مکمل شاعری

بہت جبین و رخ و لب بہت قد و گیسو

طلب ہے شرط سکوں کے ہزار ہا پہلو

ہزار دشت بلا حلقۂ اثر میں ہیں

مرا جنوں ہے کہ چشم غزال کا جادو

جو بے خودی ہے سلامت تو مل ہی جائے گا

برائے فرصت اندیشہ یار کا زانو

صبا ہزار کرے بوئے گل کی آمیزش

نہ دب سکے گی ترے جسم ناز کی خوشبو

اک اضطراب‌ حسیں ہے فشار تنگیٔ مے

کنار‌ شوق میں تو ہے کہ دام میں آہو

یہ راز کھول دیا تیری کم نگاہی نے

سکوں کی ایک نظر درد کے بہت پہلو

جنوں اور اہل جنوں کا وہ قحط ہے تابشؔ

اٹھا نہ دشت سے پھر کوئی نعرۂ یاہو

بہت ہے اہل بصیرت کو ایک جلوہ بھی

وفور‌ تشنہ لبی ہو اگر تو خم ہے سبو

— تابش دہلوی