مکمل شاعری
کبھی یہ شوق نامانوس ہوگا
کبھی وہ شکل انجانی رہے گی
چلو اتنی تو آسانی رہے گی
ملیں گے اور پریشانی رہے گی
اسی سے رونق دریائے دل ہے
یہی اک لہر طوفانی رہے گی
ابھی دل کی سیاہی زور پر ہے
ابھی چہرے پہ تابانی رہے گی
سنوگے لفظ میں بھی پھڑپھڑاہٹ
لہو میں بھی پرافشانی رہے گی
سبک سر ہو کے جینا ہے کوئی دن
ابھی کچھ دن گراں جانی رہے گی
ظفرؔ میں شہر میں آ تو گیا ہوں
مری خصلت بیابانی رہے گی
ہماری گرم گفتاری کے باوصف
ہوا اتنی ہی برفانی رہے گی
نکل جائے گی صورت آئنے سے
ہمارے گھر میں حیرانی رہے گی
— ظفر اقبال