مکمل شاعری

خاک اڑتی ہے تو ہر سو مرے اندر ورنہ

جس طرف میں ہوں وہاں چاروں طرف پانی ہے

اس کنارے پہ فقط میں ہوں اکیلا خالی

نہر کے دوسری جانب مری حیرانی ہے

جو سیہ فام ہے اندر کی طرف سے جتنا

اس کے چہرے پہ یہاں اتنی ہی تابانی ہے

کفر سے یہ جو منور مری پیشانی ہے

ظاہر اس سے بھی مرا جذبۂ ایمانی ہے

یہ جو یکسوئی میسر ہے مجھے شام و سحر

سر بسر میرے لیے وجہ پریشانی ہے

دل میں کیا صورت حالات ہے کھلتا نہیں کچھ

کیا کمی ہے یہاں کس شے کی فراوانی ہے

موسموں سے ابھی مایوس نہیں ہوں یکسر

اک ہوا ہے جو ابھی میری طرف آنی ہے

یہ عجب طرح کا بازار سخن ہے کہ جہاں

میں ہی نایاب ہوں اور میری ہی ارزانی ہے

آزمائش میں ہی رکھتا ہوں سدا خود کو ظفرؔ

میری مشکل ہی سراسر مری آسانی ہے

— ظفر اقبال