مکمل شاعری

شیر آ کے چیر پھاڑ گیا مجھ کو خواب میں

دم بھر کو میری آنکھ لگی تھی مچان پر

بجلی گری ہے کل کسی اجڑے مکان پر

رونے لگوں کہ ہنس پڑوں اس داستان پر

پیاسی ہے روح جسم شرابور ہے تو کیا

بیکار مینہ برستا رہا سائبان پر

اک نقش سا نکھرتا رہے گا نگاہ میں

اک حرف سا لرزتا رہے گا زبان پر

خالی پڑی ہیں بید کی بیمار کرسیاں

خوں خواب دھوپ دھند برستی ہے لان پر

پیلی ہوا میں خون کا ذرہ اڑا ہی تھا

پاگل ہوا یہ شہر ذرا سے نشان پر

اپنے لیے ہی آنکھ کا پردہ ہوں رات دن

میں ورنہ آشکار ہوں سارے جہان پر

کس تازہ معرکے پہ گیا آج پھر ظفرؔ

تلوار طاق میں ہے نہ گھوڑا ہے تھان پر

وہ قہر تھا کہ رات کا پتھر پگھل پڑا

کیا آتشیں گلاب کھلا آسمان پر

— ظفر اقبال