مکمل شاعری
چھوڑ جائیں جو تمہارے سبھی ہوتے سوتے
اور کبھی ساتھ ہمارے تمہیں چلنا پڑ جائے
دور سے دیکھ کے ہم جس کو ڈرا کرتے ہیں
کیا مزہ ہو جو اسی آگ میں جلنا پڑ جائے
دل کی یہ آب و ہوا اتنی مخالف ہے اگر
اور انہی موسموں میں پھولنا پھلنا پڑ جائے
اتنا ٹھہرا ہوا ماحول بدلنا پڑ جائے
باہر اپنے ہی کناروں سے اچھلنا پڑ جائے
کیا خبر جس کا یہاں اتنا اڑاتے ہیں مذاق
خود ہمیں بھی کبھی اس رنگ میں ڈھلنا پڑ جائے
اتنا مانوس بھی ہونے کی ضرورت کیا تھی
کبھی اس خواب سے ممکن ہے نکلنا پڑ جائے
کون کہہ سکتا ہے بدلے ہوئے آثار کے ساتھ
دیکھا دیکھی ہی طبیعت کو سنبھلنا پڑ جائے
شعلہ مجبور ہو دریا پہ مچلنے کو ظفرؔ
کسی دن دشت سے چشمے کو ابلنا پڑ جائے
اعتبار ایک دفعہ اور بھی کرتے ہوئے پھر
انہیں وعدوں کے کھلونوں سے بہلنا پڑ جائے
— ظفر اقبال