مکمل شاعری

ہوتا ہے فاش گریۂ پیہم سے راز عشق

اے شمع راز داریٔ پروانہ چاہئے

ذوق عبودیت ہے تعین سے بے نیاز

ہم صورت جبیں در جانانہ چاہئے

پابندیٔ حدود سے بیگانہ چاہئے

داماں بقدر وحشت‌ دیوانہ چاہئے

بزم نیاز عشق میں ہوں آشنائے ہوش

بے پردہ آج پھر رخ جانانہ چاہئے

تابشؔ غم حیات ہی وجہ نشاط ہے

ہر ایک داغ صورت پیمانہ چاہئے

اے ذوق عجز جلوہ گہہ یار ہے قریب

پائے طلب میں لغزش مستانہ چاہئے

— تابش دہلوی