مکمل شاعری

خواب در خواب چلا کرتا ہے آنکھوں میں جو شخص

ڈھونڈنے نکلیں اسے اور کہیں رہتا ہی نہ ہو

چمک اٹھا ہو ابھی روئے بیاباں اک دم

اور یہ نظارہ کسی اور نے دیکھا ہی نہ ہو

مسئلہ اتنا بھی آسان نہیں ہے کہ ظفرؔ

اپنے نزدیک جو سیدھا ہے وہ الٹا ہی نہ ہو

کیفیت ہی کوئی پانی نے بدل لی ہو کہیں

ہم جسے دشت سمجھتے ہیں وہ دریا ہی نہ ہو

وہ کوئی اور ہو جو ساتھ کسی اور کے ہے

اصل میں تو وہ ابھی لوٹ کے آیا ہی نہ ہو

یہ بھی ممکن ہے کہ آنکھیں ہوں تماشا ہی نہ ہو

راس آنے لگے ہم کو تو یہ دنیا ہی نہ ہو

کہیں نکلے کوئی اندازہ ہمارا بھی غلط

جانتے ہیں اسے جیسا کہیں ویسا ہی نہ ہو

ہو کسی طرح سے مخصوص ہمارے ہی لیے

یعنی جتنا نظر آتا ہے وہ اتنا ہی نہ ہو

ٹکٹکی باندھ کے میں دیکھ رہا ہوں جس کو

یہ بھی ہو سکتا ہے وہ سامنے بیٹھا ہی نہ ہو

— ظفر اقبال