مکمل شاعری

ایک جلوہ بصد انداز نظر دیکھ لیا

تجھ کو ہی دیکھا کئے تجھ کو اگر دیکھ لیا

باز ہے آج تلک دیدۂ حیراں کی طرح

دشت وحشت نے کسے خاک بسر دیکھ لیا

جیسے سر پھوڑ کے مل جائے گی زنداں سے نجات

کیا جنوں نے کوئی دیوار میں در دیکھ لیا

صورت نقش قدم دیدۂ مشتاق ہیں ہم

جب بھی وہ آیا سر راہ گزر دیکھ لیا

کہیں پردہ ہے تجلی کہیں جلوہ ہے حجاب

یہ تماشا بھی ترا ذوق نظر دیکھ لیا

جرم نظارہ کی پاتا ہے سزا دل اب تک

اہل دل دیکھ لیا اہل نظر دیکھ لیا

روز اک تازہ غم دہر ہے نازل تابشؔ

ایک طوفان بلا نے مرا گھر دیکھ لیا

یہی حسرت ہے کہ وہ ایک نظر دیکھ تو لے

اور اس نے کبھی اس سمت اگر دیکھ لیا

— تابش دہلوی