مکمل شاعری

پڑھ رہا ہوں میں کاغذات وجود

اور نہیں اور ہاں کا دفتر ہے

نہ تو دل کا نہ جاں کا دفتر ہے

زندگی اک زیاں کا دفتر ہے

ہم میں سے کوئی تو کرے اصرار

کہ زمیں آسماں کا دفتر ہے

کوئی سوچے تو سوز کرب جاں

سارا دفتر گماں کا دفتر ہے

ہے جو بود و نبود کا دفتر

آخرش یہ کہاں کا دفتر ہے

وہ جو دفتر ہے آسمانی تر

وہ میاں جی یہاں کا دفتر ہے

جو حقیقت ہے دم بہ دم کی یاد

وہ تو اک داستاں کا دفتر ہے

ہو رہا ہے گزشتگاں کا حساب

اور آئندگاں کا دفتر ہے

ہجر تعطیل جسم و جاں ہے میاں

وصل جسم اور جاں کا دفتر ہے

— سید حسین جون اصغر