شاعر کی معلومات لوڈ ہو رہی ہیں...
بہت دنوں سے مجھے تیرا انتظار ہے آ جا
اور اب تو خاص وہی موسم بہار ہے آ جا
شاعر کی معلومات لوڈ ہو رہی ہیں...
Jamiluddin Aali
1925 – 2015
ancestral hometown was Loharu. After the Partition of India, he migrated to Karachi and began working in a central office of the Government of Pakistan. In 1951, he passed the CSS exam and was appointed as an Income Tax Officer. Later, in 1976, he successfully completed his LLB degree. Aali played a key role in the establishment of the Pakistan Writers’ Guild. His first pen name was "Mail". Besides ghazals, he also wrote dohe (couplets) and songs. He served as the Honorary Secretary of Anjuman Taraqqi-e-Urdu Pakistan (The Society for the Promotion of Urdu). Aali received several major literary awards, including: Presidential Award for Excellence in Literature (1989) Kamal-e-Fun Award from the Pakistan Academy of Letters (2006) Notable Works: Ghazals, Dohe, Geet Lahasil (poetry collection) Jeevay Jeevay Pakistan (national songs) Duniya Mere Aagay, Tamasha Mere Aagay (travelogues) Naqqar Khane Mein (collection of newspaper columns) Ae Mere Dasht-e-Sukhan, Ek Goshay-e-Bisaat (poetry collections) Harf-e-Chand (prefaces to books – in three volumes) Insaan (a long narrative poem)
ان کے کلام کے چند منتخب اشعار پڑھیے۔
بہت دنوں سے مجھے تیرا انتظار ہے آ جا
اور اب تو خاص وہی موسم بہار ہے آ جا
کہاں یہ ہوش کہ اسلوب تازہ سے تجھے لکھوں
کہ روح تیرے لیے سخت بے قرار ہے آ جا
گزر چلی ہیں بہت غم کی شورشیں بھی حدوں سے
مگر ابھی تو ترا سب پہ اختیار ہے آ جا
وہ تیری یاد کہ اب تک سکون قلب تپاں تھی
تری قسم ہے کہ اب وہ بھی ناگوار ہے آ جا
غزل کے شکوے غزل کے معاملات جدا ہیں
مری ہی طرح سے تو بھی وفا شعار ہے آ جا
بدل رہا ہو زمانہ مگر جہان تمنا
ترے لیے تو ابد تک بھی سازگار ہے آ جا
ہزار طرح کے افکار دل کو روند رہے ہیں
مقابلے میں ترے رنج روزگار ہے آ جا
تیرے خیال کے دیوار و در بناتے ہیں
ہم اپنے گھر میں بھی تیرا ہی گھر بناتے ہیں
بجائے یوم ملامت رکھا ہے جشن مرا
مرے بھی دوست مجھے کس قدر بناتے ہیں
بکھیرتے رہو صحرا میں بیج الفت کے
کہ بیج ہی تو ابھر کر شجر بناتے ہیں
بس اب حکایت مزدوریٔ وفا نہ بنا
وہ گھر انہیں نہیں ملتے جو گھر بناتے ہیں
ترا بھی نام چھپا وجہ مرگ عاشق میں
یہ دیکھ بے خبرے یوں خبر بناتے ہیں
وہ کیا خدا کی پرستش کریں گے میری طرح
جو ایک بت بھی بہت سوچ کر بناتے ہیں
کہا یہ کس نے کہ ہے قصر عشق رہن شباب
بنانے والے اسے عمر بھر بناتے ہیں
تو آئے تو تری کاری گری کی لاج رہے
ہم آج دشت میں رہ کر بھی گھر بناتے ہیں
ملی نہ فرصت آرائش بیاباں بھی
کہ ہم یہاں بھی ترے بام و در بناتے ہیں
عدو ہواؤ کراچی کے لوگ ہارے نہیں
جو گھر گراؤ وہ بار دگر بناتے ہیں
ابو ظبی میں ہمیشہ نئی غزل عالؔی
یہ لوگ ہی تو تجھے معتبر بناتے ہیں
بے سبب تجھ سے ہر اک بات پہ نالاں ہونا
اپنا پیشہ ہی جو ٹھہرا ہے پریشاں ہونا
اتنی رسوائیاں سہہ لی ہیں تو اک یہ بھی سہی
ہم کو منظور ہے منت کش درباں ہونا
تجھ میں کیا بات ہے جو مجھ میں نہیں ہے ظالم
ہاں مگر تیرے لیے میرا پریشاں ہونا
ہائے اس بزم کے آداب جہاں لازم ہو
کبھی حیراں نظر آنا کبھی حیراں ہونا
عمر بھر کے لیے کافی ہے وہی ایک جھلک
تم کو لازم نہیں ہر شے سے نمایاں ہونا
خامشی میری کہیں اور پشیماں نہ کرے
تم اگر ہو بھی تو خلوت میں پشیماں ہونا
لوگ دیکھیں تو نہ جانے اسے کیا سمجھیں گے
آئنہ دیکھنا تیرا مرا حیراں ہونا
جیسے ساحل سے چھڑا لیتی ہیں موجیں دامن
کتنا سادہ ہے ترا مجھ سے گریزاں ہونا
ہیں تیرے رخ پہ وہ تقدیس کے پرتو کہ تجھے
زیب دیتا ہی نہیں دشمن ایماں ہونا
کیا خبر ان کو کہ ہے کتنا عجیب اے عالیؔ
اک گراں شے کا کسی کے لیے ارزاں ہونا
حقیقتوں کو فسانہ بنا کے بھول گیا
میں تیرے عشق کی ہر چوٹ کھا کے بھول گیا
ذرا یہ دورئ احساس حسن و عشق تو دیکھ
کہ میں تجھے ترے نزدیک آ کے بھول گیا
اب اس سے بڑھ کے بھی وارفتگئ دل کیا ہو
کہ تجھ کو زیست کا حاصل بنا کے بھول گیا
گمان جس پہ رہا منزلوں کا اک مدت
وہ رہ گزار بھی منزل میں آ کے بھول گیا
اب ایسی حیرت و وارفتگی کو کیا کہیے
دعا کو ہاتھ اٹھائے اٹھا کے بھول گیا
دل و جگر ہیں کہ گرمی سے پگھلے جاتے ہیں
کوئی چراغ تمنا جلا کے بھول گیا
آنکھوں میں حیا آ جاتی ہے ہونٹوں پہ تبسم لاتے ہیں
وہ مجھ پہ ستم جب کرتے ہیں تصویر کرم بن جاتے ہیں
اب آپ عنایت کرنے کی تکلیف ہی کیوں فرماتے ہیں
دن یوں بھی گزرنے ہی ٹھہرے دن یوں بھی گزر ہی جاتے ہیں
اللہ رے خس و خاشاک سے یہ ہنس ہنس کے چٹانوں کا کہنا
وہ طوفاں کو کیا سمجھیں گے جو طوفاں میں بہہ جاتے ہیں
اک سمت مسلسل امیدیں اک سمت مسلسل محرومی
کب تک یہ اٹھے بار ہستی شانے ہیں کہ ٹوٹے جاتے ہیں
اب ایسی کرم کی باتوں سے دبتی ہیں کہیں دل کی چوٹیں
تم جتنا مٹاتے جاتے ہو یہ نقش ابھرتے آتے ہیں
اس دور پریشانی میں کبھی وہ وقت بھی آتا ہے عالیؔ
کچھ دل بھی دھوکے کھاتا ہے کچھ وہ بھی کرم فرماتے ہیں
دل آشفتہ پہ الزام کئی یاد آئے
جب ترا ذکر چھڑا نام کئی یاد آئے
تجھ سے چھٹ کر بھی گزرنی تھی سو گزری لیکن
لمحہ لمحہ سحر و شام کئی یاد آئے
ہائے نوعمر ادیبوں کا یہ انداز بیاں
اپنے مکتوب ترے نام کئی یاد آئے
آج تک مل نہ سکا اپنی تباہی کا سراغ
یوں ترے نامہ و پیغام کئی یاد آئے
کچھ نہ تھا یاد بجز کار محبت اک عمر
وہ جو بگڑا ہے تو اب کام کئی یاد آئے
خود جو لب تشنہ تھے جب تک تو کوئی یاد نہ تھا
پیاس بجھتے ہی تہی جام کئی یاد آئے
اب یہ کیفیت دل ہے کہ چھپائے نہ بنے
اور جو وہ پوچھیں کہ کیا ہے تو بتائے نہ بنے
تم کو آزردگیٔ دل کا مزا کیا معلوم
کاش تم سے بھی کوئی کام بنائے نہ بنے
تو نے کیوں ان کو غم زیست دیا ہے یا رب
جن سے اک رنج محبت بھی اٹھائے نہ بنے
ہائے کیا پاس محبت ہے کہ تنہائی میں بھی
اشک آنکھوں میں رہے اور بہائے نہ بنے
ہم نشیں پوچھ نہ اس بزم کی رسمیں کہ جہاں
مجھ سے وحشی کو بھی بن ہوش میں آئے نہ بنے
وقت کی چارہ گری یوں تو مسلم ہے مگر
زخم بھی وہ ہے کہ تا عمر دبائے نہ بنے
یہ بھی اک رسم تماشا ہے وہاں اے عالیؔ
دیکھتے رہیے مگر آنکھ اٹھائے نہ بنے
کب تم بھٹکے کیوں تم بھٹکے کس کس کو سمجھاؤ گے
اتنی دور تو آ پہنچے ہو اور کہاں تک جاؤ گے
اس چالیس برس میں تم نے کتنے دوست بنائے ہیں
اب جو عمر بچی ہے اس میں کتنے دوست بناؤ گے
بچپن کے سب سنگی ساتھی آخر کیوں تمہیں چھوڑ گئے
کوئی یار نیا پوچھے تو اس کو کیا بتلاؤ گے
جو بھی تم نے شہرت پائی جو بھی تم بدنام ہوئے
کیا یہی ترکہ اپنے پیارے بچوں کو دے جاؤ گے
اب اس جوش خود آگاہی میں آگے کی کیا سوچی ہے
شعر کہو گے عشق کرو گے کیا کیا ڈھونگ رچاؤ گے
عالؔی کس کو فرصت ہوگی ایک تمہی کو رونے کی
جیسے سب یاد آ جاتے ہیں تم بھی یاد آ جاؤ گے
بھٹکے ہوئے عالی سے پوچھو گھر واپس کب آئے گا
کب یہ در و دیوار سجیں گے کب یہ چمن لہرائے گا
سوکھ چلے وہ غنچے جن سے کیا کیا پھول ابھرنے تھے
اب بھی نہ ان کی پیاس بجھی تو گھر جنگل ہو جائے گا
کم کرنیں ایسی ہیں جو اب تک راہ اسی کی تکتی ہیں
یہ اندھیارا اور رہا تو پھر نہ اجالا آئے گا
سمجھا ہے اپنے آپ سے چھٹ کر سارا زمانہ دیکھ لیا
دیکھنا! اپنے آپ میں آ کر یہ کیا کیا شرمائے گا
ایسی گیان اور دھیان کی باتیں ہم جانے پہچانوں سے
تو آخر بھولا ہی کیا تھا تجھ کو کیا یاد آئے گا
کچھ چھوٹے چھوٹے دکھ اپنے کچھ دکھ اپنے عزیزوں کے
ان سے ہی جیون بنتا ہے سو جیون بن جائے گا
چار برس سے بیگانے ہیں سو ہم کیا بیگانے ہیں
روٹھنے والا جیون ساتھی دو دن میں من جائے گا
کس کس راگ کے کیا کیا سر ہیں کس کس سر کے کیا کیا راگ
سیکھے نہ سیکھے گانے والا بے سیکھے بھی گائے گا
عالیؔ جی اب آپ چلو تم اپنے بوجھ اٹھائے
ساتھ بھی دے تو آخر پیارے کوئی کہاں تک جائے گا
بیگانۂ قیود بہار و خزاں رہے
یا رب مرا جنون محبت جواں رہے
یہ بھی سمجھ سکی ہے نہ اب تک نگاہ شوق
تم نے کہاں فریب دیا اور کہاں رہے
دنیا میں چاک دل کو نہیں پوچھتا کوئی
کیا جانے کتنے اہل جنوں بے نشاں رہے
اس انجمن میں ہم بھی پہنچ تو گئے مگر
جب تک رہے مزاج نظر پر گراں رہے
کیا کیا جفائیں کی ہیں ہر اک آرزو کے ساتھ
اور اس طرح کہ ان پہ وفا کا گماں رہے
اب یوں کرم نہ کر کہ بہ ایں وصف حسن و ناز
شاید تجھے بھی عشق کا سودا گراں رہے
لینے دے اپنا نام بھی مجھ کو کہ میرے بعد
تو بھی مری غزل کے سبب جاوداں رہے
بیان درد محبت جو بار بار نہ ہو
کوئی نقاب ترے رخ کی پردہ دار نہ ہو
سلام شوق کی جرأت سے دل لرزتا ہے
کہیں مزاج گرامی پہ یہ بھی بار نہ ہو
کرم پہ آئیں تو ہر ہر ادا میں عشق ہی عشق
نہ ہو تو ان کا تغافل بھی آشکار نہ ہو
یہی خیال رہا پتھروں کی بارش میں
کہیں انہیں میں کوئی سنگ کوئے یار نہ ہو
ابھی ہے آس کہ آخر کبھی تو آئے گا
وہ ایک لمحہ کہ جب تیرا انتظار نہ ہو
بہت فریب سمجھتا ہوں پھر بھی اے عالیؔ
میں کیا کروں اگر ان پر بھی اعتبار نہ ہو
جس سورج کی آس لگی ہے شاید وہ بھی آئے
تم یہ کہو خود تم نے اب تک کتنے دیئے جلائے
اپنا کام ہے صرف محبت باقی اس کا کام
جب چاہے وہ روٹھے ہم سے جب چاہے من جائے
کیا کیا روگ لگے ہیں دل کو کیا کیا ان کے بھید
ہم سب کو سمجھانے والے کون ہمیں سمجھائے
ایک اسی امید پہ ہیں سب دشمن دوست قبول
کیا جانے اس سادہ روی میں کون کہاں مل جائے
دنیا والے سب سچے پر جینا ہے اس کو بھی
ایک غریب اکیلا پاپی کس کس سے شرمائے
اتنا بھی مجبور نہ کرنا ورنہ ہم کہہ دیں گے
او عالؔی پر ہنسنے والے تو عالی بن جائے
یہ جو بڑھتی ہوئی جدائی ہے
شاید آغاز بے وفائی ہے
تو نہ بدنام ہو اسی خاطر
ساری دنیا سے آشنائی ہے
کس قدر کش مکش کے بعد کھلا
عشق ہی عشق سے رہائی ہے
شام غم میں تو چاند ہوں اس کا
میرے گھر کیا سمجھ کے آئی ہے
زخم دل بے حجاب ہو کے ابھر
کوئی تقریب رو نمائی ہے
اٹھتا جاتا ہے حوصلوں کا بھرم
اک سہارا شکستہ پائی ہے
جان عالیؔ نہیں پڑی آساں
موت رو رو کے مسکرائی ہے
میری بے حوصلگی اس سے سوا اور سہی
اور چاہو تو محبت کا صلا اور سہی
یوں بھی کچھ کم تو نہ تھے اتنی بہاروں کے ہجوم
ان میں شامل ترے دامن کی ہوا اور سہی
مجھ کو اصرار کہاں ہے کہ محبت جانوں
آج سے معنی انداز و ادا اور سہی
طلب درد میں دل حد سے گزرتا کب تھا
تم نے پوچھا تھا کہ اور اس نے کہا اور سہی
اب تو ہر شہر میں اس کے ہی قصیدے پڑھیے
وہ جو پہلے ہی خفا ہے وہ خفا اور سہی
ہم اسی رحمت و زحمت کے ہیں عادی یا رب
جیسی بھی ہے اسی دنیا کی فضا اور سہی
سبق بے گنہی تشنۂ تکمیل بھی تھا
اک نیا فلسفۂ جرم و سزا اور سہی
آج آپ اپنے محاسن کا بیاں کر لیجے
محفل تذکرۂ اہل وفا اور سہی
کیا ضروری ہے کہ انداز بہاراں رکھے
اب جو کچھ اور ہے رفتار صبا اور سہی
اب بہت شور سہی کل تو کوئی پرکھے گا
ان صداؤں میں فقیروں کی نوا اور سہی
کیوں نہ عالیؔ سے علائی پہ غزل لکھوائے
ایک بیدادگر رنج فزا اور سہی
اگلی گلی میں رہتا ہے اور ملنے تک نہیں آتا ہے
کہتا ہے تکلف کیا کرنا ہم تم میں تو پیار کا ناتا ہے
کہتا ہے زیادہ ملنے سے وعدوں کی خلش بڑھ جائے گی
کچھ وعدے وقت پہ بھی چھوڑو دیکھو وہ کیا دکھلاتا ہے
کہتا ہے تمہارا دوش نہ تھا کچھ ہم کو بھی اپنا ہوش نہ تھا
پھر ہنستا ہے پھر روتا ہے پھر چپ ہو کر رہ جاتا ہے
خود اس سے کہا گھر آنے کو اور اس کے بنا مر جانے کو
اور اب جو وہ کچھ آوارہ ہوا جی رہ رہ کر گھبراتا ہے
اے بچو اے ہنسنے والو تاریخ محبت پڑھ ڈالو
دل والے کے دل پر قید نہیں ہر عمر میں ٹھوکر کھاتا ہے
خدا کہوں گا تمہیں ناخدا کہوں گا تمہیں
پکارنا ہی پڑے گا تو کیا کہوں گا تمہیں
مری پسند مرے نام پر نہ حرف آئے
بہت حسین بہت با وفا کہوں گا تمہیں
ہزار دوست ہیں وجہ ملال پوچھیں گے
سبب تو صرف تمہیں ہو میں کیا کہوں گا تمہیں
ابھی سے ذہن میں رکھنا نزاکتیں میری
کہ ہر نگاہ کرم پر خفا کہوں گا تمہیں
ابھی سے اپنی بھی مجبوریوں کو سوچ رکھو
کہ تم ملو نہ ملو مدعا کہوں گا تمہیں
قسم شرافت فن کی کہ اب غزل میں کبھی
تمہارا نام نہ لوں گا صبا کہوں گا تمہیں
عالؔی جس کا فن سخن میں اک انداز نرالا تھا
نقد سخن میں ذکر یہ آیا دوہے پڑھنے والا تھا
جانے کیوں لوگوں کی نظریں تجھ تک پہنچیں ہم نے تو
برسوں بعد غزل کی رو میں اک مضمون نکالا تھا
کیا وہ گھٹا ترے گھر سے اٹھی کیا وہ تو نے بھیجی تھی
بوندیں روشن روشن تھیں اور بادل کالا کالا تھا
اجنبیوں سے دھوکے کھانا پھر بھی سمجھ میں آتا ہے
اس کے لیے کیا کہتے ہو وہ شخص تو دیکھا بھالا تھا
ہم نہ ملے اور جب بھی ملے تو دونوں نے اقرار کیا
ہاں وہ وعدہ ایسا تھا جو پورا ہونے والا تھا
تپتی دھوپوں میں بھی آ کر اپنی یاد دلاتے ہیں
چاند نگر کے انشاؔ صاحب آلے جن کا ہالا تھا
عمر بھر بہ آسانی بار غم اٹھانے سے
ان پہ اعتبار آیا خود کو آزمانے سے
اس ہجوم میں تجھ کو کیا خبر ہوئی ہوگی
کس کو کیا تعلق تھا تیرے آستانے سے
یوں سلام آنے پر اک خلش سی ہوتی ہے
کاش ہم کو بلواتے وہ کسی بہانے سے
ہاں تو ان کی خاطر سے کیوں تراوشیں کرتے
جس طرح وہاں گزری کہہ گئے زمانے سے
جب بھی بزم عالم میں کوئی فتنہ اٹھتا ہے
یا تمہاری محفل سے یا غریب خانے سے
سلسلہ یہی ہوگا رخ بدلتے جائیں گے
میں تری حقیقت سے تو مرے فسانے سے
نظروں سے بصیرت کی نہاں کچھ بھی نہیں ہے
سب کچھ ہے جہاں اور جہاں کچھ بھی نہیں ہے
ہم مٹ گئے اس فطرت آشفتہ کی خاطر
حالانکہ وہ غارت گر جاں کچھ بھی نہیں ہے
دل کی جو نہ کہیے تو زباں کاشف اسرار
اور دل کی جو کہیے تو زباں کچھ بھی نہیں ہے
دل والوں کو دل والوں سے ہے حرف و حکایت
ظاہر میں محبت کا نشاں کچھ بھی نہیں ہے
رنگین و نظر سوز مناظر سے گزر کر
پہنچا ہوں وہاں میں کہ جہاں کچھ بھی نہیں ہے
یہ عشق کی ظاہر ہو تو ہل جائیں دو عالم
جز چند اشارات نہاں کچھ بھی نہیں ہے
مجھ خوگر بیگانگئ دوست کو عالیؔ
بیگانگئ اہل جہاں کچھ بھی نہیں ہے
کیا کیا دئے فریب ہر اک اعتبار نے
اپنا بنا دیا ہے ترے انتظار نے
کیا جانے کتنے اہل طریقت کو آج تک
گمراہ کر دیا ہے ترے رہ گزار نے
کچھ ان کی جستجو ہے نہ کچھ اپنی گفتگو
یہ کیا بنا دیا ستم روزگار نے
ہاں اے نگاہ گرم نہ کر مختصر حیات
ہم کو ہزار بوجھ ابھی ہیں اتارنے
الجھے ہوئے ہیں گیسوئے جاناں میں آج تک
عالیؔ چلے تھے کاکل گیتی سنوارنے
اب تک مجھے نہ کوئی مرا رازداں ملا
جو بھی ملا اسیر زمان و مکاں ملا
کیا جانے کیا سمجھ کے ہمیشہ کیا گریز
سو بار بجلیوں کو مرا آشیاں ملا
اکتا گیا ہوں جادۂ نو کی تلاش سے
ہر راہ میں کوئی نہ کوئی کارواں ملا
مدت میں ہم نے آپ بنایا تھا اک افق
جاتے تھے اس طرف کہ ترا آستاں ملا
کن حوصلوں کے کتنے دیے بجھ کے رہ گئے
اے سوز عاشقی تو بہت ہی گراں ملا
کیا کچھ لٹا دیا ہے تری ہر ادا کے ساتھ
کیا مل گیا ہمیں جو یہ حسن بیاں ملا
تھا ایک راز دار محبت سے لطف زیست
لیکن وہ راز دار محبت کہاں ملا
اک عمر بعد اسی متلون نگاہ میں
کتنی محبتوں کا خزانہ نہاں ملا
اب جستجو کا رخ جو مڑا ہے تو مت پکار
سب تجھ کو ڈھونڈتے تھے مگر تو کہاں ملا
عمر بھر کا یاد ہے بس ایک افسانہ مجھے
میں نے پہچانا جسے اس نے نہ پہچانا مجھے
انجمن کی انجمن مجھ سے مخاطب ہو گئی
آپ نے دیکھا تھا شاید بے نیازانہ مجھے
پہلے دیوانہ کہا کرتے تھے لیکن آج کل
لوگ کہتے ہیں سراپا تیرا افسانہ مجھے
گاہے گاہے ذکر کر لینے سے کیا یاد آئے گا
یاد ہی رکھنا مجھے یا بھول ہی جانا مجھے
خواب ہی دیکھا ہے لیکن ہائے کس لذت کا خواب
وہ مرے گھر تیرا آنا اور بہلانا مجھے
ایک عجیب راگ ہے ایک عجیب گفتگو
سات سروں کی آگ ہے آٹھویں سر کی جستجو
بجھتے ہوئے مرے خیال جن میں ہزارہا سوال
پھر سے بھڑک کے روح میں پھیل گئے ہیں چار سو
تیرہ شبی پہ صبر تھا سو وہ کسی کو بھا گیا
آپ ہی آپ چھا گیا ایک سحاب رنگ و بو
ہنستی ہوئی گئی ہے صبح پیار سے آ رہی ہے شام
تیری شبیہ بن گئی وقت کی گرد ہو بہو
پھر یہ تمام سلسلہ کیا ہے کدھر کو جائے گا
میری تلاش در بہ در تیرا گریز کو بہ کو
خون جنوں تو جل گیا شوق کدھر نکل گیا
سست ہیں دل کی دھڑکنیں تیز ہے نبض آرزو
تیرا مرا قصور کیا یہ تو ہے جبر ارتقا
بس وہ جو ربط ہو گیا آپ ہی پا گیا نمو
میں جو رہا ہوں بے سخن یہ بھی ہے احترام فن
یعنی مجھے عزیز تھی اپنی غزل کی آبرو
یہ جو مری لے اور لفظوں کے رنگیں تانے بانے ہیں
سننے والوں غور نہ کرنا سارے راگ پرانے ہیں
سننے والو غور نہ کرنا ورنہ کھل ہی جائیں گے
کتنے خالی بھید ہمارے جو کب سے افسانے ہیں
سننے والوں غور نہ کرنا ورنہ پتہ چل جائے گا
ہم نے جتنے باغ سجائے وہ اب تک ویرانے ہیں
سننے والو غور نہ کرنا ورنہ صاف سمجھ لو گے
ہم نے جتنے نام لیے تھے آج بھی سب انجانے ہیں
سننے والو غور نہ کرنا ورنہ خفا ہو جاؤ گے
جن کو ہم نے دوست کہا ہے ہم ان سے بیگانے ہیں
سننے والو غور نہ کرنا ورنہ ہمیں ٹھکرا دو گے
ہم اندر سے سخت کمینے باہر سے دیوانے ہیں
سننے والو غور نہ کرنا ہم بے سر ہو جائیں گے
جب تک تم سر دھنتے رہو گے سارے گیت سہانے ہیں
سننے والو غور نہ کرنا ورنہ ہم خود کہہ دیں گے
ہم اب شعر نہیں کہہ سکتے یہ سب شعر بہانے ہیں
کہیں تو ہوگی ملاقات اے چمن آرا
کہ میں بھی ہوں تری خوشبو کی طرح آوارا
ہزار عیب کمائے ہیں ایک خوبی سے
جو اب ہو میں سو ہوں اپنے مزاج کا مارا
ہوا نہ تیس بہاروں میں ایک بار ہمیں
یہ اشتیاق کہ آئے بہار دوبارا
بغیر مرکز امید و بے سکون دروں
میں اک خلا ہوں جو ثابت بنے نہ سیارا
ہے ایک شہر میں اور مدتوں نہیں ملتا
وہ شخص جس کو رکھا ہم نے جان سے پیارا
تمہیں مجھ میں کیا نظر آ گیا جو مرا یہ روپ بنا گئے
وہ تمام لوگ جو عشق تھے وہ مرے وجود میں آ گئے
نہ ترے سوا کوئی لکھ سکے نہ مرے سوا کوئی پڑھ سکے
یہ حروف بے ورق و سبق ہمیں کیا زبان سکھا گئے
نہ کر آج ہم سے یہ گفتگو مجھے کیوں ہوئی تری جستجو
ارے ہم بھی ایک خیال تھے سو ترے بھی ذہن میں آ گئے
جو سنا کہ گھر ترے جائیں گے ترے صحن و باغ سجائیں گے
مرے اشک اڑ کے ہوا کے ساتھ انہی بادلوں میں سما گئے
دل شب میں صبح کی دھڑکنیں ابھی ابتدائے غزل میں تھیں
کہ وہ آئے اور تمام شعر مری ہی دھن میں سنا گئے
جو نہ آپ اس پہ ہوئے عیاں یہ رکھے گا ہم کو بھی سر گراں
کئی بار لے کے شکایتیں مرے دوست ارض و سما گئے
کئی محفلوں میں تو یوں ہوا کہ جب آئے عالؔیٔ خوش ادا
جو نہ کھل سکے تو چھپے رہے جو نہ رو سکے تو رلا گئے
نہیں کہ ہم نے کبھی حال سوز جاں نہ کہا
مگر بہ حیلۂ آرائش بیاں نہ کہا
کوئی خطا نہ ہوئی جس کی یہ ملے پاداش
مگر یہی کہ زمینوں کو آسماں نہ کہا
جس انجمن سے ہوا قصۂ جنوں آغاز
وہیں کبھی نہ کہا گو کہاں کہاں نہ کہا
یہ احترام تعلق یہ احتیاط تو دیکھ
کہ زندگی کو کبھی ہم نے رائیگاں نہ کہا
ترے کرم کو کرم ہی کہا ستم کو ستم
زہے خلوص تمنا کہ امتحاں نہ کہا
ہزار خشک رہا اپنی زندگی کا چمن
تری بہار کو لیکن کبھی خزاں نہ کہا
ہمیں بھی ندرت اسلوب تھی عزیز مگر
انہیں جہاں ہی پکارا غم جہاں نہ کہا
تا ابد ایک ہی چرچا ہوگا
کوئی ہم سا کوئی تم سا ہوگا
اسی تاریک زمیں کا منظر
چاند پر چاندنی جیسا ہوگا
سورج آیا ہے مری سمت مگر
دوسری سمت اندھیرا ہوگا
کاش پہلے سے کوئی بتلا دے
کس طرح ذکر ہمارا ہوگا
ایسے بیگانہ نہ سننا لوگو
یہ بھی افسانہ کسی کا ہوگا
وہ نہیں آئے گا اس محفل میں
دور ہی دور سے سنتا ہوگا
آئی بے ساختہ ہر شعر پہ داد
کتنے معنی نہیں سمجھا ہوگا
کون تھا جس نے رکھی تجھ سے امید
ہاں تو وہ شخص مجھی سا ہوگا
کون تھا ابر جو بن کر برسا
ہاں تو وہ تجھ کو ترستا ہوگا
کون تھا جس سے ہوئی طے منزل
ہاں تو پہلے وہ بھٹکتا ہوگا
کون تھا جس سے یہ شعلے بھڑکے
ہاں تو وہ خوب سلگتا ہوگا
تم رہو چپ کہ غزل خواں عالؔی
نہ برا ہوگا نہ اچھا ہوگا
یہ عشق کی گلیاں جن میں ہم کس کس عالم میں آئے گئے
کہتی ہیں کہ حضرت اب کیسے تم آج یہاں کیوں پائے گئے
اک شرط ہے یاں خوشبوئے وفا یاد آئے تو کرنا یاد ذرا
جب تم پہ بھروسا تھا گل کا کیا مہکے کیا مہکائے گئے
ہے یہ وہی لوح باب جنوں لکھا ہے نہ پوچھو کیا اور کیوں
تم لائے کلید جذب دروں اور سب منظر دکھلائے گئے
اک تخت روان شعر آیا کچھ شاہ سخن نہ فرمایا
پھر تاج ترنم پہنایا اور غزلوں میں تلوائے گئے
اک طبع رسا سے کیا بنتا یہ ان گلیوں کا صدقہ تھا
وہ لفظ اور وہ اسلوب ملے اور وہ معنی سجوائے گئے
حیرت سے ٹھہر جاتی تھی یہاں یہ کہتی ہوئی ہر کاہکشاں
جب یوں مل جانا ممکن ہے تو پھر ہم کیوں پھیلائے گئے
دنیا کے سہی انداز بہت ان گلیوں کے بھی ہیں راز بہت
جو ٹھہرے وہ سرافراز ہوئے جو نکلے وہ ٹھکرائے گئے
کسی کو ناز خرد ہے کسی کو فخر جنوں
میں اپنے دل کا فسانہ کہوں تو کس سے کہوں
نہ اضطراب میں لذت نہ آرزوئے سکوں
کوئی کہے کہ میں اب کیا فریب کھا کے جیوں
رہے گی پھر نہ یہ کیفیت طلب اے دل
چھپے ہوئے ہیں تو ہے اشتیاق دید فزوں
ہے آج دل پہ گماں حسن نا شناسی کا
جلا چکے جب اسے جلو ہائے گونا گوں
ہو اب بھی فکر میں مشکل تو یاد آتے ہیں
وہ ہر ادا میں تغزل کے سیکڑوں مضموں
تم ایسے کون خدا ہو کہ عمر بھر تم سے
امید بھی نہ رکھوں ناامید بھی نہ رہوں
کوئی تو شکل محبت میں سازگار آئے
ہنسی نہیں ہے تو رونے سے ہی قرار آئے
ہے ایک نعمت عظمیٰ غم محبت بھی
مگر یہ شرط کہ انساں کو سازگار آئے
جنون دشت پسندی بتائے دیتا ہے
گزارنی تھی جو گھر میں وہ ہم گزار آئے
گزارنی ہے مجھے عمر تیرے قدموں میں
مجھے نہ کیوں ترے وعدوں پہ اعتبار آئے
تمہاری بزم سے آ کر وہی خیال رہا
ہم ایک بار گئے تم ہزار بار آئے
نگاہ دوست کوئی اور بات ہے ورنہ
تو بے قرار کرے اور مجھے قرار آئے
ہے مطمئن بھی تو کس کس امید و بیم کے ساتھ
وہ نا مراد جسے لطف انتظار آئے
بتا گئی ہے جو مجھ کو وہ بے قرار نگاہ
نہ کہہ سکوں گا اگر آج بھی قرار آئے
یہ امتیاز ہے غالبؔ کے بعد عالیؔ کا
کہ جس پہ آپ مرے ہیں اسے بھی مار آئے
گلا نہیں جو وہ بیگانہ وار گزرے ہیں
ہم ایسے اہل سخن بے شمار گزرے ہیں
ترس نہ کھاؤ مری شدت تباہی پر
کہ عمر بھر یہی لیل و نہار گزرے ہیں
تمام عمر رہا خوف نا پذیرائی
جدھر سے گزرے ہیں دیوانہ وار گزرے ہیں
ہمیں سے تذکرۂ قحط عاشقاں توبہ
ہمیں تو کل ترے کوچے سے یار گزرے ہیں
رہین وضع بزرگاں ہے اپنا دل یعنی
ترے ہی شہر میں تجھ سے ہزار گزرے ہیں
ہمارا نام بھی رکھیے فسانہ خوانوں میں
کہ ہم بھی اپنے سوانح نگار گزرے ہیں
ہم اپنے جوش تمنا میں بھول بیٹھے تھے
کہ ہم سے اور بھی امیدوار گزرے ہیں
اس انجمن میں تجھے کون پوچھتا عالیؔ
ہزار تجھ سے غریب الدیار گزرے ہیں
منفعل تھا ترا جلوا کیا کیا
ہم نے سمجھا ترا منشا کیا کیا
ایک تھا لفظ محبت جس سے
مسئلے ہو گئے پیدا کیا کیا
تو ہی خود دیکھ کہ تیرے لیے کام
مر گیا حرف تمنا کیا کیا
کون جانے کہ تجھے بن دیکھے
تجھ سے ملتا ہے سہارا کیا کیا
جب نہ دیکھا انہیں دیکھا ہی نہیں
جب بھی دیکھا انہیں دیکھا کیا کیا
کس کو سمجھائیں کہ اس محفل میں
کیسے ہوتا ہے تقاضا کیا کیا
کس قدر سخت مقام آئے تھے
ہم نے رکھا ترا پردا کیا کیا
ہم جو دیوانے نہیں ہو جاتے
دیکھتے لوگ تماشا کیا کیا
آج تھا رونق محفل عالؔی
تم نہ ہوتے تو وہ پڑھتا کیا کیا
سمجھ سکا نہ کوئی راز حسن بیگانہ
جز ایں نیاز پسندئ قلب دیوانہ
یہ چاندنی یہ فضا یہ ہوائے مے خانہ
دوام ہو تو ملے مجھ کو ایک پیمانہ
تری نگاہ کی توصیف ہو رہی ہے مگر
مری ہی تشنہ لبی بھر رہی ہے پیمانہ
جہاں پہنچ نہ سکا کوئی جذبۂ محتاط
وہاں گیا ہے مرا ذوق سرفروشانہ
نہیں ہے سرمد و منصور پر ہی ختم جنوں
مجھے بھی لوگوں نے اکثر کہا ہے دیوانہ
شکایت غم دل کو زباں نہیں کھلتی
کہ اس نگاہ کے انداز ہیں کریمانہ
تمام بزم میں اک ہم خموش بیٹھے ہیں
سنا رہے ہیں سبھی تجھ کو تیرا افسانہ
یقین رکھ کہ تری انجمن سے ہم بھی کبھی
تری ہی طرح سے گزریں گے بے نیازانہ
گزارنی ہے شب غم کسی طرح اے دوست
نہ اپنی کوئی کہانی نہ کوئی افسانہ
نہ پوچھ مجھ سے کسی شے کی اصل اے ہمدم
کہ دیکھتا ہوں میں آبادیوں میں ویرانہ
عجب عتاب مشیت ہے مجھ پہ اے عالیؔ
گدا بنا کے دیا ہے مزاج شاہانہ
کوئی بہار کی خاطر کوئی خزاں کے لیے
بس ایک میں ہی رہا صرف گلستاں کے لیے
الٰہی مجھ سے نظر چھین لے کہ اہل نظر
تمام عمر تڑپتے ہیں رازداں کے لیے
مسرتیں جو ملیں تیرے لطف پیہم سے
مچل رہی ہیں کسی جور ناگہاں کے لیے
مجھے ہیں خار سے کچھ خاص نسبتیں کہ یہ گل
بہار میں نہ کھلا رونق خزاں کے لیے
ہمیں ان اہل سخن میں نہ کر شمار کہ یہ
فغاں بھی کرتے ہیں خوش وقتئ فغاں کے لیے
کریں نہ ذکر تمہارا تو کیا کریں کہ ہمیں
کچھ اور مل نہ سکا اپنی داستاں کے لیے
ہمارے دیس میں ایران و نجد سے استاد
بلائے جاتے ہیں تعلیم عاشقاں کے لیے
ہمارے شہر میں فن کے اجارہ داروں نے
کچل رکھا ہے دلوں کو فقط زباں کے لیے
ہم اپنے دیس اور اپنے ہی شہر میں عالیؔ
گدا گری پہ ہیں مجبور سوز جاں کے لیے
ہمیں ملا نہ کبھی سوز زندگی سے فراغ
اگر بجھا ہے کہیں دل تو جل اٹھا ہے دماغ
وہی حیات جو نیرنگ خار و گل ہے کبھی
کبھی کھلائے تمنا ہے جو نہ دشت نہ باغ
جہاں بھی کھوئے گئے قافلے ارادوں کے
وہیں سے مجھ کو ملا تیری انجمن کا سراغ
گزر رہی ہے عجب طرح زندگی عالیؔ
نہ بجھ رہا ہے چراغ اور نہ جل رہا ہے چراغ
عالؔی جی اب آپ چلو تم اپنے بوجھ اٹھائے
ساتھ بھی دے تو آخر پیارے کوئی کہاں تک جائے
جس سورج کی آس لگی ہے شاید وہ بھی آئے
تم یہ کہو خود تم نے اب تک کتنے دیئے جلائے
اپنا کام ہے صرف محبت باقی اس کا کام
جب چاہے وہ روٹھے ہم سے جب چاہے من جائے
کیا کیا روگ لگے ہیں دل کو کیا کیا ان کے بھید
ہم سب کو سمجھانے والے کون ہمیں سمجھائے
ایک اسی امید پہ ہیں سب دشمن دوست قبول
کیا جانے اس سادہ روی میں کون کہاں مل جائے
دنیا والے سب سچے پر جینا ہے اس کو بھی
ایک غریب اکیلا پاپی کس کس سے شرمائے
اتنا بھی مجبور نہ کرنا ورنہ ہم کہہ دیں گے
او عالؔی پر ہنسنے والے تو عالیؔ بن جائے
مکیں ہوں اور حدود مکاں نہیں معلوم
سنانے بیٹھ گیا داستاں نہیں معلوم
دل حزیں کو کرم کی امید کرنے دے
ابھی اسے تری مجبوریاں نہیں معلوم
گزر رہی ہے بس اک سوز و کرب پیہم میں
کہاں جلا تھا مرا آشیاں نہیں معلوم
سکوں سے منتظر امتیاز ہے اب تک
مری جبیں کو ترا آستاں نہیں معلوم
کسی کو ان کا پتہ کیا بتائیں اے عالیؔ
ہمیں تو آپ ہی اپنا نشاں نہیں معلوم
ذہن پر چھا گئی موت کی بے حسی نیند آنے لگی
ڈھونڈھتا ہوں اندھیروں میں آسودگی نیند آنے لگی
بھاگتے بھاگتے موت کے سائے سے خود ہی دھندلا گئے
سوچتے سوچتے زندگی زندگی نیند آنے لگی
ہیں اسی عہد میں سو تصور حسیں کوئی اپنا نہیں
تھک گئی ہے مرے شوق کی سادگی نیند آنے لگی
ختم ہیں روز و شب کی پریشانیاں اور حیرانیاں
تھی وہ کیا شے جو اب تک نہیں مل سکی نیند آنے لگی
حیرت انگیز رنگوں میں لپٹی ہوئی مضطرب نغمگی
آج تک اپنی لے میں نہیں ڈھل سکی نیند آنے لگی
حوصلوں کا ہی انجام ہیں تجربے بس بھرے
آشتی آشتی آشتی آشتی نیند آنے لگی
کیا ملا نغم و رنگ کے شوق سے شعر کے ذوق سے
اک چبھن اک دکھن ایک واماندگی نیند آنے لگی
کچھ دن گزرے عالیؔ صاحب عالیؔ جی کہلاتے تھے
محفل محفل قریہ قریہ شعر سناتے جاتے تھے
قدر سخن ہم کیا جانیں ہاں رنگ سخن کچھ ایسا تھا
اچھے اچھے کہنے والے اپنے پاس بٹھاتے تھے
غزلوں میں سو رنگ ملا کر اپنا رنگ ابھارا تھا
استادوں کے سائے میں کچھ اپنی راہ بناتے تھے
گیتوں میں کچھ اور نہ ہو اک کیفیت سی رہتی تھی
جب بھی مصرعے رقصاں ہوتے معنی ساز بجاتے تھے
دوہے کہنے اور پڑھنے کا ایسا طرز نکالا تھا
سننے والے سر دھنتے تھے اور پہروں پڑھواتے تھے
سامنے بیٹھی سندر ناریں آپ طلب بن جاتی تھیں
پردوں میں سے فرمائش کے سو سو پرچے آتے تھے
''غزلیں دوہے گیت'' کی شہرت ملک سے باہر پھیلی تھی
ہندوستاں سے آنے والے تحفوں میں لے جاتے تھے
اہل ہنر کی خوشہ چینی ان کو وجہ سعادت تھی
بے ہنروں میں اپنی انا کا پرچم بھی لہراتے تھے
پھر دیکھا کہ بچہ بچہ ہنستا تھا اور عالیؔ جی
فردیں لکھتے مسلیں پڑھتے بیٹھے گلڈ چلاتے تھے
بہ ایں گداز عجب رنگ کا بیاں ہوتا
کوئی رقیب جو اپنے بھی درمیاں ہوتا
جھکا ہوا ہے جو سر آج تیرے قدموں پر
اگر نہ وقت بگڑتا تو آستاں ہوتا
ہر ایک رہ پہ گئے اور یہ بھولتے ہی گئے
وہ ایک نقش قدم تھا کہاں کہاں ہوتا
ترے نثار دل غیر مطمئن پہ نہ جا
اسے جو عشق بھی ملتا تو امتحاں ہوتا
لیا نہ وعدۂ دیدار جان کر ورنہ
پھر انتظار کا یارا ہمیں کہاں ہوتا
کوئی تو رنگ سخن دے کہ لوگ کہتے ہیں
لگی تھی آگ تو کچھ آگ کا نشاں ہوتا
تری نظر کے تلاطم میں رہ گیا ورنہ
مرا بھی نام تجمل حسین خاں ہوتا
اکیلے تم ہی تو اس شہر میں نہیں عالیؔ
برا ہی تھا جو وہ تم سا ہی نکتہ داں ہوتا
عمر بھر چارۂ جنوں نہ ہوا
اب یہ کیا سوچیے کہ کیوں نہ ہوا
نہیں معلوم کیوں طبیعت میں
آج رونے سے کچھ سکوں نہ ہوا
کہیں وہ مائل کرم ہی نہ ہوں
مسکرائے تو غم فزوں نہ ہوا
ہم پئیں بھی تو کیا پئیں یہ مے
بھر گیا جام لالہ گوں نہ ہوا
شاید اب کے برس ہے ختم جنوں
فصل گل میں مجھے جنوں نہ ہوا
عشق کا ذکر شعر میں کیوں ہے
یہ تو عالیؔ غم دروں نہ ہوا
مزید شاعری پڑھیے اور دوسرے شعراء کو دریافت کیجیے۔