مکمل شاعری

وہی تکرار ہے اور ایک وہی یکسانی

اس شب و روز میں اب اپنا گزارہ کم ہے

میں زیادہ ہوں بہت اس کے لیے اب تک بھی

اور میرے لیے وہ سارے کا سارا کم ہے

اس کی اپنی بھی توجہ نہیں مجھ پر کوئی خاص

اور میں نے بھی ابھی اس کو پکارا کم ہے

ایک ہی بار نہیں ہے وہ دوبارہ کم ہے

میں وہ دریا ہوں جسے اپنا کنارہ کم ہے

میرے دن رات میں کرنا نہیں اب اس کو شمار

حصۂ عمر کوئی میں نے گزارا کم ہے

میں تو رکھتا ہوں بہت روز کے روز ان کا حساب

آسماں پر کوئی آج ایک ستارہ کم ہے

آج پانی جو اچھلتا نہیں پہلے کی طرح

ایسا لگتا ہے کہ اس میں کوئی دھارا کم ہے

ہاتھ پیر آپ ہی میں مار رہا ہوں فی الحال

ڈوبتے کو ابھی تنکے کا سہارا کم ہے

پیش رفت اور ابھی ممکن بھی نہیں ہے کہ ظفرؔ

ابھی اس شوخ پہ کچھ زور ہمارا کم ہے

— ظفر اقبال