شاعر کی معلومات لوڈ ہو رہی ہیں...
سفر ہی شرط سفر ہے تو ختم کیا ہوگا
تمہارے گھر سے ادھر بھی یہ راستہ ہوگا
شاعر کی معلومات لوڈ ہو رہی ہیں...
Akhter saeedi
1923 – 2006
grandfather, Ahmed Saeed Khan, was among the landowners of the Bhopal state and a patron of poets and writers. The scholarly and literary atmosphere of the household inclined Akhtar towards poetry, and he began composing verses at a very young age. He received his early education at Middle School Raisen, in the state of Bhopal. In 1940, he passed matriculation from Punjab University, and in 1944, completed a B.A. from Dyal Singh College, Lahore. In 1946, he obtained an LL.B. degree from Aligarh Muslim University and adopted the profession of law. Akhtar Saeed’s poetry is a fine blend of traditional style and progressive thought. Although he also wrote nazms (poems), he did not find creative fulfillment in them, which is why he chose ghazal as his primary medium of expression. In 1976, he also served as the Secretary of the All India Progressive Writers Association. His poetic collections include: Nigah Tarz-e-Dawam Soch Ke Naam Safar
ان کے کلام کے چند منتخب اشعار پڑھیے۔
سفر ہی شرط سفر ہے تو ختم کیا ہوگا
تمہارے گھر سے ادھر بھی یہ راستہ ہوگا
زمانہ سخت گراں خواب ہے مگر اے دل
پکار تو سہی کوئی تو جاگتا ہوگا
یہ بے سبب نہیں آئے ہیں آنکھ میں آنسو
خوشی کا لمحہ کوئی یاد آ گیا ہوگا
مرا فسانہ ہر اک دل کا ماجرا تو نہ تھا
سنا بھی ہوگا کسی نے تو کیا سنا ہوگا
پھر آج شام سے پیکار جان و تن میں ہے
پھر آج دل نے کسی کو بھلا دیا ہوگا
وداع کر مجھے اے زندگی گلے مل کے
پھر ایسا دوست نہ تجھ سے کبھی جدا ہوگا
میں خود سے دور ہوا جا رہا ہوں پھر اخترؔ
وہ پھر قریب سے ہو کر گزر گیا ہوگا
لب سکوت پہ اک حرف بے نوا بھی نہیں
وہ رات ہے کہ کسی کو سر دعا بھی نہیں
خموش رہیے تو کیا کیا صدائیں آتی ہیں
پکاریے تو کوئی مڑ کے دیکھتا بھی نہیں
جو دیکھیے تو جلو میں ہیں مہر و ماہ و نجوم
جو سوچیے تو سفر کی یہ ابتدا بھی نہیں
قدم ہزار جہت آشنا سہی لیکن
گزر گیا ہوں جدھر سے وہ راستہ بھی نہیں
کسی کے تم ہو کسی کا خدا ہے دنیا میں
مرے نصیب میں تم بھی نہیں خدا بھی نہیں
یہ کیسا خواب ہے پچھلے پہر کے سناٹو
بکھر گیا ہے اور آنکھوں سے چھوٹتا بھی نہیں
اس اژدہام میں کیا نام کیا نشاں اخترؔ
ملا وہ ہنس کے مگر مجھ سے آشنا بھی نہیں
میں نے مانا ایک نہ اک دن لوٹ کے تو آ جائے گا
لیکن تجھ بن عمر جو گزری کون اسے لوٹائے گا
ہجر کے صدمے اس کا تغافل باتیں ہیں سب کہنے کی
کچھ بھی نہ مجھ کو یاد رہے گا جب وہ گلے لگ جائے گا
خواب وفا آنکھوں میں بسائے پھرتا ہے کیا دیوانے
تعبیریں پتھراؤ کریں گی جب تو خواب سنائے گا
کتنی یادیں کتنے قصے نقش ہیں ان دیواروں پر
چلتے چلتے دیکھ لیں مڑ کر کون یہاں پھر آئے گا
باد بہاری اتنا بتا دے سادہ دلان موسم کو
صرف چمن جو خون ہوا ہے رنگ وہ کب تک لائے گا
جان دی کس کے لئے ہم یہ بتائیں کس کو
کون کیا بھول گیا یاد دلائیں کس کو
جرم کی طرح محبت کو چھپا رکھا ہے
ہم گنہ گار نہیں ہیں یہ بتائیں کس کو
روٹھ جاتے تو منانا کوئی دشوار نہ تھا
وہ تعلق ہی نہ رکھیں تو منائیں کس کو
کون دیتا ہے یہاں خواب جنوں کی تعبیر
خواب ہم اپنے سنائیں تو سنائیں کس کو
کوئی پرسان وفا ہے نہ پشیمان جفا
زخم ہم اپنے دکھائیں تو دکھائیں کس کو
چاک دل چاک گریباں تو نہیں ہم نفسو
ہم یہ تصویر سر بزم دکھائیں کس کو
کون اس شہر میں سنتا ہے فغان درویش
اپنی آشفتہ بیانی سے رلائیں کس کو
ہو گیا خاک رہ کوئے ملامت اخترؔ
راہ پر لائیں جو احباب تو لائیں کس کو
آج بھی دشت بلا میں نہر پر پہرا رہا
کتنی صدیوں بعد میں آیا مگر پیاسا رہا
کیا فضائے صبح خنداں کیا سواد شام غم
جس طرف دیکھا کیا میں دیر تک ہنستا رہا
اک سلگتا آشیاں اور بجلیوں کی انجمن
پوچھتا کس سے کہ میرے گھر میں کیا تھا کیا رہا
زندگی کیا ایک سناٹا تھا پچھلی رات کا
شمعیں گل ہوتی رہیں دل سے دھواں اٹھتا رہا
قافلے پھولوں کے گزرے اس طرف سے بھی مگر
دل کا اک گوشہ جو سونا تھا بہت سونا رہا
تیری ان ہنستی ہوئی آنکھوں سے نسبت تھی جسے
میری پلکوں پر وہ آنسو عمر بھر ٹھہرا رہا
اب لہو بن کر مری آنکھوں سے بہہ جانے کو ہے
ہاں وہی دل جو حریف جوشش دریا رہا
کس کو فرصت تھی کہ اخترؔ دیکھتا میری طرف
میں جہاں جس بزم میں جب تک رہا تنہا رہا
دل کی راہیں ڈھونڈنے جب ہم چلے
ہم سے آگے دیدۂ پر نم چلے
تیز جھونکا بھی ہے دل کو ناگوار
تم سے مس ہو کر ہوا کم کم چلے
تھی کبھی یوں قدر دل اس بزم میں
جیسے ہاتھوں ہاتھ جام جم چلے
ہائے وہ عارض اور اس پر چشم نم
گل پہ جیسے قطرۂ شبنم چلے
آمد سیلاب کا وقفہ تھا وہ
جس کو یہ جانا کہ آنسو تھم چلے
کہتے ہیں گردش میں ہیں سات آسماں
از سر نو قصۂ آدم چلے
کھل ہی جائے گی کبھی دل کی کلی
پھول برساتا ہوا موسم چلے
بے ستوں چھت کے تلے اس دھوپ میں
ڈھونڈنے کس کو یہ میرے غم چلے
کون جینے کے لیے مرتا رہے
لو، سنبھالو اپنی دنیا ہم چلے
کچھ تو ہو اہل نظر کو پاس درد
کچھ تو ذکر آبروئے غم چلے
کچھ ادھورے خواب آنکھوں میں لیے
ہم بھی اخترؔ درہم و برہم چ
گزرنا ہے جی سے گزر جائیے
لیے دیدۂ تر کدھر جائیے
کھلے دل سے ملتا نہیں اب کوئی
اسے بھولنے کس کے گھر جائیے
سبک رو ہے موج غم دل ابھی
ابھی وقت ہے پار اتر جائیے
الٹ تو دیا پردۂ شب مگر
نہیں سوجھتا اب کدھر جائیے
علاج غم دل نہ صحرا نہ گھر
وہی ہو کا عالم جدھر جائیے
اسی موڑ پر ہم ہوئے تھے جدا
ملے ہیں تو دم بھر ٹھہر جائیے
کٹھن ہیں بہت ہجر کے مرحلے
تقاضا ہے ہنس کر گزر جائیے
اب اس در کی اخترؔ ہوا اور ہے
لیے اپنے شام و سحر جائیے
مآل گردش لیل و نہار کچھ بھی نہیں
ہزار نقش ہیں اور آشکار کچھ بھی نہیں
ہر ایک موڑ پہ دنیا کو ہم نے دیکھ لیا
سوائے کشمکش روزگار کچھ بھی نہیں
نشان راہ ملے بھی یہاں تو کیسے ملے
سوائے خاک سر رہ گزار کچھ بھی نہیں
بہت قریب رہی ہے یہ زندگی ہم سے
بہت عزیز سہی اعتبار کچھ بھی نہیں
نہ بن پڑا کہ گریباں کے چاک سی لیتے
شعور ہو کہ جنوں اختیار کچھ بھی نہیں
کھلے جو پھول وہ دست خزاں نے چھین لیے
نصیب دامن فصل بہار کچھ بھی نہیں
زمانہ عشق کے ماروں کو مات کیا دے گا
دلوں کے کھیل میں یہ جیت ہار کچھ بھی نہیں
یہ میرا شہر ہے میں کیسے مان لوں اخترؔ
نہ رسم و راہ نہ وہ کوئے یار کچھ بھی نہیں
یہ ہم سے پوچھتے ہو رنج امتحاں کیا ہے
تمہیں کہو صلۂ خون کشتگاں کیا ہے
اسیر بند خزاں ہوں نہ پوچھ اے صیاد
خرام کیا ہے صبا کیا ہے گلستاں کیا ہے
ہوئی ہے عمر کہ دل کو نظر سے ربط نہیں
مگر یہ سلسلۂ چشم خوں فشاں کیا ہے
نظر اٹھے تو نہ سمجھوں جھکے تو کیا سمجھوں
سکوت ناز یہ پیرایۂ بیاں کیا ہے
بہیں نہ آنکھ سے آنسو تو نغمگی بے سود
کھلیں نہ پھول تو رنگینئ فغاں کیا ہے
نگاہ یاس ترے ہاتھ ہے بھرم دل کا
کہیں وہ جان نہ لیں عشق کی زباں کیا ہے
یہ اور بات کہ ہم تم کو بے وفا نہ کہیں
مگر یہ جانتے ہیں جور آسماں کیا ہے
میں شکوہ سنج نہیں اپنی تیرہ بختی کا
مگر بتاؤ تو یہ صبح زر فشاں کیا ہے
اک کرن مہر کی ظلمات پہ بھاری ہوگی
رات ان کی ہے مگر صبح ہماری ہوگی
ہم صفیران چمن مل کے پکاریں تو ذرا
یہیں خوابیدہ کہیں باد بہاری ہوگی
اس طرف بھی کوئی خوشبو سے مہکتا جھونکا
اے صبا تو نے تو وہ زلف سنواری ہوگی
یہ جو ملتی ہے ترے غم سے غم دہر کی شکل
دل نے تصویر سے تصویر اتاری ہوگی
بوئے گل آتی ہے مٹی سے چمن کی جب تک
ہم پہ دہشت نہ خزاں کی کبھی طاری ہوگی
کوئی مجھ سے جدا ہوا ہے ابھی
زندگی ایک سانحا ہے ابھی
نہیں موقع یہ پرسش غم کا
دیکھیے دل دکھا ہوا ہے ابھی
کل گزر جائے دل پہ کیا معلوم
عشق سادہ سا واقعہ ہے ابھی
بات پہنچی ہے اک نظر میں کہاں
ہم تو سمجھے تھے ابتدا ہے ابھی
کتنے نزدیک آ گئے ہیں وہ
کس قدر ان سے فاصلہ ہے ابھی
ساری باتیں یہ خواب کی سی ہیں
زندگی دور کی صدا ہے ابھی
دار پر کھینچتے ہیں اخترؔ کو
جرم یہ ہے کہ جی رہا ہے ابھی
یقین ہے نہ گماں ہے ذرا سنبھل کے چلو
عجیب رنگ جہاں ہے ذرا سنبھل کے چلو
سلگتے خوابوں کی بستی ہے رہ گزار حیات
یہاں دھواں ہی دھواں ہے ذرا سنبھل کے چلو
روش روش ہے گزر گاہ نکہت برباد
کلی کلی نگراں ہے ذرا سنبھل کے چلو
جو زخم دے کے گئی ہے ابھی نسیم سحر
سکوت گل سے عیاں ہے ذرا سنبھل کے چلو
خرام ناز مبارک تمہیں مگر یہ دل
متاع شیشہ گراں ہے ذرا سنبھل کے چلو
سراغ حشر نہ پا جائیں دیکھنے والے
ہجوم دیدہ وراں ہے ذرا سنبھل کے چلو
یہاں زمین بھی قدموں کے ساتھ چلتی ہے
یہ عالم گزراں ہے ذرا سنبھل کے چلو
چند الجھی ہوئی سانسوں کی عطا ہوں کیا ہوں
میں چراغ تہ دامان صبا ہوں کیا ہوں
ہر نفس ہے مرا پروردۂ آغوش بلا
اپنے ناکردہ گناہوں کی سزا ہوں کیا ہوں
مجھ پہ کھلتا ہی نہیں میرا ستم دیدہ وجود
کوئی پتھر ہوں کہ گم کردہ صدا ہوں کیا ہوں
دل میں ہوں اور زباں پر کبھی آتا بھی نہیں
میں کوئی بھولا ہوا حرف دعا ہوں کیا ہوں
میں سفر میں ہوں مگر سمت سفر کوئی نہیں
کیا میں خود اپنا ہی نقش کف پا ہوں کیا ہوں
میں نے دیکھا ہی نہیں جاگتی آنکھوں سے کبھی
کوئی عقدہ ہوں کہ خود عقدہ کشا ہوں کیا ہوں
پوچھتا ہے مرا پیراہن ہستی مجھ سے
میں قبا ہوں کہ فقط بند قبا ہوں کیا ہوں
دل کی اور میری زباں ایک ہے پھر بھی اخترؔ
لفظ و معنی کی پر اسرار فضا ہوں کیا ہوں
آنکھوں میں جو ایک خواب سا ہے
عالم کیا کیا دکھا رہا ہے
عالم اک انتظار کا ہے
کھلتا نہیں انتظار کیا ہے
قطرہ قطرہ جو پی چکا ہے
دریا دریا پکارتا ہے
کیا کہہ گئی زندگی کی آہٹ
جو ہے کسی سوچ میں کھڑا ہے
اے موج نسیم صبح گاہی
ہر غنچہ کا دل دھڑک رہا ہے
تم اور ذرا قریب آ جاؤ
خنجر رگ جاں تک آ گیا ہے
ہے دیدنی رنگ روئے قاتل
ہر زخم جواب مانگتا ہے
اے دشت جنوں گواہ رہنا
کانٹے ہیں اور اک برہنہ پا ہے
آثار اچھے نہیں شب ہجر
دل کو کچھ قرار سا ہے
لفظوں کو زبان مل رہی ہے
شاید اخترؔ غزل سرا ہے
عشق کے ٹوٹے ہوئے رشتوں کا ماتم کیا کریں
زندگی آ تجھ سے پھر اک بار سمجھوتا کریں
زندگی کب تک ترے درماندگان آرزو
خواب دیکھیں اور تعبیروں کو شرمندہ کریں
مڑ کے دیکھا اور پتھر کے ہوئے اس شہر میں
خود صدا بن جاؤ آوازیں اگر پیچھا کریں
ناامیدانہ بھی جینے کا سلیقہ ہے ہمیں
آئنے ٹوٹے ہوئے دل میں سجا کر کیا کریں
چند ذرے دل کے رقصاں ہیں فضاؤں میں ابھی
لاؤ ان ذروں میں حشر آرزو برپا کریں
خوں چکاں آنکھوں سے اپنی خوش نہیں ہم بھی مگر
چاک دامن ہو تو سی لیں چاک دل کو کیا کریں
بجھ گئے ایک ایک کر کے سب عقیدوں کے چراغ
اے زمانے کی ہوا اب یہ بتا ہم کیا کریں
عافیت دشمن تھا دل نا عاقبت اندیش ہم
اب کسے الزام دیں اخترؔ کسے رسوا کریں
کیسے سمجھاؤں نسیم صبح تجھ کو کیا ہوں میں
پھول کے سائے میں مرجھایا ہوا پتا ہوں میں
خاک کا ذرہ بھی کوئی تیرے دامن میں نہ تھا
قدر کر اے زندگی ٹوٹا ہوا تارا ہوں میں
ہر دھڑکتے دل سے انجانا سا رشتہ ہے مرا
آگ دامن میں کسی کے بھی لگے جلتا ہوں میں
اپنی تاریکی سمیٹے پوچھتی ہے مجھ سے رات
کون سی ہے صبح جس کو ڈھونڈھنے نکلا ہوں میں
مجھ کو سمجھائے تو کوئی رازدار کائنات
مجھ میں ہے آباد یہ دنیا کہ خود اپنا ہوں میں
زندگی ٹوٹے ہوئے خوابوں میں گزری ہے تو کیا!
آج بھی اک خواب آنکھوں میں لیے بیٹھا ہوں میں
سمت منزل ہی بدل جائے تو میرا کیا قصور
راستوں سے پوچھ کر دیکھو کہیں ٹھہرا ہوں میں
دیر تک حسرت سے دیکھے گی اسے شام سفر
جس زمیں پر نقش اپنے چھوڑ کر گزرا ہوں میں
چپکے چپکے رات بھر کہتا ہے اخترؔ مجھ سے دل
بستیاں آباد ہیں مجھ سے مگر صحرا ہوں میں
یاد آئیں جو ایام بہاراں تو کدھر جائیں
یہ تو کوئی چارہ نہیں سر پھوڑ کے مر جائیں
قدموں کے نشاں ہیں نہ کوئی میل کا پتھر
اس راہ سے اب جن کو گزرنا ہے گزر جائیں
رسمیں ہی بدل دی ہیں زمانے نے دلوں کی
کس وضع سے اس بزم میں اے دیدۂ تر جائیں
جاں دینے کے دعوے ہوں کہ پیمان وفا ہو
جی میں تو یہ آتا ہے کہ اب ہم بھی مکر جائیں
ہر موج گلے لگ کے یہ کہتی ہے ٹھہر جاؤ
دریا کا اشارہ ہے کہ ہم پار اتر جائیں
شیشے سے بھی نازک ہیں انہیں چھو کے نہ دیکھو
ایسا نہ ہو آنکھوں کے حسیں خواب بکھر جائیں
تاریک ہوئے جاتے ہیں بڑھتے ہوئے سائے
اخترؔ سے کہو شام ہوئی آپ بھی گھر جائیں
تم سے چھٹ کر زندگی کا نقش پا ملتا نہیں
پھر رہا ہوں کو بہ کو اپنا پتا ملتا نہیں
میں ہوں یا پھرتا ہے کوئی اور میرے بھیس میں
کس سے پوچھوں کوئی صورت آشنا ملتا نہیں
نقش حیرت ہی نہ تھا پرسان حال غم بھی تھا
تم نے جو توڑا ہے اب وہ آئینا ملتا نہیں
ناامیدی حرف تہمت ہی سہی کیا کیجئے
تم قریب آتے نہیں ہو اور خدا ملتا نہیں
اس کے دل سے اپنا انداز تغافل پوچھیے
جس کے دل کو درد کا بھی آسرا ملتا نہیں
اک نہ اک رشتہ اسی دنیا سے تھا اپنا کبھی
سوچتا ہوں اور کوئی سلسلہ ملتا نہیں
کوئی سائے کی طرح چلتا ہے اخترؔ ساتھ ساتھ
دوستدار دل ہے لیکن برملا ملتا نہیں
دیدنی ہے زخم دل اور آپ سے پردا بھی کیا
اک ذرا نزدیک آ کر دیکھیے ایسا بھی کیا
ہم بھی ناواقف نہیں آداب محفل سے مگر
چیخ اٹھیں خاموشیاں تک ایسا سناٹا بھی کیا
خود ہمیں جب دست قاتل کو دعا دیتے رہے
پھر کوئی اپنی ستم گاری پہ شرماتا بھی کیا
جتنے آئینے تھے سب ٹوٹے ہوئے تھے سامنے
شیشہ گر باتوں سے اپنی ہم کو بہلاتا بھی کیا
ہم نے ساری زندگی اک آرزو میں کاٹ دی
فرض کیجے کچھ نہیں کھویا مگر پایا بھی کیا
بے محابا تجھ سے اکثر سامنا ہوتا رہا
زندگی تو نے مجھے دیکھا نہ ہو ایسا بھی کیا
بے طلب اک جستجو سی بے سبب اک انتظار
عمر بے پایاں کا اتنا مختصر قصہ بھی کیا
غیر سے بھی جب ملا اخترؔ تو ہنس کر ہی ملا
آدمی اچھا ہو لیکن اس قدر اچھا بھی کیا
تم ہو یا چھیڑتی ہے یاد سحر کوئی تو ہے
کھٹکھٹاتا ہے جو یہ خواب کا در کوئی تو ہے
دل پہ پڑتی ہوئی دزدیدہ نظر کوئی تو ہے
جس طرف دیکھ رہا ہوں میں ادھر کوئی تو ہے
ایسے ناداں نہیں راتوں میں بھٹکنے والے
جاگتی آنکھوں میں خورشید سحر کوئی تو ہے
خود بخود ہاتھ گریباں کی طرف اٹھتے ہیں
سرسراتی سی ہواؤں میں خبر کوئی تو ہے
کس کا منہ دیکھ رہی ہے سفر آمادہ حیات
سوئے مقتل ہی سہی راہ گزر کوئی تو ہے
تو مجھے دیکھ مرے پاؤں کے چھالوں پہ نہ جا
زندگی تیرے لیے خاک بسر کوئی تو ہے
دن کٹا سارا خرابوں میں بھٹکتے اخترؔ
شام ہوتی ہے چلو خیر سے گھر کوئی تو ہے
پھرتی ہے زندگی جنازہ بہ دوش
بت بھی چپ ہیں خدا بھی ہے خاموش
کوئی میری طرح جئے تو سہی
زندگی در گلو اجل بر دوش
دیدنی تھی یہ کائنات بہت
ہم بھی کچھ دن رہے خراب ہوش
گھر سے طوف حرم کو نکلا تھا
راہ میں تھی دکان بادہ فروش
اک تعلق قدم کو راہ سے ہے
میں نہ آوارہ ہوں نہ خانہ بدوش
ہم سے غافل نہیں ہیں اہل ستم
اک ذرا تھک کے ہو گئے ہیں خموش
جی میں ہے کوئی آرزو کیجے
یعنی باقی ہے سر میں مستی ہوش
ہے یہ دنیا بہت وسیع تو ہو
میں ہوں اور تیرا حلقۂ آغوش
دل کو روتے کہاں تلک اخترؔ
آخر کار ہو گئے خاموش
سر میں سودائے وفا رکھتے ہیں
ہم بھی اس عہد میں کیا رکھتے ہیں
واسطہ جس کا ترے غم سے نہ ہو
ہم وہ ہر کام اٹھا رکھتے ہیں
بن کھلی ایک کلی پہلو میں
ہم بھی اے باد صبا رکھتے ہیں
بت کدہ والو تمہیں کچھ بولو
وہ تو چپ ہیں جو خدا رکھتے ہیں
غیرت عشق کوئی راہ نکال
ظلم وہ سب پہ روا رکھتے ہیں
کیا سلیقہ ہے ستم گاری کا
رخ پہ دامان حیا رکھتے ہیں
چارہ سازان زمانہ اے دل
زہر دیتے ہیں دوا رکھتے ہیں
نغمۂ شوق ہو یا نالۂ دل
درد مندانہ صدا رکھتے ہیں
دل کی تعمیر کو ڈھا کر اخترؔ
وہ محبت کی بنا رکھتے ہیں
موج شمیم ہیں نہ خرام صبا ہیں ہم
ٹھہری ہوئی گلوں کے لبوں پر دعا ہیں ہم
بیگانہ خلق سے ہیں نہ تجھ سے خفا ہیں ہم
اے زندگی معاف کہ دیر آشنا ہیں ہم
اس راز کو بھی فاش کر اے چشم دل نواز
کانٹا کھٹک رہا ہے یہ دل میں کہ کیا ہیں ہم
یا رب ترا کمال ہنر ہم پہ ختم ہے
یا صرف مشق ناز کا اک تجربہ ہیں ہم
آخر ترے سلوک نے جھٹلا دیا اسے
اک زعم تھا ہمیں کہ سراپا وفا ہیں ہم
کل اس زمیں پہ اتریں گے پھولوں کے قافلے
اک پیکر بہار کی آواز پا ہیں ہم
سیر گاہ دنیا کا حاصل تماشا کیا
رنگ و نکہت گل پر اپنا تھا اجارا کیا
کھیل ہے محبت میں جان و دل کا سودا کیا
دیکھیے دکھاتی ہے اب یہ زندگی کیا کیا
جب بھی جی امڈ آیا رو لیے گھڑی بھر کو
آنسوؤں کی بارش سے موسموں کا رشتہ کیا
کب سر نظارہ تھا ہم کو بزم عالم کا
یوں بھی دیکھ کر تم کو اور دیکھنا تھا کیا
درد بے دوا اپنا بخت نارسا اپنا
اے نگاہ بے پروا تجھ سے ہم کو شکوہ کیا
بے سوال آنکھوں سے منہ چھپا رہے ہو کیوں
میری چشم حیراں میں ہے کوئی تقاضا کیا
حال ہے نہ ماضی ہے وقت کا تسلسل ہے
رات کا اندھیرا کیا صبح کا اجالا کیا
جو ہے جی میں کہہ دیجے ان کے روبرو اخترؔ
عرض حال کی خاطر ڈھونڈیئے بہانہ کیا
یہ اندھیرا جو عیاں صبح کی تنویر میں ہے
کچھ کمی خون جگر کی ابھی تصویر میں ہے
اہل تقدیر نے سر رکھ دیا جس کے آگے
آج وہ عقدہ مرے ناخن تدبیر میں ہے
رنگ گل رنگ بتاں رنگ جبین محنت
جو حسیں رنگ ہے شامل مری تصویر میں ہے
میں نے جس خواب کو آنکھوں میں بسا رکھا ہے
تو بھی ظالم مرے اس خواب کی تعبیر میں ہے
لے اڑی موج بہاراں یہ الگ ہے ورنہ
آج بھی پاؤں مرا خانۂ زنجیر میں ہے
وہ مرے پوچھنے کو آئے ہیں سچ مچ اخترؔ
یا کوئی خواب حسیں منزل تعبیر میں ہے
بلائے تیرہ شبی کا جواب لے آئے
بجھے چراغ تو ہم آفتاب لے آئے
بکھر گئے جو کبھی چشم انتظار کے رنگ
اس انجمن سے ہم اک اور خواب لے آئے
ہم اس زمین پہ میزان عدل رکھتے ہیں
کہو زمانے سے فرد حساب لے آئے
ہر ایک غم سے سلامت گزر گیا ہے دل
خدا کرے کہ محبت کی تاب لے آئے
گئے تھے ہم بھی ان آنکھوں سے مانگنے کیا کیا
وہی ہوا کہ بس اک اضطراب لے آئے
ہماری لغزش پیہم کو رائیگاں نہ سمجھ
عجب نہیں کہ یہی انقلاب لے آئے
نہ لائے کچھ بھی ہم آشوب دہر میں اخترؔ
بس ایک حوصلۂ اضطراب لے آئے
نیرنگیٔ نشاط تمنا عجیب ہے
کچھ شام سے قفس میں اجالا عجیب ہے
شرما رہے ہیں تار گریبان و چاک دل
کچھ دن سے رنگ لالۂ صحرا عجیب ہے
ہر خواب اعتبار شکستوں سے چور ہے
دل میں مگر غرور تمنا عجیب ہے
سارا بدن ہے دھوپ میں جھلسا ہوا مگر
دل پر جو پڑ رہا ہے وہ سایہ عجیب ہے
پھینکے نہیں ہیں آج تلک ریزہ ہائے دل
ٹوٹے تعلقات کا رشتہ عجیب ہے
جب تک نظر نہ کیجیئے یک قطرہ خوں ہے دل
لیکن جو دیکھیے تو یہ دنیا عجیب ہے
اخترؔ یہ تیرے پاؤں کے کانٹے نئے نہیں
کانٹوں سے کھیلتا ہوا چھالا عجیب ہے
نہ آپ آئے نہ بیداد انتظار گئی
یہ رات پھر مری آنکھوں سے آج ہار گئی
لئے ہوئے کوئی افسانۂ بہار گئی
صبا چمن سے بہت آج سوگوار گئی
ہوئی جو صبح تو اشکوں سے جگمگا اٹھی
جو آئی شام تو یادوں سے مشک بار گئی
اسی نگاہ نے مارا الم پرستوں کو
وہی نگاہ مری زندگی سنوار گئی
زمین کوئے ملامت بھی خیر راہ میں تھی
کہاں کہاں لئے موج خرام یار گئی
مزید شاعری پڑھیے اور دوسرے شعراء کو دریافت کیجیے۔