مکمل شاعری

شب وصال ترے دل کے ساتھ لگ کر بھی

مری لٹی ہوئی دنیا تجھے پکارتی ہے

شمار شوق میں الجھی ہوئی شعاع نظر

ہزار روٹھتے رنگوں کے روپ دھارتی ہے

جہاں نگار سحر پیرہن اتارتی ہے

وہیں پہ رات ستاروں کا کھیل ہارتی ہے

افق سے پھوٹتے مہتاب کی مہک جیسے

سکون بحر میں اک لہر سی ابھارتی ہے

در امید سے ہو کر نکلنے لگتا ہوں

تو یاس روزن زنداں سے آنکھ مارتی ہے

جہاں سے کچھ نہ ملے حسن معذرت کے سوا

یہ آرزو اسی چوکھٹ پہ شب گزارتی ہے

پس دریچۂ دل یاد بوئے جوئے نشاط

نہ جانے کب سے کھڑی کاکلیں سنوارتی ہے

جو ایک جسم جلاتی ہے برق ابر خیال

تو لاکھ زنگ زندہ آئنے نکھارتی ہے

— ظفر اقبال