا
یا رب! یہ گلی کوچے ہمیشہ رہیں آباد
کل اپنی بھی تصویر نہ پہچان سکیں گے
اس دور کو بخشے گئے وہ مانیؔ وہ بہزادؔ
سنسان ہے زنداں بھی بسان دل شاعر
نے شور سلاسل ہے نہ ہنگامۂ فریاد
خورشید قیامت اتر آئے رگ جاں میں
اے نغمہ گرو ایسی کوئی طرز ہو ایجاد
شہرتؔ کہ ہے اب وجہ پریشانیٔ احباب
اٹھ جائے گا جس روز تو آئے گا بہت یاد
میں نے ہی نہ کچھ کھویا جو پایا نہ کسی کو
اس نے بھی تو پورا نہ کیا میری کمی کو
ہے موجزن اک قلزم خوں سینے میں اب تک
درکار نہیں اور مری تشنہ لبی کو
ہنستے انہیں دیکھا تو بہت پھوٹ کے روئے
جو لوگ ترستے رہے اک عمر ہنسی کو
کچھ ایسی طبیعت ملی ہم اہل چمن کو
برداشت کیا ہے کبھی شبنم نہ کلی کو
ہر اشک عجب گوہر یک دانہ ہے شہرتؔ
گریہ بڑی دولت ہے جو ملتی ہے کسی کو
حاصل انتظار کچھ بھی نہیں
یعنی انجام کار کچھ بھی نہیں
حسرت وصل کے مقابل میں
کلفت انتظار کچھ بھی نہیں
دشت میں کچھ نہیں سراب تو ہے
باغ میں گل نہ خار کچھ بھی نہیں
کس سے اپنی شناخت لیتے ہو
آئنہ جز غبار کچھ بھی نہیں
دل میں جھانکو مرے اگر تو کھلے
دامن تار تار کچھ بھی نہیں
کون ہم سے ملے کہ پاس اپنے
جز دل داغ دار کچھ بھی نہیں
آ نفس دو نفس کو مل بیٹھیں
سانس کا اعتبار کچھ بھی نہیں
دل سخت نڈھال ہو گیا ہے
سانس آنا محال ہو گیا ہے
تو تیرا وصال تیری فرقت
سب خواب و خیال ہو گیا ہے
وہ شوق کہ تھا متاع ہستی
اب جی کا وبال ہو گیا ہے
کیا ربط ہے میرا روز و شب سے
ہر لمحہ سوال ہو گیا ہے
جو درد بھلا دیا تھا تو نے
وہ درد بحال ہو گیا ہے
اب چارہ گری سے فائدہ کیا
آغاز مآل ہو گیا ہے
تیار رکھو چراغ اپنے
سورج کو زوال ہو گیا ہے
اے دل مری جان کچھ تو بتلا
یہ کیا ترا حال ہو گیا ہے
لاہور کہ اہل دل کی جاں تھا
کوفے کی مثال ہو گیا ہے
اس عالم بے کسی میں شہرتؔ
جیتا ہوں کمال ہو گیا ہے
آ دل میں تجھے کہیں چھپا لوں
لوگوں کی نگاہ سے بچا لوں
کیوں تجھ پہ گمان بے وفائی
کیوں اپنے ہی دل کی بد دعا لوں
تجھ سا کوئی دوسرا نہیں ہے
چاہے تو تری قسم اٹھا لوں
دیوار امید ڈھے رہی ہے
تصویر تری کہاں لگا لوں
آئینے کی دھند صاف کر کے
کیوں خود کو نہ حال دل سنا لوں
کٹتے ہی نہیں پہاڑ سے دن
شہرتؔ میں اسے کہاں سے پا لوں
دل نے کس منزل بے نام میں چھوڑا تھا مجھے
رات بھر خود مرے سائے نے بھی ڈھونڈا تھا مجھے
مجھ کو حسرت کہ حقیقت میں نہ دیکھا اس کو
اس کو ناراضگی کیوں خواب میں دیکھا تھا مجھے
اجنبی بن کے سر راہ ملا تھا جو ابھی
یہ وہی شخص ہے جس نے کبھی چاہا تھا مجھے
جب بھی تنہائی ملے آئینہ ہے یا میں ہوں
اس نے کس آن سے کس آن میں دیکھا تھا مجھے
جن سے بھاگا تھا وہی صورتیں پھر سامنے ہیں
کون سی قبر میں دنیا نے اتارا تھا مجھے
وہ فقط میرے لیے پیدا ہوئے ہیں شہرتؔ
کون سا لمحہ تھا جب وہم یہ گزرا تھا مجھے
بے نشہ بہک رہا ہوں کب سے
دوزخ ہوں دہک رہا ہوں کب سے
پتھر ہوئے کان موت کے بھی
سولی پہ لٹک رہا ہوں کب سے
جھڑتی نہیں گرد آگہی کی
دامن کو جھٹک رہا ہوں کب سے
لاہور کے کھنڈروں میں یا رب
بلبل سا چہک رہا ہوں کب سے
روشن نہ ہوئیں غزل کی شمعیں
شعلہ سا بھڑک رہا ہوں کب سے
تاریک ہیں راستے وفا کے
سورج سا چمک رہا ہوں کب سے
ٹوٹا نہ فسردگی کا جادو
غنچہ سا چٹک رہا ہوں کب سے
جلتا نہیں بے کسی کا خرمن
بجلی سا لپک رہا ہوں کب سے
اس حرص و ہوا کی تیرگی میں
سونا سا دمک رہا ہوں کب سے
سنسان ہے وادئی تکلم
بادل سا کڑک رہا ہوں کب سے
بستی کوئی ہو تو مل بھی جائے
صحرا میں بھٹک رہا ہوں کب سے
گلچیں کوئی ہو تو قدر جانے
جنگل میں مہک رہا ہوں کب سے
ہاں اے غم عشق مجھ کو پہچان
دل بن کے دھڑک رہا ہوں کب سے
پیمانۂ عمر کی طرح سے
ہر لمحہ چھلک رہا ہوں کب سے
معلوم یہ اب ہوا کہ شہرتؔ
دیوانہ ہوں بک رہا ہوں کب سے
آ دل میں تجھے کہیں چھپا لوں
لوگوں کی نگاہ سے بچا لوں
کیوں تجھ پہ گمان بے وفائی
کیوں اپنے ہی دل کی بد دعا لوں
دیوار امید گر رہی ہے
تصویر تری کہاں لگا لوں
آئینے کی دھند صاف کر کے
کیوں خود کو نہ حال دل سنا لوں
یہ فاصلے کیسے ختم ہوں گے
میں کیسے تجھے یہاں بلا لوں
کٹتے ہی نہیں پہاڑ سے دن
شہرتؔ میں اسے کہاں سے پا لوں
سانس کی آس نگہباں ہے خبردار رہو
دل چراغ تہ داماں ہے خبردار رہو
پھر دو عالم کے اجڑنے کی گھڑی آ پہنچی
آج پھر حسن پشیماں ہے خبردار رہو
جادۂ شہر تصور کہ رہا رشتۂ جاں
صورت گرد پریشاں ہے خبردار رہو
پھر کسی دل میں قیامت نے سکوں ڈھونڈ لیا
آج پھر وا در زنداں ہے خبردار رہو
رنگ و خوشبو کے طلسمات میں کھونے والو
پھول میں آگ بھی پنہاں ہے خبردار رہو
اس قدر محو نہ ہو جاؤ غم دنیا میں
صاف عکس غم جاناں ہے خبردار رہو
دل لگاؤ نہ چمن سے نہ چمن والوں سے
آخر کار بیاباں ہے خبردار رہو
دو گھڑی کے لئے ممکن ہے کوئی پھول کھلے
حاصل دشت مغیلاں ہے خبردار رہو
بو علیؔ آبلہ پا سر بہ گریباں ہے یہاں
موت اس درد کا درماں ہے خبردار رہو
دل کہ ہے ماتمیٔ حسرت تعمیر ازل
خود ہی غارت گر ساماں ہے خبردار رہو
پھر رگ و پے میں اتر آئیں گے سورج گل کر
آج پھر کوئی غزل خواں ہے خبردار رہو
ایک اک حرف کہ آئے گا زباں پر لوگو
گرہ شعلۂ پیچاں ہے خبردار رہو
کب تلک سوؤ گے اے کوچۂ جاناں والو
اثر جور نمایاں ہے خبردار رہو
ذکر میرا بہ بدی بھی نہ زباں پر لاؤ
یہ بھی اک صورت درماں ہے خبردار رہو
طور سینا ہو کہ لاہور کی گلیاں شہرتؔ
حسن ہر رنگ گریزاں ہے خبردار رہو
جانے کس کس کی توجہ کا تماشا دیکھا
توڑ کر آئنہ جب اپنا ہی چہرا دیکھا
آ لگے گور کنارے تو ملا مژدۂ وصل
رات ڈوبی تو ابھرتا ہوا تارا دیکھا
ایک آنسو میں ہوئے غرق دو عالم کے ستم
یہ سمندر تو ترے غم سے بھی گہرا دیکھا
یاد آتا نہیں کچھ بھی کہ یہاں دنیا میں
کون سی چیز نہیں دیکھی مگر کیا دیکھا
عشق کے داغ ہوئے محو اس آشوب میں سب
ٹمٹماتا سا چراغ رخ زیبا دیکھا
اس غلط بینی کا کوئی تو نتیجہ ہوتا
عمر بھر بحر بلا خیز کو صحرا دیکھا
کوئی اس خواب کی تعبیر بدل دے یارب
گھر میں بہتا ہوا اک خون کا دریا دیکھا
کھو گئے بھیڑ میں دنیا کی پر اب تک شہرتؔ
سنسنا اٹھا ہے جی جب کوئی ان سا دیکھا
اک زمانے سے فلک ٹھہرا ہوا لگتا ہے
کوئی جیتا ہے یہاں اور نہ کوئی مرتا ہے
آزمائش ہو تو کیا جانیے کس کا نکلے
دیکھنے میں تو وہ اپنا ہی کوئی لگتا ہے
موت ہی کی ہو پر امید کی صورت ہو کوئی
نا امیدی میں کہاں تک کوئی جی سکتا ہے
نقش پا ہیں جو بتاتے ہیں کہ گزرا ہے کوئی
کون گزرا ہے مگر کس کو پتا چلتا ہے
کوئی پوچھے تو بتانا نہیں آتا دل کو
بیٹھے بیٹھے کبھی روتا ہے کبھی ہنستا ہے
صبح کی آس نہ توڑو کہ جیو گے کیسے
ان ہواؤں میں ابھی ایک دیا جلتا ہے
قافلہ ایسا مقدر ہے کہ چلتا ہی نہیں
اور چلتا ہے تو پیچھے کی طرف چلتا ہے
رہ گئی برف فقط شہر کی بنیادوں میں
پھر بھی جو ذرہ ہے سورج کا اثر رکھتا ہے
ہجر نے ایسے مراحل سے گزارا ہے کہ اب
رات کا نام بھی آ جائے تو جی ڈرتا ہے
دیکھتے دیکھتے کیا ہو گیا شہرتؔ کہ وہ اب
دل میں رہتا ہے مگر دور بہت لگتا ہے
وہ پاس آئے آس بنے اور پلٹ گئے
کتنے ہی پردے آنکھوں کے آگے سے ہٹ گئے
ہر باغ میں بہار ہوئی خیمہ زن مگر
دامن کے ساتھ ساتھ یہاں دل بھی پھٹ گئے
گمراہیوں کا لپکا کچھ ایسا پڑا کہ ہم
منزل قریب آئی تو رہبر سے کٹ گئے
دل دے کے اس طرح سے طبیعت سنبھل گئی
گویا تمام عمر کے جھگڑے نپٹ گئے
برسوں کے پیاسے دشت نوردوں سے پوچھئے
ان بادلوں کا پیار جو گھرتے ہی چھٹ گئے
بس میں رہیں نہ جب غم دوراں کی وسعتیں
ہم لوگ اپنے گوشۂ دل میں سمٹ گئے
شہرتؔ انہیں بھلانے کی کوشش جو کی کبھی
دامان دل سے سینکڑوں فتنے لپٹ گئے
آؤ کہ ابھی چھاؤں ستاروں کی گھنی ہے
پھر شام تلک دشت غریب الوطنی ہے
کچھ بھی ہو مگر حسن کی فطرت میں ابھی تک
پابندیٔ رسم و رہ خاطر شکنی ہے
مت پوچھ کہ کیا رنگ ہے ضبط غم دل میں
ہر اشک جو پیتا ہوں وہ ہیرے کی کنی ہے
شاعر کے تخیل سے چراغوں کی لوؤں تک
ہر چیز تری بزم میں تصویر بنی ہے
تم جس کو بہت سمجھے تو اک بوند لہو کی
پوچھو مرے دامن سے عقیق یمنی ہے
معلوم ہوا جب کہ رہا کچھ بھی نہ دل میں
بس ایک نظر قیمت دنیائے دنی ہے
ابلیس ہو سقراط ہو سرمد ہو کہ منصور
خود آگہی ہر شکل میں گردن زدنی ہے
مقصود نہ بلبل ہے نہ طوطی ہے نہ قمری
مطلب تو چمن والوں کا ناوک فگنی ہے
آسائش گیتی ہے سزا بے ہنری کی
آزردگیٔ دل صلۂ خوش سخنی ہے
کن پھول فضاؤں کی توقع میں پڑے ہو
ہشیار کہ یاں ذوق صبا شعلہ زنی ہے
آؤ چلیں اس انجمن بوالہوساں سے
آتش نفسی ہے نہ جہاں گل بدنی ہے
شہرتؔ سے کبھی جان طلب کر کے تو دیکھو
ہر چند تہی دست ہے پر دل کا غنی ہے
کچھ حشر سے کم گرمئ بازار نہیں ہے
وہ جنس ہوں میں جس کا خریدار نہیں ہے
اس رات کے گمبھیر اندھیرے میں ہے کیا کیا
حاصل تجھے پر دیدۂ بے دار نہیں ہے
ممکن ہو تو سینے میں اتر کر تو مرے دیکھ
وہ لاش ہوں میں جس کا عزا دار نہیں ہے
اک تیرے تغافل نے کمر توڑ کے رکھ دی
ورنہ غم دنیا تو مجھے بار نہیں ہے
ہنستا ہے مرے سینۂ صد چاک پہ کیا کیا
وہ جس کے گریبان میں اک تار نہیں ہے
دل خوگر غم کون سا غم پا کے جئے گا
ورنہ تجھے پانا مجھے دشوار نہیں ہے
کس منہ سے اماں چاہوں گا سورج سے دوبارہ
صد شکر کہ یاں سایۂ دیوار نہیں ہے
چاہے گا کسے کس کا وفادار رہے گا
یہ دل جسے خود سے بھی ابھی پیار نہیں ہے
کیا لطف ہے رکھتا ہے سر لطف و کرم بھی
شہرتؔ کہ ترے غم کا سزاوار نہیں ہے
رسم گریہ بھی اٹھا دی ہم نے
آخری شمع بجھا دی ہم نے
ایک موہوم تصور کے لیے
روح کی آب گنوا دی ہم نے
درمیان دل و گلزار حیات
غم کی دیوار اٹھا دی ہم نے
راکھ بھی پائے نہ کوئی اپنی
اب کے وہ آگ لگا دی ہم نے
سنسناتے رہے تارے پہروں
کیوں تری بات سنا دی ہم نے
ہر کڑی راہ میں ہر منزل پر
تیرے ہی غم کو صدا دی ہم نے
آس کے بجھتے ہوئے شعلے کو
تیرے دامن سے ہوا دی ہم نے
جب تجھے بھولنا چاہا دل نے
اک نئے غم کی سزا دی ہم نے
کوئی غنچہ کسی گوشے میں کھلا
باغ میں دھوم مچا دی ہم نے
کیسی آباد تھی دنیا شہرتؔ
کیسی سنسان بنا دی ہم نے
بزم سنواروں غزلیں گاؤں
جینے کے انداز بناؤں
ہر دم رو رو خون کے آنسو
کیوں آنکھوں کی آب گنواؤں
کب تک دل کے بہکانے پر
تارے گن گن رات بتاؤں
ان کو میرا دھیان نہیں ہے
میں کیوں اپنی جان گنواؤں
میرا غم کس نے کھایا ہے
میں کیوں دنیا کا غم کھاؤں
سب سے ترک تعلق کر لوں
خود سے رسم و راہ بڑھاؤں
مرنے والوں کو مرنے دوں
جینے والوں کو اپناؤں
ہر میت کے سرہانے شہرتؔ
نغمے چھیڑوں جشن مناؤں
وہم ثابت ہوئے سب خواب سہانے تیرے
یاد کرتے ہیں مگر لوگ فسانے تیرے
کاش وہ دن نہ کبھی آئے کہ تو آ جائے
راس آتے ہیں مرے جی کو بہانے تیرے
ایسی افتاد پڑی اپنی خبر بھی نہ رہی
ہم تو آئے تھے یہاں رنگ جمانے تیرے
کل چھپا رکھتے تھے خود سے بھی محبت اپنی
آج آئے ہیں تجھے داغ دکھانے تیرے
خلق کا دھیان ہٹاتے رہے کانٹے کیا کیا
راز افشا کیے سب باد صبا نے تیرے
درد کیا کیا نہ ملے شوق طلب سے اپنے
زخم کیا کیا نہ دیے ذوق حیا نے تیرے
جز ترے چاہنے والا تھا نہ ان کا کوئی
لوٹ کر آئے نہ شہرتؔ وہ زمانے تیرے
شہرت بخاری
12
ہر لمحہ تھا سو سال کا ٹلتا بھی تو کیسے
لے آئی شب غم کوئی مرتا بھی تو کیسے
اک آگ تھی جو پھونک رہی تھی دو جہاں کو
وہ دل سے مرے ہو کے گزرتا بھی تو کیسے
ہم پیاس کے ماروں نے عبث آس لگائی
برسا ہوا بادل تھا برستا بھی تو کیسے
گلچیں کی نظر تاک میں رہتی تھی برابر
غنچہ کوئی کھلتا بھی مہکتا بھی تو کیسے
تنکے کی رکاوٹ بھی نہ تھی غار کی تہ میں
پھر پھیلا ہوا پاؤں سنبھلتا بھی تو کیسے
سایہ نہ کوئی نقش قدم کوچہ نہ بازار
صحرا کے سفر میں تھا بھٹکتا بھی تو کیسے
سینے میں کوئی شعلہ نہ نظروں میں کہیں برق
شہرتؔ بھلا دل میرا بہلتا بھی تو کیسے
ان کو دیکھا تھا کہیں یاد نہیں
آسماں تھا کہ زمیں یاد نہیں
چاند تاروں کی مندی تھیں آنکھیں
تھا کہاں مہر مبیں یاد نہیں
نغمہ ہی نغمہ تھا یا رنگ ہی رنگ
ہم مکاں تھے کہ مکیں یاد نہیں
عہد و پیماں کی جھمکتی شمعیں
کس طرح ڈوب گئیں یاد نہیں
اب یہ عالم ہے کہ خود ہم کو بھی
کیوں ہوئے برق نشیں یاد نہیں
موت پیاری جو لگا کرتی ہے
اس قدر کیوں ہے غمیں یاد نہیں
رس بھری صبحیں نشیلی شامیں
کس کے ہم راہ گئیں یاد نہیں
راکھ کے ڈھیر ہیں چاروں جانب
بستیاں کیسے لٹیں یاد نہیں
جن کی تعبیر ہیں آنسو شہرتؔ
آج وہ خواب حسیں یاد نہیں
اک عمر فسانے غم جاناں کے گڑھے ہیں
تارے افق شعر پہ کیا کیا نہ جڑے ہیں
صحرا میں ہے جل تھل تو سمندر میں بگولے
ہم وضع کے پابند ہیں چپ چاپ پڑے ہیں
آئے کوئی جائے ہمیں کیا کام کہ ہم لوگ
کھمبے ہیں کہ سڑکوں کے کنارے پہ گڑے ہیں
خود پر جو پڑی ہے تو دھڑکتا نہیں دل بھی
غیروں کے لئے کعبے میں جا جا کے لڑے ہیں
مہدی کوئی آئے گا بدل دے گا مقدر
کیا جانئے اس آس میں کس دن سے پڑے ہیں
ہم کچھ بھی ہوں لیکن ہیں ترے پاؤں کی مٹی
چرچے ترے کچھ بھی نہ ہوں پھر بھی تو بڑے ہیں
یہ مرتبہ حاصل ہے تری بزم کو جن سے
وہ لوگ ابھی تک پس دیوار پڑے ہیں
انگارے برستے ہیں اگر کچھ تو ہے ورنہ
اس منہ سے سدا پھول محبت کے جھڑے ہیں
موقوف کرو ہم سخنی میرؔ کی شہرتؔ
ارباب قلم پر یہ شب و روز کڑے ہیں
زندگی تجھ پہ گراں ہے تو مرے گا کیسے
جس کو رونا نہیں آتا وہ ہنسے گا کیسے
میری آنکھوں میں کوئی اشک نہ ہونٹوں پہ غزل
داستان غم دل کوئی سنے گا کیسے
ہاتھ شل ہو گئے دل درد سے محروم ہوا
پردہ چھوڑا ہے جو اس نے وہ ہٹے گا کیسے
کیسا نادان ہے تو جب مرا دل توڑا تھا
یہ نہ سوچا کہ تجھے یاد کرے گا کیسے
آستاں چھوڑ کے تیرا میں کہیں کا نہ رہا
بیٹھنا آئے نہ جس کو وہ چلے گا کیسے
اب کے شہرت کو خبر ہے تری بد خوئی کی
مرثیہ دل کا ترے آگے پڑے گا کیسے
کاش میں بھول سکوں آج ہی چہرا تیرا
بجھنے پائے نہ مگر عشق کا شعلہ تیرا
کوئی صورت کوئی منزل نہ رہی یاد مجھے
ہاں اگر یاد رہا ہے تو وہ رستہ تیرا
تو کہیں کھویا گیا ہو تو میں ڈھونڈوں تجھ کو
ثبت ہے دل پہ مرے نقش کف پا تیرا
میں نے چاہا تھا پرستش کی حدوں تک تجھ کو
تیری بد خوئی نے دھندلا دیا نقشہ تیرا
پاؤں گاڑے رہا برسوں میں درختوں کی طرح
آخر کار بہا لے گیا دریا تیرا
موت کی میری دعا کرتے تھے اور کہتے تھے دوست
ہم سے دیکھا نہیں جاتا ہے تماشا تیرا
ہے کوئی ایسا کہ جو اس کو بتائے شہرتؔ
چشمۂ آب بقا مر گیا پیاسا تیرا
بنا جانے کسی کے ہو گئے ہم
غبار کارواں میں کھو گئے ہم
رگوں میں برف سی جمنے لگی ہے
سنبھالو اپنی یادوں کو گئے ہم
تمہاری مسکراہٹ رچ گئی ہے
ہر اس غنچے میں جس پر رو گئے ہم
کسے معلوم کیا محفل پہ گزری
فسانہ کہتے کہتے سو گئے ہم
تری چاہت کے سناٹوں سے ڈر کر
ہجوم زندگی میں کھو گئے ہم
نہ راس آئی کسی کی چھاؤں شہرتؔ
خود اپنی دھوپ ہی میں سو گئے ہم
کوٹھے اجاڑ کھڑکیاں چپ راستے اداس
جاتے ہی ان کے کچھ نہ رہا زندگی کے پاس
دو پل برس کے ابر نے دریا کا رخ کیا
تپتی زمیں سے پہروں نکلتی رہی بھڑاس
مٹی کی سوندھ جاتے ہوئے ساتھ لے اڑی
ڈالی کا لوچ پات کی سبزی کلی کی باس
اشکوں سے کس کو پیار ہے آہوں سے کس کو انس
لیکن یہ دل کہ جس کو خوشی آ سکی نہ راس
ہشیار اے نوید اجل لٹ نہ جائیو
پھرتا ہے کوئی آٹھ پہر دل کے آس پاس
آنسو ہو مے ہو زہر ہو آب حیات ہو
جز خون آرزو نہ مجھے زندگی کی پیاس
جیسے کبھی تعلق خاطر نہ رہا
یوں روٹھ کر چلی گئی شہرتؔ ہر ایک آس
جب منزلوں وہم تھا نہ شب کا
میں نکلا ہوا ہوں گھر سے تب کا
جس شہر میں بس رہے تھے ہم تم
وہ شہر اجڑ چکا ہے کب کا
تھی پہلے عجب جدائی ان کی
اب خود سے فراق ہے غضب کا
اے محو طلسم روز روشن
درپیش ابھی سفر ہے شب کا
ہر گل سے بھڑک رہے ہیں شعلے
یہ عہد مگر ہے بو لہب کا
تم کاہے کو اکڑ رہے ہو تنہا
شہرتؔ یہ معاملہ ہے سب کا
وحشت کا کہیں اثر نہیں ہے
کچھ بھی ہے یہ میرا گھر نہیں ہے
تا حد فلک کھنچی ہے دیوار
دیوار میں کوئی در نہیں ہے
آغاز سفر میں قافلہ تھا
اب ایک بھی ہم سفر نہیں ہے
کوفہ ہو دمشق ہو مدینہ
سادات کا کوئی گھر نہیں ہے
وہ، وہ تو نہیں جو سامنے تھا
میرا ہے، مرا مگر نہیں ہے
اس عہد کی شناخت ٹھہری
سب کچھ ہے مگر نظر نہیں ہے
جینے کی طلب نہیں ہے شہرتؔ
جینے سے مگر مفر نہیں ہے
ہم پی گئے سب ہلے نہ اب تک
جی ہار گئے نجوم شب تک
ہر چند گھٹائیں چھٹ گئی ہیں
پر دل پہ غبار سا ہے اب تک
خوش ہو نہ زمانہ میرے غم پر
آئے گا یہ دور جام سب تک
اشکوں نے فسانہ کر دیا ہے
وہ لفظ کہ آ سکا نہ لب تک
ہر غم کو اڑا دیا ہنسی میں
تم پیش نظر رہے ہو جب تک
مے خانہ میں سر چھپائیں آؤ
وا ہو در کعبہ جانے کب تک
شہرتؔ کوئی اور بات چھیڑو
الٹیں وہ نقاب لطف جب تک
عیش دنیا کا جب شمار نہ تھا
تب ہمیں دل پہ اختیار نہ تھا
ہم بھی کس قافلے میں شامل تھے
جس کے پیچھے کوئی غبار نہ تھا
عمر بھر عشق کا فریب رہا
کب ہمیں اپنا انتظار نہ تھا
رات دن ایک ہی رہا عالم
کون سا لمحہ سوگوار نہ تھا
وہ بھی معصوم تھا اگر شہرتؔ
اپنا دامن بھی داغ دار نہ تھا
دل طلب گار تماشا کیوں تھا
یعنی حسرت کش دنیا کیوں تھا
دن بہر حال گزر ہی جاتے
دل کا احسان اٹھایا کیوں تھا
سخت بیگانہ تھا لیکن یارب
اتنا مانوس وہ چہرا کیوں تھا
جز غزل خاک تھا دامن میں مرے
اس نے پھر پیار سے دیکھا کیوں تھا
وہ اگر میری رسائی میں نہ تھا
آئنے میں کوئی ویسا کیوں تھا
آنکھ کو شوق کہ دیکھے اس کو
دل کا پچھتاوا کہ دیکھا کیوں تھا
حاصل بزم ہے پروانے کی راکھ
رات بھر شمع کا چرچا کیوں تھا
صبح کے نام سے گھبراتا ہوں
جی کو راس آیا اندھیرا کیوں تھا
صحبت گل بدناں میں شہرتؔ
دل میں کانٹا سا کھٹکتا کیوں تھا
مزید شاعری پڑھیے اور دوسرے شعراء کو دریافت کیجیے۔