مکمل شاعری
کشتی ہوس ہواؤں کے رخ پر اتار دے
کھوئے ہوؤں سے مل یہ دلدر اتار دے
بے سمت کی اڑان ہے شوخی شباب کی
اس چھت پہ آج تو یہ کبوتر اتار دے
چہرے سے جھاڑ پچھلے برس کی کدورتیں
دیوار سے پرانا کلنڈر اتار دے
دن رات یوں نہ خوف کا گٹھر اٹھائے پھر
یہ بوجھ اپنے سر سے جھٹک کر اتار دے
تو خود تو سات پردوں میں مستور ہے ظفرؔ
ملبوس تیرے آگے وہ کیونکر اتار دے
لوگوں کے ساتھ میری لڑائی ہے آج کل
بہتر ہے مجھ کو شہر سے باہر اتار دے
اس کی ہی آب و تاب سے روشن ہو ریگ دل
یہ تیغ میرے سینے کے اندر اتار دے
میں اتنا بد معاش نہیں یعنی کھل کے بیٹھ
چبھنے لگی ہے دھوپ سوئیٹر اتار دے
یہ بات ظرف کی نہیں ہے ماوراے ظرف
چاہے تو اس کنویں میں سمندر اتار دے
— ظفر اقبال