شاعر کی معلومات لوڈ ہو رہی ہیں...
سینہ خوں سے بھرا ہوا میرا
اف یہ بد مست مے کدہ میرا
شاعر کی معلومات لوڈ ہو رہی ہیں...
Akhtar Ansari
1909 – 1988
Akhtar Ansari was a prominent poet and critic associated with the Progressive Writers' Movement. Although not formally tied to the movement, he played a vital role in promoting its ideals, critical thinking, and scientific foundations through his writings. His poetry, criticism, and short stories reflect his intellectual struggle for a just and thoughtful literary approach. He was born on October 1, 1909, in Badaun (India). He received his early education at Anglo-Arabic School, earned a B.A. from Delhi University, and completed a B.T. from Aligarh Muslim University. He worked as a schoolteacher and later as a lecturer in the Department of Urdu and in a training college. He passed away on October 5, 1988. Major Works: Poetry Collections: Naghma-e-Rooh Aabginey Tedhi Zameen Sarwar-e-Jaan
ان کے کلام کے چند منتخب اشعار پڑھیے۔
سینہ خوں سے بھرا ہوا میرا
اف یہ بد مست مے کدہ میرا
نا رسائی پہ ناز ہے جس کو
ہائے وہ شوق نا رسا میرا
دل غم دیدہ پر خدا کی مار
سینہ آہوں سے چھل گیا میرا
یاد کے تند و تیز جھونکے سے
آج ہر داغ جل اٹھا میرا
یاد ماضی عذاب ہے یا رب
چھین لے مجھ سے حافظہ میرا
منت چرخ سے بری ہوں میں
نہ ہوا جیتے جی بھلا میرا
ہے بڑا شغل زندگی اخترؔ
پوچھتے کیا ہو مشغلہ میرا
سمجھتا ہوں میں سب کچھ صرف سمجھانا نہیں آتا
تڑپتا ہوں مگر اوروں کو تڑپانا نہیں آتا
یہ جمنا کی حسیں امواج کیوں ارگن بجاتی ہیں
مجھے گانا نہیں آتا مجھے گانا نہیں آتا
یہ میری زیست خود اک مستقل طوفان ہے اخترؔ
مجھے ان غم کے طوفانوں سے گھبرانا نہیں آتا
آرزو کو روح میں غم بن کے رہنا آ گیا
سہتے سہتے ہم کو آخر رنج سہنا آ گیا
دل کا خوں آنکھوں میں کھنچ آیا چلو اچھا ہوا
میری آنکھوں کو مرا احوال کہنا آ گیا
سہل ہو جائے گی مشکل ضبط سوز و ساز کی
خون دل کو آنکھ سے جس روز بہنا آ گیا
میں کسی سے اپنے دل کی بات کہہ سکتا نہ تھا
اب سخن کی آڑ میں کیا کچھ نہ کہنا آ گیا
جب سے منہ کو لگ گئی اخترؔ محبت کی شراب
بے پیے آٹھوں پہر مدہوش رہنا آ گیا
اپنی اجڑی ہوئی دنیا کی کہانی ہوں میں
ایک بگڑی ہوئی تصویر جوانی ہوں میں
آگ بن کر جو کبھی دل میں نہاں رہتا تھا
آج دنیا میں اسی غم کی نشانی ہوں میں
ہائے کیا قہر ہے مرحوم جوانی کی یاد
دل سے کہتی ہے کہ خنجر کی روانی ہوں میں
عالم افروز تپش تیرے لیے لایا ہوں
اے غم عشق ترا عہد جوانی ہوں میں
چرخ ہے نغمہ گر ایام ہیں نغمے اخترؔ
داستاں گو ہے غم دہر کہانی ہوں میں
پھول سونگھے جانے کیا یاد آ گیا
دل عجب انداز سے لہرا گیا
اس سے پوچھے کوئی چاہت کے مزے
جس نے چاہا اور جو چاہا گیا
ایک لمحہ بن کے عیش جاوداں
میری ساری زندگی پر چھا گیا
غنچۂ دل ہائے کیسا غنچہ تھا
جو کھلا اور کھلتے ہی مرجھا گیا
رو رہا ہوں موسم گل دیکھ کر
میں سمجھتا تھا مجھے صبر آ گیا
یہ ہوا یہ برگ گل کا اہتزاز
آج میں راز مسرت پا گیا
اخترؔ اب برسات رخصت ہو گئی
اب ہمارا رات کا رونا گیا
محبت ہے اذیت ہے ہجوم یاس و حسرت ہے
جوانی اور اتنی دکھ بھری کیسی قیامت ہے
وہ ماضی جو ہے اک مجموعہ اشکوں اور آہوں کا
نہ جانے مجھ کو اس ماضی سے کیوں اتنی محبت ہے
لب دریا مجھے لہروں سے یوں ہی چہل کرنے دو
کہ اب دل کو اسی اک شغل بے معنی میں راحت ہے
ترا افسانہ اے افسانہ خواں رنگیں سہی ممکن
مجھے روداد عشرت سن کے رو دینے کی عادت ہے
کوئی روئے تو میں بے وجہ خود بھی رونے لگتا ہوں
اب اخترؔ چاہے تم کچھ بھی کہو یہ میری فطرت ہے
آئینۂ نگاہ میں عکس شباب ہے
دنیا سمجھ رہی ہے کہ آنکھوں میں خواب ہے
روئے بغیر چارہ نہ رونے کی تاب ہے
کیا چیز اف یہ کیفیت اضطراب ہے
اے سوز جاں گداز ابھی میں جوان ہوں
اے درد لا علاج یہ عمر شباب ہے
میرے رخ سے سکوں ٹپکتا ہے
گفتگو سے جنوں ٹپکتا ہے
مست ہوں میں مری نظر سے بھی
بادۂ لالہ گوں ٹپکتا ہے
ہاں کبھی خواب عشق دیکھا تھا
اب تک آنکھوں سے خوں ٹپکتا ہے
آہ اخترؔ میری ہنسی سے بھی
میرا حال زبوں ٹپکتا ہے
غم حیات کہانی ہے قصہ خواں ہوں میں
دل ستم زدہ ہے رازداں ہوں میں
زیادہ اس سے کوئی آج تک بتا نہ سکا
کہ ایک نکتۂ ناقابل بیاں ہوں میں
نظر کے سامنے کوندی تھی ایک بجلی سی
مجھے بتاؤ خدارا کہ اب کہاں ہوں میں
خزاں نے لوٹ لیا گلشن شباب مگر
کسی بہار کے ارمان میں جواں ہوں میں
یہ کہہ رہی ہے نظر کی غم آفریں جنبش
کسی کے دل کی تباہی کی داستاں ہوں میں
خزاں کہتی تھی میں شوخی بہاراں ہوں
بہار کہتی ہے رنگینی خزاں ہوں میں
شباب نام ہے اس جاں نواز لمحے کا
جب آدمی کو یہ محسوس ہو جواں ہوں میں
جہان درد و الم پوجتا ہے مجھ کو آہ
تپش جبیں ہے لہو سجدہ آستاں ہوں میں
وہ دن بھی تھے کہ میں جان شباب تھا اخترؔ
اب اپنے عہد جوانی کی داستاں ہوں میں
صاف ظاہر ہے نگاہوں سے کہ ہم مرتے ہیں
منہ سے کہتے ہوئے یہ بات مگر ڈرتے ہیں
ایک تصویر محبت ہے جوانی گویا
جس میں رنگوں کے عوض خون جگر بھرتے ہیں
عشرت رفتہ نے جا کر نہ کیا یاد ہمیں
عشرت رفتہ کو ہم یاد کیا کرتے ہیں
آسماں سے کبھی دیکھی نہ گئی اپنی خوشی
اب یہ حالت ہے کہ ہم ہنستے ہوئے ڈرتے ہیں
شعر کہتے ہو بہت خوب تم اخترؔ لیکن
اچھے شاعر یہ سنا ہے کہ جواں مرتے ہیں
کیا خبر تھی اک بلائے ناگہانی آئے گی
نامرادی کی نشانی یہ جوانی آئے گی
سب کہیں گے کون کرتا ہے ہمارے راز فاش
جب مرے لب پر محبت کی کہانی آئے گی
نامرادی سے کہو منہ پھیر لے اپنا ذرا
میری دنیا میں عروس کامرانی آئے گی
جب خزاں کی نذر ہو جائے گی دنیا سے شباب
یاد اخترؔ یہ ستم آرا جوانی آئے گی
محبت کرنے والوں کے بہار افروز سینوں میں
رہا کرتی ہے شادابی خزاں کے بھی مہینوں میں
ضیائے مہر آنکھوں میں ہے توبہ مہ جبینوں کے
کہ فطرت نے بھرا ہے حسن خود اپنا حسینوں میں
ہوائے تند ہے گرداب ہے پر شور دھارا ہے
لیے جاتے ہیں ذوق عافیت سی شے سفینوں میں
میں ہنستا ہوں مگر اے دوست اکثر ہنستے ہوئے بھی
چھپائے ہوتے ہیں داغ اور ناسور اپنے سینوں میں
میں ان میں ہوں جو ہو کر آستان دوست سے محروم
لیے پھرتے ہیں سجدوں کی تڑپ اپنی جبینوں میں
مری غزلیں پڑھیں سب اہل دل اور مست ہو جائیں
مے جذبات لایا ہوں میں لفظی آبگینوں میں
سننے والے فسانہ تیرا ہے
صرف طرز بیاں ہی میرا ہے
یاس کی تیرگی نے گھیرا ہے
ہر طرف ہول ناک اندھیرا ہے
اس میں کوئی مرا شریک نہیں
میرا دکھ آہ صرف میرا ہے
چاندنی چاندنی نہیں اخترؔ
رات کی گود میں سویرا ہے
میں دل کو چیر کے رکھ دوں یہ ایک صورت ہے
بیاں تو ہو نہیں سکتی جو اپنی حالت ہے
مرے سفینے کو دھارے پہ ڈال دے کوئی
میں ڈوب جاؤں کہ تر جاؤں میری قسمت ہے
رگوں میں دوڑتی ہیں بجلیاں لہو کے عوض
شباب کہتے ہیں جس چیز کو قیامت ہے
لطافتیں سمٹ آتی ہیں خلد کی دل میں
تصورات میں اللہ کتنی قدرت ہے
آفتوں میں گھر گیا ہوں زیست سے بے زار ہوں
میں کسی رومان غم کا مرکزی کردار ہوں
مدتوں کھیلی ہیں مجھ سے غم کی بے درد انگلیاں
میں رباب زندگی کا اک شکستہ تار ہوں
دوسروں کا درد اخترؔ میرے دل کا درد ہے
مبتلائے غم ہے دنیا اور میں غم خوار ہوں
خزاں میں آگ لگاؤ بہار کے دن ہیں
نئے شگوفے کھلاؤ بہار کے دن ہیں
الٹ دو تختہ خزاں کی تباہ کاری کا
بساط عیش بچھاؤ بہار کے دن ہیں
عذار گل کی دہک سے جلا کے کانٹوں کو
لگی دلوں کی بجھاؤ بہار کے دن ہیں
ملا کے قطرۂ شبنم میں رنگ و نکہت گل
کوئی شراب بناؤ بہار کے دن ہیں
بھرے کٹورے چمن کے یہ درس دیتے ہیں
چھلکتے جام لڑھاؤ بہار کے دن ہیں
اب احتیاط پسندی ہے سعئ نا مشکور
متاع ضبط لٹاؤ بہار کے دن ہیں
شرار گل سے زمانے میں شعلے بھڑکا دو
حسین فتنے جگاؤ بہار کے دن ہیں
جنون شوق کی بے اعتدالیوں کے خلاف
کوئی دلیل نہ لاؤ بہار کے دن ہیں
پرانی شمعیں بجھا دیں صبا کے جھونکوں نے
نئے چراغ جلاؤ بہار کے دن ہیں
لچک رہی ہے وفور ثمر سے شاخ حیات
یہ بار ہنس کے اٹھاؤ بہار کے دن ہیں
جناب اختر جاں دادۂ رخ گل کو
امام وقت بناؤ بہار کے دن ہیں
کوئی مآل محبت مجھے بتاؤ نہیں
میں خواب دیکھ رہا ہوں مجھے جگاؤ نہیں
کسی کی یاد ہے ان کی مہک سے وابستہ
مجھے یہ پھول خدا کے لیے سنگھاؤ نہیں
محبت اور جوانی کے تذکرے نہ کرو
کسی ستائے ہوئے کو بہت ستاؤ نہیں
یہ کہہ رہا ہے محبت کی کاوشوں سے دل
یہ میرے ہنسنے کے دن ہیں مجھے رلاؤ نہیں
اجڑ کے پھر نہیں بستا جہان دل اخترؔ
بہار باغ کو اس پر دلیل لاؤ نہیں
غم زدہ ہیں مبتلائے درد ہیں ناشاد ہیں
ہم کسی افسانۂ غم ناک کے افراد ہیں
گردش افلاک کے ہاتھوں بہت برباد ہیں
ہم لب ایام پر اک دکھ بھری فریاد ہیں
حافظے پر عشرتوں کے نقش باقی ہیں ابھی
تو نے جو صدمے سہے اے دل تجھے بھی یاد ہیں
رات بھر کہتے ہیں تارے دل سے روداد باب
ان کو میری وہ شباب افروز راتیں یاد ہیں
اخترؔ ناشاد کی پرچھائیں سے بچتے رہیں
جو زمانے میں شگفتہ خاطر و دل شاد ہیں
دل کے ارمان دل کو چھوڑ گئے
آہ منہ اس جہاں سے موڑ گئے
وہ امنگیں نہیں طبیعت میں
کیا کہیں جی کو صدمے توڑ گئے
بادۂ باس کے مسلسل دور
ساغر آرزو کو پھوڑ گئے
مٹ گئے وہ نظارہ ہائے جمیل
لیکن آنکھوں میں عکس چھوڑ گئے
ہم تھے عشرت کی گہری نیندیں تھیں
آئے آلام اور جھنجھوڑ گئے
ہر وقت نوحہ خواں سی رہتی ہیں میری آنکھیں
اک دکھ بھری کہانی کہتی ہیں میری آنکھیں
جذبات دل کی شدت سہتی ہیں میری آنکھیں
گل رنگ اور شفق گوں رہتی ہیں میری آنکھیں
عیش و طرب کے جلسے درد و الم کے منظر
کیا کچھ نہ ہم نے دیکھا کہتی ہیں میری آنکھیں
جب سے دل و جگر کی ہمدرد بن گئی ہیں
غمگینیوں میں ڈوبی رہتی ہیں میری آنکھیں
لبریز ہو کے دل کا ساغر چھلک اٹھا ہے
شاید اسی سبب سے بہتی ہیں میری آنکھیں
ہر جنبش نظر ہے روداد عشق اخترؔ
ہیں بے زباں مگر کچھ کہتی ہیں میری آنکھیں
چیر کر سینے کو رکھ دے گر نہ پائے غم گسار
دل کی باتیں دل ہی سے کوئی بیاں کب تک کرے
مبتلائے درد ہونے کی یہ لذت دیکھیے
قصۂ غم ہو کسی کا دل مرا دھک دھک کرے
سب کی قسمت اک نہ اک دن جاگتی ہے ہاں بجا
زندگی کیوں کر گزارے وہ جو اس میں شک کرے
یہ حسین فطرت کے حسن کا انیلا پن
زندگی کے عارض پر یہ کریہہ پیلا پن
اف یہ بیتی راتوں کی یاد کا کٹیلا پن
آنے والی صبحوں کے دھیان کا رسیلا پن
کھائے گا شکست اک دن صبر و ضبط پیہم سے
درد کا تسلسل اور جبر کا ہٹیلا پن
زندگی کی موسیقی کس ستم کی شاکی ہے
حزن ہے نواؤں میں لے میں ہے چٹیلا پن
بہار فکر کے جلوے لٹا دیے ہم نے
جنون عشق کے دریا بہا دیے ہم نے
فروغ دانش و برہاں کے شعلے بھڑکا کر
توہمات کے خرمن جلا دیے ہم نے
گرا کے درک و بصیرت کی بجلیاں پیہم
تعصبات کے ٹکڑے اڑا لیے ہم نے
بنا کے فکر و تدبر کو خادم انساں
مقدرات کے چھکے چھڑا دیے ہم نے
شعور نقد کی صحت پسندیوں کی قسم
عقیدتوں کے پرخچے اڑا دیے ہم نے
مٹا کے تفرقۂ خاص و عام کی لعنت
حقوق خاص ٹھکانے لگا دیے ہم نے
فتادگان زمیں کا بلند کر کے علم
فلک نشینوں کے پرچم جھکا دیے ہم نے
نئے شعور سے ذہنوں میں بجلیاں بھر دیں
نئی امنگوں سے دل جگمگا دیے ہم نے
گماں حیات پہ ہوتا ہے گیت کی لے کا
کچھ ایسے گیت جہاں کو سنا دیے ہم نے
طلسم توڑ کے جھوٹی حقیقتوں کے تمام
عجائبات کے جادو جگا دیے ہم نے
ورائے چرخ تھے آباد جس قدر فردوس
زمیں کی سطح پہ لا کر بسا دیے ہم نے
بنا کے محنت انساں کو ایک قدر بلند
زمیں پہ چاند ستارے بچھا دیے ہم نے
جلا کے عظمت آدم کی شمع دیرینہ
چراغ دیر و حرم کے بجھا دیے ہم نے
جو درک رکھتے ہیں اختر وہ سمجھیں اور بتائیں
یہ کس شراب کے ساغر لنڈھا دیے ہم نے
کسی سے لڑائیں نظر اور جھیلیں محبت کے غم اتنی فرصت کہاں
اٹھائیں کسی ماہ پیکر حسینہ کے جور و ستم اتنی فرصت کہاں
زمانے کی بے رحمیوں کے تصدق دماغ نشاط و الم ہی نہیں
دل اپنا کرے آرزوئے جفا یا امید کرم اتنی فرصت کہاں
ڈبو دیں مئے ناب کی مستیوں میں فلاکت کے نکبت کے احساس کو
بنا لیں کسی عامانہ سے کوزے ہی کو جام جم اتنی فرصت کہاں
ہوں آزاد افکار لیکن تفکر میں ڈوبے ہوئے سے رہیں رات دن
طبیعت کی بے وجہ افسردگی کے مزے لوٹیں ہم اتنی فرصت کہاں
نہ ماضی ہمارا نہ مستقبل اپنا کچھ اس طور سے حرف امروز ہیں
غم دوش یا فکر فردا میں اخترؔ کریں سر کو خم اتنی فرصت کہاں
خواہش عیش نہیں درد نہانی کی قسم
بوالہوس کھایا کریں عشرت فانی کی قسم
اک غم انگیز حقیقت ہے ہماری ہستی
قصہ خواں تیری غم انگیز کہانی کی قسم
دل کی گہرائیوں میں آگ دبی رکھتا ہوں
چشم گریاں سے برستے ہوئے پانی کی قسم
جب سے آئی ہے خدا رکھے جوانی اخترؔ
ہم ہر اک بات پہ کھاتے ہیں جوانی کی قسم
حیات انساں کی سر تا پا زباں معلوم ہوتی ہے
یہ دنیا انقلاب آسماں معلوم ہوتی ہے
مکدر ہے خزاں کے خون سے عیش بہار گل
خزاں کی رت بہار بے خزاں معلوم ہوتی ہے
مجھے ناکامی پیہم سے مایوسی نہیں ہوتی
ابھی امید میری نوجواں معلوم ہوتی ہے
کوئی جب نالہ کرتا ہے کلیجہ تھام لیتا ہوں
فغان غیر بھی اپنی فغاں معلوم ہوتی ہے
مآل درد و غم دیکھو صدائے ساز عشرت بھی
اتر جاتی ہے جب دل میں فغاں معلوم ہوتی ہے
چمن میں عندلیب زار کی فریاد اے اخترؔ
دل ناداں کو اپنی داستاں معلوم ہوتی ہے
سرشار ہوں چھلکتے ہوئے جام کی قسم
مست شراب شوق ہوں خیام کی قسم
عشرت فروش تھا مرا گزرا ہوا شباب
کہتا ہوں کھا کے عشرت ایام کی قسم
ہوتی تھی صبح عید مری صبح پر نثار
کھاتی تھی شام عیش مری شام کی قسم
اخترؔ مذاق درد کا مارا ہوا ہوں میں
کھاتے ہیں اہل درد مرے نام کی قسم
پر کیف ضیائیں ہوتی ہیں پر نور اجالے ہوتے ہیں
جب خاک بسر دل ہوتا ہے اور عرش پہ نالے ہوتے ہیں
ہنستے ہیں دہان زخم سے ہم گاتے ہیں فغاں کے بربط پر
آشفتہ سروں کی دنیا کے سب ڈھنگ نرالے ہوتے ہیں
کیا قہر برستا ہے دل پر ساون کی شبوں میں کیا کہئے
کچھ درد کی پھواریں ہوتی ہیں کچھ یاس کے جھالے ہوتے ہیں
ان اجڑے ہوئے ارمانوں کو کس شوق سے دل نے سینچا تھا
برباد مگر ہوتے ہیں وہی جو نام کے پالے ہوتے ہیں
چاہت کے ستم برداشت کریں مر مر کے جئیں اور مر نہ سکیں
کیا جانئے کس مٹی کے بنے یہ چاہنے والے ہوتے ہیں
دل تنگ نہ ہو اے رہرو غم کانٹوں کے لئے تو کم سے کم
مانند نوید ابر کرم یہ پاؤں کے چھالے ہوتے ہیں
اف رے وہ نزاکت لہجے کی باتیں جو نکلتی ہیں منہ سے
یا چاند کی کرنیں ہوتی ہیں یا برف کے گالے ہوتے ہیں
یہ درد جنوں یہ سوز جگر ان کیفتیوں کے گرد اخترؔ
تسخیر کے حلقے ہوں کہ نہ ہوں تقدیس کے ہالے ہوتے ہیں
دن مرادوں کے عیش کی راتیں
ہائے کیا ہو گئیں وہ برساتیں
رات کو باغ میں ملاقاتیں
یاد ہیں جیسے خواب کی باتیں
حسرتیں سرد آہیں گرم آنسو
لائی ہے برشگال سوغاتیں
خوار ہیں یوں مرے شباب کے دن
جیسے جاڑوں کی چاندنی راتیں
دل یہ کہتا ہے کنج راحت ہوں
دیکھنا غم نصیب کی باتیں
جن کے دم سے شباب تھا زندہ
ہائے اخترؔ وہ عشق کی گھاتیں
جو داغ بن کے تمنا تمام ہو جائے
ہمیں تو خون بھی رونا حرام ہو جائے
شباب درد مری زندگی کی صبح سہی
پیوں شراب یہاں تک کہ شام ہو جائے
یہی ہے مصلحت انتہائے راز اخترؔ
جہاں میں رسم محبت نہ عام ہو جائے
صدا کچھ ایسی مرے گوش دل میں آتی ہے
کوئی بنائے کہن جیسے لڑکھڑاتی ہے
رچا ہوا ہے فضاؤں میں ایک اتھاہ ہراس
دماغ شل ہے مگر روح سنسناتی ہے
مجھے یقین ہے آندھی کوئی اٹھی ہے کہیں
کہ لو چراغ شبستاں کی تھرتھراتی ہے
امید یاس کے گہرے خموش جنگل میں
ہوائے شام کی مانند سرسراتی ہے
سوال ہے غم ہستی کے بیت جانے کا
یہ زندگی تو بہرحال بیت جاتی ہے
خیال عمر گزشتہ ذرا توقف کر
زمین قدموں کے نیچے سے نکلی جاتی ہے
میں اپنی آگ میں جل کر کبھی کا خاک ہوا
یہ زندگی مجھے کیا خاک میں ملاتی ہے
نشانہ باز فلک تیرے ناوکوں کی خیر
کہ جن کی زد پہ مرے حوصلوں کی چھاتی ہے
لچک ہی جاتی ہے شاخ اپنے آشیاں کی بھی
چمن میں گاتی ہوئی جب بہار آتی ہے
فغان درد لبوں پر نہ آئیو زنہار
مری سلیقہ شعاری پہ بات آتی ہے
ادھر یہ گریۂ ابر اور ادھر وہ خندۂ برق
مزاج دہر مرے دوست طنزیاتی ہے
رہین رسم روایت ہو جس کی بت شکنی
وہ بت شکن بھی حقیقت میں سومناتی ہے
بپا ہے شور قیامت دماغ میں اخترؔ
زبان خامہ مگر زمزمے لٹاتی ہے
قسم ان آنکھوں کی جن سے لہو ٹپکتا ہے
مرے جگر میں اک آتش کدہ دہکتا ہے
گزشتہ کاہش و اندوہ کے خیال ٹھہر
مرے دماغ میں شعلہ سا اک بھڑکتا ہے
کسی کے عیش تمنا کی داستاں نہ کہو
کلیجہ میری تمناؤں کا دھڑکتا ہے
علاج اخترؔ ناکام کیوں نہیں ممکن
اگر وہ جی نہیں سکتا تو مر تو سکتا ہے
طبع عشرت پسند رکھتا ہوں
اک دل دردمند رکھتا ہوں
بہت کہتا نہیں میں پستی کو
اپنی فطرت بلند رکھتا ہوں
چشم باطن سے دیکھتا ہوں میں
چشم ظاہر کو بند رکھتا ہوں
لفظ شیریں ہیں اور معنی تلخ
زہر آمیز قند رکھتا ہوں
کامیابی محال ہے اخترؔ
ذوق اتنا بلند رکھتا ہوں
ترا آسماں ناوکوں کا خزینہ حیات آفرینا حیات آفرینا
ہماری زمیں لعل و گل کا دفینہ حیات آفرینا حیات آفرینا
ہوئے نام اور ننگ سب غرق صہبا مری مے گساری کی ہوگی سزا کیا
ترے نام کا ایک جرعہ یہی نا حیات آفرینا حیات آفرینا
ترے وعدۂ رزق کی ہے دہائی اگر رزق آزوقۂ روح بھی ہے
تو ہم تو ہیں محروم نان شبینہ حیات آفرینا حیات آفرینا
نہ سانسوں میں جوش نمو کا تلاطم نہ مرنے کے غم میں گداز تألم
یہ جینا بھی ہے کوئی جینے میں جینا حیات آفرینا حیات آفرینا
زمیں کا کلیجہ بہت پھنک رہا ہے فلک پھٹ پڑے قلزم خوں رواں ہو
جبین مشیت سے ٹپکے پسینہ حیات آفرینا حیات آفرینا
مہ و مہر و انجم فلک کے دلارے تری مملکت کے حسیں شاہزادے
ہماری زمیں کائناتی حسینہ حیات آفرینا حیات آفرینا
نہیں اخترؔ زار مایوس خود سے کہ ظلمت بھی چھٹتی ہے درجہ بہ درجہ
اترتی ہے رحمت بھی زینہ بہ زینہ حیات آفرینا حیات آفرینا
یہ صنم روایت و نقل کے ہبل و منات سے کم نہیں
تیرا فکر واعظ حق نوا کسی سومنات سے کم نہیں
کہیں برق چمکے میں جل اٹھوں کوئی تارا ٹوٹے میں رو پڑوں
یہ دل ستم زدہ ہم نشیں دل کائنات سے کم نہیں
کہیں رنگ و نور جمال ہے کہیں بیم و فکر مآل ہے
کہیں شام غیرت صبح ہے کہیں دن بھی رات سے کم نہیں
جسے کہئے رقص شرار غم وہ اگر ہو شامل غم تو پھر
غم دل ہو یا غم زندگی غم کائنات سے کم نہیں
یہ سرور اخترؔ دل زدہ رجز بہار و شباب ہے
یہ بلند ہوتی ہوئی فغاں علم حیات سے کم نہیں
\
لطف لے لے کے پیے ہیں قدح غم کیا کیا
ہم نے فردوس بنائے ہیں جہنم کیا کیا
آنسوؤں کو بھی پیا جرعۂ صہبا کی طرح
ساغر و جام بنے دیدۂ پر نم کیا کیا
حلقۂ دام وفا عقدۂ غم موج نشاط
یہ زمانہ بھی دکھاتا ہے چم و خم کیا کیا
لذت ہجر کبھی عشرت دیدار کبھی
آرزو نے بھی طبیعت کو دیئے دم کیا کیا
کس کس انداز سے کھٹکے رگ گل کے نشتر
تپش افروز ہوئے شعلہ و شبنم کیا کیا
شام ویراں کی اداسی شب تیرہ کا سکوت
دل محزوں کو ملے ہمدم و محرم کیا کیا
ہائے وہ عالم بے نام کہ جس عالم میں
بیت جاتے ہیں دل زار پہ عالم کیا کیا
عصمت و رفعت انجم سے خیال آتا ہے
خاک میں روندی گئی حرمت آدم کیا کیا
دب گئے منت مزدور سے ایواں کتنے
جھک گئے غیرت مفتوح سے پرچم کیا کیا
تھے مسلح غم معشوق سے گو ہم اخترؔ
پھر بھی دکھلائے غم دہر نے دم خم کیا کیا
شعلے بھڑکاؤ دیکھتے کیا ہو
جل اٹھے گھاؤ دیکھتے کیا ہو
غرق خوناب ہونے والی ہے
درد کی ناؤ دیکھتے کیا ہو
دل کسی یاد نے چھوا ہوگا
آگے بڑھ جاؤ دیکھتے کیا ہو
انجم چرخ فکر آدم کا
چل گیا داؤ دیکھتے کیا ہو
پیے بیٹھے ہیں زہر دوراں ہم
جام اٹھواؤ دیکھتے کیا ہو
حسن سے لو نظر کی بھیک اخترؔ
ہاتھ پھیلاؤ دیکھتے کیا ہو
اپنی بہار پہ ہنسنے والو کتنے چمن خاشاک ہوئے
اپنے رفو کو گننے والو کتنے گریباں چاک ہوئے
دیوانوں کو کون بتائے آج کی رسم اور آج کی بات
اس نے انہیں کی سمت نظر کی عشق میں جو بے باک ہوئے
شعبدۂ یک طرز کرم ہے کیسی سزا اور کیسی جزا
موج تبسم جب لہرائی تر دامن بھی پاک ہوئے
رخ دیکھا جس سمت ہوا کا اس جانب منہ کر کے چلے
دشت جنوں کے دیوانے بھی مثل صبا چالاک ہوئے
خاک نشیمن جب اڑتی ہے دل سے دھواں سا اٹھتا ہے
حادثے اس گلزار میں ورنہ اور بہت غم ناک ہوئے
دیکھتے دیکھتے دنیا بدلی گلشن کیا ویرانہ کیا
پربت پربت نقش تھے جن کے مٹتے مٹتے خاک ہوئے
جان چمن جو گل تھے اخترؔ وہ تو ہوئے معتوب و ذلیل
زیب گلستاں رونق گلشن کل کے خس و خاشاک ہوئے
اب وہ سینہ ہے مزار آرزو
تھا جو اک دن شعلہ زار آرزو
اب تک آنکھوں سے ٹپکتا ہے لہو
بجھ گیا تھا دل میں خار آرزو
رنگ و بو میں ڈوبے رہتے تھے حواس
ہائے کیا شے تھی بہار آرزو
اب وہ سینہ ہے مزار آرزو
تھا جو اک دن شعلہ زار آرزو
اب تک آنکھوں سے ٹپکتا ہے لہو
بجھ گیا تھا دل میں خار آرزو
رنگ و بو میں ڈوبے رہتے تھے حواس
ہائے کیا شے تھی بہار آرزو
بہار آئی زمانہ ہوا خراباتی
ہمارے دل میں بھی اک لہر کاش آ جاتی
ہوا بھی سرد ہے بھیگی ہے رات بھی لیکن
سلگ رہی ہے کسی آگ سے مری چھاتی
مرے پڑوس میں یہ ذکر ہے کئی دن سے
صدا جو آتی تھی رونے کی اب نہیں آتی
لگا کے سینے سے شادابیوں کو سو جاتا
مجھے بہار جوانی میں موت آ جاتی
بجا رہا ہے کوئی رات میں ستار اخترؔ
دھڑک رہی ہے مری آرزوؤں کی چھاتی
سنا کے اپنے عیش تام کی روداد کے ٹکڑے
اڑا دوں گا کسی دن چرخ کی بیداد کے ٹکڑے
اسیری کو عطا کر کے اسیری کا شرف ہم نے
اڑا ڈالے خود اپنی فطرت آزاد کے ٹکڑے
کہاں کا آدمی انسان کیسا ماحصل یہ ہے
کہیں اشخاص کے پرزے کہیں افراد کے ٹکڑے
تباہی کے مزوں سے بھی گئے اب واۓ محرومی
سمیٹوں گا کہاں تک حسرت برباد کے ٹکڑے
یہ سینہ تلخ یادوں کا خزینہ ہی سہی لیکن
بہت چبھتے ہیں دل میں اک نکیلی یاد کے ٹکڑے
تم اچھے ہی سہی میرا برا ہونا بھی ہے برحق
کہ ہم سب ہیں کسی مجموعۂ اضداد کے ٹکڑے
ہمیں لخت جگر کھانے کو ہرگز کم نہ تھا اخترؔ
مگر قسمت میں لکھے تھے جہان آباد کے ٹکڑے
دل فسردہ میں کچھ سوز و ساز باقی ہے
وہ آگ بجھ گئی لیکن گداز باقی ہے
نیاز کیش بھی میری طرح نہ ہو کوئی
امید مر چکی ذوق نیاز باقی ہے
وہ ابتداے محبت کی لذتیں واللہ
کہ اب بھی روح میں اک اہتزاز باقی ہے
نہ ساز دل ہے اب اخترؔ نہ حسن کی مضراب
مگر وہ فطرت نغمہ نواز باقی ہے
چرخ کی سعیٔ جفا کوشش ناکارہ ہے
گردش دہر یہاں جنبش گہوارہ ہے
چاند تاروں کے تلاطم سے یہ آتا ہے خیال
دل وحشی کوئی طوفاں زدہ سیارہ ہے
بہہ گئے دیدۂ نم ناک سے دریا لیکن
دل وہی ایک دہکتا ہوا انگارہ ہے
دل ہوا سوز جہنم میں گرفتار مگر
روح اب بھی کسی فردوس میں آوارہ ہے
کیسی تقدیر کی گردش غم دل کو میں نے
گردش گنبد افلاک پہ دے مارا ہے
میرے شعروں سے تعرض نہ کر اے ناقد فن
میری بربادئ دل ہی مرا شہ پارا ہے
بہجت فکر پہ قادر ہوں میں جب تک اخترؔ
مجھے سرمایۂ اندوہ بہت پیارا ہے
جاں سپاری کے بھی ارماں زندگی کی آس بھی
حفظ ناموس الم بھی نیش غم کا پاس بھی
خاک در بر ہی سہی میں خاک بھی وہ خاک ہے
جس میں میرے زخم دل کی بو بھی ہے اور باس بھی
کتنے دور چرخ ان آنکھوں نے دیکھے کچھ نہ پوچھ
مٹ چکا ہے وقت کی رفتار کا احساس بھی
ہائے وہ اک نشتر آگیں نیشتر افروز یاد
جس کے آگے ہیچ اپنی برش انفاس بھی
ہم نہ تھے کچھ خود ہی اس سودے پہ راضی ورنہ یوں
راس آنے کو یہ دنیا آ ہی جاتی راس بھی
خود کو اے دل یاس کامل کے حوالے یوں نہ کر
جھانکتی ہے ذہن کے غرفے سے کوئی آس بھی
کون اس وادی سے اچھلا تا سر عرش بریں
گم ہیں جس وادی میں اخترؔ خضر بھی الیاس بھی
مطرب دل کی وہ تانیں کیا ہوئیں
وہ تخیل کی اڑانیں کیا ہوئیں
کیا ہوئے وہ ترچھی نظروں کے خدنگ
ابرووں کی وہ کمانیں کیا ہوئیں
وہ ادائیں جن پہ ہوتی تھیں نثار
چاہنے والوں کی جانیں کیا ہوئیں
کیا ہوئے ٹوٹے دلوں کے زمزمے
بے زبانوں کی زبانیں کیا ہوئیں
کیا ہوئے اخترؔ امیدوں کے حصار
وہ عزائم کی چٹانیں کیا ہوئیں
مزید شاعری پڑھیے اور دوسرے شعراء کو دریافت کیجیے۔