مکمل شاعری

کھڑکیاں کس طرح کی ہیں اور در کیسا ہے وہ

سوچتا ہوں جس میں وہ رہتا ہے گھر کیسا ہے وہ

اک نظر میں ہی نظر آ جائے گا وہ سر بسر

پھر بھی اس کو دیکھنا بار دگر کیسا ہے وہ

کون سی رنگت کے ہیں اس کے زمین و آسماں

چھاؤں ہے جس کی یہاں تک بھی شجر کیسا ہے وہ

اس کا ہونا ہی بہت ہے وہ کہیں ہے تو سہی

کیا سروکار اس سے ہے مجھ کو ظفرؔ کیسا ہے وہ

میں تو اس کے ایک اک لمحے کا رکھتا ہوں شمار

اور میرے حال دل سے بے خبر کیسا ہے وہ

کیسی وہ آب و ہوا ہے جس میں وہ لیتا ہے سانس

آتا جاتا ہے وہ جس پر رہ گزر کیسا ہے وہ

— ظفر اقبال