مکمل شاعری

بند غم مشکل سے مشکل تر کھلا

ہم سے جب کوئی پری پیکر کھلا

دیکھنے میں وہ نگاہ لطف تھی

کس سے پوچھیں زخم دل کیوں کر کھلا

میری وحشت نے نکالے جب سے پاؤں

ایک صحرا صحن کے اندر کھلا

مل گئی وحشی کو سودا سے نجات

در کھلا دیوار میں یا سر کھلا

نو امیدی سے بندھی تابشؔ امید

ابر غم دل پر بہت گھر کر کھلا

کوئی جادہ ہے نہ منزل ہے کوئی

سب فریب راہی و رہبر کھلا

یہ زلیخائی! کہ یوسف کے لئے

مصر کا بازار ہے گھر گھر کھلا

ہے قیامت اس کی مژگاں کا خیال

رکھ دیا ہے دل میں اک نشتر کھلا

جاں ستانی کے نئے انداز ہیں

ہاتھ میں غمزے کے ہے خنجر کھلا

— تابش دہلوی