مکمل شاعری

چمکتی وسعتوں میں جو گل صحرا کھلا ہے

کوئی کہہ دے اگر پہلے کبھی ایسا کھلا ہے

لہو میں اک الگ انداز سے مستور تھا وہ

سر شاخ تماشا اور بھی تنہا کھلا ہے

کبھی دل پر گری تھی شبنم اسم محمد

مری ہر سانس میں کلیوں کا مجموعہ کھلا ہے

کہاں خاک مدینہ اور کہاں خاکستر دل

کہاں کا پھول تھا لیکن کہاں پر آ کھلا ہے

ازل سے گلشن ہستی میں ہے موجود بھی وہ

مگر لگتا ہے جیسے آج ہی تازہ کھلا ہے

بہم کیسے ہوئے ہیں دیکھنا خواب اور خوشبو

گزرتے موسموں کا آخری تحفہ کھلا ہے

یہیں تک لائی ہے یہ زندگی بھر کی مسافت

لب دریا ہوں میں اور وہ پس دریا کھلا ہے

یہی روزن بنے گا ایک دن دیوار جاں میں

مرے دل میں ندامت کا جو اک لمحہ کھلا ہے

بکھرتا جا رہا ہے دور تک رنگ جدائی

ظفرؔ کیا پوچھتے ہو زخم دل کیسا کھلا ہے

— ظفر اقبال