مکمل شاعری
سوز پرور نگاہ رکھتے ہیں
ہم نظر میں بھی آہ رکھتے ہیں
اس ہجوم تجلیات میں ہم
حسرت یک نگاہ رکھتے ہیں
یہ تعلق جہاں سے کافی ہے
آپ سے رسم و راہ رکھتے ہیں
ہم حجابات سے نہیں مایوس
جلوہ پیش نگاہ رکھتے ہیں
بخش دے گا وہ بخشنے والا
بس یہ عذر گناہ رکھتے ہیں
کوئی عالم ہو حضرت تابشؔ
کج ہمیشہ کلاہ رکھتے ہیں
غم وسیلہ ہے اور تو مقصود
ہم یہ منزل یہ راہ رکھتے ہیں
ایک جلوہ دکھا نہیں سکتے
وہ جو اک جلوہ گاہ رکھتے ہیں
— تابش دہلوی