شاعر کی معلومات لوڈ ہو رہی ہیں...
رخصت ہوا تو آنکھ ملا کر نہیں گیا
وہ کیوں گیا ہے یہ بھی بتا کر نہیں گیا
شاعر کی معلومات لوڈ ہو رہی ہیں...
shehzad Ahmed
1932 – 2012
Name: Shehzad Ahmed, pen name: Shehzad. He was born on April 16, 1932, in Amritsar. He earned Master's degrees in Psychology and then in Philosophy from Government College, Lahore. In 1958, he began his career as Assistant Director of Public Relations at the Thal Development Authority. In 1966, he became associated with the Arts Council. Later, he was involved with television for a year as well. After the death of Ahmad Nadeem Qasmi, he was appointed as the Chairman of the literary institution Majlis-e-Taraqqi-e-Adab. His published works include: Sadaf Jalti Bujhti Aankhen Adh Khula Daricha Khali Aasman Mazhab, Tehzeeb, Maut Takhleeqi Ravayye He received the Adamjee Literary Award for Jalti Bujhti Aankhen. A complete collection of his poetry has been published under the title "Deewar Par Dastak". He also made significant contributions in the fields of translations and popular psychology, which have been published in multiple volumes.
ان کے کلام کے چند منتخب اشعار پڑھیے۔
رخصت ہوا تو آنکھ ملا کر نہیں گیا
وہ کیوں گیا ہے یہ بھی بتا کر نہیں گیا
وہ یوں گیا کہ باد صبا یاد آ گئی
احساس تک بھی ہم کو دلا کر نہیں گیا
یوں لگ رہا ہے جیسے ابھی لوٹ آئے گا
جاتے ہوئے چراغ بجھا کر نہیں گیا
بس اک لکیر کھینچ گیا درمیان میں
دیوار راستے میں بنا کر نہیں گیا
شاید وہ مل ہی جائے مگر جستجو ہے شرط
وہ اپنے نقش پا تو مٹا کر نہیں گیا
گھر میں ہے آج تک وہی خوشبو بسی ہوئی
لگتا ہے یوں کہ جیسے وہ آ کر نہیں گیا
تب تک تو پھول جیسی ہی تازہ تھی اس کی یاد
جب تک وہ پتیوں کو جدا کر نہیں گیا
رہنے دیا نہ اس نے کسی کام کا مجھے
اور خاک میں بھی مجھ کو ملا کر نہیں گیا
ویسی ہی بے طلب ہے ابھی میری زندگی
وہ خار و خس میں آگ لگا کر نہیں گیا
شہزادؔ یہ گلہ ہی رہا اس کی ذات سے
جاتے ہوئے وہ کوئی گلہ کر نہیں گیا
اپنی تصویر کو آنکھوں سے لگاتا کیا ہے
اک نظر میری طرف بھی ترا جاتا کیا ہے
میری رسوائی میں وہ بھی ہیں برابر کے شریک
میرے قصے مرے یاروں کو سناتا کیا ہے
پاس رہ کر بھی نہ پہچان سکا تو مجھ کو
دور سے دیکھ کے اب ہاتھ ہلاتا کیا ہے
ذہن کے پردوں پہ منزل کے ہیولے نہ بنا
غور سے دیکھتا جا راہ میں آتا کیا ہے
زخم دل جرم نہیں توڑ بھی دے مہر سکوت
جو تجھے جانتے ہیں ان سے چھپاتا کیا ہے
سفر شوق میں کیوں کانپتے ہیں پاؤں ترے
آنکھ رکھتا ہے تو پھر آنکھ چراتا کیا ہے
عمر بھر اپنے گریباں سے الجھنے والے
تو مجھے میرے ہی سائے سے ڈراتا کیا ہے
چاندنی دیکھ کے چہرے کو چھپانے والے
دھوپ میں بیٹھ کے اب بال سکھاتا کیا ہے
مر گئے پیاس کے مارے تو اٹھا ابر کرم
بجھ گئی بزم تو اب شمع جلاتا کیا ہے
میں ترا کچھ بھی نہیں ہوں مگر اتنا تو بتا
دیکھ کر مجھ کو ترے ذہن میں آتا کیا ہے
تیرا احساس ذرا سا تری ہستی پایاب
تو سمندر کی طرح شور مچاتا کیا ہے
تجھ میں کس بل ہے تو دنیا کو بہا کر لے جا
چائے کی پیالی میں طوفان اٹھاتا کیا ہے
تیری آواز کا جادو نہ چلے گا ان پر
جاگنے والوں کو شہزادؔ جگاتا کیا ہے
پرانے دوستوں سے اب مروت چھوڑ دی ہم نے
معزز ہو گئے ہم بھی شرافت چھوڑ دی ہم نے
میسر آ چکی ہے سربلندی مڑ کے کیوں دیکھیں
امامت مل گئی ہم کو تو امت چھوڑ دی ہم نے
کسے معلوم کیا ہوگا مآل آئندہ نسلوں کا
جواں ہو کر بزرگوں کی روایت چھوڑ دی ہم نے
یہ ملک اپنا ہے اور اس ملک کی سرکار اپنی ہے
ملی ہے نوکری جب سے بغاوت چھوڑ دی ہم نے
ہے اتنا واقعہ اس سے نہ ملنے کی قسم کھا لی
تأسف اس قدر گویا وزارت چھوڑ دی ہم نے
کریں کیا یہ بلا اپنے لیے خود منتخب کی ہے
گلا باقی رہا لیکن شکایت چھوڑ دی ہم نے
ستارے اس قدر دیکھے کہ آنکھیں بجھ گئیں اپنی
محبت اس قدر کر لی محبت چھوڑ دی ہم نے
جو سوچا ہے عزیزوں کی سمجھ میں آ نہیں سکتا
شرارت اب کے یہ کی ہے شرارت چھوڑ دی ہم نے
الجھ پڑتے اگر تو ہم میں تم میں فرق کیا رہتا
یہی دیوار باقی تھی سلامت چھوڑ دی ہم نے
گنہ گاروں میں شامل مدعی بھی اور ملزم بھی
ترا انصاف دیکھا اور عدالت چھوڑ دی ہم نے
جو شجر سوکھ گیا ہے وہ ہرا کیسے ہو
میں پیمبر تو نہیں میرا کہا کیسے ہو
دل کے ہر ذرے پہ ہے نقش محبت اس کی
نور آنکھوں کا ہے آنکھوں سے جدا کیسے ہو
جس کو جانا ہی نہیں اس کو خدا کیوں مانیں
اور جسے جان چکے ہیں وہ خدا کیسے ہو
عمر ساری تو اندھیرے میں نہیں کٹ سکتی
ہم اگر دل نہ جلائیں تو ضیا کیسے ہو
جس سے دو روز بھی کھل کر نہ ملاقات ہوئی
مدتوں بعد ملے بھی تو گلا کیسے ہو
دور سے دیکھ کے میں نے اسے پہچان لیا
اس نے اتنا بھی نہیں مجھ سے کہا کیسے ہو
وہ بھی اک دور تھا جب میں نے تجھے چاہا تھا
دل کا دروازہ ہے ہر وقت کھلا کیسے ہو
جب کوئی داد وفا چاہنے والا نہ رہا
کون انصاف کرے حشر بپا کیسے ہو
آئنے میں بھی نظر آتی ہے صورت تیری
کوئی مقصود نظر تیرے سوا کیسے ہو
کن نگاہوں سے اسے دیکھ رہا ہوں شہزادؔ
مجھ کو معلوم نہیں اس کو پتا کیسے ہو
جس نے تری آنکھوں میں شرارت نہیں دیکھی
وہ لاکھ کہے اس نے محبت نہیں دیکھی
اک روپ مرے خواب میں لہرا سا گیا تھا
پھر دل میں کوئی چیز سلامت نہیں دیکھی
آئینہ تجھے دیکھ کے گل نار ہوا تھا
شاید تری آنکھوں نے وہ رنگت نہیں دیکھی
یوں نقش ہوا آنکھ کی پتلی پہ وہ چہرہ
پھر ہم نے کسی اور کی صورت نہیں دیکھی
خیرات کیا وہ بھی جو موجود نہیں تھا
تو نے تہی دستوں کی سخاوت نہیں دیکھی
صد شکر گزاری ہے قیامت تن تنہا
اس رات کسی نے مری حالت نہیں دیکھی
کیا تجھ سے کہیں کیسے کٹی کیسے کٹے گی
اچھا ہے کہ تو نے یہ مصیبت نہیں دیکھی
شاید اسی باعث وہ فروزاں ہے ابھی تک
سورج نے کبھی رات کی ظلمت نہیں دیکھی
سب کی طرح تو نے بھی مرے عیب نکالے
تو نے بھی خدایا مری نیت نہیں دیکھی
تنکا ہوں مگر سیل کے رستے میں کھڑا ہوں
اے بھاگنے والو مری ہمت نہیں دیکھی
جو ٹھان لیا دل میں وہ کر گزرا ہوں شہزادؔ
آئی ہوئی سر پر کوئی آفت نہیں دیکھی
وہ مرے پاس ہے کیا پاس بلاؤں اس کو
دل میں رہتا ہے کہاں ڈھونڈنے جاؤں اس کو
آج پھر پہلی ملاقات سے آغاز کروں
آج پھر دور سے ہی دیکھ کے آؤں اس کو
قید کر لوں اسے آنکھوں کے نہاں خانے میں
چاہتا ہوں کہ کسی سے نہ ملاؤں اس کو
اسے دنیا کی نگاہوں سے کروں میں محفوظ
وہ وہاں ہو کہ جہاں دیکھ نہ پاؤں اس کو
چلنا چاہے تو رکھے پاؤں مرے سینے پر
بیٹھنا چاہے تو آنکھوں پہ بٹھاؤں اس کو
وہ مجھے اتنا سبک اتنا سبک لگتا ہے
کبھی گر جائے تو پلکوں سے اٹھاؤں اس کو
مجھے معلوم ہے آخر کو جدا ہونا ہے
لیکن اک بار تو سینے سے لگاؤں اس کو
یاد سے اس کی نہیں خالی کوئی بھی لمحہ
پھر بھی ڈرتا ہوں کہیں بھول نہ جاؤں اس کو
مجھ پہ یہ راز اسی ایک حوالے سے کھلا
بات اس کی ہے مگر کیسے بتاؤں اس کو
یہ مرا دل مرا دشمن مرا دیوانہ دل
چاہتا ہے کہ سبھی زخم دکھاؤں اس کو
آج تو دھوپ میں تیزی ہی بہت ہے ورنہ
اپنے سائے سے بھی شہزادؔ بچاؤں اس کو
چراغ خود ہی بجھایا بجھا کے چھوڑ دیا
وہ غیر تھا اسے اپنا بنا کے چھوڑ دیا
ہزار چہرے ہیں موجود آدمی غائب
یہ کس خرابے میں دنیا نے لا کے چھوڑ دیا
میں اپنی جاں میں اسے جذب کس طرح کرتا
اسے گلے سے لگایا لگا کے چھوڑ دیا
میں جا چکا ہوں مرے واسطے اداس نہ ہو
میں وہ ہوں تو نے جسے مسکرا کے چھوڑ دیا
کسی نے یہ نہ بتایا کہ فاصلہ کیا ہے
ہر ایک نے مجھے رستہ دکھا کے چھوڑ دیا
ہمارے دل میں ہے کیا جھانک کر نہ دیکھ سکے
خود اپنی ذات سے پردہ اٹھا کے چھوڑ دیا
وہ تیرا روگ بھی ہے اور ترا علاج بھی ہے
اسی کو ڈھونڈ جسے تنگ آ کے چھوڑ دیا
وہ انجمن میں ملا بھی تو اس نے بات نہ کی
کبھی کبھی کوئی جملہ چھپا کے چھوڑ دیا
رکھوں کسی سے توقع تو کیا رکھوں شہزادؔ
خدا نے بھی تو زمیں پر گرا کے چھوڑ دیا
نہ سہی کچھ مگر اتنا تو کیا کرتے تھے
وہ مجھے دیکھ کے پہچان لیا کرتے تھے
آخر کار ہوئے تیری رضا کے پابند
ہم کہ ہر بات پہ اصرار کیا کرتے تھے
خاک ہیں اب تری گلیوں کی وہ عزت والے
جو ترے شہر کا پانی نہ پیا کرتے تھے
اب تو انسان کی عظمت بھی کوئی چیز نہیں
لوگ پتھر کو خدا مان لیا کرتے تھے
دوستو اب مجھے گردن زدنی کہتے ہو
تم وہی ہو کہ مرے زخم سیا کرتے تھے
ہم جو دستک کبھی دیتے تھے صبا کی مانند
آپ دروازۂ دل کھول دیا کرتے تھے
اب تو شہزادؔ ستاروں پہ لگی ہیں نظریں
کبھی ہم لوگ بھی مٹی میں جیا کرتے تھے
جب اس کی زلف میں پہلا سفید بال آیا
تب اس کو پہلی ملاقات کا خیال آیا
وہ جس کا ذکر ہم اتنی خوشی سے کرتے ہیں
وہی تو عمر میں سب سے اداس سال آیا
بہت دنوں سے میں زندوں میں تھا نہ مردوں میں
غزل ہوئی تو مرے دشت میں غزال آیا
زیادہ تر تو ہم اپنی ہی خاک اڑاتے رہے
تمہارا روپ تو شعروں میں خال خال آیا
فصل گل خاک ہوئی جب تو صدا دی تو نے
اے گل تازہ بہت دیر لگا دی تو نے
تیری خوشبو سے مرے دل میں کھلے درد کے پھول
سو گئی تھی جو بلا پھر سے جگا دی تو نے
میری آنکھوں میں اندھیرے کے سوا کچھ بھی نہ تھا
اس خرابے میں یہ کیا شمع جلا دی تو نے
زندگی بھر مجھے جلنے کے لیے چھوڑ دیا
سبز پتوں میں یہ کیا آگ لگا دی تو نے
کوئی صورت بھی رہائی کی نہیں رہنے دی
ایسی دیوار پہ دیوار بنا دی تو نے
میں ترے ہاتھ نہ چوموں تو یہ نا شکری ہے
دولت درد تمنا سے سوا دی تو نے
کبھی کہہ دوں تو زمانہ میرا دشمن ہو جائے
دل کو وہ بات بھی چپ رہ کے بتا دی تو نے
وہ ترے پاس سے چپ چاپ گزر کیسے گیا
دل بے تاب قیامت نہ اٹھا دی تو نے
اسے کہنے کے لیے لفظ کہاں سے آئے
داستان شب غم کیسے سنا دی تو نے
اس کو بھی اس کی نگاہوں میں بہت خوار کیا
اپنی توقیر بھی مٹی میں ملا دی تو نے
کاش واپس تجھے گویائی نہ ملتی شہزادؔ
بول کر آج بہت بات بڑھا دی تو نے
جل بھی چکے پروانے ہو بھی چکی رسوائی
اب خاک اڑانے کو بیٹھے ہیں تماشائی
اب دل کو کسی کروٹ آرام نہیں ملتا
اک عمر کا رونا ہے دو دن کی شناسائی
اب وسعت عالم بھی کم ہے مری وحشت کو
کیا مجھ کو ڈرائے گی اس دشت کی پہنائی
جی میں ہے کہ اس در سے اب ہم نہیں اٹھیں گے
جس در پہ نہ جانے کی سو بار قسم کھائی
خلق نے چھین لی مجھ سے مری تنہائی تک
عشق آ پہنچا ہے الزام سے رسوائی تک
کھول رکھا ہے یہ دروازۂ دل تیرے لیے
کاش تو دیکھ سکے روح کی گہرائی تک
کیوں ہوں میں اور مرے غم کا اسے احساس کہاں
ہے ملاقات فقط انجمن آرائی تک
یوں تو ہم اہل نظر ہیں مگر انجام یہ ہے
ڈھونڈتے ڈھونڈتے کھو دیتے ہیں بینائی تک
کھل گئے وہ تو کھلا اپنی محبت کا بھرم
ولولے دل میں ہزاروں تھے شناسائی تک
ڈوبنا اپنا مقدر تھا مگر ظلم ہے یہ
بہہ گئے ایک ہی ریلے میں تماشائی تک
خشک مٹی پہ بھی گرتا نہیں پتا کوئی
خامشی وہ ہے کہ چلتی نہیں پروائی تک
شہر میں اہل جفا اہل ریا رہتے ہیں
یہ ہوا کاش نہ پہنچے ترے سودائی تک
اپنے انجام پہ خود روئے گی شمع محفل
چھوڑ جائیں گے اسے اس کے تمنائی تک
ہم نے بھی دشت نوردی تو بہت کی شہزادؔ
ہاتھ پہنچا نہ کسی لالۂ صحرائی تک
جو دل میں کھٹکتی ہے کبھی کہہ بھی سکو گے
یا عمر بھر ایسے ہی پریشان پھرو گے
پتھر کی ہے دیوار تو سر پھوڑنا سیکھو
یہ حال رہے گا تو جیو گے نہ مرو گے
طوفان اٹھاؤ گے کبھی اپنے جہاں میں
یا آنکھ کے پانی ہی کو سیلاب کہوگے
سوئے ہو اندھیرے میں چراغوں کو بجھا کر
آئے گا نظر خاک اگر جاگ اٹھوگے
اپنی ہی حقیقت کو نہ پہچاننے والو
تم پردۂ افلاک کو کیا چاک کرو گے
اے برق کی مانند گزرتے ہوئے لمحو
کیا آنکھ جھپکنے کی بھی مہلت نہیں دو گے
روشن بھی کرو گے کبھی تاریکئ شب کو
یا شمع کی مانند پگھلتے ہی رہوگے
ارزاں ہے بہت خون فروزاں ہے بہت شام
کیا اپنی ہی محفل میں چراغاں نہ کرو گے
مانا کہ کٹھن راہ ہے دشوار سفر ہے
کیا ایک قدم بھی نہ مرے ساتھ چلو گے
گزرے ہوئے لمحے کی وہ بے نام کسک ہوں
تم جس کی تمنا میں پریشان پھرو گے
چاہو گے نشاں بھی نہ رہے میرا جہاں میں
گر ذکر کرو گے تو مرا نام نہ لوگے
یہ گرد سفر حال وہ کر دے گی کہ شہزادؔ
تم اپنی بھی صورت کو نہ پہچان سکو گے
حال اس کا ترے چہرہ پہ لکھا لگتا ہے
وہ جو چپ چاپ کھڑا ہے ترا کیا لگتا ہے
یوں تری یاد میں دن رات مگن رہتا ہوں
دل دھڑکنا ترے قدموں کی صدا لگتا ہے
یوں تو ہر چیز سلامت ہے مری دنیا میں
اک تعلق ہے کہ جو ٹوٹا ہوا لگتا ہے
اے مرے جذب دروں مجھ میں کشش ہے اتنی
جو خطا ہوتا ہے وہ تیر بھی آ لگتا ہے
جانے میں کون سی پستی میں گرا ہوں شہزادؔ
اس قدر دور ہے سورج کہ دیا لگتا ہے
یہ سوچ کر کہ تیری جبیں پر نہ بل پڑے
بس دور ہی سے دیکھ لیا اور چل پڑے
دل میں پھر اک کسک سی اٹھی مدتوں کے بعد
اک عمر کے رکے ہوئے آنسو نکل پڑے
سینے میں بے قرار ہیں مردہ محبتیں
ممکن ہے یہ چراغ کبھی خود ہی جل پڑے
اے دل تجھے بدلتی ہوئی رت سے کیا ملا
پودوں میں پھول اور درختوں میں پھل پڑے
اب کس کے انتظار میں جاگیں تمام شب
وہ ساتھ ہو تو نیند میں کیسے خلل پڑے
سورج سی اس کی طبع ہے شعلہ سا اس کا رنگ
چھو جائے اس بدن کو تو پانی ابل پڑے
شہزادؔ دل کو ضبط کا یارا نہیں رہا
نکلا جو ماہتاب سمندر اچھل پڑے
میں اکیلا ہوں یہاں میرے سوا کوئی نہیں
چل رہا ہوں اور میرا نقش پا کوئی نہیں
ذہن کے تاریک گوشوں سے اٹھی تھی اک صدا
میں نے پوچھا کون ہے اس نے کہا کوئی نہیں
دیکھ کر ہر ایک شے کا فیصلہ کرتے ہیں لوگ
آنکھ کی پتلی میں کیا ہے دیکھتا کوئی نہیں
کس کو پہچانوں کہ ہر پہچان مشکل ہو گئی
خود نما سب لوگ ہیں اور رونما کوئی نہیں
نقش حیرت بن گئی دنیا ستاروں کی طرح
سب کی سب آنکھیں کھلی ہیں جاگتا کوئی نہیں
گھر میں یہ مانوس سی خوشبو کہاں سے آ گئی
اس خرابے میں اگر آیا گیا کوئی نہیں
پیکر گل آسمانوں کے لیے بیتاب ہے
خاک کہتی ہے کہ مجھ سا دوسرا کوئی نہیں
عمر بھر کی تلخیاں دے کر وہ رخصت ہو گیا
آج کے دن کے سوا روز جزا کوئی نہیں
چپ کے عالم میں وہ تصویر سی صورت اس کی
بولتی ہے تو بدل جاتی ہے رنگت اس کی
سیڑھیاں چڑھتے اچانک وہ ملی تھی مجھ کو
اس کی آواز میں موجود تھی حیرت اس کی
ہاتھ چھو لوں تو لرز جاتی ہے پتے کی طرح
وہی نا کردہ گناہی پہ ندامت اس کی
کسی ٹھہری ہوئی ساعت کی طرح مہر بہ لب
مجھ سے دیکھی نہیں جاتی یہ اذیت اس کی
آنکھ رکھتے ہو تو اس آنکھ کی تحریر پڑھو
منہ سے اقرار نہ کرنا تو ہے عادت اس کی
خود وہ آغوش کشادہ ہے جزیرے کی طرح
پھیلے دریاؤں کی مانند محبت اس کی
روشنی روح کی آتی ہے مگر چھن چھن کر
سست رو ابر کا ٹکڑا ہے طبیعت اس کی
ہے ابھی لمس کا احساس مرے ہونٹوں پر
ثبت پھیلی ہوئی ہوئی باہوں پہ حرارت اس کی
وہ اگر جا بھی چکی ہے تو نہ آنکھیں کھولو
ابھی محسوس کیے جاؤ رفاقت اس کی
دل دھڑکتا ہے تو وہ آنکھ بلاتی ہے مجھے
سانس آتی ہے تو ملتی ہے بشارت اس کی
وہ کبھی آنکھ بھی جھپکے تو لرز جاتا ہوں
مجھ کو اس سے بھی زیادہ ہے ضرورت اس کی
وہ کہیں جان نہ لے ریت کا ٹیلہ ہوں میں
میرے کاندھوں پہ ہے تعمیر عمارت اس کی
بے طلب جینا بھی شہزادؔ طلب ہے اس کی
زندہ رہنے کی تمنا بھی شرارت اس کی
سورج کی کرن دیکھ کے بیزار ہوئے ہو
شاید کہ ابھی خواب سے بے دار ہوئے ہو
منزل ہے کہاں تم کو دکھائی نہیں دے گی
تم اپنے لیے آپ ہی دیوار ہوئے ہو
احساس کی دولت جو ملے گی تو کہاں سے
کچھ بھی نہ رہا پاس تو ہوشیار ہوئے ہو
سوچو تو ہے موجود نہ سوچو تو نہیں ہے
جس دام میں تم لوگ گرفتار ہوئے ہو
اپنے سے تغافل ہے کہ بے راہروی ہے
کیا سوچ کے دنیا کے طلب گار ہوئے ہو
یہ رشتۂ دل توڑ کے کیا تم کو ملا ہے
ٹوٹے ہوئے پتے کی طرح خوار ہوئے ہو
پہلے بھی کبھی نور کا احساس ہوا تھا
یا آج ہی اس غم سے خبردار ہوئے ہو
مجنوں ہو تو ہے خاک اڑانے سے تمہیں کام
یوسف ہو تو رسوا سر بازار ہوئے ہو
کل تک تو ان آنکھوں میں مروت کی جھلک تھی
فتنہ ہو تو پھر آج ہی بے دار ہوئے ہو
کوئی افق دل پہ نمودار تو ہو لے
تم کس کے قدم لینے کو تیار ہوئے ہو
یہ چھب یہ جھمک آنکھ سے دیکھی نہیں جاتی
تم اڑتے ہوئے وقت کی رفتار ہوئے ہو
شہزادؔ تأسف نہ کرو بے اثری پر
تم دست رسا کب تھے کہ بے کار ہوئے ہو
ابلیس بھی رکھ لیتے ہیں جب نام فرشتے
میں کیوں نہ کہوں مجھ سے بھی ہیں خام فرشتے
وہ نور ہیں میں خاک ہوں لیکن مرے باعث
لیتے نہیں اک لمحہ بھی آرام فرشتے
تنہائی میں آ جاتی ہیں حوریں مرے گھر میں
چمکاتے ہیں مسجد کے در و بام فرشتے
اک میں ہی تو ہوں رات گئے جاگنے والا
سو جاتے ہیں بے ہوش سر شام فرشتے
جنت سے نکالا ہوا انسان وہی ہے
شیطان بنے بیٹھے ہیں ناکام فرشتے
ہوں اتنا گنہ گار کہ اللہ کے آگے
لیتے ہوئے ڈرتے ہیں مرا نام فرشتے
دنیا ہوئی آباد تو میرے ہی سبب سے
انجام نہ دے پائے کوئی کام فرشتے
کیا سوچ کے انسان سے شرمائے ہوئے ہیں
دیتے نہیں دیدار سر عام فرشتے
میں ایک گنہ گار نصیحت کا ہدف ہوں
دنیا میں بھی ملتے ہیں بہر گام فرشتے
یہ دختر رز دانۂ گندم تو نہیں ہے
چکھیں تو سہی بادۂ گلفام فرشتے
یوں غیب سے میں ڈھونڈ کے لایا ہوں مضامیں
جیسے کوئی لے آئے تہ دام فرشتے
جو بات مرے دل میں تھی آئی ہے زباں پر
اب کرتے پھریں گے مجھے بد نام فرشتے
شہزادؔ زمانہ ہوا لیکن مری جانب
لاتے نہیں اللہ کا پیغام فرشتے
اب نبھانی ہی پڑے گی دوستی جیسی بھی ہے
آپ جیسے بھی ہیں نیت آپ کی جیسی بھی ہے
کھل چکی ہیں اس کے گھر کی کھڑکیاں میرے لیے
رخ مری جانب رہے گا بے رخی جیسی بھی ہے
چوٹیاں چھو کر گزرتے ہیں برستے کیوں نہیں
بادلوں کی ایک صورت آدمی جیسی بھی ہے
اجنبی شہروں میں تجھ کو ڈھونڈھتا ہوں جس طرح
اک گلی ہر شہر میں تیری گلی جیسی بھی ہے
آج کے دکھ ہی بہت ہیں بیم فردا کس لیے
کٹ ہی جائے گی اذیت کی گھڑی جیسی بھی ہے
دھندلا دھندلا ہی سہی رستہ دکھائی تو دیا
آج کا دن ہے غنیمت روشنی جیسی بھی ہے
جھولتی ہے میرے دل میں ایک شاخ اس پیڑ کی
وہ تر و تازہ ہے یا سوکھی ہوئی جیسی بھی ہے
میں نے دیکھا ہے فلک کو جاگتے سوتے ہوئے
میری آنکھوں تک تو آئی چاندنی جیسی بھی ہے
اب کہاں لے جائیں سانسوں کی سلگتی آگ کو
زندگی ہے زندگی اچھی بری جیسی بھی ہے
کوئی موسم ہو مری خوشبو رہے اس پھول میں
داستاں میری کہی یا ان کہی جیسی بھی ہے
اپنا حق شہزادؔ ہم چھینیں گے مانگیں گے نہیں
رحم کی طالب نہیں بے چارگی جیسی بھی ہے
میں جو روتا ہوں تو کہتے ہو کہ ایسا نہ کرو
تم اگر میری جگہ ہو تو بھلا کیا نہ کرو
اب تو اے دل ہوس ساغر و مینا نہ کرو
چھوڑ بھی دو یہ تقاضا یہ تقاضا نہ کرو
دل پہ اے دوست قیامت سی گزر جاتی ہے
تم نگاہ غلط انداز سے دیکھا نہ کرو
پھر بھی آنکھیں انہیں ہر بات بتا دیتی ہیں
دل تو کہتا ہے کسی بات کا چرچا نہ کرو
اب مرا درد مری جان ہوا جاتا ہے
اے مرے چارہ گرو اب مجھے اچھا نہ کرو
یہ سر بزم مری سمت اشارے کیسے
میں تماشا تو نہیں میرا تماشا نہ کرو
مل ہی جاتی ہے کبھی یاس میں تسکین مجھے
اے امیدو مجھے ایسے میں تو چھیڑا نہ کرو
اس نے شہزادؔ تری بات کو ٹھکرا ہی دیا
میں نہ کہتا تھا کہ اظہار تمنا نہ کرو
یہ بھی سچ ہے کہ نہیں ہے کوئی رشتہ تجھ سے
جتنی امیدیں ہیں وابستہ ہیں تنہا تجھ سے
ہم نے پہلی ہی نظر میں تجھے پہچان لیا
مدتوں میں نہ ہوئے لوگ شناسا تجھ سے
شب تاریک فروزاں تری خوشبو سے ہوئی
صبح کا رنگ ہوا اور بھی گہرا تجھ سے
بے تعلق بھی ہیں ہر رنگ ہر انداز سے ہم
وہ تعلق بھی ہے قائم جو کبھی تھا تجھ سے
یہ الگ بات زباں ساتھ نہ دے پائے گی
دل کا جو حال ہے کہنا تو پڑے گا تجھ سے
تیرے سینے میں بھی اک داغ ہے تنہائی کا
جانتا میں تو کبھی دور نہ ہوتا تجھ سے
آنکھ بھی پردہ ہے تکنے نہیں پاتی سورج
دل بھی دیوار ہے ملنے نہیں دیتا تجھ سے
کیوں ازل سے ترے ہم راہ چلا آتا ہے
جانے کیا چاہتا ہے نقش کف پا تجھ سے
یہ الگ بات تجھے ٹوٹ کے چاہا لیکن
دل بے مایہ نے کچھ بھی نہیں چاہا تجھ سے
رات آئی تو طلب شمع نہیں کی دل نے
دھوپ نکلی ہے تو سایہ نہیں مانگا تجھ سے
جس سے وابستہ ہے شہزادؔ مقدر تیرا
روشنی مانگ رہا ہے وہ ستارہ تجھ سے
آج تک اس کی محبت کا نشہ طاری ہے
پھول باقی نہیں خوشبو کا سفر جاری ہے
سحر لگتا ہے پسینے میں نہایا ہوا جسم
یہ عجب نیند میں ڈوبی ہوئی بے داری ہے
آج کا پھول تری کوکھ سے ظاہر ہوگا
شاخ دل خشک نہ ہو اب کے تری باری ہے
دھیان بھی اس کا ہے ملتے بھی نہیں ہیں اس سے
جسم سے بیر ہے سائے سے وفا داری ہے
دل کو تنہائی کا احساس بھی باقی نہ رہا
وہ بھی دھندلا گئی جو شکل بہت پیاری ہے
اس تگ و تاز میں ٹوٹے ہیں ستارے کتنے
آسماں جیت سکا ہے نہ زمیں ہاری ہے
کوئی آیا ہے ذرا آنکھ تو کھولو شہزادؔ
ابھی جاگے تھے ابھی سونے کی تیاری ہے
اب نہ وہ شور نہ وہ شور مچانے والے
خاک سے بیٹھ گئے خاک اڑانے والے
یہ الگ بات میسر لب گویا نہ ہوا
دل میں وہ دھوم کہ سنتے ہیں زمانے والے
کسی منزل کی طرف کوئی قدم اٹھ نہ سکا
اپنے ہی پاؤں کی زنجیر تھے جانے والے
دل سا وحشی کبھی قابو میں نہ آیا یارو
ہار کر بیٹھ گئے جال بچھانے والے
دن کی کجلائی ہوئی دھوپ میں کیا دیکھتے ہیں
شام ہوتے ہی پریشاں نظر آنے والے
جلوۂ حسن سزا وار نظر ہو نہ سکا
کچھ نہیں دیکھ سکے آنکھ اٹھانے والے
یاد ایام کے دروازے سے مت جھانک مجھے
آنکھ سے دور نہ ہو دل میں سمانے والے
تیری قربت میں گزارے ہوئے کچھ لمحے ہیں
دل کو تنہائی کا احساس دلانے والے
انہی جھونکوں سے ہے شہزادؔ چمک آنکھوں میں
یہی جھونکے ہیں چراغوں کو بجھانے والے
وہ جا چکا ہے تو کیوں بے قرار اتنے ہو
محبت اس سے کرو جس کو بھول سکتے ہو
نشان منزل جاں گر نہیں ملا نہ سہی
چلو سفر تو کیا ہے کہیں تو پہنچے ہو
تمام عمر نہ ملنے کا حوصلہ ہی سہی
تم اپنے دل میں کوئی آرزو تو رکھتے ہو
سفر بھی تم نے کیا آفتاب کی صورت
ابھی تک اپنے ہی نقش قدم پہ چلتے ہو
جو روشنی ہے دلوں میں عطا تمہاری ہے
چراغ تم سا نہیں تم چراغ جیسے ہو
دلوں کے سوئے ہوئے غم ابھی تو جاگے ہیں
ذرا سی دیر تو بیٹھو ابھی تو آئے ہو
تمہارے لہجے کا یہ زیر و بم قیامت ہے
کبھی رفیق کبھی نا شناس لگتے ہو
خدا سنا ہے رگ جاں کے پاس رہتا ہے
مگر تم اور بھی نزدیک آتے جاتے ہو
تمام دن رہی سائے کی جستجو شہزادؔ
ہوئی ہے رات تو آنکھیں تلاش کرتے ہو
سکون کچھ تو ملا دل کا ماجرا لکھ کر
لفافہ پھاڑ دیا پھر ترا پتہ لکھ کر
سمجھ میں یہ نہیں آتا خطاب کیسے کروں
حروف کاٹ دیے میں نے بارہا لکھ کر
قلم نے ٹوکا بھی دل کی صدا نے روکا بھی
مگر جو اس نے کہا میں نے دے دیا لکھ کر
ہجوم غم میں زباں ساتھ جب نہ دے پائی
جو حال دل کا تھا میں نے سنا دیا لکھ کر
اب اس کی باری ہے اب اختیار اس کا ہے
کہیں کا میں نہ رہا اس کو بے وفا لکھ کر
بھلا سا کوئی بھی اک نام اس کا رکھ لینا
پر اس کے نام کو آنکھوں سے چومنا لکھ کر
میں اپنی حسرت دل کا حساب کیسے دوں
یہ ڈھیر میں نے لگایا ذرا ذرا لکھ کر
مجھے تو اپنے لیے راستہ تراشنا ہے
میں کیا کروں گا کسی کا لکھا ہوا لکھ کر
ملی ہے اس کے سبب اتنی روشنی شہزادؔ
بجھا دیے کئی سورج اسے دیا لکھ کر
منتظر دشت دل و جاں ہے کہ آہو آئے
سارے منظر ہی بدل جائیں اگر تو آئے
نیند آئے تو اچانک تری آہٹ سن لوں
جاگ اٹھوں تو بدن سے تری خوشبو آئے
بے ہنر ہاتھ چمکنے لگا سورج کی طرح
آج ہم کس سے ملے آج کسے چھو آئے
صوت ہی صوت ہے تصویر ہی تصویر ہے تو
یاد تیری کئی باتیں کئی پہلو آئے
ہم تجھے دیکھتے ہی نقش بہ دیوار ہوئے
اب وہی تجھ سے ملے گا جسے جادو آئے
اپنے ہی عکس کو پانی میں کہاں تک دیکھوں
ہجر کی شام ہے کوئی تو لب جو آئے
کسی جانب نظر آتا نہیں بادل کوئی
اور جب سیل بلا آئے تو ہر سو آئے
چاہتا ہوں کہ ہو پرواز ستاروں سے بلند
اور مرے حصے میں ٹوٹے ہوئے بازو آئے
درد میں ڈوبی ہوئی راکھ میں نہلائی ہوئی
رات یوں آئی ہے جیسے کوئی سادھو آئے
راستہ روک سکی ہیں نہ فصیلیں نہ حصار
پھول جنگل میں کھلے شہر میں خوشبو آئے
آسمانوں پہ نہ تارے ہیں نہ بادل ہے نہ چاند
اب تو ممکن ہے کہیں سے کوئی جگنو آئے
وقت رخصت مرے ہم راہ کوئی کب آیا
اور اگر لوٹ کے آئے بھی تو آنسو آئے
روگ بھی تو نے لگایا ہے انوکھا شہزادؔ
اب کہاں سے ترے اس درد کا دارو آئے
اس بھرے شہر میں آرام میں کیسے پاؤں
جاگتے چیختے رنگوں کو کہاں لے جاؤں
پیرہن چست ہوا سست کھڑی دیواریں
اسے چاہوں اسے روکوں کہ جدا ہو جاؤں
حسن بازار کی زینت ہے مگر ہے تو سہی
گھر سے نکلا ہوں تو اس چوک سے بھی ہو آؤں
لڑکیاں کون سے گوشے میں زیادہ ہوں گی
نہ کروں بات مگر پیڑ تو گنتا جاؤں
کر رہا ہوں جسے بد نام گلی کوچوں میں
آنکھ بھی اس سے ملاتے ہوئے میں گھبراؤں
وہ مجھے پیار سے دیکھے بھی تو پھر کیا ہوگا
مجھ میں اتنی بھی سکت کب ہے کہ دھوکا کھاؤں
حسن خود ایک بھکاری ہے مجھے کیا دے گا
کس توقع پہ میں دامان نظر پھیلاؤں
واقعہ کچھ بھی ہو سچ کہنے میں رسوائی ہے
کیوں نہ خاموش رہوں اہل نظر کہلاؤں
ایک مدت سے کئی سائے مری تاک میں ہیں
کب تلک رات کی دیوار سے سر ٹکراؤں
آدمیت ہے کہ ہے گنبد بے در کوئی
ڈھونڈنے نکلوں تو اپنا بھی نہ رستہ پاؤں
لیے پھرتا ہوں خیالوں کا دہکتا دوزخ
سر سے یہ بوجھ اتاروں تو خدا ہو جاؤں
شہر کا شہر اگر آئے بھی سمجھانے کو
اس سے کیا فرق پڑے گا ترے دیوانے کو
کیا کوئی کھیل ہے بے نام و نشاں ہو جانا
ویسے تو شمع بھی تیار ہے جل جانے کو
وہ عجب شخص تھا کل جس سے ملاقات ہوئی
میں ملا ہوں کسی جانے ہوئے ان جانے کو
ایک لمحہ بھی تو بے کار نہیں کٹ سکتا
ایک گتھی جو ملی ہے مجھے سلجھانے کو
یہ الگ بات کہ اک بوند مقدر میں نہ تھی
سر پہ سو بار گھٹا چھائی رہی چھانے کو
شام ہونے کو ہے جلنے کو ہے شمع محفل
سانس لینے کی بھی فرصت نہیں پروانے کو
واقعہ کوئی نہ جنت میں ہوا میرے بعد
آسمانوں پہ اکیلا ہے خدا میرے بعد
پھر دکھاتا ہے مجھے جنت فردوس کے خواب
کیا فرشتوں میں ترا جی نہ لگا میرے بعد
کچھ نہیں ہے تری دنیا میں ہیولوں کے سوا
مجھ سے پہلے بھی وہی تھا جو ہوا میرے بعد
خاک صحرائے جنوں نرم ہے ریشم کی طرح
آبلہ ہے نہ کوئی آبلہ پا میرے بعد
میرے انجام پہ ہنسنے کی تمنا نہ کرو
کم ہی بدلے گی گلستاں کی ہوا میرے بعد
ختم افسانہ ہوا بات سمجھ میں آئی
ساری دنیا نے مجھے جان لیا میرے بعد
یار ہوتے تو مجھے منہ پہ برا کہہ دیتے
بزم میں میرا گلا سب نے کیا میرے بعد
ہوں پر کاہ شب و روز مگر سوچتا ہوں
کس کے گھر جائے گا سیلاب بلا میرے بعد
اس زمیں میں وہ کوئی اور غزل بھی کہتا
لیکن افسوس کہ غالبؔ نہ ہوا میرے بعد
دل کا برا نہیں مگر شخص عجیب ڈھب کا ہے
مجھ سے ہے خاص دشمنی ویسے تو یار سب کا ہے
دوریوں نے مٹا دیے جو بھی تھے قربتوں کے رنج
اب مری بات بات میں رنگ تری طلب کا ہے
میرے لہو میں تھی رواں جب ترے سانس کی مہک
جانے یہ کب کی بات ہے جانے یہ ذکر کب کا ہے
ایک ذرا سی بات پر بدلی تھی جب تری نظر
تجھ کو خبر نہیں مگر دل تو اداس تب کا ہے
کیوں نہ دل خزاں نصیب ہر گل تر کو چوم لے
آج تو پھول پھول میں ذائقہ اس کے لب کا ہے
کیف و نشاط و سر خوشی نعمتیں سب اسی کی ہیں
مجھ کو عطا کیا ہوا درد بھی میرے رب کا ہے
شوکت و شان ایزدی دل نے کہاں سے سیکھ لی
سب سے ہے بے نیاز بھی دھیان بھی اس کو سب کا ہے
راہ دکھائی تک نہ دی تیرہ شبی بلا کی تھی
آنکھ نہ کھل سکی مری نور بھی اس غضب کا ہے
حشر کا دن بھی ہو تو کیا یہ بھی نصیب ہے مرا
دن ہے گزر ہی جائے گا خوف تو مجھ کو شب کا ہے
عقل ہر بات پہ حیراں ہے اسے کیا کہیے
دل بہر حال پریشاں ہے اسے کیا کہیے
بلبلیں طاقت گفتار سے محروم ہوئیں
اب یہ آئین گلستاں ہے اسے کیا کہیے
لوگ کہتے ہیں کہ گلشن میں بہار آئی ہے
بوئے گل پھر بھی پریشاں ہے اسے کیا کہیے
رہنما دور بہت دور نکل آئے ہیں
قافلہ راہ میں حیراں ہے اسے کیا کہیے
آرزوؤں نے کئی پھول چنے تھے لیکن
زندگی خار بداماں ہے اسے کیا کہیے
اپنے ماضی کی حکایات بہت خوب سہی
اب نئے دور کا ساماں ہے اسے کیا کہیے
سوچتے تھے کہ سحر نور بد اماں ہوگی
تیرگی پھر بھی نمایاں ہے اسے کیا کہیے
اہتمام سحر نو تو کریں گے لیکن
دل ابھی بے سر و ساماں ہے اسے کیا کہیے
میں نے کس حال میں دیکھا ہے چمن کو شہزادؔ
اور دل اب بھی غزل خواں ہے اسے کیا کہیے
کوشش ہے شرط یوں ہی نہ ہتھیار پھینک دے
موقع ملے تو خط پس دیوار پھینک دے
چہرے پہ جو لکھا ہے وہی اس کے دل میں ہے
پڑھ لی ہیں سرخیاں تو یہ اخبار پھینک دے
صیاد ہے تو شہر میں آزاد یوں نہ پھر
شاید کمند کوئی گرفتار پھینک دے
کر دوستی بھی ظلم سے اور دشمنی بھی رکھ
چہرے پہ تھوک پاؤں پہ دستار پھینک دے
سایا بھی کیوں رہے کسی دشمن کی راہ میں
ہاں کاٹ کر زمین پہ اشجار پھینک دے
رسوائے شہر اب تری عزت اسی میں ہے
پگڑی اتار کر سر بازار پھینک دے
گر ہاتھ کانپتے ہیں تو میدان میں نہ آ
ہمت نہیں تو دور سے تلوار پھینک دے
دل سے یہ کہہ رہا ہوں ذرا اور دیکھ لے
سو بار اس کو دیکھ چکا اور دیکھ لے
اس کو خبر ہوئی تو بدل جائے گا وہ رنگ
احساس تک نہ اس کو دلا اور دیکھ لے
صحرا میں کیا دھرا ہے ابھی شہر کو نہ چھوڑ
کچھ روز دوستوں کی وفا اور دیکھ لے
موسم کا اعتبار نہیں بادباں نہ کھول
کچھ دیر ساحلوں کی ہوا اور دیکھ لے
صحرائے آرزو ہے قدم دیکھ بھال کر
کانٹوں کی سمت آبلہ پا اور دیکھ لے
ہوتا کوئی تو پاؤں کی آہٹ سے چونکتا
جنگل ہے کر کے ایک صدا اور دیکھ لے
دل بھی تو اک دیار ہے روشن ہرا بھرا
آنکھوں کا یہ چراغ بجھا اور دیکھ لے
ممکن ہے ایک لمحے کی مہمان ہو بہار
پھولوں کی تازگی پہ نہ جا اور دیکھ لے
یوں کس طرح بتاؤں کہ کیا میرے پاس ہے
تو بھی تو کوئی رنگ دکھا اور دیکھ لے
دیکھی تھی اک جھلک کہ اڑے رنگ ہر طرف
کوئی پکارتا ہی رہا اور دیکھ لے
شہزادؔ زندگی کے جھمیلے ہزار ہیں
دنیا نہیں پسند تو آ اور دیکھ لے
کون کہتا ہے کہ دریا میں روانی کم ہے
میں جہاں ڈوب رہا ہوں وہاں پانی کم ہے
بھول کر بھی کوئی سنتا نہیں روداد مری
واقعہ اس میں زیادہ ہے کہانی کم ہے
اے خدا پھر مرے جذبوں کو فراوانی دے
زندگی بھر کے لیے ایک جوانی کم ہے
میرے لہجے سے مرے درد کا اندازہ کر
میری باتوں میں اگر تلخ بیانی کم ہے
یہ محبت ہے کہ احساس ہے محرومی کا
میری آنکھوں میں بہت کچھ ہے زبانی کم ہے
کون کہتا ہے کہ دریا میں روانی کم ہے
میں جہاں ڈوب رہا ہوں وہاں پانی کم ہے
بھول کر بھی کوئی سنتا نہیں روداد مری
واقعہ اس میں زیادہ ہے کہانی کم ہے
اے خدا پھر مرے جذبوں کو فراوانی دے
زندگی بھر کے لیے ایک جوانی کم ہے
میرے لہجے سے مرے درد کا اندازہ کر
میری باتوں میں اگر تلخ بیانی کم ہے
یہ محبت ہے کہ احساس ہے محرومی کا
میری آنکھوں میں بہت کچھ ہے زبانی کم ہے
جان مقدر میں تھی جان سے پیارا نہ تھا
میرے لیے صبح تھی صبح کا تارا نہ تھا
بحر شب و روز میں بہہ گئے تنکے سے ہم
موج بلا خیز تھی اور کنارا نہ تھا
جان کے دشمن تھے سب لوگ ترے شہر کے
عمر کٹی جس جگہ پل بھی گزارا نہ تھا
سرد رہی عمر بھر انجمن آرزو
خار و خس شوق میں کوئی شرارہ نہ تھا
کس کے لیے جاگتے کس کی طرف بھاگتے
اتنے بڑے شہر میں کوئی ہمارا نہ تھا
شوق سفر بے سبب اور سفر بے طلب
اس کی طرف چل دیے جس نے پکارا نہ تھا
دور سہی منزلیں اب نہ رہیں ہمتیں
ٹوٹ گئے پائے شوق دل ابھی ہارا نہ تھا
تھوڑا سا رنگ رات کے چہرے پہ ڈال دو
کیا سوچتے ہو جام ہوا میں اچھال دو
سمجھے گا کون روح کی گہرائیوں کے راز
پوچھے کوئی تو باتوں ہی باتوں میں ٹال دو
سورج ہے اور پیاس کے مارے ہوئے ہیں لوگ
ساری خدائی برف کے پانی میں ڈال دو
زنداں میں کس لیے مجھے کرتے ہو تم اسیر
دیوانہ ہوں تو شہر سے باہر نکال دو
سائے کے پیچھے بھاگتے پھرنے سے فائدہ
ہر آرزو کو جسم کے پیکر میں ڈھال دو
ویسے یہ تیرگی بھی بری چیز تو نہیں
لیکن کبھی تو آ کے دلوں کو اجال دو
شہزادؔ دوستی میں بھلا کیا ملا تمہیں
ہو اہل دل تو دل کا جنازہ نکال دو
ویسے تو اک دوسرے کی سب سنتے ہیں
جن کو سنانا چاہتا ہوں کب سنتے ہیں
اب بھی وہی دن رات ہیں لیکن فرق یہ ہے
پہلے بولا کرتے تھے اب سنتے ہیں
شک اپنی ہی ذات پہ ہونے لگتا ہے
اپنی باتیں دوسروں سے جب سنتے ہیں
محفل میں جن کو سننے کی تاب نہ تھی
وہ باتیں تنہائی میں اب سنتے ہیں
جینا ہم کو ویسے بھی کب آتا تھا
بدل گئے ہیں جینے کے ڈھب سنتے ہیں
آنکھیں چھو کر دیکھتی ہیں آوازوں کو
کان دہائی دیتے ہیں لب سنتے ہیں
سنتے ضرور ہیں دنیا والے بھی شہزادؔ
کہنے کی خواہش نہ رہے تب سنتے ہیں
یوں خاک کی مانند نہ راہوں پہ بکھر جا
کرنوں کی طرح جھیل کے سینے میں اتر جا
مت بھول کہ اب بھی ہے تری گھات میں صیاد
سنتا ہے کوئی پاؤں کی آواز ٹھہر جا
مت دیکھ تمنا کی طرف آنکھ اٹھا کر
اندھوں کی طرح نور کے دریا سے گزر جا
منزل کی طلب اپنی طرف کھینچ رہی ہے
اور رات مسافر سے یہ کہتی ہے کہ گھر جا
اتنا تو سمجھ کیا ہے تری راہ میں حائل
آہو کی طرح اپنے ہی سائے سے نہ ڈر جا
شاید کہ کوئی برہنہ پا ہو ترے پیچھے
جاتے ہوئے اس راہ کو کانٹوں سے نہ بھر جا
پتھر نہیں آنکھیں تو یہ آنسو ہیں بڑی چیز
بھیگے ہوئے پھولوں کی طرح اور نکھر جا
یا دشت میں اس بزم کی رونق کو نہ کر یاد
یا شہر کی دیوار سے سر پھوڑ کے مر جا
اک عمر سے رویا ہوں نہ تڑپا ہوں میں شہزادؔ
احساس کا بادل کبھی برسا ہے نہ گرجا
ڈوب جائیں گے ستارے اور بکھر جائے گی رات
دیکھتی رہ جائیں گی آنکھیں گزر جائے گی رات
رات کا پہلا پہر ہے اہل دل خاموش ہیں
صبح تک روتی ہوئی آنکھوں سے بھر جائے گی رات
آرزو کی بے حسی کا گر یہی عالم رہا
بے طلب آئے گا دن اور بے خبر جائے گی رات
روشنی کیسی اگر عالم اندھیرا ہو گیا
دل میں بس جائے گی آنکھوں میں اتر جائے گی رات
کوئی آہٹ بھی نہ سن پائے گا خوابیدہ چمن
خشک پتوں پر دبے پاؤں گزر جائے گی رات
دل میں رہ جائیں گے تنہائی کے قدموں کے نشاں
اپنے پیچھے کتنی یادیں چھوڑ کر جائے گی رات
شام ہی سے سو گئے ہیں لوگ آنکھیں موند کر
کس کا دروازہ کھلے گا کس کے گھر جائے گی رات
دیر تک شہزادؔ آنکھوں میں پھرے گی چاندنی
کٹ تو جائے گی مگر کیا کچھ نہ کر جائے گی رات
میں کہ خوش ہوتا تھا دریا کی روانی دیکھ کر
کانپ اٹھا ہوں گلی کوچوں میں پانی دیکھ کر
ہو کوئی بہروپ اس کا دل دھڑکتا ہے ضرور
میں اسے پہچان لیتا ہوں نشانی دیکھ کر
ادھ کھلے تنہا دریچوں کا مجھے آیا خیال
نیم وا آنکھوں کی رنگت آسمانی دیکھ کر
ابر کے ٹکڑوں نے دیواریں بنا دیں جا بجا
دھوپ سے جلتی فضا کی بے کرانی دیکھ کر
ایک لمحے میں کٹا ہے مدتوں کا فاصلہ
میں ابھی آیا ہوں تصویریں پرانی دیکھ کر
آنکھ کے بادل سے کہتا ہے کہ دنیا پر برس
دل لب و رخسار کی شعلہ فشانی دیکھ کر
کس طرف لے جائے گی سوئے ہوئے لوگوں کو رات
ڈر رہا ہوں اس کی آنکھوں میں گرانی دیکھ کر
دن وہیں پر کاٹنا ہم کو قیامت ہو گیا
آن بیٹھے تھے جہاں صبحیں سہانی دیکھ کر
دل میں جو کچھ ہے زباں کا ذائقہ بنتا نہیں
لفظ چہرہ ڈھانپ لیتے ہیں معانی دیکھ کر
دل نہ جانے کون سی گہرائیوں میں کھو گیا
بحر کی موجوں کی تحریروں کو فانی دیکھ کر
دیر سے شہزادؔ کنج عافیت میں تھے اسیر
خوش ہوا ہے دل بلائے ناگہانی دیکھ کر
کہیں بھی سایہ نہیں کس طرف چلے کوئی
درخت کاٹ گیا ہے ہرے بھرے کوئی
عجیب رت ہے زباں ذائقے سے ہے محروم
تمام شہر ہی چپ ہو تو کیا کرے کوئی
ہمارے شہر میں ہے وہ گریز کا عالم
چراغ بھی نہ جلائے چراغ سے کوئی
یہ زندگی ہے سفر منجمد سمندر کا
وہیں پہ شق ہو زمیں جس جگہ رکے کوئی
پلٹ کر آ نہیں سکتے گئے ہوئے لمحے
تمام عمر بھی اب جاگتا رہے کوئی
مثال عکس مقید حصار ذات میں ہوں
وہ موج ہوں جسے رستہ نہ مل سکے کوئی
پھر اس کے بعد بکھر جاؤں ریت کی صورت
بس ایک بار مجھے ٹوٹ کر ملے کوئی
حضور حسن یہ دل کاسۂ گدائی ہے
ہوں وہ فقیر جسے بھیک بھی نہ دے کوئی
سوال اس نے بھی کوئی نہیں کیا شہزادؔ
جواب بن نہ پڑے جس کے سامنے کوئی
دل فسردہ اسے کیوں گلے لگا نہ لیا
قریب رہ کے بھی جس نے ترا پتا نہ لیا
بس ایک لمحے میں کیا کچھ گزر گئی دل پر
بحال ہوتے ہوئے ہم نے اک زمانہ لیا
کسی بھی حال میں پہنچے تو ہیں کنارے پر
یہی بہت ہے کہ احسان ناخدا نہ لیا
خیال آیا روانہ ہوئے سفر کے لیے
نہ ہم نے رخت ہی باندھا نہ آب و دانہ لیا
میں جی رہا ہوں مگر یاد رفتگاں کی طرح
مجھے گئے ہوئے لمحوں نے کیوں بلا نہ لیا
تمام عمر ہوا پھانکتے ہوئے گزری
رہے زمیں پہ مگر خاک کا مزا نہ لیا
ازل سے ہے وہی بے کیف روشنی اب تک
گلوں کا رنگ ستاروں نے کیوں اڑا نہ لیا
جو تھا عزیز اسی سے گریز کرتے رہے
گلی گلی میں پھرے اپنا راستہ نہ لیا
امید شعلہ نہیں آفتاب ہے شہزادؔ
چراغ تھا تو ہواؤں نے کیوں بجھا نہ لیا
باغ بہشت کے مکیں کہتے ہیں مرحبا مجھے
پھینک کے فرش خاک پر بھول گیا خدا مجھے
میں ترا بندہ ہوں مگر تیرے جہاں کا رازدار
تو ہے مرا خدا مگر تو نہیں جانتا مجھے
سوچتا ہوں سناؤں کیا عہد ستم کی داستاں
کہتا ہوں خیر چھوڑیئے یاد نہیں رہا مجھے
تھا کسی سائے کا خیال تھی کسی گل کی جستجو
دشت کی سمت چل دیا دیکھ کے راستا مجھے
روز نیا مقام ہے روز نئی امنگ ہے
تیری تلاش کیا کروں اپنا نہیں پتا مجھے
رنگ تھا میں تو کیوں زمیں مجھ سے ہوئی نہ لالہ زار
خاک تھا میں تو کس لیے لے نہ اڑی ہوا مجھے
لمحہ بہ لمحہ دم بہ دم چلتا رہا قدم قدم
ڈوبتے چاند کا سفر کتنا عزیز تھا مجھے
گرچہ مری چمک سے بند چشم ستارہ و فلک
نور ہوں پھر بھی نور کا رنگ نہیں ملا مجھے
آنکھ اٹھا کے میری سمت اہل نظر نہ دیکھ پائے
آنکھ نہ ہو تو کس قدر سہل ہے دیکھنا مجھے
اگرچہ کار دنیا کچھ نہیں ہے
مگر اس کے علاوہ کچھ نہیں ہے
اگر دھرتی پہ بادل ہی نہ برسیں
تو یہ دریا اکیلا کچھ نہیں ہے
بہت ناراض ہیں اک دوسرے سے
مگر دونوں میں جھگڑا کچھ نہیں ہے
یہ جو کچھ ہو رہا ہے شہر بھر میں
تماشا ہے تماشا کچھ نہیں ہے
یہ میں ہوں جو بدل جاتا ہوں ہر روز
زمانے میں بدلتا کچھ نہیں ہے
اگر جھولی نہ پھیلائی گئی ہو
تو وہ بے درد دیتا کچھ نہیں ہے
یہ دنیا ہے یوں ہی چلتی رہے گی
مرے ہونے سے ہونا کچھ نہیں ہے
کتنی بے نور تھی دن بھر نظر پروانہ
رات آئی تو ہوئی ہے سحر پروانہ
شمع جلتے ہی یہاں حشر کا منظر ہوگا
پھر کوئی پا نہ سکے گا خبر پروانہ
بجھ گئی شمع کٹی رات گئی سب محفل
اب اکیلے ہی کٹے گا سفر پروانہ
رات بھر بزم میں ہنگامہ ہی ہنگامہ تھا
صرف خاموشی ہے اب نوحہ گر پروانہ
ساری مخلوق تماشے کے لیے آئی تھی
کون تھا سیکھنے والا ہنر پروانہ
آسماں سرخ ہے سورج بھی ابھی ڈوبا ہے
ابھی روشن نہ کرو رہ گزر پروانہ
نہ سہی جسم مگر خاک تو اڑتی پھرتی
کاش جلتے نہ کبھی بال و پر پروانہ
شمع کیا چیز ہے جلتی تو کہاں تک جلتی
ابھی زندہ ہے دل بے خطر پروانہ
ہائے وہ حسن کہ جس کا کوئی مشتاق نہیں
ہائے وہ شمع کہ ہے بے خبر پروانہ
جس طرح گزرے گی یہ رات گزر جائے گی
مدتوں یاد رہے گا اثر پروانہ
ایک ہی جست میں طے ہو گئی منزل شہزادؔ
کتنے آرام سے گزرا سفر پروانہ
کیسے گزر سکیں گے زمانے بہار کے
چپ ہو گیا ہوں موسم گل کو پکار کے
یا میری زندگی میں اجالا کرے کوئی
یا پھینک دے کہیں یہ ستارے اتار کے
جھولی میں گل تو کیا کوئی کانٹا ہی ڈال دو
مایوس تو نہ ہو کوئی دامن پسار کے
دل پر بھی آؤ ایک نظر ڈالتے چلیں
شاید چھپے ہوئے ہوں یہیں دن بہار کے
آنکھوں میں آنسوؤں کی طرح تیرنے لگے
بھیگے ہوئے خیال لب جوئے بار کے
دہکی ہوئی فضاؤں میں جائیں کہاں طیور
سائے بھی جب گھنے نہ رہیں شاخسار کے
شہزادؔ کس زمیں کو میں اپنا وطن کہوں
آوارگان عشق ہوئے کس دیار کے
یہ کس غم سے عقیدت ہو گئی ہے
غم دنیا سے فرصت ہو گئی ہے
ہم اپنے حال پر خود رو دیے ہیں
کبھی ایسی بھی حالت ہو گئی ہے
اگر دو دل کہیں بھی مل گئے ہیں
زمانے کو شکایت ہو گئی ہے
کہاں میں اور کہاں آلام ہستی
مگر جینا تو عادت ہو گئی ہے
ذرا سا غم ہوا اور رو دیے ہم
بڑی نازک طبیعت ہو گئی ہے
خبر کیا ہو جہاں والوں کی ہم کو
انہیں دیکھے بھی مدت ہو گئی ہے
سکوں ملنے لگا شہزادؔ مجھ کو
تڑپ جانے کی صورت ہو گئی ہے
عمر جتنی بھی کٹی اس کے بھروسے پہ کٹی
اور اب سوچتا ہوں اس کا بھروسہ کیا تھا
تم نے اچھا کیا دامن کو بچا کر گزرے
ہم تو بس راہ کی مٹی تھے ہمارا کیا تھا
اس لیے آ کے ترے شہر میں آباد ہوئے
ہم کو اس دشت نوردی سے بھی لینا کیا تھا
یہ اگر سچ ہے کہ ہم اس سے بچھڑ کر خوش تھے
رات دن اس کی طرف دیکھتے رہنا کیا تھا
شوق نظارہ نے آنکھیں ہی نہیں کھلنے دیں
یہ کسی کو نہیں معلوم کہ دیکھا کیا تھا
پاؤں میرے بھی نہیں اٹھتے تھے گھر کی جانب
تم بھی جاتے ہوئے لوٹ آئے تھے ایسا کیا تھا
جال میں اس کے گرفتار تو ہونا تھا ہمیں
اس کے جادو سے نکلنے کا طریقہ کیا تھا
صبح پہچان نہ پایا کوئی صورت تیری
دل ہنگامہ طلب رات تماشا کیا تھا
صبح سورج بھی اسے دیکھنے آیا شہزادؔ
رات چمکا تھا جبیں پر جو ستارہ کیا تھا
دیکھنے اس کو کوئی میرے سوا کیوں آئے
میرے ہم راہ یہ نقش کف پا کیوں آئے
کل تھی یہ فکر اسے حال سنائیں کیسے
آج یہ سوچتے ہیں اس کو سنا کیوں آئے
کم نہیں ہے یہ اذیت کہ ابھی زندہ ہوں
اب مرے سر پہ کوئی اور بلا کیوں آئے
میں بلندی پہ اگر جاؤں تو کیسے جاؤں
آسمانوں سے زمینوں پہ خدا کیوں آئے
عدل و انصاف تقاضائے مشیت ہی سہی
زندگی ہی میں مگر روز جزا کیوں آئے
دوڑتے خون کی اک لہر بہت کافی ہے
شفق شام کو اتنی بھی حیا کیوں آئے
قیدیوں کے لیے بہتر ہے کہ گھٹ کر مر جائیں
روشنی جب نہیں آتی تو ہوا کیوں آئے
لوگ خاموشی کا کرتے ہیں تقاضا یعنی
سانس لینے کی بھی شہزادؔ صدا کیوں آئے
باغ کا باغ اجڑ گیا کوئی کہو پکار کر
کس نے شفق پہ مل دیے پھولوں کے رنگ اتار کر
شام کو موجۂ ہوا جانب دشت لے اڑے
صبح چمن میں آ گئے خاک پہ شب گزار کر
سایۂ آفتاب میں برگ و شرر ٹھٹھر گئے
برف کہاں سے آ گئی دھوپ کا روپ دھار کر
پاس ہی منزل مراد خاک میں تھی چھپی ہوئی
راہ میں پا بریدہ لوگ بیٹھ چکے تھے ہار کر
آج ترے خیال سے دل کو بہت سکوں ملا
ڈوب چلی یہ موج بھی مجھ کو ابھار ابھار کر
جلوۂ ماہتاب بھی شعبدۂ خیال ہے
رات کے پاس کچھ نہیں صبح کا انتظار کر
ولولۂ حیات کے دل میں کئی چراغ تھے
وقت نے سب بجھا دیے ایک ہی پھونک مار کر
رات کی نیندیں تو پہلے ہی اڑا کر لے گیا
رہ گئی تھی آرزو سو وہ بھی آ کر لے گیا
دن نکلتے ہی وہ خوابوں کے جزیرے کیا ہوئے
صبح کا سورج مری آنکھیں چرا کر لے گیا
دور سے دیکھو تو یہ دریا ہے پانی کی لکیر
موج میں آیا تو جنگل بھی بہا کر لے گیا
اس نے تو ان موتیوں پر خاک بھی ڈالی نہیں
آنکھ کی تھالی میں دل آنسو سجا کر لے گیا
غور سے دیکھا تو دل کی خاک تک باقی نہ تھی
مجھ کو دعویٰ تھا کہ میں سب کچھ بچا کر لے گیا
تری تلاش تو کیا تیری آس بھی نہ رہے
عجب نہیں کہ کسی دن یہ پیاس بھی نہ رہے
ہر ایک سمت خلا ہی خلا نظر آئیں
خرابۂ دل ویراں میں یاس بھی نہ رہے
غم فراق کی تلخی وہ دشت ہے کہ جہاں
کوئی قریب تو کیا آس پاس بھی نہ رہے
ترا خیال ہی پر تول کر اڑا لے جائے
کوئی امید شریک حواس بھی نہ رہے
تمام رنگ ہے خوشبو تمام خوشبو رنگ
گلوں سے رنگ اڑا لیں تو باس بھی نہ رہے
لٹا ہے قافلۂ آگہی دوراہے پر
زمانہ ساز تو کیا خود شناس بھی نہ رہے
کسی طریق سے شہزادؔ دل کو سمجھا لیں
نہ مسکرائے مگر یوں اداس بھی نہ رہے
خط میں اس کو کیسے لکھیں کیا پانا کیا کھونا ہے
دوری میں تو ہو نہیں سکتا جو آپس میں ہونا ہے
نیند کا پنچھی آ پہنچا ہے وحشی دل کی بات نہ سن
مل بھی گئے تو آخر تھک کر گہری نیند ہی سونا ہے
وہ آیا تو سارے موسم بدلے بدلے لگتے ہیں
یا کانٹوں کی سیج بچھی تھی یا پھولوں کا بچھونا ہے
ابھی تو خشک بہت ہے موسم بارش ہو تو سوچیں گے
ہم نے اپنے ارمانوں کو کس مٹی میں بونا ہے
ہم کو نصیحت کرنے والے خود بھی یہی کچھ کرتے ہیں
تم کیا قصے لے بیٹھے ہو یہ عمروں کا رونا ہے
کانچ کی گڑیاں طاق میں کب تک آپ سجائے رکھیں گے
آج نہیں تو کل ٹوٹے گا جس کا نام کھلونا ہے
بڑے بڑے دعوے ہیں لیکن چھوٹے چھوٹے قد شہزادؔ
پھانکنی ہے کچھ خاک ان کو کچھ پانی انہیں بلونا ہے
ہجر کی رات مری جاں پہ بنی ہو جیسے
دل میں اک یاد کہ نیزے کی انی ہو جیسے
نہیں معلوم کہ میں کون ہوں منزل ہے کہاں
چادر خاک ہر اک سمت تنی ہو جیسے
اپنی آواز کو خود سن کے لرز جاتا ہوں
کسی سائے سے مری ہم سخنی ہو جیسے
حادثہ ایک مگر کتنے غموں کا احساس
ایک صورت کئی رنگوں سے بنی ہو جیسے
بھول کر بھی کوئی لیتا نہیں اب نام وفا
عشق اس شہر میں گردن زدنی ہو جیسے
کتنے آرام سے ہوں عرصۂ تنہائی میں
گوشۂ دشت میں بھی چھاؤں گھنی ہو جیسے
کس قدر نرم و دل آویز ہے یہ گرم سحر
دھوپ مہتاب کی چادر میں چھنی ہو جیسے
کبھی سینے سے بھی پھولوں کی مہک آتی ہے
دل میں بھی کوئی فضائے چمنی ہو جیسے
جسم وہ جسم کہ لپکا ہوا کوندا کوئی
ہونٹ وہ ہونٹ کہ لعل یمنی ہو جیسے
دل میں چبھتی بھی رہی آنکھ میں کھبتی بھی رہی
مژۂ تیز کہ ہیرے کی کنی ہو جیسے
خود ہی تصویر بناتا ہوں مٹا دیتا ہوں
بت گری میرے لیے بت شکنی ہو جیسے
کم نہیں ہمت فرہاد سے سعیٔ تخلیق
کسی شیریں کے لیے کوہ کنی ہو جیسے
محفل دوست کی رونق میں ہیں شہزادؔ مگر
دل کا یہ حال غریب الوطنی ہو جیسے
چمک چمک کے ستارو مجھے فریب نہ دو
تم اپنی رات گزارو مجھے فریب نہ دو
طلسم ٹوٹ گیا ہے تمہاری الفت کا
مری ہوس کو پکارو مجھے فریب نہ دو
میں جانتا ہوں تمہاری حقیقت ہستی
خزاں نصیب بہارو مجھے فریب نہ دو
لگے ہوئے ہیں یہاں پھول پھول سے کانٹے
مرے چمن کے نظارو مجھے فریب نہ دو
تڑپ تڑپ نہ اٹھو آج میرے ارمانو
بھڑک بھڑک کے شرارو مجھے فریب نہ دو
امید وعدۂ فردا نہ مجھ کو دلواؤ
میں غم نصیب ہوں یارو مجھے فریب نہ دو
ہم لوگوں کو اپنے دل کے راز بتاتے رہتے ہیں
لوگ ہماری باتیں سن کر ہنستے ہنساتے رہتے ہیں
مزید شاعری پڑھیے اور دوسرے شعراء کو دریافت کیجیے۔