شاعر کی معلومات لوڈ ہو رہی ہیں...
دشت میں پیاس بجھاتے ہوئے مر جاتے ہیں
ہم پرندے کہیں جاتے ہوئے مر جاتے ہیں
شاعر کی معلومات لوڈ ہو رہی ہیں...
Abbas tabish
1961 – حال
Abbas Tabish, born on June 15, 1961, in Mailsi Tehsil of Vehari District, Punjab, Pakistan, is a distinguished contemporary Urdu poet celebrated for his emotive and thought-provoking poetry. After completing his master's degree from Government College Lahore in 1986, he embarked on an academic career and currently serves as an Assistant Professor at Government College, Lahore. His literary contributions have earned him the prestigious Pride of Performance award, recognizing his significant impact on Urdu literature. Tabish's poetry, known for its modern sensibility and deep emotional resonance, has garnered acclaim not only in Pakistan but also in India and among Urdu-speaking communities worldwide. His works, including collections like Ishqabad, Tamheed, and Aasman, delve into themes of love, loss, and the human experience, solidifying his place as a prominent voice in contemporary Urdu poetry.
ان کے کلام کے چند منتخب اشعار پڑھیے۔
دشت میں پیاس بجھاتے ہوئے مر جاتے ہیں
ہم پرندے کہیں جاتے ہوئے مر جاتے ہیں
ہم ہیں سوکھے ہوئے تالاب پہ بیٹھے ہوئے ہنس
جو تعلق کو نبھاتے ہوئے مر جاتے ہیں
گھر پہنچتا ہے کوئی اور ہمارے جیسا
ہم ترے شہر سے جاتے ہوئے مر جاتے ہیں
کس طرح لوگ چلے جاتے ہیں اٹھ کر چپ چاپ
ہم تو یہ دھیان میں لاتے ہوئے مر جاتے ہیں
ان کے بھی قتل کا الزام ہمارے سر ہے
جو ہمیں زہر پلاتے ہوئے مر جاتے ہیں
یہ محبت کی کہانی نہیں مرتی لیکن
لوگ کردار نبھاتے ہوئے مر جاتے ہیں
ہم ہیں وہ ٹوٹی ہوئی کشتیوں والے تابشؔ
جو کناروں کو ملاتے ہوئے مر جاتے ہیں
ہنسنے نہیں دیتا کبھی رونے نہیں دیتا
یہ دل تو کوئی کام بھی ہونے نہیں دیتا
تم مانگ رہے ہو مرے دل سے مری خواہش
بچہ تو کبھی اپنے کھلونے نہیں دیتا
میں آپ اٹھاتا ہوں شب و روز کی ذلت
یہ بوجھ کسی اور کو ڈھونے نہیں دیتا
وہ کون ہے اس سے تو میں واقف بھی نہیں ہوں
جو مجھ کو کسی اور کا ہونے نہیں دیتا
پانی آنکھ میں بھر کر لایا جا سکتا ہے
اب بھی جلتا شہر بچایا جا سکتا ہے
ایک محبت اور وہ بھی ناکام محبت
لیکن اس سے کام چلایا جا سکتا ہے
دل پر پانی پینے آتی ہیں امیدیں
اس چشمے میں زہر ملایا جا سکتا ہے
مجھ گمنام سے پوچھتے ہیں فرہاد و مجنوں
عشق میں کتنا نام کمایا جا سکتا ہے
یہ مہتاب یہ رات کی پیشانی کا گھاؤ
ایسا زخم تو دل پر کھایا جا سکتا ہے
پھٹا پرانا خواب ہے میرا پھر بھی تابشؔ
اس میں اپنا آپ چھپایا جا سکتا ہے
میری تنہائی بڑھاتے ہیں چلے جاتے ہیں
ہنس تالاب پہ آتے ہیں چلے جاتے ہیں
اس لیے اب میں کسی کو نہیں جانے دیتا
جو مجھے چھوڑ کے جاتے ہیں چلے جاتے ہیں
میری آنکھوں سے بہا کرتی ہے ان کی خوشبو
رفتگاں خواب میں آتے ہیں چلے جاتے ہیں
شادیٔ مرگ کا ماحول بنا رہتا ہے
آپ آتے ہیں رلاتے ہیں چلے جاتے ہیں
کب تمہیں عشق پہ مجبور کیا ہے ہم نے
ہم تو بس یاد دلاتے ہیں چلے جاتے ہیں
آپ کو کون تماشائی سمجھتا ہے یہاں
آپ تو آگ لگاتے ہیں چلے جاتے ہیں
ہاتھ پتھر کو بڑھاؤں تو سگان دنیا
حیرتی بن کے دکھاتے ہیں چلے جاتے ہیں
یہ عجب ساعت رخصت ہے کہ ڈر لگتا ہے
شہر کا شہر مجھے رخت سفر لگتا ہے
رات کو گھر سے نکلتے ہوئے ڈر لگتا ہے
چاند دیوار پے رکھا ہوا سر لگتا ہے
ہم کو دل نے نہیں حالات نے نزدیک کیا
دھوپ میں دور سے ہر شخص شجر لگتا ہے
جس پہ چلتے ہوئے سوچا تھا کہ لوٹ آؤں گا
اب وہ رستہ بھی مجھے شہر بدر لگتا ہے
مجھ سے تو دل بھی محبت میں نہیں خرچ ہوا
تم تو کہتے تھے کہ اس کام میں گھر لگتا ہے
وقت لفظوں سے بنائی ہوئی چادر جیسا
اوڑھ لیتا ہوں تو سب خواب ہنر لگتا ہے
اس زمانہ میں تو اتنا بھی غنیمت ہے میاں
کوئی باہر سے بھی درویش اگر لگتا ہے
اپنے شجرے کہ وہ تصدیق کرائے جا کر
جس کو زنجیر پہنتے ہوئے ڈر لگتا ہے
ایک مدت سے مری ماں نہیں سوئی تابشؔ
میں نے اک بار کہا تھا مجھے ڈر لگتا ہے
جو بھی من جملۂ اشجار نہیں ہو سکتا
کچھ بھی ہو جائے مرا یار نہیں ہو سکتا
اک محبت تو کئی بار بھی ہو سکتی ہے
ایک ہی شخص کئی بار نہیں ہو سکتا
جس سے پوچھیں ترے بارے میں یہی کہتا ہے
خوب صورت ہے وفادار نہیں ہو سکتا
پاؤں پڑتا ہوا رستہ نہیں دیکھا جاتا
جانے والے ترا جانا نہیں دیکھا جاتا
تیری مرضی ہے جدھر انگلی پکڑ کر لے جا
مجھ سے اب تیرے علاوہ نہیں دیکھا جاتا
یہ حسد ہے کہ محبت کی اجارہ داری
درمیاں اپنا بھی سایہ نہیں دیکھا جاتا
تو بھی اے شخص کہاں تک مجھے برداشت کرے
بار بار ایک ہی چہرہ نہیں دیکھا جاتا
یہ ترے چاہنے والے بھی عجب ہیں جاناں
عشق کرتے ہیں کہ ہوتا نہیں دیکھا جاتا
یہ تیرے بعد کھلا ہے کہ جدائی کیا ہے
مجھ سے اب کوئی اکیلا نہیں دیکھا جاتا
تیرے لیے سب چھوڑ کے تیرا نہ رہا میں
دنیا بھی گئی عشق میں تجھ سے بھی گیا میں
اک سوچ میں گم ہوں تری دیوار سے لگ کر
منزل پہ پہنچ کر بھی ٹھکانے نہ لگا میں
ورنہ کوئی کب گالیاں دیتا ہے کسی کو
یہ اس کا کرم ہے کہ تجھے یاد رہا میں
میں تیز ہوا میں بھی بگولے کی طرح تھا
آیا تھا مجھے طیش مگر جھوم اٹھا میں
اس درجہ مجھے کھوکھلا کر رکھا تھا غم نے
لگتا تھا گیا اب کے گیا اب کے گیا میں
یہ دیکھ مرا ہاتھ مرے خون سے تر ہے
خوش ہو کہ ترا مد مقابل نہ رہا میں
اک دھوکے میں دنیا نے مری رائے طلب کی
کہتے تھے کہ پتھر ہوں مگر بول پڑا میں
اب طیش میں آتے ہی پکڑ لیتا ہوں پاؤں
اس عشق سے پہلے کبھی ایسا تو نہ تھا میں
کوئی ٹکرا کے سبک سر بھی تو ہو سکتا ہے
میری تعمیر میں پتھر بھی تو ہو سکتا ہے
کیوں نہ اے شخص تجھے ہاتھ لگا کر دیکھوں
تو مرے وہم سے بڑھ کر بھی تو ہو سکتا ہے
تو ہی تو ہے تو پھر اب جملہ جمال دنیا
تیرا شک اور کسی پر بھی تو ہو سکتا ہے
یہ جو ہے پھول ہتھیلی پہ اسے پھول نہ جان
میرا دل جسم سے باہر بھی تو ہو سکتا ہے
شاخ پر بیٹھے پرندے کو اڑانے والے
پیڑ کے ہاتھ میں پتھر بھی تو ہو سکتا ہے
کیا ضروری ہے کہ باہر ہی نمو ہو میری
میرا کھلنا مرے اندر بھی تو ہو سکتا ہے
یہ جو ہے ریت کا ٹیلہ مرے قدموں کے تلے
کوئی دم میں مرے اوپر بھی تو ہو سکتا ہے
کیا ضروری ہے کہ ہم ہار کے جیتیں تابشؔ
عشق کا کھیل برابر بھی تو ہو سکتا ہے
دی ہے وحشت تو یہ وحشت ہی مسلسل ہو جائے
رقص کرتے ہوئے اطراف میں جنگل ہو جائے
اے مرے دشت مزاجو یہ مری آنکھیں ہیں
ان سے رومال بھی چھو جائے تو بادل ہو جائے
چلتا رہنے دو میاں سلسلہ دل داری کا
عاشقی دین نہیں ہے کہ مکمل ہو جائے
حالت ہجر میں جو رقص نہیں کر سکتا
اس کے حق میں یہی بہتر ہے کہ پاگل ہو جائے
میرا دل بھی کسی آسیب زدہ گھر کی طرح
خودبخود کھلنے لگے خود ہی مقفل ہو جائے
ڈوبتی ناؤ میں سب چیخ رہے ہیں تابشؔ
اور مجھے فکر غزل میری مکمل ہو جائے
کوئی ملتا نہیں یہ بوجھ اٹھانے کے لیے
شام بے چین ہے سورج کو گرانے کے لیے
اپنے ہم زاد درختوں میں کھڑا سوچتا ہوں
میں تو آیا تھا انہیں آگ لگانے کے لیے
میں نے تو جسم کی دیوار ہی ڈھائی ہے فقط
قبر تک کھودتے ہیں لوگ خزانے کے لیے
دو پلک بیچ کبھی راہ نہ پائی ورنہ
میں نے کوشش تو بہت کی نظر آنے کے لیے
لفظ تو لفظ یہاں دھوپ نکل آتی ہے
تیری آواز کی بارش میں نہانے کے لیے
کس طرح ترک تعلق کا میں سوچوں تابشؔ
ہاتھ کو کاٹنا پڑتا ہے چھڑانے کے لیے
اتنا آساں نہیں مسند پہ بٹھایا گیا میں
شہر تہمت تری گلیوں میں پھرایا گیا میں
میرے ہونے سے یہاں آئی ہے پانی کی بہار
شاخ گریہ تھا سر دشت لگایا گیا میں
یہ تو اب عشق میں جی لگنے لگا ہے کچھ کچھ
اس طرف پہلے پہل گھیر کے لایا گیا میں
خوب اتنا تھا کہ دیوار پکڑ کر نکلا
اس سے ملنے کے لیے صورت سایہ گیا میں
تجھ سے کچھ کہنے کی ہمت ہی نہیں تھی ورنہ
ایک مدت تری دہلیز تک آیا گیا میں
خلوت خاص میں بلوانے سے پہلے تابشؔ
عام لوگوں میں بہت دیر بٹھایا گیا میں
شعر لکھنے کا فائدہ کیا ہے
اس سے کہنے کو اب رہا کیا ہے
پہلے سے طے شدہ محبت میں
تو بتا تیرا مشورہ کیا ہے
سرخ کیوں ہو رہے ہیں تیرے کان
میں نے تجھ سے ابھی کہا کیا ہے
آنکھیں مل مل کے دیکھتا ہوں اسے
دوپہر میں یہ چاند سا کیا ہے
میرا ہم عصر صبح کا تارا
میرے بارے میں جانتا کیا ہے
سوچتے ہونٹ بولتی آنکھیں
حیرتی کا مکالمہ کیا ہے
شور سا اٹھ رہا ہے چار طرف
کچھ گرا ہے مگر گرا کیا ہے
میں یہاں سے پلٹنا چاہتا ہوں
اے خدا تیرا مشورہ کیا ہے
جسم کے اس طرف ہے گل آباد
پھاند دیوار دیکھتا کیا ہے
میری خود سے مفاہمت نہ ہوئی
تو بتا تیرا مسئلہ کیا ہے
اس لئے بولنے پہ ہوں مجبور
آپ سوچیں گے سوچتا کیا ہے
یہ بہت دیر میں ہوا معلوم
عشق کیا ہے مغالطہ کیا ہے
میں تو عادی ہوں خاک چھاننے کا
تم بتاؤ کہ ڈھونڈھنا کیا ہے
عشق کر کے بھی کھل نہیں پایا
تیرا میرا معاملہ کیا ہے
میں بنا تھا کھنکتی مٹی سے
میرے اندر سکوت سا کیا ہے
عجیب طور کی ہے اب کے سرگرانی مری
میں تجھ کو یاد بھی کر لوں تو مہربانی مری
میں اپنے آپ میں گہرا اتر گیا شاید
مرے سفر سے الگ ہو گئی روانی مری
بس ایک موڑ مری زندگی میں آیا تھا
پھر اس کے بعد الجھتی گئی کہانی مری
تباہ ہو کے بھی رہتا ہے دل کو دھڑکا سا
کہ رائیگاں نہ چلی جائے رائیگانی مری
میں اپنے بعد بہت یاد آیا کرتا ہوں
تم اپنے پاس نہ رکھنا کوئی نشانی مری
ہوائے تیز ترا ایک کام آخری ہے
کہ نخل خشک پہ ماہ تمام آخری ہے
میں جس سکون سے بیٹھا ہوں اس کنارے پر
سکوں سے لگتا ہے میرا قیام آخری ہے
پھر اس کے بعد یہ بازار دل نہیں لگنا
خرید لیجئے صاحب غلام آخری ہے
گزر چلا ہوں کسی کو یقیں دلاتا ہوا
کہ لوح دل پہ رقم ہے جو نام آخری ہے
تبھی تو پیڑ کی آنکھوں میں چاند بھر آیا
کسی نے کہہ دیا ہوگا کہ شام آخری ہے
یہ لگ رہا ہے محبت کے پہلے زینے پر
کہ جس مقام پہ ہوں یہ مقام آخری ہے
کسی نے پھر سے کھڑے کر دیے در و دیوار
خیال تھا کہ مرا انہدام آخری ہے
ہمارے جیسے وہاں کس شمار میں ہوں گے
کہ جس قطار میں مجنوں کا نام آخری ہے
شروع عشق میں ایسی اداسیاں تابشؔ
ہر ایک شام یہ لگتا ہے شام آخری ہے
ہم نے چپ رہ کے جو ایک ساتھ بتایا ہوا ہے
وہ زمانا مری آواز میں آیا ہوا ہے
غیر مانوس سی خوشبو سے لگا ہے مجھ کو
تو نے یہ ہاتھ کہیں اور ملایا ہوا ہے
میں اسے دیکھ کے لوٹا ہوں تو کیا دیکھتا ہوں
شہر کا شہر مجھے دیکھنے آیا ہوا ہے
یاد کر کر کے اسے وقت گزارا جائے
کس کو فرصت ہے وہاں کون دوبارہ جائے
شک سا ہوتا ہے ہر اک پہ کہ کہیں تو ہی نہ ہو
اب ترے نام سے کس کس کو پکارا جائے
سائرہ تجھ کو بہت یاد ہیں اس کی باتیں
کیوں نہ کچھ وقت ترے ساتھ گزارا جائے
جس طرح پیڑ کو بڑھنے نہیں دیتی کوئی بیل
کیا ضروری ہے مجھے گھیر کے مارا جائے
عین ممکن ہے کہ ہو اس سے علاج وحشت
شہر میں زور سے اک نام پکارا جائے
اس حسیں شخص کی خاطر جو کہا ہے تابشؔ
کم ہے اس شعر کو جتنا بھی سنوارا جائے
آنکھ پہ پٹی باندھ کے مجھ کو تنہا چھوڑ دیا ہے
یہ کس نے صحرا میں لا کر صحرا چھوڑ دیا ہے
جسم کی بوری سے باہر بھی کبھی نکل آؤں گا
ابھی تو اس پر خوش ہوں اس نے زندہ چھوڑ دیا ہے
ذہن مرا آزاد ہے لیکن دل کا دل مٹھی میں
آدھا اس نے قید رکھا ہے آدھا چھوڑ دیا ہے
جہاں دعا ملتی تھی اللہ جوڑی سلامت رکھے
میں نے تیرے بعد ادھر سے گزرنا چھوڑ دیا ہے
چاروں شانے چت مٹی پر گرا پڑا ہوں تابشؔ
جانے کس نے دوسری جانب رسہ چھوڑ دیا ہے
میرے اعصاب معطل نہیں ہونے دیں گے
یہ پرندے مجھے پاگل نہیں ہونے دیں گے
تو خدا ہونے کی کوشش تو کرے گا لیکن
ہم تجھے آنکھ سے اوجھل نہیں ہونے دیں گے
یار اک بار پرندوں کو حکومت دے دو
یہ کسی شہر کو مقتل نہیں ہونے دیں گے
یہ جو چہرہ ہیں یہاں چاند سے چہرہ تابشؔ
یہ مرا عشق مکمل نہیں ہونے دیں گے
ڈوب کر بھی نہ پڑا فرق گراں جانی میں
میں ہوں پتھر کی طرح بہتے ہوئے پانی میں
یہ محبت تو بہت بعد کا قصہ ہے میاں
میں نے اس ہاتھ کو پکڑا تھا پریشانی میں
رفتگاں تم نے عبث ڈھونگ رچایا ورنہ
عشق کو دخل نہیں موت کی ارزانی میں
یہ محبت بھی ولایت کی طرح رکھتی ہے
حالت حال میں یہ حالت حیرانی میں
اس لیے جل کے کبھی راکھ نہیں ہوتا دل
یہ کبھی آگ میں ہوتا ہے کبھی پانی میں
اک محبت ہی پہ موقوف نہیں ہے تابشؔ
کچھ بڑے فیصلے ہو جاتے ہیں نادانی میں
عشق کی جوت جگانے میں بڑی دیر لگی
سائے سے دھوپ بنانے میں بڑی دیر لگی
میں ہوں اس شہر میں تاخیر سے آیا ہوا شخص
مجھ کو اک اور زمانے میں بڑی دیر لگی
یہ جو مجھ پر کسی اپنے کا گماں ہوتا ہے
مجھ کو ایسا نظر آنے میں بڑی دیر لگی
اک صدا آئی جھروکے سے کہ تم کیسے ہو
پھر مجھے لوٹ کے جانے میں بڑی دیر لگی
بولتا ہوں تو مرے ہونٹ جھلس جاتے ہیں
اس کو یہ بات بتانے میں بڑی دیر لگی
میرے عرصے میں کوئی سہل نہ تھا کار سخن
ایک دو شعر کمانے میں بڑی دیر لگی
میں سر خاک کوئی پیڑ نہیں تھا تابشؔ
اس لیے پاؤں جمانے میں بڑی دیر لگی
بہت بیکار موسم ہے مگر کچھ کام کرنا ہے
کہ تازہ زخم ملنے تک پرانا زخم بھرنا ہے
ابھی سادہ ورق پر نام تیرا لکھ کے بیٹھا ہوں
ابھی اس میں مہک آنی ہے تتلی نے اترنا ہے
بڑھے جو حبس تو شاخیں ہلا دینا کہ اب ہم کو
ہوا کے ساتھ جینا ہے ہوا کے ساتھ مرنا ہے
مبادا اس کو دقت ہو نشانے تک پہنچنے میں
سو میں نے پھول سے دیوار کے رخنے کو بھرنا ہے
یہی اک شغل رکھنا ہے اذیت کے دنوں میں بھی
کسی کو بھول جانا ہے کسی کو یاد کرنا ہے
کوئی چہرہ نہ بن پایا مقدر کی لکیروں سے
سو اب اپنی ہتھیلی میں مجھے خود رنگ بھرنا ہے
کوئی رستہ ملے کیوں کر مرے پائے خجالت کو
یہاں تو پاؤں دھرنا بھی کوئی الزام دھرنا ہے
وہ ہر لمحہ دعا دیتے ہیں لمبی عمر کی تابشؔ
مجھے لگتا ہے پیاروں کو بھی رخصت میں نے کرنا ہے
نہ تجھ سے ہے نہ گلا آسمان سے ہوگا
تری جدائی کا جھگڑا جہان سے ہوگا
تمہارے میرے تعلق کا لوگ پوچھتے ہیں
کہ جیسے فیصلہ میرے بیان سے ہوگا
اگر یوں ہی مجھے رکھا گیا اکیلے میں
بر آمد اور کوئی اس مکان سے ہوگا
جدائی طے تھی مگر یہ کبھی نہ سوچا تھا
کہ تو جدا بھی جداگانہ شان سے ہوگا
گزر رہے ہیں مرے دن اسی تفاخر میں
کہ اگلا قیس مرے خاندان سے ہوگا
وہ آنے والا نہیں پھر بھی آنا چاہتا ہے
مگر وہ کوئی مناسب بہانا چاہتا ہے
یہ زندگی ہے یہ تو ہے یہ روزگار کے دکھ
ابھی بتا دے کہاں آزمانا چاہتا ہے
کہ جیسے اس سے ملاقات پھر نہیں ہوگی
وہ ساری باتیں اکٹھی بتانا چاہتا ہے
میں سن رہا ہوں اندھیرے میں آہٹیں کیسی
یہ کون آیا ہے اور کون جانا چاہتا ہے
اسے خبر ہے کہ مجنوں کو راس ہے جنگل
وہ میرے گھر میں بھی پودے لگانا چاہتا ہے
وہ خود غرض ہے محبت کے باب میں تابشؔ
کہ ایک پل کے عوض اک زمانہ چاہتا ہے
بیٹھتا اٹھتا تھا میں یاروں کے بیچ
ہو گیا دیوار دیواروں کے بیچ
جانتا ہوں کیسے ہوتی ہے سحر
زندگی کاٹی ہے بیماروں کے بیچ
میرے اس کوشش میں بازو کٹ گئے
چاہتا تھا صلح تلواروں کے بیچ
وہ جو میرے گھر میں ہوتا تھا کبھی
اب وہ سناٹا ہے بازاروں کے بیچ
تم نے چھوڑا تو مجھے یہ طائراں
بھر کے لے جائیں گے منقاروں کے بیچ
تجھ کو بھی اس کا کوئی احساس ہے
تیری خاطر ٹھن گئی یاروں کے بیچ
شجر سمجھ کے مرا احترام کرتے ہیں
پرندے رات کو مجھ میں قیام کرتے ہیں
سنو تم آخر شب گفتگو درختوں کی
یہ کم کلام بھی کیا کیا کلام کرتے ہیں
کہاں کی زندگی ہم کو تو شرم مار گئی
کہ تیری چیز ہے اور تیرے نام کرتے ہیں
ہمیں تو اس لیے جائے نماز چاہئے ہے
کہ ہم وجود سے باہر قیام کرتے ہیں
اگر کبھی مجھے موجودگاں سے فرصت ہو
تو رفتگاں مری نیندیں حرام کرتے ہیں
لہو کے گھونٹ نہ پیتا تو اور کیا کرتا
وہ کہہ رہے تھے ترا انتظام کرتے ہیں
ہمیں سماعت بے لفظ کی اجازت ہے
ہمارے ساتھ پرندے کلام کرتے ہیں
ابھی تو گھر میں نہ بیٹھیں کہو بزرگوں سے
ابھی تو شہر کے بچے سلام کرتے ہیں
وہ چاند ہو کہ چاند سا چہرہ کوئی تو ہو
ان کھڑکیوں کے پار تماشا کوئی تو ہو
لوگو اسی گلی میں مری عمر کٹ گئی
مجھ کو گلی میں جاننے والا کوئی تو ہو
مجھ کو تو اپنی ذات کا اثبات چاہئے
ہوتا ہے اور میرے علاوہ کوئی تو ہو
جس سمت جائیے وہی دریا ہے سامنے
اس شہر سے فرار کا رستہ کوئی تو ہو
اپنے سوا بھی میں کوئی آواز سن سکوں
وہ برگ خشک ہو کہ پرندہ کوئی تو ہو
یوں ہی خیال آتا ہے بانہوں کو دیکھ کر
ان ٹہنیوں پہ جھولنے والا کوئی تو ہو
ہم اس ادھیڑ بن میں محبت نہ کر سکے
ایسا کوئی نہیں مگر ایسا کوئی تو ہو
مشکل نہیں ہے عشق کا میدان مارنا
لیکن ہماری طرح نہتا کوئی تو ہو
بچپن کا دور عہد جوانی میں کھو گیا
یہ امر واقعہ بھی کہانی میں کھو گیا
لہروں میں کوئی نقشہ کہاں پائیدار ہے
سورج کے بعد چاند بھی پانی میں کھو گیا
آنکھوں تک آ سکی نہ کبھی آنسوؤں کی لہر
یہ قافلہ بھی نقل مکانی میں کھو گیا
اب بستیاں ہیں کس کے تعاقب میں رات دن
دریا تو آپ اپنی روانی میں کھو گیا
تابشؔ کا کیا کہیں کہ وہ زہرہ گداز شخص
آتش فشاں کا پھول تھا پانی میں کھو گیا
ٹوٹ جانے میں کھلونوں کی طرح ہوتا ہے
آدمی عشق میں بچوں کی طرح ہوتا ہے
اس لئے مجھ کو پسند آتا ہے صحرا کا سکوت
اس کا نشہ تری باتوں کی طرح ہوتا ہے
ہم جسے عشق میں دیتے ہیں خدا کا منصب
پہلے پہلے ہمیں لوگوں کی طرح ہوتا ہے
جس سے بننا ہو تعلق وہی ظالم پہلے
غیر ہوتا ہے نہ اپنوں کی طرح ہوتا ہے
چاندنی رات میں سڑکوں پہ قدم مت رکھنا
شہر جاگے ہوئے ناگوں کی طرح ہوتا ہے
بس یہی دیکھنے کو جاگتے ہیں شہر کے لوگ
آسماں کب تری آنکھوں کی طرح ہوتا ہے
اس سے کہنا کہ وہ ساون میں نہ گھر سے نکلے
حافظہ عشق کا سانپوں کی طرح ہوتا ہے
اس کی آنکھوں میں امڈ آتے ہیں آنسو تابشؔ
وہ جدا چاہنے والوں کی طرح ہوتا ہے
اب ادھورے عشق کی تکمیل ہی ممکن نہیں
کیا کریں پیغام کی ترسیل ہی ممکن نہیں
کیا اسے سمجھاؤں کاغذ پر لکیریں کھینچ کر
جذبۂ بے نام کی تشکیل ہی ممکن نہیں
ایسے موسم میں بھی شرح دل کئے جاتا ہوں میں
جب کہ اس اجمال کی تفصیل ہی ممکن نہیں
کس جگہ انگلی رکھوں کس حرف کو کیسے پڑھوں
آیت امکاں تری ترتیل ہی ممکن نہیں
تہمت رسوائی کیسے عشق پر رکھتا کوئی
ایسے کاموں میں تو ایسی ڈھیل ہی ممکن نہیں
کنج نسیاں میں پڑے دھندلا گئے اس کے نقوش
اب تو اس خوش رنگ کی تمثیل ہی ممکن نہیں
اور بھی کچھ صورتیں بن جائیں گی رسوائی کی
عشق میں تابشؔ فقط تذلیل ہی ممکن نہیں
صبح کی پہلی کرن پہلی نظر سے پہلے
ہم کو ہونا ہے کہیں اور سحر سے پہلے
چاند نے دیکھ لیا ہم کو کنار دریا
بھاگ چلتے ہیں کسی اور خبر سے پہلے
لو لگانے سے گئی در بدری کی ذلت
خود کو پہنچا ہوا لگتا ہوں سفر سے پہلے
کیوں نہ دنیا کو دکھاؤں میں جلے ہاتھ کا زخم
کچھ چراغوں سے تعلق تھا ادھر سے پہلے
اک ہتھیلی ہے مری ایک ہتھیلی اس کی
سب دعائیں ہیں اثر یاب اثر سے پہلے
شام کے بعد اندھیرا نہیں رہتا گھر میں
ایک سورج نکل آتا ہے سحر سے پہلے
تب مری آنکھ کھلا کرتی تھی اندر کی طرف
میں نے دیکھا ہے اسے پہلی نظر سے پہلے
تو فقط سینہ و دل ہے نہ فقط عارض و لب
سخن آغاز کرے کوئی کدھر سے پہلے
کھا کے سوکھی روٹیاں پانی کے ساتھ
جی رہا تھا کتنی آسانی کے ساتھ
یوں بھی منظر کو نیا کرتا ہوں میں
دیکھتا ہوں اس کو حیرانی کے ساتھ
گھر میں اک تصویر جنگل کی بھی ہے
رابطہ رہتا ہے ویرانی کے ساتھ
آنکھ کی تہ میں کوئی صحرا نہ ہو
آ رہی ہے ریت بھی پانی کے ساتھ
زندگی کا مسئلہ کچھ اور ہے
شعر کہہ لیتا ہوں آسانی کے ساتھ
بیاں اپنی حقیقت کر رہا ہوں
وہ کہتے ہیں شکایت کر رہا ہوں
کبھی ان سے کہی تھی بات کوئی
مگر اب تک وضاحت کر رہا ہوں
بلا مقصد نہیں یہ دیکھنا بھی
کسی کو خوب صورت کر رہا ہوں
شاید کسی بلا کا تھا سایہ درخت پر
چڑیوں نے رات شور مچایا درخت پر
موسم تمہارے ساتھ کا جانے کدھر گیا
تم آئے اور بور نہ آیا درخت پر
دیکھا نہ جائے دھوپ میں جلتا ہوا کوئی
میرا جو بس چلے کروں سایہ درخت پر
سب چھوڑے جا رہے تھے سفر کی نشانیاں
میں نے بھی ایک نقش بنایا درخت پر
اب کے بہار آئی ہے شاید غلط جگہ
جو زخم دل پہ آنا تھا آیا درخت پر
ہم دونوں اپنے اپنے گھروں میں مقیم ہیں
پڑتا نہیں درخت کا سایہ درخت پر
اب پرندوں کی یہاں نقل مکانی کم ہے
ہم ہیں جس جھیل پہ اس جھیل میں پانی کم ہے
یہ جو میں بھاگتا ہوں وقت سے آگے آگے
میری وحشت کے مطابق یہ روانی کم ہے
دے مجھے انجم و مہتاب سے آگے کی خبر
مجھ سے فانی کے لئے عالم فانی کم ہے
غم کی تلخی مجھے نشہ نہیں ہونے دیتی
یہ غلط ہے کہ تری چیز پرانی کم ہے
غیب کے باغ کا وہ بھید کھلا ہے مجھ پر
جس کا ابلاغ پرندوں کی زبانی کم ہے
ہجر کو حوصلہ اور وصل کو فرصت درکار
اک محبت کے لئے ایک جوانی کم ہے
اتنا مشکل تو نہ تھا گمشدگاں کا ملنا
ہم نے اے دشت تری خاک ہی چھانی کم ہے
اس سمے موت کی خوشبو کے مقابل تابشؔ
کسی آنگن میں کھلی رات کی رانی کم ہے
یہ تو نہیں فرہاد سے یاری نہیں رکھتے
ہم لوگ فقط ضربت کاری نہیں رکھتے
قیدی بھی ہیں اس شان کے آزاد تمہارے
زنجیر کبھی زلف سے بھاری نہیں رکھتے
مصروف ہیں کچھ اتنے کہ ہم کار محبت
آغاز تو کر لیتے ہیں جاری نہیں رکھتے
جیتے ہیں مگر زیست کو آزار سمجھ کر
مرتے ہیں مگر موت سے یاری نہیں رکھتے
مہمان سرا دل کی گرا دیتے ہیں پل میں
ہم صدقۂ جاری کو بھی جاری نہیں رکھتے
تنہا ہی نکلتے ہیں سر کوئے ملامت
ہم راہ کبھی ذلت و خواری نہیں رکھتے
ہر چند تری یاد جنوں خیز بہت ہے
میں جاگ رہا ہوں کہ ہوا تیز بہت ہے
کیوں کر نہ مرے تن سے چھلک جائے خموشی
پیمانۂ جاں ضبط سے لبریز بہت ہے
کیا کوہ گراں ٹھہرے تری راہ گزر میں
اے حسن تری ایک ہی مہمیز بہت ہے
اک چاند کی کشتی ہی نہیں ڈوبنے والی
ورنہ وہ سمندر تو بلا خیز بہت ہے
گلدان سے لگتے ہی بکھر جاتی ہے تتلی
گویا یہ رگ سنگ بھی خوں ریز بہت ہے
پلکوں پہ کوئی پھول نہیں ہے تو عجب کیا
کہنے کو تو مٹی مری زرخیز بہت ہے
تم خود سا سمجھ کر نہ اسے ہاتھ لگانا
وہ خاک کا پتلا ہی سہی تیز بہت ہے
دھرنا ہے کہیں تو یہ گراں بارئ خاطر
زانو جو نہیں سر کے لئے میز بہت ہے
کیا ہے جو کٹورے کے بھی پیراک نہیں ہم
جینے کو تو یہ حیلۂ تبریز بہت ہے
تابشؔ جو گزرتی ہی نہیں شام کی حد سے
سوچیں تو وہیں رات سحر خیز بہت ہے
تیری روح میں سناٹا ہے اور مری آواز میں چپ
تو اپنے انداز میں چپ ہے میں اپنے انداز میں چپ
گاہے گاہے سانسوں کی آواز سنائی دیتی ہے
گاہے گاہے بج اٹھتی ہے دل کے شکستہ ساز میں چپ
سناٹے کے زہر میں بجھتے لوگوں کو یہ کون بتائے
جتنا اونچا بول رہے ہیں اتنی ہے آواز میں چپ
اک مدت سے خشک پڑا ہے وہ جھرنا انگڑائی کا
جانے کس نے بھر دی ہے اس پیکر نغمہ ساز میں چپ
رگ رگ میں جب خون کی بوندیں بلبل بن کر چہک اٹھیں
پھر دل حافظؔ کیوں کر سادھے سینے کے شیراز میں چپ
فقط مال و زر دیوار و در اچھا نہیں لگتا
جہاں بچے نہیں ہوتے وہ گھر اچھا نہیں لگتا
مرے دکھ تک مرے خوں اور پسینے کی کمائی ہیں
تمہیں کیوں میری محنت کا ثمر اچھا نہیں لگتا
شکستہ سطر چاہے رنگ و بوئے پیرہن ٹھہرے
کسی صورت مجھے عجز ہنر اچھا نہیں لگتا
میسر ہو نہ جب تک بوئے تازہ تر کی ہم راہی
ہوا کی طرح گلیوں سے گزر اچھا نہیں لگتا
رہ تیشہ طلب تیری میں وہ دیوار ہوں جس کو
نہ ہو شوریدگی جس میں وہ سر اچھا نہیں لگتا
گلی میں کھیلتے بچوں کے ہاتھوں کا میں پتھر ہوں
مجھے اس صحن کا خالی شجر اچھا نہیں لگتا
چمکتا ہوں ہر اک مہتاب رو کے روئے روشن میں
میں سورج ہوں مجھے شب کا سفر اچھا نہیں لگتا
جسے دیکھیں وہی پھر دیکھنے کی آرزو ٹھہرے
جسے چاہیں وہی بار دگر اچھا نہیں لگتا
اسی خاطر اسے تابشؔ اچکنا چاہتا ہوں میں
مجھے تالاب کی تہہ میں قمر اچھا نہیں لگتا
ایک مشکل سی بہر طور بنی ہوتی ہے
تجھ سے باز آئیں تو پھر خود سے ٹھنی ہوتی ہے
کچھ تو لے بیٹھتی ہے اپنی شکستہ پائی
اور کچھ راہ میں چھاؤں بھی گھنی ہوتی ہے
میرے سینے سے ذرا کان لگا کر دیکھو
سانس چلتی ہے کہ زنجیر زنی ہوتی ہے
آبلہ پائی بھی ہوتی ہے مقدر اپنا
سر پہ افلاک کی چادر بھی تنی ہوتی ہے
دودھ کی نہر نکالی ہے غموں سے ہم نے
ہم بتا سکتے ہیں کیا کوہ کنی ہوتی ہے
آنکھ تو کھلتی ہے کرنوں کی طلب میں لیکن
زیب مژگاں کسی نیزے کی انی ہوتی ہے
دشت غربت ہی پہ موقوف نہیں ہے تابشؔ
اب تو گھر میں بھی غریب الوطنی ہوتی ہے
ایسے تو کوئی ترک سکونت نہیں کرتا
ہجرت وہی کرتا ہے جو بیعت نہیں کرتا
یہ لوگ مجھے کس لیے دوزخ سے ڈرائیں
میں عاشقی کرتا ہوں عبادت نہیں کرتا
ہم سلسلہ داروں کے ہو کیوں جان کے درپئے
کافر اسے کہیے جو محبت نہیں کرتا
لگتا ہے یہاں موت نہیں آنی کسی کو
اس شہر میں اب کوئی وصیت نہیں کرتا
یہ مجھ کو بتاتے ہیں غزالان طرح دار
اچھا وہی رہتا ہے جو وحشت نہیں کرتا
تابشؔ کا قیامت سے یقیں اٹھ نہ گیا ہو
کچھ دن سے وہ ذکر قد و قامت نہیں کرتا
سانس کے شور کو جھنکار نہ سمجھا جائے
ہم کو اندر سے گرفتار نہ سمجھا جائے
اس کو رستے سے ہٹانے کا یہ مطلب تو نہیں
کسی دیوار کو دیوار نہ سمجھا جائے
میں کسی اور حوالے سے اسے دیکھتا ہوں
مجھ کو دنیا کا طرف دار نہ سمجھا جائے
یہ زمیں تو ہے کسی کاغذی کشتی جیسی
بیٹھ جاتا ہوں اگر بار نہ سمجھا جائے
اس کو عادت ہے گھنے پیڑ میں سو جانے کی
چاند کو دیدۂ بے دار نہ سمجھا جائے
اپنی باتوں پہ وہ قائم نہیں رہتا تابشؔ
اس کے انکار کو انکار نہ سمجھا جائے
اب محبت نہ فسانہ نہ فسوں ہے یوں ہے
صاحب دشت تو کہتا تھا کہ یوں ہے یوں ہے
پس گریہ کوئی دیتا ہے تسلی تجھ کو
یہ جو اے دل تجھے بے وجہ سکوں ہے یوں ہے
میرؔ صاحب ہی نہیں اس سے پرے بیٹھتے ہیں
جو بھی شائستۂ آداب جنوں ہے یوں ہے
زندگی بھر میں کوئی شعر تو ایسا ہوتا
میں بھی کہتا جو مرا زخم دروں ہے یوں ہے
نیست میں ہست کا احساس دلاتی ہوئی آنکھ
شور کرتی ہے کہ ہے کن فیکوں ہے یوں ہے
وہ کون ہے جو پس چشم تر نہیں آتا
سمجھ تو آتا ہے لیکن نظر نہیں آتا
اگر یہ تم ہو تو ثابت کرو کہ یہ تم ہو
گیا ہوا تو کوئی لوٹ کر نہیں آتا
یہ دل بھی کیسا شجر ہے کہ جس کی شاخوں پر
پرندے آتے ہیں لیکن ثمر نہیں آتا
یہ جمع خرچ زبانی ہے اس کے بارے میں
کوئی بھی شخص اسے دیکھ کر نہیں آتا
ہماری خاک پہ اندھی ہوا کا پہرہ ہے
اسے خبر ہے یہاں کوزہ گر نہیں آتا
یہ بات سچ ہے کہ اس کو بھلا دیا میں نے
مگر یقیں مجھے اس بات پر نہیں آتا
نظر جمائے رکھوں گا میں چاند پر تابشؔ
کہ جب تلک یہ پرندہ اتر نہیں آتا
شاخ پر پھول فلک پر کوئی تارا بھی نہیں
میں بھی تنہا ہوں بہت کوئی تمہارا بھی نہیں
ایک تو مڑ کے نہ جانے کی اذیت تھی بہت
اور اس پر یہ ستم کوئی پکارا بھی نہیں
کہہ رہا تھا کہ محبت میں تکلم کیسا
میں جو چونکا تو کہاں اذن اشارا بھی نہیں
عمر مابعد اگر تیرے علاوہ کچھ ہے
پھر تو میں اب بھی نہیں اور دوبارا بھی نہیں
شکستہ خواب و شکستہ پا ہوں مجھے دعاؤں میں یاد رکھنا
میں آخری جنگ لڑ رہا ہوں مجھے دعاؤں میں یاد رکھنا
ہوائیں پیغام دے گئی ہیں کہ مجھ کو دریا بلا رہا ہے
میں بات ساری سمجھ گیا ہوں مجھے دعاؤں میں یاد رکھنا
نہ جانے کوفے کو کیا خبر ہو نہ جانے کس دشت میں بسر ہو
میں پھر مدینے سے جا رہا ہوں مجھے دعاؤں میں یاد رکھنا
مجھے عزیزان من محبت کا کوئی بھی تجربہ نہیں ہے
میں اس سفر میں نیا نیا ہوں مجھے دعاؤں میں یاد رکھنا
مجھے کس سے بھلائی کی اب کوئی توقع نہیں ہے تابشؔ
میں عادتاً سب سے کہہ رہا ہوں مجھے دعاؤں میں یاد رکھنا
چاند کا پتھر باندھ کے تن سے اتری منظر خواب میں چپ
چڑیاں دور سدھار گئیں اور ڈوب گئی تالاب میں چپ
لفظوں کے بٹوارے میں اس چیخ بھرے گہوارے میں
بول تو ہم بھی سکتے ہیں پر شامل ہے آداب میں چپ
پہلے تو چوپال میں اپنا جسم چٹختا رہتا تھا
چل نکلی جب بات سفر کی پھیل گئی اعصاب میں چپ
اب تو ہم یوں رہتے ہیں اس ہجر بھرے ویرانے میں
جیسے آنکھ میں آنسو گم ہو جیسے حرف کتاب میں چپ
اپنی آہٹ کو بھی اپنے ساتھ نہیں لے جاتے وہ
تیری راہ پہ چلنے والے رکھتے ہیں اسباب میں چپ
چاند کو تالاب مجھ کو خواب واپس کر دیا
دن ڈھلے سورج نے سب اسباب واپس کر دیا
اس طرح بچھڑا کہ اگلی رونقیں پھر آ گئیں
اس نے میرا حلقۂ احباب واپس کر دیا
پھر بھٹکتا پھر رہا ہے کوئی برج دل کے پاس
کس کو اے چشم ستارہ یاب واپس کر دیا
میں نے آنکھوں کے کنارے بھی نہ تر ہونے دیئے
جس طرف سے آیا تھا سیلاب واپس کر دیا
جانے کس دیوار سے ٹکرا کے لوٹ آئی ہے گیند
جانے کس دیوار نے مہتاب واپس کر دیا
پھر تو اس کی یاد بھی رکھی نہ میں نے اپنے پاس
جب کیا واپس تو کل اسباب واپس کر دیا
التجائیں کر کے مانگی تھی محبت کی کسک
بے دلی نے یوں غم نایاب واپس کر دیا
دہن کھولیں گی اپنی سیپیاں آہستہ آہستہ
گزر دریا سے اے ابر رواں آہستہ آہستہ
لہو تو عشق کے آغاز ہی میں جلنے لگتا ہے
مگر ہونٹوں تک آتا ہے دھواں آہستہ آہستہ
پلٹنا بھی اگر چاہیں پلٹ کر جا نہیں سکتے
کہاں سے چل کے ہم آئے کہاں آہستہ آہستہ
کہیں لالی بھری تھالی نہ گر جائے سمندر میں
چلا ہے شام کا سورج کہاں آہستہ آہستہ
ابھی اس دھوپ کی چھتری تلے کچھ پھول کھلنے دو
زمیں بدلے گی اپنا آسماں آہستہ آہستہ
کسے اب ٹوٹ کے رونے کی فرصت کار دنیا میں
چلی جاتی ہے اک رسم فغاں آہستہ آہستہ
مرے دل میں کسی حسرت کے پس انداز ہونے تک
نمٹ ہی جائے گا کار جہاں آہستہ آہستہ
مکیں جب نیند کے سائے میں سستانے لگیں تابشؔ
سفر کرتے ہیں بستی کے مکاں آہستہ آہستہ
کس کر باندھی گئی رگوں میں دل کی گرہ تو ڈھیلی ہے
اس کو دیکھ کے جی بھر آنا کتنی بڑی تبدیلی ہے
زندہ رہنے کی خواہش میں دم دم لو دے اٹھتا ہوں
مجھ میں سانس رگڑ کھاتی ہے یا ماچس کی تیلی ہے
ان آنکھوں میں کودنے والو تم کو اتنا دھیان رہے
وہ جھیلیں پایاب ہیں لیکن ان کی تہہ پتھریلی ہے
کتنی صدیاں سورج چمکا کتنے دوزخ آگ جلی
مجھے بنانے والے میری مٹی اب تک گیلی ہے
زندہ ہوں تو مجھے بتائیں نیلے ہونٹوں والے لوگ
میرا کیسا رنگ کرے گی بات جو میں نے پی لی ہے
ممکن ہے اب وقت کی چادر پر میں کروں رفو کا کام
جوتے میں نے گانٹھ لیے ہیں گدڑی میں نے سی لی ہے
دم سخن ہی طبیعت لہو لہو کی جائے
کوئی تو ہو کہ تری جس سے گفتگو کی جائے
یہ نکتہ کٹتے شجر نے مجھے کیا تعلیم
کہ دکھ تو ملتے ہیں گر خواہش نمو کی جائے
کشیدہ کار ازل تجھ کو اعتراض تو نئیں
کہیں کہیں سے اگر زندگی رفو کی جائے
میں یہ بھی چاہتا ہوں عشق کا نہ ہو الزام
میں یہ بھی چاہتا ہوں تیری آرزو کی جائے
محبتوں میں تو شجرے کا بھی نہیں مذکور
تو چاہتا ہے کہ مسلک پہ گفتگو کی جائے
مری طرح سے اجڑ کر بسائیں شہر سخن
جو نقل کرنی ہے میری تو ہو بہ ہو کی جائے
یہ ہم کو کون سی دنیا کی دھن آوارہ رکھتی ہے
کہ خود ثابت قدم رہ کر ہمیں سیارہ رکھتی ہے
اگر بجھنے لگیں ہم تو ہوائے شام تنہائی
کسی محراب میں جا کر ہمیں دوبارہ رکھتی ہے
چلو ہم دھوپ جیسے لوگ ہی اس کو نکال آئیں
سنا ہے وہ ندی تہہ میں کوئی مہ پارہ رکھتی ہے
ہمیں کس کام پر مامور کرتی ہے یہ دنیا بھی
کہ ترسیل غم دل کے لیے ہرکارہ رکھتی ہے
کبھی سر پھوڑنے دیتی نہیں دیوار سے تابشؔ
یہ کیا دیوانگی ہے جو ہمیں ناکارہ رکھتی ہے
پرندے پوچھتے ہیں تم نے کیا قصور کیا
وہ کیا کہیں جنہیں ہجرت نے گھر سے دور کیا
یہی بہت ہے کہ اس عہد بے پیمبر میں
کہیں چراغ کہیں خواب نے ظہور کیا
یہ میرا خاک میں ملنا بسا غنیمت ہے
کہ میں نے عجز کی خاطر بہت غرور کیا
فلک سے پھینک کے دیکھا کہ ٹوٹنے کا نہیں
گرا کے اپنی نگاہوں سے چور چور کیا
غبار در بدری جس نے کر دیا مجھ کو
مسافروں کو اسی دھوپ نے کھجور کیا
مرے بدن میں لہو کا کٹاؤ ایسا تھا
کہ میرا ہر بن مو ایک گھاؤ ایسا تھا
بچھڑتے وقت عجب الجھنوں میں ڈال گیا
وہ ایک شخص کہ سیدھے سبھاؤ ایسا تھا
چلی جو بات کوئی رات کے تعاقب میں
تو بات بات سے نکلی بہاؤ ایسا تھا
میں پورا پورا روانہ تھا ابجدوں کی طرف
حساب عمر ترا چل چلاؤ ایسا تھا
گل نشاط کی خوشبو بھی بار تھی مجھ کو
مرے مزاج میں غم کا رچاؤ ایسا تھا
کنار لب میں نہ رہتی تھی موج گویائی
طبیعتوں میں سخن کا بہاؤ ایسا تھا
ٹھہرتا کیا مری خاکستری نگاہوں میں
ترا وجود تو روشن الاؤ ایسا تھا
نکل سکی نہ کوئی بھی فرار کی صورت
سپاہ زیست کا مجھ پر پڑاؤ ایسا تھا
نہ چاہ کر بھی اسے دل سے چاہتے تھے ہم
کسی کی لاگ میں تابشؔ لگاؤ ایسا تھا
تیری آنکھوں سے اپنی طرف دیکھنا بھی اکارت گیا
یعنی پہچان کا یہ نیا سلسلہ بھی اکارت گیا
یوں حنائی لکیریں اڑیں اجنبی طائروں کی طرح
پر بریدہ سا رنگ کف صد حنا بھی اکارت گیا
اب کھلا ہے کہ میرا ترے رنگ میں تیرے انداز میں
بولنا ہی نہیں دیکھنا سوچنا بھی اکارت گیا
سن رہا ہوں ابھی تک میں اپنی ہی آواز کی بازگشت
یعنی اس دشت میں زور سے بولنا بھی اکارت گیا
وہ زلیخائی خواہش ہی اپنے سبب سے پشیماں نہ تھی
ساتویں در کے اندر مرا حوصلہ بھی اکارت گیا
کوئی لو تک نہ دی کالے پیڑوں کو اس آتشیں رقص نے
یعنی جنگل میں اس مور کا ناچنا بھی اکارت گیا
نقش سارے خاک کے ہیں سب ہنر مٹی کا ہے
اس دیار رنگ و بو میں بست و در مٹی کا ہے
کچھ تو اپنی گردنیں کج ہیں ہوا کے زور سے
اور کچھ اپنی طبیعت میں اثر مٹی کا ہے
چاندنی خنداں ہے اپنے حجرۂ مہتاب پر
اور میں نازاں ہوں اس پر میرا گھر مٹی کا ہے
رحمتیں برسا کے بھی ابر کرم چھٹتا نہیں
ایسے لگتا ہے کہ سایہ چرخ پر مٹی کا ہے
خاک سے اٹھتے نہیں چلتی ہوا کے ساتھ ہم
عجز خاطر پر بہت گہرا اثر مٹی کا ہے
اک نمونہ ہے کسی کی صنعت تمثال کا
یہ جو کھڑکی ہے صدا کی یہ جو گھر مٹی کا ہے
کیوں نہ خوئے خاک سے خستہ رہے میری انا
پا بہ گل ہوں اور خمیر معتبر مٹی کا ہے
یہ ہم جو ہجر میں اس کا خیال باندھتے ہیں
ہوا کی شاخ سے بوئے وصال باندھتے ہیں
ہمارے بس میں کہاں زیست کو سخن کرنا
یہ قافیہ فقط اہل کمال باندھتے ہیں
یہ عہد جیب تراشاں کو اب ہوا معلوم
یہاں کے لوگ گرہ میں سوال باندھتے ہیں
وہ خوب جانتے ہیں ہم دعا نہادوں کو
ہمارے ہاتھ بوقت زوال باندھتے ہیں
سبھی کو شوق اسیری ہے اپنی اپنی جگہ
وہ ہم کو اور ہم ان کا خیال باندھتے ہیں
تمہیں پتہ ہو کہ ہم ساحلوں کے پروردہ
محبتوں میں بھی مضبوط جال باندھتے ہیں
پھر اس کے بعد کہیں بھی وہ جا نہیں سکتا
جسے بھی باندھتے ہیں ہم کمال باندھتے ہیں
مجھ تہی جاں سے تجھے انکار پہلے تو نہ تھا
تیرا اور میرے لیے دیوار پہلے تو نہ تھا
حسن نے سونپی ہے یہ کیسی نگوں ساری مجھے
میں کسی کا آئنہ بردار پہلے تو نہ تھا
اس طرح تو پا بہ جولاں ہم نہ پھرتے تھے کبھی
ان گلی کوچوں میں یہ بازار پہلے تو نہ تھا
اب کہاں سے آئی اس کافر کے دل میں روشنی
آئنہ حلقہ بگوش یار پہلے تو نہ تھا
تابشؔ اک دریوزہ گر کو باز رکھنے کے لئے
کوئی دروازہ پس دیوار پہلے تو نہ تھا
کنج غزل نہ قیس کا ویرانہ چاہئے
جو غم مجھے ہے اس کو عزا خانہ چاہئے
ہے جس کا انتظار پلک سے فلک تلک
اب آنا چاہئے اسے آ جانا چاہئے
یارب مرے لباس سے ہرگز گماں نہ ہو
لیکن مجھے مزاج فقیرانہ چاہئے
ملتی نہیں ہے ناؤ تو درویش کی طرح
خود میں اتر کے پار اتر جانا چاہئے
اے دوست! مجھ سے عشق کی یکسانیت نہ پوچھ
تو بھی کبھی کبھی مجھے بیگانہ چاہئے
یہ دیکھ مرے نقش کف پا مرے آگے
آگے بھی کہاں جاتا ہے رستہ مرے آگے
اے تشنہ لبی تو نے کہاں لا کے ڈبویا
اس بار تو دریا بھی نہیں تھا مرے آگے
ایسے نہیں مانوں گا میں ہستی کا توازن
تقطیع کیا جائے یہ مصرعہ مرے آگے
اے قامت دلدار گزشتہ کی معافی
پہلے کوئی معیار نہیں تھا مرے آگے
کیوں کر سخن آغاز کیا جائے کہ وہ آنکھ
لا رکھتی ہے اجداد کا لکھا مرے آگے
حیرت ہے کہ دیتی ہیں مجھے طعنۂ وحشت
ترتیب سے رکھی ہوئی اشیاء مرے آگے
میں جانتا ہوں اس کے سبھی بھید سبھی بھاؤ
دنیا نے کبھی رقص کیا تھا مرے آگے
میں عشق کے آداب ذرا سیکھ لوں پہلے
بیٹھے گی ادب سے یہی دنیا مرے آگے
یہ کس کے خوف کا گلیوں میں زہر پھیل گیا
کہ ایک نعش کے مانند شہر پھیل گیا
نہیں گرفت میں تا حد خاک کا منظر
سمٹ گئیں مری بانہیں کہ دہر پھیل گیا
تجھے قریب سمجھتے تھے گھر میں بیٹھے ہوئے
تری تلاش میں نکلے تو شہر پھیل گیا
میں جس طرف بھی چلا جاؤں جان سے جاؤں
بچھڑ کے تجھ سے تو لگتا ہے دہر پھیل گیا
مکاں مکان سے نکلا کہ جیسے بات سے بات
مثال قصۂ ہجراں یہ شہر پھیل گیا
بچا نہ کوئی تری دھوپ کی تمازت سے
ترا جمال بہ انداز قہر پھیل گیا
یہ موج موج بنی کس کی شکل سی تابشؔ
یہ کون ڈوب کے بھی لہر لہر پھیل گیا
ہوائے موسم گل سے لہو لہو تم تھے
کھلے تھے پھول مگر ان میں سرخ رو تم تھے
ذرا سی دیر کو موسم کا ذکر آیا تھا
پھر اس کے بعد تو موضوع گفتگو تم تھے
اور اب کہ جب صورت نہیں تلافی کی
میں تم سے کیسے کہوں میری آرزو تم تھے
کہانیوں میں تو یہ کام اژدہے کا تھا
مری جب آنکھ کھلی میرے چار سو تم تھے
ایک قدم تیغ پہ اور ایک شرر پر رکھا
میری وحشت نے مجھے رقص دگر پر رکھا
میرے مالک نے تجھے آئنہ داری دے کر
نگراں تجھ کو مرے حسن نظر پر رکھا
لا تعلق نظر آتا تھا بظاہر لیکن
شہر کو اس نے مری خیر خبر پر رکھا
زندگی تو نے قدم موڑ دیئے اور طرف
اور اندر سے مجھے اور سفر پر رکھا
اہل وحشت کو مگر کون بتاتا جا کر
ہو گیا ناف غزالیں کوئی گھر پر رکھا
کونپلیں پھوٹ پڑیں دست دعا سے میرے
دم آمین جو میں دیدۂ تر پر رکھا
ختم ہوتی ہی نہیں گریہ و زاری ان کی
میر نے ہاتھ تو ہر لفظ کے سر پر رکھا
میں نے اس ڈر سے اسے توڑ لیا ہے تابشؔ
سوکھ جائے نہ کہیں شاخ شجر پر رکھا
جہان مرگ صدا میں اک اور سلسلہ ختم ہو گیا ہے
کلام یعنی خدا کا ہم سے مکالمہ ختم ہو گیا ہے
ہمیں تو بس یہ پتہ چلا تھا کہ اونٹوں والے چلے گئے ہیں
کسی کو اس کی خبر نہیں جو معاملہ ختم ہو گیا ہے
نہ تتلیوں جیسی دوپہر ہے نہ اب وہ سورج گلاب جیسا
جسے محبت کہا گیا وہ مغالطہ ختم ہو گیا ہے
تمہاری باتوں کے جن پہ شہتوت جھڑ رہے ہوں وہی بتائیں
کہ تلخ آباد میں ہمارا تو ذائقہ ختم ہو گیا ہے
ہماری آنکھوں سے خواب و خس کے تمام پشتے ہٹائے جائیں
ہمارا ناراض پانیوں سے معاہدہ ختم ہو گیا ہے
اب اس لیے بھی ہمیں محبت کو طول دینا پڑے گا تابشؔ
کسی نے پوچھا تو کیا کہیں گے کہ سلسلہ ختم ہو گیا ہے
میں اپنے عشق کو خوش اہتمام کرتا ہوا
مقام شکر پہ پہنچا کلام کرتا ہوا
یہ گرد باد سلامت گزرنا چاہتا ہے
مرے چراغ پہ وحشت تمام کرتا ہوا
گزر رہا ہوں کسی قریۂ ملامت سے
قدیم سلسلہ داری کو عام کرتا ہوا
تو پھر یہ کون ہے نصف النہار کے ہنگام
قیام و رقص کی حالت میں شام کرتا ہوا
کبھی تو کھل کے بتا اے مری ریاضت مرگ
میں کیسا لگتا ہوں فکر دوام کرتا ہوا
زمانوں بعد بھی دشت بلا میں میرا حسینؔ
دکھائی دیتا ہے حجت تمام کرتا ہوا
نگاہ اولیں کا ہے تقاضا دیکھتے رہنا
کہ جس کو دیکھنا اس کو ہمیشہ دیکھتے رہنا
نہ مجھ کو نیند آتی ہے نہ دل سے بات جاتی ہے
یہ کس نے کہہ دیا مجھ سے کہ رستہ دیکھتے رہنا
ابھی اچھے نہیں لگتے جنوں کے پیچ و خم اس کو
کبھی اس رہ سے گزرے گی یہ دنیا دیکھتے رہنا
دیئے کی لو نہ بن جائے طناب سرسری اس کی
میں دریا کی طرف جاتا ہوں خیمہ دیکھتے رہنا
کوئی چہرہ ہی ممکن ہے تمہارے جی کو لگ جائے
تماشا دیکھنے والو تماشا دیکھتے رہنا
کہ اب تو دیکھنے میں بھی ہیں کچھ محویتیں ایسی
کہیں پتھر نہ کر ڈالے یہ میرا دیکھتے رہنا
سرشک خوں کبھی مژگاں تلک آیا نہیں پھر بھی
کنارے آ لگے شاید یہ دریا دیکھتے رہنا
نگاہ سرسری تابشؔ محیط حسن کیا ہوگی
جہاں تک دیکھنے کا ہو تقاضا دیکھتے رہنا
یوں تو شیرازۂ جاں کر کے بہم اٹھتے ہیں
بیٹھنے لگتا ہے دل جوں ہی قدم اٹھتے ہیں
ہم تو اس رزم گہ وقت میں رہتے ہیں جہاں
ہاتھ کٹ جائیں تو دانتوں سے علم اٹھتے ہیں
سہل انگار طبیعت کا برا ہو جس سے
ناز اٹھتے ہیں ترے اور نہ ستم اٹھتے ہیں
کوئی روندے تو اٹھاتے ہیں نگاہیں اپنی
ورنہ مٹی کی طرح راہ سے کم اٹھتے ہیں
نیند جاتی ہی نہیں عرض ہنر سے آگے
دفتر غم ہی سدا کر کے رقم اٹھتے ہیں
دن کی آغوش رضاعت سے نکل کر تابشؔ
رات کی رات کف خاک سے ہم اٹھتے ہیں
اس کا خیال خواب کے در سے نکل گیا
پھر میں بھی اپنے دیدۂ تر سے نکل گیا
پلکیں بھی بہہ گئیں خس و خاشاک کی طرح
میں اپنے ساحلوں کے اثر سے نکل گیا
تنہائی سے تھی میری ملاقات آخری
رویا اور اس کے بعد میں گھر سے نکل گیا
جب شمع انتظار اٹھا لی منڈیر سے
دست ہوا بھی حلقۂ در سے نکل گیا
رستے میں آنکھ تھی سگ مامور کی طرح
دل میں جو چور تھا وہ کدھر سے نکل گیا
اب لے لے مجھ کو اپنی ہتھیلی کی اوٹ میں
میرا ستارہ برج سفر سے نکل گیا
میرے ہی ساتھ گھر میں نظر بند تھا تو پھر
تیرا خیال کون سے در سے نکل گیا
نیا پرندہ قفس سے باہر بنا رہا ہوں
میں اپنی مرضی کا پیش منظر بنا رہا ہوں
مجھے بھی اوروں کی طرح کاغذ ملا ہے لیکن
میں اس سے ناؤ نہیں سمندر بنا رہا ہوں
یہاں سے ہجرت کے بعد بھی میں یہیں رہوں گا
نیا مکاں اپنے گھر کے اندر بنا رہا ہوں
عجب خموشی ہے جھیل کے ٹھہرے پانیوں میں
میں اس خموشی سے ایک پتھر بنا رہا ہوں
یہ گھر تو سج جائے گا پرندہ حنوط کر کے
مگر میں اپنی مثال کیوں کر بنا رہا ہوں
اور اب اداسی کی ستر پوشی کا مرحلہ ہے
تھکن کے دھاگوں سے ایک چادر بنا رہا ہوں
بہت ہی ویرانیاں ہیں غرفے کی جالیوں میں
میں ان کی خاطر نیا کبوتر بنا رہا ہوں
مکاں بھر ہم کو ویرانی بہت ہے
مگر یہ دل کہ سیلانی بہت ہے
ہمارے پاؤں الٹے ہیں سو ہم کو
پلٹ جانے میں آسانی بہت ہے
ستارے چور آنکھوں سے نہ دیکھیں
زمیں پر میری نگرانی بہت ہے
ابھی سوکھی نہیں مٹی کی آنکھیں
ابھی دریاؤں میں پانی بہت ہے
عجب سی شرط ہے یہ زندگی بھی
جو منوائی ہے کم مانی بہت ہے
ضرورت ہی نہیں دشمن کی تابشؔ
مجھے میری تن آسانی بہت ہے
عجب سودائے وحشت ہے دل خود سر میں رہتا ہے
یہ کیسی چھب کا مالک ہے یہ کیسے گھر میں رہتا ہے
اسی کے دم قدم سے ہے جہان دید و نظارا
کہیں آنکھوں میں بستا ہے کہیں منظر میں رہتا ہے
نہال خشک میں اب تک وہ سوکھا زرد سا پتا
برہنہ لگتا ہے لیکن لباس زر میں رہتا ہے
مری آنکھوں سے لے کر تیرے چہرے تک ستارے ہیں
کہ جو گردش میں آ جائے اسی محور میں رہتا ہے
میں اپنے عکس کو رم خوردگی سے باز کیا رکھوں
غزال آئنہ خانہ کسی کے ڈر میں رہتا ہے
مجھے تو گور گریہ میں سلا دیتے ہیں گھر والے
مگر احساس بیداری مرے بستر میں رہتا ہے
پس غبار بھی اڑتا غبار اپنا تھا
ترے بہانے ہمیں انتظار اپنا تھا
کھڑے تھے اپنی جڑوں پر کسی شجر کی طرح
ہماری خاطر نازک پہ بار اپنا تھا
اسی لیے ہمیں سورج نے ساتھ رکھا تھا
کہ اک ستارے پہ دار و مدار اپنا تھا
راتیں گزارنے کو تری رہ گزر کے ساتھ
گھر سے نکل پڑا ہوں میں دیوار و در کے ساتھ
دستک نے ایسا حشر اٹھایا کہ دیر تک
لرزاں رہا ہے جسم بھی زنجیر در کے ساتھ
کشکول تھامتے ہیں کف اعتبار سے
کرتے ہیں ہم گداگری لیکن ہنر کے ساتھ
اب کس طرح یہ ٹوکری سر پہ اٹھاؤں میں
سورج پڑا ہوا ہے مرے بام و در کے ساتھ
سورج اسی طرح ہے یہ مہتاب اسی طرح
ڈھلتے رہے ہیں یار ہی شام و سحر کے ساتھ
یوں ہے مری اڑان پہ بھاری مرا وجود
جیسے زمیں بندھی ہو مرے بال و پر کے ساتھ
تابشؔ مجھے سفر کی روایت کا پاس تھا
سو میں بھی رہ بنا کے چلا رہ گزر کے ساتھ
پس غبار مدد مانگتے ہیں پانی سے
یہ لوگ تنگ ہیں مٹی کی حکمرانی سے
یہ ہاتھ سوکھ کے جھڑنے کو ہو گئے لیکن
میں دست کش نہ ہوا تیری مہربانی سے
پھر اس کے بعد پھلوں میں مٹھاس آئی نہیں
شجر نے کام لیا تھا غلط بیانی سے
کسی جزیرے پہ شاید کھلا یہ باغ کوئی
مہک گلاب کی آتی ہے بہتے پانی سے
میں تیرے وصل کا لمحہ بچا سکوں شاید
مرا تعلق خاطر ہے رائیگانی سے
نواح شہر میں پھیلی ہے موت کی خوشبو
مگر یہ لوگ کہ لگتے ہیں جاودانی سے
ترے وصال کے موسم میں استوار ہوا
کوئی عجب سا تعلق جہان فانی سے
تو مل گیا ہے تو اچھا ہوا وگرنہ دوست
کسے غرض تھی محبت میں کامرانی سے
پہنچ چکے ہیں محبت میں اس جگہ ہم لوگ
جہاں یقیں نہیں آتا یقیں دہانی سے
چراغ صبح جلا کوئی نا شناسی میں
اک اور دن کا اضافہ ہوا اداسی میں
تری نظر کے اشاروں پہ آئنہ نہ ہوا
یہ دل کی طاق بہت تھا سخن شناسی میں
دکھائی دے نہ مجھے دہشت جمال کے ساتھ
نشاط عشق نہ کھو جائے بد حواسی میں
جنوں رہین قبا ہو تو اس سے پوچھوں بھی
کے کتنا لطف میسر تھا بے لباسی میں
نہ روز ابر سیہ تھا نہ ماہتاب کی رات
گلاس ٹوٹ گیا کیسی بد حواسی میں
دل دکھوں کے حصار میں آیا
جبر کب اختیار میں آیا
دے اسے بھی فروغ حسن کی بھیک
دل بھی لگ کر قطار میں آیا
خوب ہے یہ اکائی بھی لیکن
جو مزہ انتشار میں آیا
دیکھتا ہے نہ پوچھنا ہے کوئی
اجنبی کس دیار میں آیا
یہ تو جانیں مقدروں والے
کون کس کے مدار میں آیا
شاخ پر ایک پھول بھی تابشؔ
مجھ سے ملنے بہار میں آیا
چشم نم دیدہ سہی خطۂ شاداب مرا
رات کی رات مہکتا ہے گل خواب مرا
اب تہی رخت بھی ہو کر میں تہی رخت نہیں
خواہش بادیہ پیمائی ہے اسباب مرا
ثبت کر اور کوئی مہر مرے ہونٹوں پر
قفل ابجد سے نہیں بند ہوا باب مرا
ساحل چشم پہ کپڑوں کو سکھانے والے
تو نے کب پار کیا تھا دل پایاب مرا
نام میرا تو کیا اس نے قلم زد لیکن
دفتر عشق سے خارج نہ ہوا باب مرا
جس قدر آئی فراخی مرے دل میں تابشؔ
اتنا ہی تنگ ہوا حلقۂ احباب مرا
مہ رخ جو گھروں سے کبھی باہر نکل آئے
پس منظر شب سے کئی منظر نکل آئے
تم اپنی زبانوں سے اسے چاٹتے رہنا
کیا جانیے دیوار میں کب در نکل آئے
کیا ان کو ڈبوئے کسی دریا کی روانی
یہ شہر تو کوزے کے سمندر نکل آئے
دن بھر تو رہے مہر جہاں تاب کی صورت
جب رات پڑی بھیس بدل کر نکل آئے
آئے ہیں اگرچہ کئی چہروں سے الجھ کر
لگتا ہے کہ ہم آنکھ بچا کر نکل آئے
آواز تو دو پرتو مہتاب کو تابشؔ
ممکن ہے وہ تالاب سے باہر نکل آئے
طلسم خواب سے میرا بدن پتھر نہیں ہوتا
مری جب آنکھ کھلتی ہے میں بستر پر نہیں ہوتا
مزید شاعری پڑھیے اور دوسرے شعراء کو دریافت کیجیے۔