شاعر کی معلومات لوڈ ہو رہی ہیں...
تم نے کہا تھا چپ رہنا سو چپ نے بھی کیا کام کیا
چپ رہنے کی عادت نے کچھ اور ہمیں بد نام کیا
شاعر کی معلومات لوڈ ہو رہی ہیں...
Sahba Akhtar
1931 – 1996
His name was Akhtar Ali Rehmat and his pen name was Sahba. He was born on 30th September 1931 in Jammu. He received his early education and upbringing under the care of his mother in Bareilly and Aligarh. After the partition of India, he migrated to Pakistan. Due to difficult circumstances, he could not pursue further education. He worked various jobs for short periods and eventually became an Inspector in the Food Department, where he rose to the position of Rationing Controller. Sahba Akhtar had a passion for poetry from an early age. His work was published in the leading literary magazines of the country. After becoming associated with Radio Pakistan, he began writing songs, which led him to the film industry. He was affiliated with the daily newspaper Hurriyat for seven years and also wrote quatrains for the daily Mashriq. Sahba Akhtar tried his hand at all genres of poetry, though he wrote more poems than ghazals. He also wrote national songs and dohe (couplets), which became very popular. He passed away on 19th February 1996 in Karachi.
ان کے کلام کے چند منتخب اشعار پڑھیے۔
تم نے کہا تھا چپ رہنا سو چپ نے بھی کیا کام کیا
چپ رہنے کی عادت نے کچھ اور ہمیں بد نام کیا
فرزانوں کی تنگ دلی فرزانوں تک محدود رہی
دیوانوں نے فرزانوں تک رسم جنوں کو عام کیا
کنج چمن میں آس لگائے چپ بیٹھے ہیں جس دن سے
ہم نے صبا کے ہاتھ روانہ ان کو اک پیغام کیا
ہم نے بتاؤ کس تپتے سورج کی دھوپ سے مانی ہار
ہم نے کس دیوار چمن کے سائے میں آرام کیا
صہباؔ کون شکاری تھے تم وحشت کیش غزالوں کے
متوالی آنکھوں کو تم نے آخر کیسا رام کیا
مجھے ملا وہ بہاروں کی سر خوشی کے ساتھ
گل و سمن سے زیادہ شگفتگی کے ساتھ
وہ رات چشمۂ ظلمات پر گزاری تھی
وہ جب طلوع ہوا مجھ پہ روشنی کے ساتھ
اگر شعور نہ ہو تو بہشت ہے دنیا
بڑے عذاب میں گزری ہے آگہی کے ساتھ
یہ اتفاق ہیں سب راہ کی مسافت کے
چلے کسی کے لیے جا ملے کسی کے ساتھ
برا نہیں ہے مگر حسب تشنگی بھی کہاں
سلوک شہد لباں میری تشنگی کے ساتھ
فضا میں رقص ہے صہباؔ حسیں پرندوں کا
مجھے بھی حسرت پرواز ہے کسی کے ساتھ
ہم اپنے بخت سیہ کے اثر میں رہتے ہیں
وہ رات ہے کہ ستارے نظر میں رہتے ہیں
تماشہ گاہ طلوع و غروب سے ہٹ کر
ہم اک سواد شب بے سحر میں رہتے ہیں
نہ تھی خدا کی زمیں تنگ جن کے قدموں پر
فغاں کہ قید وہ دیوار و در میں رہتے ہیں
وہ آگہی کے سمندر کہاں ہیں جن کے لئے
تمام عمر یہ پیاسے سفر میں رہتے ہیں
ہوائے کوچۂ محبوب سے کہے تو کون
کہ ہم بھی آرزوئے نامہ بر میں رہتے ہیں
وہ شہر یار سخن نام جن کا صہباؔ ہے
فقیر بن کے تری رہ گزر میں رہتے ہیں
چہرے شادابی سے عاری آنکھیں نور سے خالی ہیں
کس کے آگے ہاتھ بڑھاؤں سارے ہاتھ سوالی ہیں
مجھ سے کس نے عشق کیا ہے کون مرا محبوب ہوا
میرے سب افسانے جھوٹے سارے شعر خیالی ہیں
چاند کا کام چمکتے رہنا اس ظالم سے کیا کہنا
کس کے گھر میں چاندنی چھٹکی کس کی راتیں کالی ہیں
صہباؔ اس کوچے میں نہ جانا شاید پتھر بن جاؤ
دیکھو اس ساحر کی گلیاں جادو کرنے والی ہیں
اصنام مال و زر کی پرستش سکھا گئی
دنیا مجھے بھی عابد دنیا بنا گئی
وہ سنگ دل مزار وفا پر بنام عشق
آئی تو میرے نام کا پتھر لگا گئی
میرے لیے ہزار تبسم تھی وہ بہار
جو آنسوؤں کی راہ پہ مجھ کو لگا گئی
گوہر فروش شبنمی پلکوں کی چھاؤں میں
کیا آگ تھی جو روح کے اندر سما گئی
میرے سخن کی داد بھی اس کو ہی دیجئے
وہ جس کی آرزو مجھے شاعر بنا گئی
صہباؔ وہ روشنی جو بہت مہربان تھی
کیوں میرے راستے میں اندھیرے بچھا گئی
میرے لیے وجود کا دریا سراب تھا
ناکامیوں کے باب میں میں کامیاب تھا
بخشے ہیں مجھ کو پھول محبت کی آگ نے
میرے لیے سکوں کا سبب اضطراب تھا
میں نے سفید لفظ لکھے اور سچ لکھے
میری صداقتوں کا بیاں بے خضاب تھا
عصیاں شمار تھے جو فرشتے وہ تھک گئے
اک فرد صد گناہ سے میں بے حساب تھا
کیا مجھ سے انتخاب کی کرتا ہے آرزو
میں تو نگاہ شعر کا خود انتخاب تھا
ہجر و وصال ختم ہوئے ٹھیک ہے یہ کھیل
تجھ کو بھی ناگوار مجھے بھی عذاب تھا
بے داغ کہہ رہا ہے جو اپنے جمال کو
کل شب مری بغل میں یہی آفتاب تھا
میری کتاب رسم جہاں ہے وگرنہ میں
وہ صاحب کتاب ہوں جو بے کتاب تھا
صہباؔ مرے وجود پہ ہر میکدے سے دور
چھایا تھا وہ سرور کہ پانی شراب تھا
مجھ پہ ایسا کوئی شعر نازل نہ ہو
جس کی حدت مرے خوں میں شامل نہ ہو
فکر ایسے محیط سخن کی کرو
جس کی امواج کا کوئی ساحل نہ ہو
آج اک بنت مریم ہے آغوش میں
مجھ پہ اے روح قدس آج نازل نہ ہو
بے محابا ملے ہجر ہو با وصال
کوئی دیوار رستے میں مائل نہ ہو
شاخ پر ہے گماں گل سے اندیشہ ہے
یہ بھی خنجر نہ ہو یہ بھی قاتل نہ ہو
کاروان جنوں دے رہا ہے صدا
جاں ہو پیاری جسے ہم میں شامل نہ ہو
کاش وہ وقت بھی آئے دنیا میں جب
زر پکارے مگر کوئی سائل نہ ہو
میری تنہائی کو میرا مقسوم کر
میری منزل زمانے کی منزل نہ ہو
حکم دے جان صہباؔ نئی فکر کا
یہ غزل بھی اگر تیرے قابل نہ ہو
بہ ہر عالم برابر لکھ رہا ہوں
میں پیاسا ہوں سمندر لکھ رہا ہوں
صدف اندر صدف تھے جو معانی
انہیں گوہر بہ گوہر لکھ رہا ہوں
نہیں یہ شاعری ہرگز نہیں ہے
میں خود اپنا مقدر لکھ رہا ہوں
ہر اک طفل قلم یہ سوچتا ہے
میں کل دنیا سے بہتر لکھ رہا ہوں
نظر آتی نہیں جو دل کی دنیا
اسے منظر بہ منظر لکھ رہا ہوں
مے لب سے مجھ خوش کرنے والو
تمہارے نام کوثر لکھ رہا ہوں
جو مستی ہے مرا مقسوم صہباؔ
اسے ساغر بہ ساغر لکھ رہا ہوں
ملے ہیں پیار کے لمحے تو ان میں کھو جائیں
نصیب جاگ رہا ہے تو آؤ سو جائیں
سر بہشت غزل کوثر محبت میں
اٹھو کہ قرض ادا تشنگی کے ہو جائیں
یہ اشک اشک گہر رائیگاں نہ جائیں گے
جو ان کو شعر کی لڑیوں میں ہم پرو جائیں
بہار ہو کہ خزاں کارگاہ ہستی میں
انہیں کسی سے غرض کیا جو تیرے ہو جائیں
چمن نصیب زمانہ کرے گا یاد ہمیں
زمین شعر میں صہباؔ خیال بو جائیں
جسے لکھ لکھ کے خود بھی رو پڑا ہوں
میں اپنی روح کا وہ مرثیہ ہوں
مری تنہائیوں کو کون سمجھے
میں سایہ ہوں مگر خود سے جدا ہوں
سمجھتا ہوں نوا کی شعلگی کو
سکوت حرف سے لمس آشنا ہوں
کسی سے کیا ملوں اپنا سمجھ کر
میں اپنے واسطے بھی نارسا ہوں
کوئی سورج ہے فن کا تو مجھے کیا
میں اپنی روشنی میں سوچتا ہوں
مرا صحرا ہے میری خود شناسی
میں اپنی خامشی میں گونجتا ہوں
مجھے یہ جستجو رکھتی ہے حیراں
کہ میں صہبا ہوں یا صہبا نما ہوں
یوں بھی ہوا اک عرصے تک اک شعر نہ مجھ سے تمام ہوا
اور کبھی اک رات میں اک دیوان مجھے الہام ہوا
اپنی تنہائی کا شکوہ تجھ کو گروہ غیر سے کیوں
یہ تو ہوس کا دور ہے پیارے جس کو جس سے کام ہوا
میں اپنے خالق سے خوش ہوں مثل علی اس قسمت پر
دولت اہل جہل نے پائی علم مجھے انعام ہوا
کیسی قناعت کیسی عبادت حرص و ہوس کے عالم میں
دل جو پہلے گھر تھا خدا کا اب شہر اصنام ہوا
جو پتھر کو موم بنا دے دل میں اب وہ آنچ کہاں
جس شعلے پر ناز بہت تھا وہ شعلہ بھی خام ہوا
جن کو ہے اسلام کا دعویٰ صہباؔ ان کا حال بھی دیکھ
میں تو خیر بتوں کا ہو کر محروم اسلام ہوا
کل جہاں اک آئینہ ہے حسن کی تحریر کا
حال کس پتھر پہ لکھا ہے مری تقدیر کا
چاند اس کا آسماں اس کا سر شام وصال
جس پہ سایہ ہو تری زلف ستارہ گیر کا
کی نہ چشم شوق نے جنبش ہجوم رنگ میں
مجھ پہ طاری ہو گیا عالم تری تصویر کا
میں اسے سمجھوں نہ سمجھوں دل کو ہوتا ہے ضرور
لالہ و گل پر گماں اک اجنبی تحریر کا
چین سے دونوں نہیں اس عالم احساس میں
میں تری چپ کا ہوں زخمی تو مری تقریر کا
آ جا اندھیری راتیں تنہا بتا چکا ہوں
شمعیں جہاں نہ جلتیں آنکھیں جلا چکا ہوں
خورشید شام رفتہ لوٹے تو اس سے پوچھوں
میں زندگی کی کتنی صبحیں گنوا چکا ہوں
امید و بیم شب نے یہ بھی بھلا دیا ہے
کتنے دئے جلائے کتنے بجھا چکا ہوں
میں باز گشت دل ہوں پیہم شکست دل ہوں
وہ آزما رہا ہوں جو آزما چکا ہوں
یہ شب بجھی بجھی ہے شاید کہ آخری ہے
اے صبح درد تیرے نزدیک آ چکا ہوں
مجھ کو فریب مت دے اے موسم بہاراں
ایسے کئی شگوفے میں بھی کھلا چکا ہوں
سورج طلوع ہوں یا سورج غروب صہباؔ
شب ہائے غم کے پردے خود پر گرا چکا ہوں
فرد عصیاں کو وہ سیاہی دے
جس کی وہ زلف بھی گواہی دے
بے اماں نیم جاں ہوں میری جاں
مجھ کو آغوش جاں پناہی دے
اپنی زلفوں کے سائے میں مجھ کو
ایک شب کی ستارہ جاہی دے
دل کے اجڑے نگر کو کر آباد
اس ڈگر کو بھی کوئی راہی دے
میں نے تعمیر قصر شوق کیا
تو اسے مژدۂ تباہی دے
بخشنے والے گل رخوں کو جمال
مجھ کو سامان خوش نگاہی دے
میں اسیر گمان ظلمت ہوں
اعتماد سحر نگاہی دے
مجرم عشق ہوں مجھے صہباؔ
جو سزا دے وہ بے گناہی دے
گونج مرے گمبھیر خیالوں کی مجھ سے ٹکراتی ہے
آنکھیں بند کروں یا کھولوں بجلی کوندے جاتی ہے
تنہائی کے دشت سے گزرو تو ممکن ہے تم بھی سنو
سناٹے کی چیخ جو میرے کانوں کو پتھراتی ہے
کل اک نیم شگفتہ جسم کے قرب سے مجھ پر ٹوٹ پڑی
آدھی رات کو ادھ کھلی کلیوں سے جو خوش بو آتی ہے
سونے گھروں میں رہنے والے کندنی چہرے کہتے ہیں
ساری ساری رات اکیلے پن کی آگ جلاتی ہے
صہباؔ صاحب دریا ہو تو دریا جیسی بات کرو
تیز ہوا سے لہر تو اک جوہڑ میں بھی آ جاتی ہے
واقف نہیں تو اس کے لبوں کو کنول نہ لکھ
الفاظ کو خضاب لگا کر غزل نہ لکھ
مومن کے ساتھ صرف خدا ہے صنم نہیں
اس بیکسی کو عقدۂ مشکل کا حل نہ لکھ
لفظوں میں کب سمٹتا ہے وہ سحر بے کراں
شعروں کو حسن دوست کا نعم البدل نہ لکھ
انسان آپ اپنی تباہی کو کم نہیں
دنیا کی اس تباہی کو کار اجل نہ لکھ
صہباؔ کے ساتھ ساتھ نہ چل سایۂ ضمیر
اے میرے ہم نشیں مری فرد عمل نہ لکھ
میں اہل دہر کی نظروں میں بے عقیدہ سہی
الٹ نقاب کہ نادیدہ آج دیدہ سہی
ہوائے کوچۂ محبوب کا ہوں دامن گیر
ہزار دامن محبوب نا رسیدہ سہی
تصورات ترے حسن سے ہیں وابستہ
تعلقات تری ذات سے کشیدہ سہی
مری بلند خیالی میں کیا کمی آئی
میں عرش زاد نہیں خاک آفریدہ سہی
مجھے نہیں نہ سہی ہو عدو کو چین نصیب
بشر کا دکھ ہے مجھے میں بشر گزیدہ سہی
جسے ملا ہے اسے مست کر گیا صہباؔ
مرے خیال کا بادہ سخن کشیدہ سہی
جیسے کسی سے وصل کا وعدہ وفا ہوا
یوں صبح دم چراغ سے شعلہ جدا ہوا
زہراب غم کا کوئی اثر ہو تو کس طرح
سینے میں دل ہے دل بھی لہو میں بجھا ہوا
تجھ سے سدا بہار کو اندیشۂ خزاں
پورا نہ ہو خدا کرے تیرا کہا ہوا
اس چشم مے فروش سے پی جس کا ایک عمر
اک شام کا بھی قرض بہ مشکل ادا ہوا
دیتا ہے مجھ کو ترک محبت کے مشورے
تیرے سوا بھی ہے کوئی دل میں چھپا ہوا
جاؤں کہاں کہ ترک تمنا کے باوجود
ہے ہر طرف حصار تمنا کھنچا ہوا
اس طریقے کو عداوت میں روا رکھتا ہوں میں
اپنے دشمن کے لیے حرف دعا رکھتا ہوں میں
میں فقیری میں بھی اہل زر سے بہتر ہی رہا
کچھ نہیں رکھتا مگر نام خدا رکھتا ہوں میں
میں کبھی تنہا نہیں ہوتا سر کنج چمن
وہ نہ ہوں تو ہاتھ میں دست صبا رکھتا ہوں میں
میں نے کم کھویا سوا پایا ہے کار عشق میں
دل جہاں تھا اب وہاں اک دل ربا رکھتا ہوں میں
جانے کب آ جائے وہ صہبا مثال فصل گل
اس لیے ویرانۂ دل کو سجا رکھتا ہوں میں
خود کو شرر شمار کیا اور جل بجھے
اک شعلہ رخ سے پیار کیا اور جل بجھے
اک رات میں سمٹ گئی کل عمر آرزو
اک عمر انتظار کیا اور جل بجھے
پچھلے جنم کی راکھ سے لے کر نیا جنم
پھر راکھ کو شرار کیا اور جل بجھے
ہم بھی نصیب سے جو ستارہ نصیب تھے
سورج کا انتظار کیا اور جل بجھے
ہم روشنئ طبع سے شعلہ فروز تھے
ہر تیرگی پہ وار کیا اور جل بجھے
خواب کی صورت کبھی ہم رنگ افسانہ ملے
چاند جیسے لوگ ہم سے ماہتابانہ ملے
دیدہ و دل میں بسا لی اس کے کوچے کی ہوا
اس کی زلفوں کی مہک سے بھی اسیرانہ ملے
ہم بھی اک بت کی پرستش کے لیے بیتاب ہیں
کون جانے کب محبت کا صنم خانہ ملے
آرزو مند تماشہ ہیں مری تنہائیاں
کوئی کاشانہ نہیں تو کوئی ویرانہ ملے
زیر ہونے نہ دیا ہمت عالی نے مجھے
سر کشیدہ ہی رکھا سرو خیالی نے مجھے
اتنے چہرے تو نہ تھے ارژنگ مانی کو نصیب
جتنے چہرے دئے آئینہ خیالی نے مجھے
میں نے منسوب کیا خون جگر سے ورنہ
شعر بخشے ترے رخسار کی لالی نے مجھے
دل نے رزاق دو عالم کو پکارا کیا کیا
رہ میں روکا جو کسی دست سوالی نے مجھے
یہ قلمروئے سخن ہے تو چلو یوں ہی سہی
ملک تفویض کیا جو مرے والی نے مجھے
سوال صبح چمن ظلمت خزاں سے اٹھا
یہ نفع کم تو نہیں ہے جو اس زیاں سے اٹھا
سفینہ رانئ مہتاب دیکھتا کوئی
کہ اک تلاطم ضو جوئے کہکشاں سے اٹھا
غبار ماہ کہ مقسوم تھا خلاؤں کا
بکھر گیا تو ترے سنگ آستاں سے اٹھا
غم زمانہ ترے ناز کیا اٹھاؤں گا
کہ ناز دوست بھی کم مجھ سے سرگراں سے اٹھا
مرے حبیب بہت کم ثبات ہے دنیا
مرے حبیب بس اب ہاتھ امتحاں سے اٹھا
بیان لغزش آدم نہ کر کہ وہ فتنہ
مری زمیں سے نہیں تیرے آسماں سے اٹھا
کہاں چلے ہو لیے نقد جان و دل صہباؔ
کہ کاروبار وفا شہر دلبراں سے اٹھا
میں بہاروں کے روپ میں گم تھا
جب تجھے مجھ سے کچھ تبسم تھا
تھا وہ اپنے ہی خوف کا محکوم
جس کی آواز میں تحکم تھا
وصل تیرا رہا نہ راز کہ صبح
در و دیوار پر تبسم تھا
میرے شعروں میں ڈھل سکا نہ کبھی
جو مری روح میں ترنم تھا
میں پیمبر نہ تھا مگر مجھ سے
ماہ و خورشید کو تکلم تھا
سب بہانے تھے کوچہ گردی کے
کون تیری تلاش میں گم تھا
میرا ساحل نہ بن سکا صہباؔ
میری فطرت میں جو تلاطم تھا
برنگ شعر گرے اور بار بار گرے
ہمارے ذہن پہ کرنوں کے آبشار گرے
غموں کی راہ میں ثابت قدم ہیں دیوانے
بساط عیش پہ کتنے نشاط کار گرے
چمن کھلا تو نئی نکہتوں کے آنچل پر
شگفت گل سے ترے عکس بے شمار گرے
زمین چاند کا ٹکڑا ہے جس کی ظلمت پر
کئی اجالے ہر اک شب ستارہ وار گرے
ہمیں بھی فرصت یک خواب اس فضا میں جہاں
کرن کرن لب و رخسار کی پھوار گرے
ابھر رہا ہے جو مشرق کے ہر خرابے سے
کسے خبر کہ کہاں جا کے یہ غبار گرے
محیط مثل آسماں زمین فکر و فن پہ ہوں
سکوت کا سبب ہے یہ مقام لا سخن پہ ہوں
فضائے لا ثبات میں سرائے بے جہات میں
مسافرانہ خندہ ریز وقت کی تھکن پہ ہوں
مرے نصیب کی سحر غروب ہو گئی کہاں
نظر جمائے دیر سے تری کرن کرن پہ ہوں
سجاؤں وہ چمن جنہیں خزاں کبھی نہ چھو سکے
تری طرح جو حکمراں شگفت ہر چمن پہ ہوں
عزیز تر ہے تیشۂ ہنر غبار درد سے
طریق قیس پر نہیں طریق کوہکن پہ ہوں
ہجوم صد خیال سے نجات مل سکے اگر
تو حاسدانہ معترض کسی کی انجمن پہ ہوں
وصال ہی وصال ہے فراق اب محال ہے
میں تیرے ہر لباس کی طرح ترے بدن پہ ہوں
کسی کے شجرۂ سخن سے نسبت سخن نہیں
میں آپ اپنا مدعی سیادت سخن پہ ہوں
دہراؤں کیا فسانۂ خواب و خیال کو
گزرے کئی فراق کسی کے وصال کو
رشتہ بجز گمان نہ تھا زندگی سے کچھ
میں نے فقط قیاس کیا ماہ و سال کو
شاید وہ سنگ دل ہو کبھی مائل کرم
صورت نہ دے یقین کی اس احتمال کو
ترغیب کا ہے وسعت امکاں پہ انحصار
رم خوردگی سکھاتا ہے صحرا غزال کو
صہباؔ سدا بہار ہے یہ گلستان فن
ممکن نہیں زوال سخن کے کمال کو
رقص یک نور کبھی سیل بلا دیکھتا ہوں
ذہن پر چھائی ہوئی دھند میں کیا دیکھتا ہوں
تجھ کو محدود خد و خال میں کر رکھا ہے
میں کہاں تجھ کو ابھی تیرے سوا دیکھتا ہوں
نرم مٹی سے اٹھے ہیں وہ کنوارے جذبات
جن کو پہنے ہوئے پھولوں کی قبا دیکھتا ہوں
آنکھ حائل ہے تری دید میں اچھا ہوگا
آج یہ آخری پردہ بھی اٹھا دیکھتا ہوں
کیوں نہ اس پردہ نشیں کو ہو تکلم میں حجاب
میں تو آواز کو بھی چہرہ نما دیکھتا ہوں
میں وہ کافر ہوں کہ اس ظلمت دل کے ہاتھوں
ہر چمکتے ہوئے چہرے میں خدا دیکھتا ہوں
پھر کوئی کنج اماں دشت سخن میں صہباؔ
آج پھر دل کو پریشان نوا دیکھتا ہوں
ہر نئے چہرے سے پیدا اک نیا چہرا ہوا
طاق نسیاں پر ہے کوئی آئنہ رکھا ہوا
بے وسیلہ اس جہاں میں موت بھی ممکن نہیں
حیلۂ دار و رسن بھی ہے مرا سمجھا ہوا
زخم گہرے کر رہی ہے ہر نئے مصرعے کی کاٹ
شعر کہنے سے بھی دل کا بوجھ کب ہلکا ہوا
زندگی کیا جانے کیوں محسوس ہوتا ہے مجھے
تجھ سے پہلے بھی ہو جیسے زہر یہ چکھا ہوا
ہوک سی اٹھتی ہے صہباؔ آسماں کو دیکھ کر
گر میں شعلہ ہوں تو پھر کیوں خاک سے پیدا ہوا
ایک اندوہ بے قیاس میں ہوں
آگ ہوں خاک کے لباس میں ہوں
کیا سکونت سرائے فانی کی
ایک تعمیر بے اساس میں ہوں
دور آب فرات فن ہے ہنوز
کربلائے سخن کی پیاس میں ہوں
کوئی سنتا تو قدر بھی کرتا
ایک صحرائے ناسپاس میں ہوں
شمع امید ہوں مگر صہباؔ
بند فانوس رنج و یاس میں ہوں
مزید شاعری پڑھیے اور دوسرے شعراء کو دریافت کیجیے۔