مکمل شاعری
گرنے کی طرح کا نہ سنبھلنے کی طرح کا
سارا وہ سفر خواب میں چلنے کی طرح کا
اک چاند ابھرنے کی طرح کا مرے باہر
سورج مرے اندر کوئی ڈھلنے کی طرح کا
بارش کی بہت تیز ہوا میں کہیں مجھ کو
درپیش تھا اک مرحلہ جلنے کی طرح کا
ایسا ہے کہ رہتا ہے سدا ساتھ بھی اس کے
منظر کوئی پوشاک بدلنے کی طرح کا
کیسی یہ خزاں چھائی ہے مجھ میں کہ سراسر
موسم ہے وہی پھولنے پھلنے کی طرح کا
میں تو یہی سمجھا ظفرؔ اس بار بھی شاید
مجھ پر یہ برا وقت ہے ٹلنے کی طرح کا
کیا دل کا بھروسا ہے کہ اس آب و ہوا میں
ویسے ہی یہ پودا نہیں پلنے کی طرح کا
اڑتی ہوئی سی ریت وہی دشت میں ہر سو
پانی وہی دریا میں اچھلنے کی طرح کا
معلوم بھی تھا مجھ کو مگر بھول چکا ہوں
رستہ کوئی جنگل سے نکلنے کی طرح کا
— ظفر اقبال