شاعر کی معلومات لوڈ ہو رہی ہیں...
آپ جیسوں کے لیے اس میں رکھا کچھ بھی نہیں
لیکن ایسا تو نہ کہیے کہ وفا کچھ بھی نہیں
شاعر کی معلومات لوڈ ہو رہی ہیں...
Jawad Shaikh
1985 – حال
Jawad Sheikh is a respected and powerful name in Urdu ghazal poetry. He hails from Bhalwal, in the Sargodha District of Pakistan. He lived abroad for thirteen years in Oslo, Norway, and Portugal. He began writing poetry in 1997, with his formal literary journey starting in 2002. He earned a Master’s degree in Urdu literature from the University of Sargodha. During his stay in Norway, he also served as the General Secretary of Halqa Arbab-e-Zauq Oslo, a literary organization promoting Urdu literature. In January 2016, his first poetry collection, titled "Koi Koi Baat", was published and received great appreciation in literary circles. His poetry is admired not only in Pakistan but also internationally, and he frequently participates in poetry events (mushairas) across the globe. Jawad Sheikh has been honored with several prestigious literary awards, notably the "Nam Girifta Award 2016/2017" and the "Ishara Literary Award 2017". Many of his verses have gained immense popularity among the public, reflecting his depth of thought and simplicity of expression.
ان کے کلام کے چند منتخب اشعار پڑھیے۔
آپ جیسوں کے لیے اس میں رکھا کچھ بھی نہیں
لیکن ایسا تو نہ کہیے کہ وفا کچھ بھی نہیں
آپ کہیے تو نبھاتے چلے جائیں گے مگر
اس تعلق میں اذیت کے سوا کچھ بھی نہیں
میں کسی طرح بھی سمجھوتہ نہیں کر سکتا
یا تو سب کچھ ہی مجھے چاہیے یا کچھ بھی نہیں
کیسے جانا ہے کہاں جانا ہے کیوں جانا ہے
ہم کہ چلتے چلے جاتے ہیں پتا کچھ بھی نہیں
ہائے اس شہر کی رونق کے میں صدقے جاؤں
ایسی بھرپور ہے جیسے کہ ہوا کچھ بھی نہیں
پھر کوئی تازہ سخن دل میں جگہ کرتا ہے
جب بھی لگتا ہے کہ لکھنے کو بچا کچھ بھی نہیں
اب میں کیا اپنی محبت کا بھرم بھی نہ رکھوں
مان لیتا ہوں کہ اس شخص میں تھا کچھ بھی نہیں
میں نے دنیا سے الگ رہ کے بھی دیکھا جوادؔ
ایسی منہ زور اداسی کی دوا کچھ بھی نہیں
عرض الم بہ طرز تماشا بھی چاہیے
دنیا کو حال ہی نہیں حلیہ بھی چاہیے
اے دل کسی بھی طرح مجھے دستیاب کر
جتنا بھی چاہیے اسے جیسا بھی چاہیے
دکھ ایسا چاہیے کہ مسلسل رہے مجھے
اور اس کے ساتھ ساتھ انوکھا بھی چاہیے
اک زخم مجھ کو چاہیے میرے مزاج کا
یعنی ہرا بھی چاہیے گہرا بھی چاہیے
اک ایسا وصف چاہیے جو صرف مجھ میں ہو
اور اس میں پھر مجھے ید طولٰی بھی چاہیے
رب سخن مجھے تری یکتائی کی قسم
اب کوئی سن کے بولنے والا بھی چاہیے
کیا ہے جو ہو گیا ہوں میں تھوڑا بہت خراب
تھوڑا بہت خراب تو ہونا بھی چاہیے
ہنسنے کو صرف ہونٹ ہی کافی نہیں رہے
جوادؔ شیخ اب تو کلیجہ بھی چاہیے
ٹوٹنے پر کوئی آئے تو پھر ایسا ٹوٹے
کہ جسے دیکھ کے ہر دیکھنے والا ٹوٹے
تو اسے کس کے بھروسے پہ نہیں کات رہی؟؟
چرخ کو دیکھنے والی!! ترا چرخہ ٹوٹے
اپنے بکھرے ہوئے ٹکڑوں کو سمیٹے کب تک؟؟
ایک انسان کی خاطر کوئی کتنا ٹوٹے
کوئی ٹکڑا تری آنکھوں میں نہ چبھ جائے کہیں
دور ہو جا کہ مرے خواب کا شیشہ ٹوٹے
میں کسی اور کو سوچوں تو مجھے ہوش آئے
میں کسی اور کو دیکھوں تو یہ نشہ ٹوٹے
رنج ہوتا ہے تو ایسا کہ بتائے نہ بنے
جب کسی اپنے کے باعث کوئی اپنا ٹوٹے
پاس بیٹھے ہوئے یاروں کو خبر تک نہ ہوئی
ہم کسی بات پہ اس درجہ انوکھا ٹوٹے
اتنی جلدی تو سنبھلنے کی توقع نہ کرو!!
وقت ہی کتنا ہوا ہے مرا سپنا ٹوٹے
داد کی بھیک نہ مانگ!! اے مرے اچھے شاعر!!
جا تجھے میری دعا ہے ترا کاسہ ٹوٹے
ورنہ کب تک لیے پھرتا رہوں اس کو جوادؔ
کوئی صورت ہو کہ امید سے رشتہ ٹوٹے
میں چاہتا ہوں کہ دل میں ترا خیال نہ ہو
عجب نہیں کہ مری زندگی وبال نہ ہو
میں چاہتا ہوں تو یک دم ہی چھوڑ جائے مجھے
یہ ہر گھڑی ترے جانے کا احتمال نہ ہو
میں چاہتا ہوں محبت پہ اب کی بار آئے
زوال ایسا کہ جس کو کبھی زوال نہ ہو
میں چاہتا ہوں محبت سرے سے مٹ جائے
میں چاہتا ہوں اسے سوچنا محال نہ ہو
میں چاہتا ہوں محبت مجھے فنا کر دے
فنا بھی ایسا کہ جس کی کوئی مثال نہ ہو
میں چاہتا ہوں محبت مرا وہ حال کرے
کہ خواب میں بھی دوبارہ کبھی مجال نہ ہو
میں چاہتا ہوں کہ اتنا ہی ربط رہ جائے
وہ یاد آئے مگر بھولنا محال نہ ہو
میں چاہتا ہوں مری آنکھیں نوچ لی جائیں
ترا خیال کسی طور پائمال نہ ہو
میں چاہتا ہوں کہ میں زخم زخم ہو جاؤں
اور اس طرح کہ کبھی خوف اندمال نہ ہو
مری مثال ہو سب کی نگاہ میں جوادؔ
میں چاہتا ہوں کسی اور کا یہ حال نہ ہو
ایک تصویر کہ اول نہیں دیکھی جاتی
دیکھ بھی لوں تو مسلسل نہیں دیکھی جاتی
دیکھی جاتی ہے محبت میں ہر اک جنبش دل
صرف سانسوں کی ریہرسل نہیں دیکھی جاتی
اک تو ویسے بڑی تاریک ہے خواہش نگری
پھر طویل اتنی کہ پیدل نہیں دیکھی جاتی
ایسا کچھ ہے بھی نہیں جس سے تجھے بہلاؤں
یہ اداسی بھی مسلسل نہیں دیکھی جاتی
سامنے اک وہی صورت نہیں رہتی اکثر
جو کبھی آنکھ سے اوجھل نہیں دیکھی جاتی
میں نے اک عمر سے بٹوے میں سنبھالی ہوئی ہے
وہی تصویر جو اک پل نہیں دیکھی جاتی
اب مرا دھیان کہیں اور چلا جاتا ہے
اب کوئی فلم مکمل نہیں دیکھی جاتی
اک مقام ایسا بھی آتا ہے سفر میں جوادؔ
سامنے ہو بھی تو دلدل نہیں دیکھی جاتی
یہ وہم جانے میرے دل سے کیوں نکل نہیں رہا
کہ اس کا بھی مری طرح سے جی سنبھل نہیں رہا
کوئی ورق دکھا جو اشک خوں سے تر بہ تر نہ ہو
کوئی غزل دکھا جہاں وہ داغ جل نہیں رہا
میں ایک ہجر بے مراد جھیلتا ہوں رات دن
جو ایسے صبر کی طرح ہے جس کا پھل نہیں رہا
تو اب مرے تمام رنج مستقل رہیں گے کیا؟
تو کیا تمہاری خامشی کا کوئی حل نہیں رہا؟
کڑی مسافتوں نے کس کے پاؤں شل نہیں کیے؟
کوئی دکھاؤ جو بچھڑ کے ہاتھ مل نہیں رہا
تو کیا اک ہمارے لیے ہی محبت نیا تجربہ ہے
جسے پوچھیے وہ کہے گا کہ جی ہاں بڑا تجربہ ہے
سمجھ میں نہ آئے تو میری خموشی کو دل پر نہ لینا
کہ یہ عقل والوں کی دانست سے ماورا تجربہ ہے
کٹھن تو بہت ہے مگر دل کے رشتوں کو آزاد چھوڑو
توقع نہ باندھو کہ یہ اک اذیت بھرا تجربہ ہے
مگر ہم مصر تھے کہ ہم نے کتابیں بہت پڑھ رکھی ہیں
بڑوں نے کہا بھی کہ دیکھو میاں تجربہ تجربہ ہے
وہ اپنی جگہ خوش گماں تھی کہ دائم ہے پہلی محبت
میں اپنے تئیں مطمئن تھا کہ یہ دوسرا تجربہ ہے
کسی اور کے تجربے سے کوئی فائدہ کیا اٹھائیں
محبت میں ہر تجربہ ہی الگ طرح کا تجربہ ہے
مولا کسی کو ایسا مقدر نہ دیجیو
دلبر نہیں تو پھر کوئی دیگر نہ دیجیو
اپنے سوال سہل نہ لگنے لگیں اسے
آتے بھی ہوں جواب تو فر فر نہ دیجیو
چادر وہ دیجیو اسے جس پر شکن نہ آئے
جس پر شکن نہ آئے وہ بستر نہ دیجیو
آئے نہ کار شکر گزاری پہ کوئی حرف
جب دیجیو تو ظرف سے بڑھ کر نہ دیجیو
بکھراؤ کچھ نہیں بھی سمٹتے مرے عزیز
اپنے کسی خیال کو پیکر نہ دیجیو
تفریق رہنے دیجیو تعریف و طنز میں
اب کے شراب زہر ملا کر نہ دیجیو
یا دل سے ترک کیجیو دستار کا خیال
یا اس معاملے میں کبھی سر نہ دیجیو
کہیو کہ تو نے خوب بنائی ہے کائنات
لیکن اسے لکھائی کے نمبر نہ دیجیو
معیار سے سوا یہاں رفتار چاہیے
جوادؔ اس کو آخری اوور نہ دیجیو
ادھر یہ حال کہ چھونے کا اختیار نہیں
ادھر وہ حسن کہ آنکھوں پہ اعتبار نہیں
میں اب کسی کی بھی امید توڑ سکتا ہوں
مجھے کسی پہ بھی اب کوئی اعتبار نہیں
تم اپنی حالت غربت کا غم مناتے ہو
خدا کا شکر کرو مجھ سے بے دیار نہیں
میں سوچتا ہوں کہ وہ بھی دکھی نہ ہو جائے
یہ داستان کوئی ایسی خوش گوار نہیں
تو کیا یقین دلانے سے مان جاؤ گے؟
یقیں دلاؤں کہ یہ ہجر دل پہ بار نہیں
قدم قدم پہ نئی ٹھوکریں ہیں راہوں میں
دیار عشق میں کوئی بھی کامگار نہیں
یہی سکون مری بے کلی نہ بن جائے
کہ زندگی میں کوئی وجہ انتظار نہیں
خدا کے بارے میں اک دن ضرور سوچیں گے
ابھی تو خود سے تعلق بھی استوار نہیں
گلہ تو مجھ سے وہ کرتا ہے اس طرح جوادؔ
کہ جیسے میں تو جدائی میں سوگوار نہیں
نہ سہی عیش، گزارا ہی سہی
یعنی گر تو نہیں دنیا ہی سہی
چھوڑیئے کچھ تو مرا بھی مجھ میں
خون کا آخری قطرہ ہی سہی
غور تو کیجے مری باتوں پر
عمر میں آپ سے چھوٹا ہی سہی
رنج ہم نے بھی جدا پائے ہیں
آپ یکتا ہیں تو یکتا ہی سہی
میں برا ہوں تو ہوں اب کیا کیجے
کوئی اچھا ہے تو اچھا ہی سہی
کس کو سینے سے لگاؤں ترے بعد
جاتے جاتے کوئی دھوکہ ہی سہی
کر کچھ ایسا کہ تجھے یاد رکھوں
بھول جانے کا تقاضا ہی سہی
تم پہ کب روک تھی چلتے جاتے
میری سوچوں پہ تو پہرہ ہی سہی
وہ کسی طور نہ ہوگا میرا
چلو ایسا ہے تو ایسا ہی سہی
سرخ کرنے لگی ہر شے جوادؔ
یاد کا رنگ سنہرا ہی سہی
مرے حواس پہ حاوی رہی کوئی کوئی بات
کہ زندگی سے سوا خاص تھی کوئی کوئی بات
یہ اور بات کہ محسوس تک نہ ہونے دوں
جکڑ سی لیتی ہے دل کو تری کوئی کوئی بات
کوئی بھی تجھ سا مجھے ہو بہ ہو کہیں نہ ملا
کسی کسی میں اگرچہ ملی کوئی کوئی بات
خوشی ہوئی کہ ملاقات رائیگاں نہ گئی
اسے بھی میری طرح یاد تھی کوئی کوئی بات
بدن میں زہر کے مانند پھیل جاتی ہے
دلوں میں خوف سے سہمی ہوئی کوئی کوئی بات
کبھی سمجھ نہیں پائے کہ اس میں کیا ہے مگر
چلی تو ایسے کہ بس چل پڑی کوئی کوئی بات
وضاحتوں میں الجھ کر یہی کھلا جوادؔ
ضروری ہے کہ رہے ان کہی کوئی کوئی بات
عشق نے جب بھی کسی دل پہ حکومت کی ہے
تو اسے درد کی معراج عنایت کی ہے
اپنی تائید پہ خود عقل بھی حیران ہوئی
دل نے ایسے مرے خوابوں کی حمایت کی ہے
شہر احساس تری یاد سے روشن کر کے
میں نے ہر گھر میں ترے ذکر کی جرأت کی ہے
مجھ کو لگتا ہے کہ انسان ادھورا ہے ابھی
تو نے دنیا میں اسے بھیج کے عجلت کی ہے
شہر کے تیرہ تریں گھر سے وہ خورشید ملا
جس کی تنویر میں تاثیر قیامت کی ہے
سوچتا ہوں کہ میں ایسے میں کدھر کو جاؤں
تیرا ملنا بھی کٹھن، یاد بھی شدت کی ہے
اس طرح اوندھے پڑے ہیں یہ شکستہ جذبے
جیسے اک وہم نے ان سب کی امامت کی ہے
یہ جو بکھری ہوئی لاشیں ہیں ورق پر جوادؔ
یہ مرے ضبط سے لفظوں نے بغاوت کی ہے
سب کو بچاؤ خود بھی بچو فاصلہ رکھو
اب اور کچھ کرو نہ کرو فاصلہ رکھو
خطرہ تو مفت میں بھی نہیں لینا چاہیے
گھر سے نکل کے مول نہ لو فاصلہ رکھو
فی الحال اس سے بچنے کا ہے ایک راستہ
وہ یہ کہ اس سے بچ کے رہو فاصلہ رکھو
دشمن ہے اور طرح کا جنگ اور طرح کی
آگے بڑھو نہ پیچھے ہٹو فاصلہ رکھو
حل بھی تلاش کر لیا جائے گا عن قریب
تم اس وبا کو بڑھنے نہ دو فاصلہ رکھو
رکھنے کی بس یہ تین ہی چیزیں ہیں ان دنوں
ہمت رکھو یقین رکھو فاصلہ رکھو
کرتے ہو جس طرح برے لوگوں سے اجتناب
اچھوں سے بھی گریز کرو فاصلہ رکھو
ہزار صحرا تھے رستے میں یار کیا کرتا
جو چل پڑا تھا تو فکر غبار کیا کرتا
کبھی جو ٹھیک سے خود کو سمجھ نہیں پایا
وہ دوسروں پہ بھلا اعتبار کیا کرتا
چلو یہ مانا کہ اظہار بھی ضروری ہے
سو ایک بار کیا، بار بار کیا کرتا
اسی لیے تو در آئنہ بھی وا نہ کیا
جو سو رہے ہیں انہیں ہوشیار کیا کرتا
وہ اپنے خواب کی تفسیر خود نہ کر پایا
جہان بھر پہ اسے آشکار کیا کرتا
اگر وہ کرنے پہ آتا تو کچھ بھی کر جاتا
یہ سوچ مت کہ اکیلا شرار کیا کرتا
سوائے یہ کہ وہ اپنے بھی زخم تازہ کرے
مرے غموں پہ مرا غم گسار کیا کرتا
بس ایک پھول کی خاطر بہار مانگی تھی
رتوں سے ورنہ میں قول و قرار کیا کرتا
مرا لہو ہی کہانی کا رنگ تھا جوادؔ
کہانی کار اسے رنگ دار کیا کرتا
جو بھی جینے کے سلسلے کیے تھے
ہم نے بس آپ کے لیے کیے تھے
تب کہیں جا کے اپنی مرضی کی
پہلے اپنوں سے مشورے کیے تھے
کبھی اس کی نگہ میسر تھی
کیسے کیسے مشاہدے کیے تھے
عقل کچھ اور کر کے بیٹھ رہی
عشق نے اور فیصلے کیے تھے
بات ہم نے سنی ہوئی سنی تھی
کام اس نے کیے ہوئے کیے تھے
اسے بھی ایک خط لکھا گیا تھا
اپنے آگے بھی آئنے کیے تھے
یہاں کچھ بھی نہیں ہے میرے لیے
تو نے کیا کیا مبالغے کیے تھے
اول آنے کا شوق تھا لیکن
کام سارے ہی دوسرے کیے تھے
بڑی مشکل تھی وہ گھڑی جوادؔ
ہم نے کب ایسے فیصلے کیے تھے
داد تو بعد میں کمائیں گے
پہلے ہم سوچنا سکھائیں گے
میں کہیں جا نہیں رہا لیکن
آپ کیا میرے ساتھ آئیں گے
کوئی کھڑکی کھلے گی رات گئے
کئی اپنی مراد پائیں گے
کھل کے رونے پہ اختیار نہیں
ہم کوئی جشن کیا منائیں گے
ہنسیں گے تیری بد حواسی پر
لوگ رستہ نہیں بتائیں گے
تم اٹھاؤ گے کوئی رنج مرا
دوست احباب حظ اٹھائیں گے
ہمیں اپنی تلاش میں مت بھیج
کھڑی فصلیں اجاڑ آئیں گے
درگزر جتنا کیا ہے وہی کافی ہے مجھے
اب تجھے قتل بھی کر دوں تو معافی ہے مجھے
مسئلہ ایسے کوئی حل تو نہ ہوگا شاید
شعر کہنا ہی مرے غم کی تلافی ہے مجھے
دفعتاً اک نئے احساس نے چونکا سا دیا
میں تو سمجھا تھا کہ ہر سانس اضافی ہے مجھے
میں نہ کہتا تھا دوائیں نہیں کام آئیں گی
جانتا تھا تری آواز ہی شافی ہے مجھے
اس سے اندازہ لگاؤ کہ میں کس حال میں ہوں
غیر کا دھیان بھی اب وعدہ خلافی ہے مجھے
وہ کہیں سامنے آ جائے تو کیا ہو جوادؔ
یاد ہی اس کی اگر سینہ شگافی ہے مجھے
غم جہاں سے میں اکتا گیا تو کیا ہوگا
خود اپنی فکر میں گھلنے لگا تو کیا ہوگا
یہ ناگزیر ہے امید کی نمو کے لیے
گزرتا وقت کہیں تھم گیا تو کیا ہوگا
یہی بہت ہے کہ ہم کو سکوں سے جینے دے
کسی کے ہاتھوں ہمارا بھلا تو کیا ہوگا
یہ لوگ میری خموشی پہ مجھ سے نالاں ہیں
کوئی یہ پوچھے میں گویا ہوا تو کیا ہوگا
میں اس لیے بھی بہت مختلف ہوں لوگوں سے
وہ سوچتے ہیں کہ ایسا ہوا تو کیا ہوگا
جنوں کی راہ عجب ہے کہ پاؤں دھرنے کو
زمین تک بھی نہیں نقش پا تو کیا ہوگا
یہ ایک خوف بھی میری خوشی میں شامل ہے
ترا بھی دھیان اگر ہٹ گیا تو کیا ہوگا
جو ہو رہا ہے وہ ہوتا چلا گیا تو پھر؟
جو ہونے کو ہے وہی ہو گیا تو کیا ہوگا
نہیں ایسا بھی کہ یکسر نہیں رہنے والا
دل میں یہ شور برابر نہیں رہنے والا
جس طرح خامشی لفظوں میں ڈھلی جاتی ہے
اس میں تاثیر کا عنصر نہیں رہنے والا
اب یہ کس شکل میں ظاہر ہو، خدا ہی جانے
رنج ایسا ہے کہ اندر نہیں رہنے والا
میں اسے چھوڑنا چاہوں بھی تو کیسے چھوڑوں؟
وہ کسی اور کا ہو کر نہیں رہنے والا
غور سے دیکھ ان آنکھوں میں نظر آتا ہے
وہ سمندر جو سمندر نہیں رہنے والا
جرم وہ کرنے کا سوچا ہے کہ بس اب کی بار
کوئی الزام مرے سر نہیں رہنے والا
میں نے حالانکہ بہت وقت گزارا ہے یہاں
اب میں اس شہر میں پل بھر نہیں رہنے والا
مصلحت لفظ پہ دو حرف نہ بھیجوں؟ جوادؔ
جب مرے ساتھ مقدر نہیں رہنے والا
کرے گا کیا کوئی میرے گلے سڑے آنسو
تو کیوں نہ سوکھ ہی جائیں پڑے پڑے آنسو
جو یاد آئیں تو دل غم سے پھٹنے لگتا ہے
کسی عزیز کی پلکوں میں وہ جڑے آنسو
ہوا میں اپنی تہی دامنی سے شرمندہ
کسی کی آنکھوں میں تھے یہ بڑے بڑے آنسو
خزاں میں پتے بھی ایسے کہاں جھڑے ہوں گے
ہماری آنکھوں سے جوں ہجر میں جھڑے آنسو
میں اس خیال سے جاتے ہوئے اسے نہ ملا
کہ روک لیں نہ کہیں سامنے کھڑے آنسو
کسی نے ایک طرف مر کے بھی گلہ نہ کیا
کسی نے دیکھتے ہی دیکھتے گھڑے آنسو
مہارت ایسی کہ بس دیکھتے ہی رہ جاؤ
نکالتا ہے کوئی یوں کھڑے کھڑے آنسو
تمہیں کہا نا کہ بس ہو گئے جدا ہم لوگ
اکھاڑتے ہو میاں کس لیے گڑے آنسو
مگر جو ضبط نے طوفاں کھڑے کیے اب کے!!
تمام عمر بہایا کیے بڑے آنسو
عجب گداز طبیعت ہے آپ کی جوادؔ
ذرا سی بات ہوئی اور چھلک پڑے آنسو
کہاں ہٹتا ہے نگاہوں سے ہٹائے ہائے
وہی منظر کہ جسے دیکھ نہ پائے ہائے
کیا پتہ ساری تمنائیں دھواں ہو گئی ہوں
کچھ نکلتا ہی نہیں دل سے سوائے ہائے
یاد آتی ہوئی اک شکل پہ اللہ اللہ
دل میں اٹھتی ہوئی ہر ٹیس پہ ہائے ہائے
اس گلی جا کے بھی سجدہ نہ تمہیں یاد رہا
صرف نظریں ہی جھکائے چلے آئے ہائے
ساری مشکل ہی نہاں ہے مری آسانی میں
کون یہ خستہ سی دیوار گرائے ہائے
روز اک تازہ چلم بھر کے مجھے دے فرہاد
اور پھر قیس مرے پاؤں دبائے ہائے
دل کے بے کار دھڑکنے پہ کہاں خوش تھے میاں
ہم تو پھولے نہ سمائے بہ صدائے ہائے
جب وہ جائے تو مجھے کچھ بھی نہ بھائے جوادؔ
اور جب آئے تو کچھ آئے نہ جائے ہائے
اس نے کوئی تو دم پڑھا ہوا ہے
جس نے دیکھا وہ مبتلا ہوا ہے
اب ترے راستے سے بچ نکلوں
اک یہی راستہ بچا ہوا ہے
آؤ تقریب رو نمائی کریں
پاؤں میں ایک آبلہ ہوا ہے
پھر وہی بحث چھیڑ دیتے ہو
اتنی مشکل سے رابطہ ہوا ہے
رات کی واردات مت پوچھو
واقعی ایک واقعہ ہوا ہے
لگ رہا ہے یہ نرم لہجے سے
پھر تجھے کوئی مسئلہ ہوا ہے
میں کہاں اور وہ فصیل کہاں
فاصلے کا ہی فیصلہ ہوا ہے
اتنا مصروف ہو گیا ہوں کہ بس
میرؔ بھی اک طرف پڑا ہوا ہے
آج کچھ بھی نہیں ہوا جوادؔ
ہاں مگر ایک سانحہ ہوا ہے
نہیں کہ پند و نصیحت کا قحط پڑ گیا ہے
ہماری بات میں برکت کا قحط پڑ گیا ہے
تو پھر یہ رد مناجات کی نحوست کیوں
کبھی سنا کہ عبادت کا قحط پڑ گیا ہے؟
ملال یہ ہے کہ اس پر کوئی ملول نہیں
ہمارے شہر میں حیرت کا قحط پڑ گیا ہے
سخن کا کھوکھلا ہونا سمجھ سے باہر تھا
کھلا کہ حرف کی حرمت کا قحط پڑ گیا ہے
کہیں کہیں نظر آئے تو آئے مصرعۂ تر
نہیں تو شعر میں لذت کا قحط پڑ گیا ہے
نصیب دل کو بھلا کب رہی فراوانی
اور اب تو ویسے بھی مدت کا قحط پڑ گیا ہے
مگر اب ایسی بھی کوئی اندھیر نگری نہیں
یہ ٹھیک ہے کہ محبت کا قحط پڑ گیا ہے
نہیں میں صرف بظاہر نہیں ہوا ویران
درون ذات بھی شدت کا قحط پڑ گیا ہے
کہاں گئیں مرے گاؤں کی رونقیں جوادؔ
تو کیا یہاں بھی روایت کا قحط پڑ گیا ہے
ہم تمہیں دوسرے لوگوں سے تو اچھے پڑتے
اک تو معیار بھی تھا دوسرا سستے پڑتے
عشق کو سہل تو ہم بھی نہیں کہتے لیکن
ہو ہی جاتا اگر اس کام کے پیچھے پڑتے
وہ بھی کچھ خاص توجہ سے کہاں سنتا ہے
ہم بھی ہر بات بتاتے نہیں پورے پڑتے
کچھ تو ہے جو اسے ویران کیے رکھتا ہے
ورنہ ایسے ہی کسی کو نہیں حلقے پڑتے
ہاں مگر اب تری تصویر سے وہ ربط نہیں
اک نظر دیکھ تو لیتا ہوں نکلتے پڑتے
خواب میں بھی میں پہنچتا نہیں پر دیکھتا ہوں
خود کو اپنی طرف آتا ہوا گرتے پڑتے
تو کیا یہ آخری خواہش ہے اچھا بھول جاؤں
جہاں بھی جو بھی ہے تیرے علاوہ بھول جاؤں
تو کیا یہ دوسرا ہی عشق اصلی عشق سمجھوں
تو پہلا تجربے کی ذیل میں تھا بھول جاؤں
تو کیا اتنا ہی آساں ہے کسی کو بھول جانا
کہ بس باتوں ہی باتوں میں بھلاتا بھول جاؤں
کبھی کہتا ہوں اس کو یاد رکھنا ٹھیک ہوگا
مگر پھر سوچتا ہوں فائدہ کیا بھول جاؤں
تو کیا یہ دسترس اک روز حاصل ہوگی مجھ کو
کہ ہر پل دھیان میں رکھوں اسے یا بھول جاؤں
یہ کوئی قتل تھوڑی ہے کہ بات آئی گئی ہو
میں اور اپنا نظر انداز ہونا بھول جاؤں
ہیں اتنی جزئیات اس سانحے کی پوچھیے مت
میں کیا کیا یاد رکھوں اور کیا کیا بھول جاؤں
کوئی کب تک کسی کی بے وفائی یاد رکھے
بہت ممکن ہے میں بھی رفتہ رفتہ بھول جاؤں
تو کیا یہ کہہ کے خود کو مطمئن کر لو گے جواد
کہ وہ ہے بھی اسی لائق لہٰذا بھول جاؤں
ہاتھ میں کیا نہیں کہ تم سے کہیں
ہم کو زیبا نہیں کہ تم سے کہیں
دل کسی وجہ سے دکھی ہے مگر
کچھ بھی ایسا نہیں کہ تم سے کہیں
ذہن الجھا ہوا ہے کچھ دن سے
لیکن اتنا نہیں کہ تم سے کہیں
ورنہ اب تک نہ کہہ چکے ہوتے
کبھی چاہا نہیں کہ تم سے کہیں
خامشی اشک روگ مرگ فرار
ایک رستہ نہیں کہ تم سے کہیں
تم کو آتا نہیں کہ ہم سے کہو
ہم سے ہوتا نہیں کہ تم سے کہیں
کہے دیتے ہیں دل کی بات چلو
خیر بنتا نہیں کہ تم سے کہیں
یوںہی اک کیفیت سی ہے جوادؔ
کوئی قصہ نہیں کہ تم سے کہیں
ذرا سی بات پہ نم دیدہ ہوا کرتے تھے
ہم بھی کیا سادہ و پیچیدہ ہوا کرتے تھے
عکس بندی کی ہوس ان میں کہاں سے آئی
مہرباں ہاتھ تو نادیدہ ہوا کرتے تھے
اب ہمیں دیکھ کے لگتا تو نہیں ہے لیکن
ہم کبھی اس کے پسندیدہ ہوا کرتے تھے
تو نے کس موج میں یہ حال کیا ہے اپنا
لوگ کیا کیا ترے گرویدہ ہوا کرتے تھے
تجھ سے پہلے بھی مرے راز تھے اک شخص کے پاس
فرق اتنا ہے کہ پوشیدہ ہوا کرتے تھے
صاحب الرائے کہاں اتنے بہم تھے پہلے
یہ چنیدہ تو بہت چیدہ ہوا کرتے تھے
ان دنوں اتنے وسائل نہیں ہوتے تھے مگر
پھر بھی کچھ لوگ جہاں دیدہ ہوا کرتے تھے
مرا خزانہ زمانے کے ہاتھ جا نہ لگے
تجھے کسی کی کسی کو تری ہوا نہ لگے
میں ایک جسم کو چکھنا تو چاہتا ہوں مگر
کچھ اس طرح کہ مرے منہ کو ذائقہ نہ لگے
ہمیں لگا سو لگا خود اذیتی کا نشہ
دعا کرو کہ تمہیں کوئی بد دعا نہ لگے
دعا کرو کہ کسی کا نہ دل لگے تم سے
لگے تو اور کسی سے لگا ہوا نہ لگے
حسد کیا ہو ترے رزق سے کبھی میں نے
تو مجھ کو اپنی کمائی ہوئی غذا نہ لگے
ہمیں ہی عشق کی تشہیر چاہیے ورنہ
پتہ نہ لگنے دیا جائے تو پتہ نہ لگے
پڑا رہا میں کسی اور ہی بکھیڑے میں
بہت سے قیمتی جذبے کسی دشا نہ لگے
بنا رہا ہوں تصور میں ایک مدت سے
اک ایسا شہر جسے کوئی راستہ نہ لگے
ہمیں ہی عشق کی تشہیر چاہیے ورنہ
پتہ نہ لگنے دیا جائے تو پتہ نہ لگے
کسے خوشی نہیں ہوتی سراہے جانے کی
مگر وہ دوست ہی کیا ہے جو آئنہ نہ لگے
اک محبت کے حوالے سے مجھے جانتے ہیں
وہ سبھی لوگ جو اچھے سے مجھے جانتے ہیں
عام لوگوں میں اداسی ہے تعارف میرا
اور شاعر مرے لہجے سے مجھے جانتے ہیں
سونے والوں سے بھی نسبت کوئی ہوگی میری
جاگنے والے تو گریے سے مجھے جانتے ہیں
سب نے رکھی ہوئی ہے کوئی نشانی میری
جیسے کچھ آنکھ کے حلقے سے مجھے جانتے ہیں
میں کسی اور تعلق سے انہیں دیکھتا ہوں
وہ کسی اور علاقے سے مجھے جانتے ہیں
سچ تو یہ ہے کہ مجھے لوگ نہیں جان سکے
خاص کر جو بڑے دعوے سے مجھے جانتے ہیں
کسی کی بات بہت سننے والی ہوتی ہے
ہماری خامشی ہوتی ہے دیکھنے والی
کوئی گناہ نہیں میری راہ میں حائل
کوئی نگاہ نہیں مجھ کو ٹوکنے والی
میں ایسی عمر سے دکھ جھیلنے لگا جوادؔ
جو عام طور پہ ہوتی ہے کھیلنے والی
نہیں ہے منحصر اس بات پر یاری ہماری
کہ تو کرتا رہے ناحق طرف داری ہماری
اندھیرے میں ہمیں رکھنا تو خاموشی سے رکھنا
کہیں بیدار ہو جائے نہ بیداری ہماری
مگر اچھا تو یہ ہوتا کہ ہم اک ساتھ رہتے
بھری رہتی ترے کپڑوں سے الماری ہماری
ہم آسانی سے کھل جائیں مگر اک مسئلہ ہے
تمہاری سطح سے اوپر ہے تہہ داری ہماری
ہمیں جیتے چلے جانے پہ مائل کرنے والی
یہاں کوئی نہیں لیکن سخن کاری ہماری
کہانی کار نے کردار ہی ایسا دیا ہے
اداکاری نہیں لگتی اداکاری ہماری
اونچی آواز میں گانے کے لیے ہوتا ہے
شور اندر کا دبانے کے لیے ہوتا ہے
مسکرانے سے کوئی خاص علاقہ نہ سہی
بحث سے جان چھڑانے کے لیے ہوتا ہے
دور جانے کا کہو گے تو قریب آئے گا
روٹھنا اس کو منانے کے لئے ہوتا ہے
تم اسے میری شکایت نہ سمجھنا لیکن
یہ رویہ تو زمانے کے لئے ہوتا ہے
یہ مرا دوسرے لوگوں سے تمہیں ملوانا
اور بھی اپنا بنانے کے لئے ہوتا ہے
دوسرا دوست بھی ہوتا ہے ضروری جوادؔ
ایک تو راہ پہ لانے کے لئے ہوتا ہے
جانے کس سمت سے آتی ہے اچانک تری یاد
اور پھر کچھ بھی سمٹنے میں نہیں آتا ہے
خود کو مصروف کیے رکھنے کی کوشش کرنا
کیا تری یاد کے زمرے میں نہیں آتا ہے
ٹھیک سے کہہ نہیں سکتا کہ وہ کیا ہے لیکن
کچھ تو ایسا ہے جو ہونے میں نہیں آتا ہے
تم اگر سیکھنا چاہو مجھے بتلا دینا
عام سا فن تو کوئی ہے نہیں تحفہ دینا
ایک ہی شخص ہے جس کو یہ ہنر آتا ہے
روٹھ جانے پہ فضا اور بھی مہکا دینا
بھانپ لینا کہ بہت وقت نہیں اس کے پاس
اور پھر اس کو کسی بحث میں الجھا دینا
حسن دنیا میں اسی کام کو بھیجا گیا ہے
کہ جہاں آگ لگی ہو اسے بھڑکا دینا
ان بزرگوں کا یہی کام ہوا کرتا تھا
جہاں خوبی نظر آئی اسے چمکا دینا
دل بتاتا ہے مجھے عقل کی باتیں کیا کیا
بندہ پوچھے کہ ترا ہے کوئی لینا دینا
اور کچھ یاد نہ رہتا تھا لڑائی میں اسے
ہاں مگر میرے گزشتہ کا حوالہ دینا
اس کی فطرت میں نہ تھا ترک تعلق لیکن
دوسرے شخص کو اس نہج پہ پہنچا دینا
جانتا تھا کہ بہت خاک اڑائے گا مری
کوئی آسان نہیں تھا اسے رستہ دینا
یہ وہ منصب ہیں جو اپنوں کو دئے جاتے ہیں
یاد کیا رکھنا اسے اور بھلا کیا دینا
کیا پتہ خود سے چھڑی جنگ کہاں لے جائے
جب بھی یاد آؤں مری جان کا صدقہ دینا
دل کا سامان کوئی خاک خریدے اس سے
یاد ہی جس کو نہ رہتا ہو بقایا دینا
بات کرنے سے گریزاں نظر آتے ہیں مگر
ختم ہے حضرت جوادؔ پہ لقمہ دینا
دل کو مآل عشق سے بیگانہ کیجیے
پروانہ کہہ رہا ہے کہ پروا نہ کیجیے
ہر خواب ناگزیر ہے ہر کام فرض ہے
کس کس سے ہاتھ کھینچیے کیا کیا نہ کیجیے
وہ بات جو ابھی ابھی میں نے نہیں سنی
وہ بات ہو سکے تو دوبارہ نہ کیجیے
مخلص ہیں اور وہ بھی مجھ ایسے حقیر سے
اپنے ہی ساتھ آپ یہ دھوکہ نہ کیجیے
کیا سچ میں آپ جی نہیں سکتے مرے بغیر
تو پھر کوئی جواز مہیا نہ کیجیے
اتنی بھی میری درگزری مستقل نہیں
کتنی دفعہ کہا ہے کہ ایسا نہ کیجیے
ہاں شکر تو ضرور بجا لائیے حضور
لیکن ہمارے ضبط پہ تکیہ نہ کیجیے
اچھا ہے انفراد بھی اپنی جگہ مگر
جوادؔ کوئی کام تو الٹا نہ کیجیے
ایسا مت کہہ کہ یہاں تو غلطی سے آیا
دل وہ حجرہ ہے جہاں غم بھی خوشی سے آیا
خامشی آئی دریدہ دہنی سے تیری
دیکھنا مجھ کو تری کم نظری سے آیا
فتح مندی کا جو اک رنگ ہے اس چہرے پر
سرخ روئی سے نہیں دل شکنی سے آیا
ورنہ راہیں تو مری سمت کئی آتی تھیں
اس کو عجلت تھی سو بے راہروی سے آیا
اب کوئی روک رہا ہو تو میں رک جاتا ہوں
مجھ میں یہ وصف غریب الوطنی سے آیا
موت کا خوف بڑا خوف ہے لیکن جوادؔ
جو مجھے اس کی توجہ میں کمی سے آیا
بس اک نگاہ میں قصہ تمام ہوتا ہے
تو کیا یہ واقعی اتنا سا کام ہوتا ہے
کسی کے سرد رویے پہ خامشی کا لحاف
یہ انتقام بھی کیا انتقام ہوتا ہے
کبھی کبھی کوئی لقمہ کہیں کہیں کوئی کام
حلال ہوتے ہوئے بھی حرام ہوتا ہے
فراق یار سے کیا کیا امید تھی لیکن
یہ رنج بھی کوئی دو چار گام ہوتا ہے
اسیر اسیر ہی ہوتا ہے قید کوئی بھی ہو
کسی بھی شکل میں ہو دام دام ہوتا ہے
شعور جس میں نہ ہو اس میں شاعری کیا ہو
جو خوش بدن ہو وہی خوش خرام ہوتا ہے
وہ شخص یوں تو کسی کام کا نہیں لیکن
سنا ہے اس کے یہاں انتظام ہوتا ہے
کبھی کبھی بڑی مشکل میں ڈال دیتے ہیں
وہ جن کا دل میں بہت احترام ہوتا ہے
کھڑا ہوں کتنے ہی رشتوں کو تھام کر جوادؔ
اور ایسے میں جو مرا انہدام ہوتا ہے
وہ مرے ساتھ نہ چل پائے گا
اس کے چلنے سے پتہ چلتا ہے
ایسے چلتا ہے ترے ہجر میں وقت
جیسے اک آبلہ پا چلتا ہے
تیرے سکے ہی میں ہوگا کوئی کھوٹ
بھائی اپنا تو بڑا چلتا ہے
ہجر کی راہ کسی کے لیے آسان نہیں
منع کرتا ہوں تو ہو جایا کرو جان نہیں
اب میں چپ چاپ یہی دیکھ رہا ہوتا ہوں
کون اس بزم میں کس بات پہ حیران نہیں
اس کو چھوڑا ہے بہت سوچ سمجھ کر میں نے
سو پریشان تو رہتا ہوں پشیمان نہیں
شاید اچھا ہی کیا ان سنی کر کے اس نے
بات سادہ تو بہت تھی مگر آسان نہیں
کام تو اور بھی کرنے کو بہت ہیں لیکن
شعر گوئی کے علاوہ مرے شایان نہیں
آخری دن ہیں مہینے کے تجھے کیا معلوم
تو سمجھتا ہے کہ اک تیری طرف دھیان نہیں
ہم یہاں اور ہی کچھ سوچ کے آئے تھے مگر
اس خرابے میں ضرورت کا بھی سامان نہیں
شے تو اچھی ہے میانہ روی لیکن جوادؔ
اس میں کیا نفع ہے جس میں کوئی نقصان نہیں
سنبھل نہیں گئی حضرت درست ہو گئی ہے
بگڑ کے اور بھی حالت درست ہو گئی ہے
عجیب بات سنی ہے خدا معاف کرے
کہ آنجناب کی صحبت درست ہو گئی ہے
خراب شے ہوا کرتی تھی کوئی دن پہلے
تجھے ملی ہے تو شہرت درست ہو گئی ہے
نجانے کون مخاطب ہے ان دنوں مجھ سے
کوئی بھی ہو مری لکنت درست ہو گئی ہے
غلط تو خیر محبت میں اور کیا ہوتا
مگر یہ ہے کہ طبیعت درست ہو گئی ہے
ابھی گیا ہے مجھے کوستے ہوئے کوئی
کہ اس تئیں مری نیت درست ہو گئی ہے
کھلا کہ اس سے بچھڑنے کی دیر تھی جوادؔ
مری اک اور بھی عادت درست ہو گئی ہے
سنبھل نہیں گئی حضرت درست ہو گئی ہے
بگڑ کے اور بھی حالت درست ہو گئی ہے
عجیب بات سنی ہے خدا معاف کرے
کہ آنجناب کی صحبت درست ہو گئی ہے
خراب شے ہوا کرتی تھی کوئی دن پہلے
تجھے ملی ہے تو شہرت درست ہو گئی ہے
نجانے کون مخاطب ہے ان دنوں مجھ سے
کوئی بھی ہو مری لکنت درست ہو گئی ہے
غلط تو خیر محبت میں اور کیا ہوتا
مگر یہ ہے کہ طبیعت درست ہو گئی ہے
ابھی گیا ہے مجھے کوستے ہوئے کوئی
کہ اس تئیں مری نیت درست ہو گئی ہے
کھلا کہ اس سے بچھڑنے کی دیر تھی جوادؔ
مری اک اور بھی عادت درست ہو گئی ہے
ہوتا ہے مٹنے ہی کے لیے ہر لگا ہوا
لیکن وہ ایک داغ نہ لگ کر لگا ہوا
دل بیٹھ بیٹھ جاتا ہے آئینہ دیکھ کر
جانے یہ کیسا روگ ہے بھیتر لگا ہوا
ایسے ہی بات بات پہ روتا نہیں ہوں میں
اک زخم ہے کہیں مرے اندر لگا ہوا
اندر بچھا ہوا ہے کوئی جال اور ہی
دام اور ہے دکان کے باہر لگا ہوا
ڈرتا بھی ہوں کہ ہو ہی نہ جائے کہیں وہ کام
اک عمر سے ہوں جس میں برابر لگا ہوا
ہوتا نہیں جوان لڑکپن کے بعد بھی
لگتا نہیں غریب کا نمبر لگا ہوا
وہ اتفاق سے مرا محبوب ہے تو کیا
جچتا ہے ایک شخص ہی افسر لگا ہوا
جوادؔ زندگی کی طرح تھی کوئی سڑک
دونوں طرف قطار میں کیکر لگا ہوا
یہ غم تو ہے سو ہے کہ غریب الدیار ہوں
لیکن جہاں جہاں ہوں میں دیوانہ وار ہوں
اس کے سوا بہ وقت دعا کچھ نہ کہہ سکا
میں بھی تو آخر اے مرے پروردگار ہوں
تیری عطا ہے آرزوئے روزگار غم
میری خطا ہے صید غم روزگار ہوں
اس کی تلاش ہے تو مجھے دیکھ لیجیے
میں اس کی آزمائشوں کا اشتہار ہوں
زنجیر ہوں تو الجھی ہوئی اپنے آپ سے
میں تیر ہوں تو اپنے ہی سینے کے پار ہوں
میں خار تھا تو اپنے ہی اندر گڑا ہوا
آزار تھا تو آج تلک برقرار ہوں
خاموشی تھی تو اب بھی وہی ہے مرا مزاج
غم کوشی تھی تو اب بھی اسی کا شکار ہوں
غم کے لیے کچھ اور خوشی کے لیے کچھ اور
جائے پناہ ہوں کہیں راہ فرار ہوں
یعنی عروج ہی میں نہاں ہے مرا زوال
پہلے میں دل گداز تھا اب دل فگار ہوں
تو کون ہے تو وجہ ہے میرے وجود کی
میں کون ہوں میں آرزؤں کا مزار ہوں
قائم رہیں وہ جن کی بدولت ہے یہ مدار
دائم رہیں وہ جن کا میں دار و مدار ہوں
مزید شاعری پڑھیے اور دوسرے شعراء کو دریافت کیجیے۔