مکمل شاعری
ایک ہلچل سی مچی رہتی ہے دل میں ہر گھڑی
ساتھ ہیں پیارے ہمارے ہم نہیں پیاروں کے ساتھ
آ رہی ہے ان کی خو بو اپنے اندر بھی کہیں
ہیں رعایا ہی مگر رہتے ہیں سرداروں کے ساتھ
دور سے تو فرق ہی کوئی نظر آتا نہیں
اس طرح رل مل گئے ہیں پھول انگاروں کے ساتھ
رفتہ رفتہ لگ چکے تھے ہم بھی دیواروں کے ساتھ
حشر اپنا بھی یہی تھا ہم بھی تھے ساروں کے ساتھ
لگ گئی تھی موت کی اپنی بھی چھوٹی سی خبر
آخر اپنا بھی تعلق تھا ان اخباروں کے ساتھ
ہو گئی ہے شکل ہی تبدیل درباروں کی اب
ورنہ ہم بھی کم نہیں وابستہ درباروں کے ساتھ
فرض کچھ پگڑی بچانا بھی ہے لیکن ایک دن
دیکھنا سر بھی چلے آئیں گے دستاروں کے ساتھ
پڑ گئے تھے رائیگاں پہچان کے چکر میں ہم
اپنی مرضی سے جو ہم اڑتے نہیں ڈاروں کے ساتھ
بے تعلق بھی ہے وہ ہم نے بھی ہے اب تک ظفرؔ
رابطہ جوڑا ہوا ٹوٹے ہوئے تاروں کے ساتھ
— ظفر اقبال