مکمل شاعری
دیکھا ہوا راستہ یہ میرا
دشوار گزار کیوں ہوا ہے
چھوڑا تھا جو کام دل نے اس پر
پھر سے تیار کیوں ہوا ہے
پیدا یہ غبار کیوں ہوا ہے
اور آخری بار کیوں ہوا ہے
سب کچھ تبدیل ہوتے ہوتے
شبنم سے شرار کیوں ہوا ہے
پہلے تو نہیں تھا یہ طریقہ
مجمع یہ قطار کیوں ہوا ہے
گھیرے میں لیے ہوئے ہوں خود کو
ہر سو یہ حصار کیوں ہوا ہے
میں کب سے کھڑا ہوں اس کنارے
دریا مرے پار کیوں ہوا ہے
آبا تو ظفرؔ نہیں تھے ایسے
پھر شعر شعار کیوں ہوا ہے
جو پانو پکڑ رہا تھا پہلے
اب سر پہ سوار کیوں ہوا ہے
— ظفر اقبال