مکمل شاعری

کس سمت لیے جاتے ہو اور کیا ہے ارادہ

پوچھا نہ کبھی اپنے عناں گیر سے ہم نے

تخریب تو کرتے رہے سو طرح کی لیکن

یہ کام کیا جذبۂ تعمیر سے ہم نے

دل پر کوئی قابو نہ رہا جب تو کسی طور

باندھا ہے یہ وحشی تری زنجیر سے ہم نے

بہتر ہے کہ اب کام کوئی اور کیا کر

یہ بھی نہ کہا کاتب تقدیر سے ہم نے

ہر بار مدد کے لیے اوروں کو پکارا

یا کام لیا نعرۂ تکبیر سے ہم نے

اپنی ہی کرامات دکھاتے رہے سب کو

سرقہ نہ کیا معجزۂ میرؔ سے ہم نے

رہ رہ کے زبانی کبھی تحریر سے ہم نے

قائل کیا اس کو اسی تدبیر سے ہم نے

وہ بام تماشا ہوا غائب تو ظفرؔ آج

لٹکا لیا خود کو کسی شہتیر سے ہم نے

اب دیکھیے کیا اس کا نکلتا ہے نتیجہ

ماتھا ہے لگایا ہوا تاثیر سے ہم نے

— ظفر اقبال