مکمل شاعری
ہائے جانانہ کی مہماں داریاں
اور مجھ دل کی بدن آزاریاں
اپنے درباں کو سنبھالے رکھئے
ہیں ہوس کی اپنی عزت داریاں
ڈھا گئیں دل کو تری دہلیز پر
تیری قتالہ سرینی بھاریاں
تشنہ لب ہے کب سے دل سا شیر خوار
تیرے دودھوں سے ہیں چشمے جاریاں
اف شکن ہائے شکم جانم تری
کیا کٹاریں ہیں کٹاریں کاریاں
ہائے تیری چھاتیوں کا تن تناؤ
پھر تیری مجبوریاں ناچاریاں
خواب جو تعبیر کے بس کے نہ تھے
دوستوں نے ان پہ جانیں واریاں
دکھ غرور حشر کے جانا ہے کون
کس نے سمجھی حشر کی دشواریاں
ہیں سدھاری کون سے شہروں طرف
لڑکیاں وہ دل گلی کی ساریاں
خلوت مضراب ساز و ناز میں
چاہیے ہم کو تیری سسکاریاں
لفظ و معانی کا بہم کیوں ہے سخن
کس زمانے میں تھیں ان میں یاریاں
شوق کا اک داؤ بے شوقی بھی ہے
ہم ہیں اس کے حسن کے انکاریاں
یہ حرامی ہیں غریبوں کے رقیب
ہیں ملازم سب کے سب سرکاریاں
مجھ سے بد طوری نہ کر او شہر یار
میرے جوتوں کے ہے تلوے خاریاں
وہ جو ہیں جیتے انہوں نے بے طرح
جیتنے پر ہمتیں ہیں ہاریاں
کھا گئیں اس ظالم و مظلوم کو
میری مظلومی نما عیاریاں
تم سے جو کچھ بھی نہ کہہ پائیں میاں
آخرش کرتی وہ کیا بے چاریاں