مکمل شاعری

لیں گے حساب مجھ سے ابھی لفظ لفظ کا

یعنی ذرا یہ انجمن آرائی ختم ہو

حد ہو چکی ہے شرم شکیبائی ختم ہو

بہتر ہے اب دعا کی پذیرائی ختم ہو

دیکھا ہے اس نواح میں وہ کچھ کہ اے خدا

اب تو یہی دکھا کہ یہ بینائی ختم ہو

ہے دود خاک دار بہت پاک ہو ہوا

پانی ہے زیر بار بہت کائی ختم ہو

ممکن ہے منتظر ہو کوئی خاک خوش خصال

شاید کہیں یہ ساحل رسوائی ختم ہو

خوش رنگ میں گھلا ہوا بد رنگ ہو جدا

اور شور میں چھپی ہوئی تنہائی ختم ہو

آکر وہ میری بات سنے اور جواب دے

گر یوں نہیں تو پھر یہ شناسائی ختم ہو

بازار بوسہ تیز سے ہے تیز تر ظفرؔ

امید تو نہیں کہ یہ مہنگائی ختم ہو

اپنے مقابل آپ ہی آ جاؤں گا کبھی

تنگ آ چکا ہوں اب مری یکتائی ختم ہو

— ظفر اقبال