مکمل شاعری

ایسی کوئی درپیش ہوا آئی ہمارے

جو ساتھ ہی پتے بھی اڑا لائی ہمارے

دیکھا ہے بہت خواب ملاقات بھی ہر روز

حصے میں جو اب آئی ہے تنہائی ہمارے

وہ ابر کہ چھایا رہا آنکھوں کے افق پر

وہ برق جو اندر کہیں لہرائی ہمارے

تھے ہی نہیں موجود تو کیوں خلق نے اس کی

چاروں طرف افواہ سی پھیلائی ہمارے

پھر جھوٹ کی اس میں ہمیں کرنی ہے ملاوٹ

پھر راس نہیں آئے گی سچائی ہمارے

اس بار ملی ہے جو نتیجے میں برائی

کام آئی ہے اپنی کوئی اچھائی ہمارے

ڈرتے ہوئے کھولا تو ہے یہ باب تعارف

پڑ جائے گلے ہی نہ شناسائی ہمارے

چل بھی دیے دکھلا کے تماشا تو ظفرؔ ہم

بیٹھے رہے تا دیر تماشائی ہمارے

دعویٰ تو بہت رمز شناسی کا اسے تھا

یہ خلق اشارے نہ سمجھ پائی ہمارے

— ظفر اقبال