مکمل شاعری
نہ کوئی بات کہنی ہے نہ کوئی کام کرنا ہے
اور اس کے بعد کافی دیر تک آرام کرنا ہے
بہت بے سود ہے لیکن ابھی کچھ اور دن مجھ کو
سواد صبح میں رہ کر شمار شام کرنا ہے
اس آغاز محبت ہی میں پورے ہو گئے ہم تو
اسے اب اور کیا شرمندۂ انجام کرنا ہے
بدی کے طور پر کرنی ہے نیکی بھی محبت میں
کہ جو بھی کام کرنا ہے وہ بے ہنگام کرنا ہے
کوئی بدلہ چکانا ہے وفا کے نام پر اس سے
مسافت کے لیے اٹھنا ہے اور بسرام کرنا ہے
ابھی تو کار خیر اتنا پڑا ہے سامنے میرے
ابھی تو میں نے ہر خاص آدمی کو عام کرنا ہے
اک آغاز سفر ہے اے ظفرؔ یہ پختہ کاری بھی
ابھی تو میں نے اپنی پختگی کو خام کرنا ہے
نشاں دینا ہے میں نے کچھ غبار آلود سمتوں کا
کوئی کافی پرانا راز طشت از بام کرنا ہے
کمائی عمر بھر کی ہے یہی اک جائداد اپنی
سو یہ خواب تماشا اب کسی کے نام کرنا ہے
— ظفر اقبال