مکمل شاعری
کرے گا کیوں نہ مرے بعد حسرتوں کا شمار
ترا بھی حصہ ان املاک سے نکلتا ہے
وہی مرے خس و خاشاک سے نکلتا ہے
جو رنگ سا تری پوشاک سے نکلتا ہے
اتارتا ہے مجھے نیند کے نیستاں میں
ابھی وہ خواب رگ تاک سے نکلتا ہے
یہ معجزے سے کوئی کم نہیں ظفرؔ اپنا
جو کام اس بت چالاک سے نکلتا ہے
فصیل فہم کے اندر بھی کچھ نہیں موجود
نہ کوئی خیمۂ ادراک سے نکلتا ہے
ہوا کے ساتھ جو اک بوسہ بھیجتا ہوں کبھی
تو شعلہ اس بدن پاک سے نکلتا ہے
ملے اگر نہ کہیں بھی وہ بے لباس بدن
تو میرے دیدۂ نمناک سے نکلتا ہے
دھوئیں کی طرح سے اک پھول میرے ہونے کا
کبھی زمیں کبھی افلاک سے نکلتا ہے
مرے سوا بھی کوئی ہے جو میرے ہوتے ہوئے
بدل بدل کے مری خاک سے نکلتا ہے
— ظفر اقبال